হিজ এক্সেলেন্সী, মিস্তর সাবা কোরোসী, য়ু.এন. জেনেরেল এসেমব্লীগী প্রেসিদেন্ত,
হিজ এক্সেলেন্সী, অমিনা মোহম্মদ, য়ূ.এন.গী দিপুতী সেক্রেতরী জেনেরেল,
হিজ এক্সেলেন্সী, ইরিক অদাম্স, নিউ য়োর্ককী মেয়র,
অমদি ঐগী নুংশিজরবা মালেম পুম্বগী মরূপশিং
খুরুমজরি!
মরূপশিং,
ঙসিগী য়াইফরবা অয়ুকসিদা, ঐখোয়না য়ুনাইতেদ নেসন্স অসিদা, মীওইবা খুন্নাই পুম্বগী উনফমসিদা, নিউ য়োর্ক্কী নীংথিরবা ময়োল্লমসিদা পুল্লরি। ময়াম মরক্তগী কয়া অমদি অরাপ্পা মফমশিংদগী লেঙবিরকপনি হায়বা ঐ খঙই। অদোম অয়াম্বনা নোং ঙানদ্রিঙৈদা হৌগৎলগা মফমসিদা য়ৌরক্নবা হোৎনবিরমগনি।
ময়ামবু উবদা ঐঙোন্দা নুংঙাইজবা অমা ফাওই, অমদি ঐনা ময়াম পুম্নমকপু লেঙবিরকপগীদমক থাগৎচরি।
মরূপশিং,
ঐঙোন্দা পাউদমবিরকপদা ঙসি মফমসিদা লৈবাক অয়াম্বদগী মীওইশিং তিল্লি হায়বিরকই। অদুগা য়োগ হায়বসিনা ঐখোয় পুম্নমকপু পুনশিন্ননবগী কয়াদা নীংথিরবা মরম অমা ওইরিবনো?
য়োগ হায়বগী ৱাহন্থোক্তি – পুনশিনবা হায়বনি। মরম অসিনা ময়াম্না পুন্না মফমসিদা লেঙবিরকপা অসিমকসু য়োগগী মওং অমনি। ঐ নীংশিংলি, চহি মাপনলোমগী মমাঙদা, মফমসিমক্তদা য়ু.এন.দা জুন ২১দা মালেমগী য়োগ নুমিৎ পাঙথোক্নবা ৱাফম হৌদোকচনবগী খুদোংচাবা ফংজখি।
মতমদুদা মালেম পুম্বনা ৱাখল্লোন অসিবু শৌগৎপিরকখিবা তশেংনমক অঙকপগী মশক্নি। ঐ হৌজিক্তা থৌনা ফরবা য়ু.এন. পীসকীপরশিংগী মফমদা ইকায়খুম্নবা উৎচরম্বনি। ইং ২০১৫দা, ঐনা মখোয়গী নীংশিং খুভম অমা য়ু.এন.দা শানবা ৱাফম অমা হৌদোকখি।
অদুগা মমাঙগী চয়োলদা, মালেম পুম্বনা ভারতকা খুৎশম্নদুনা হায়রিবা ৱাফম অসিবু অথুবদা থবক ওইনা ওন্থোক্নবা ফিরেপ লৌখি। খ্বায়দগী মশিং য়াম্বা লান্মী পীরিবা লৈবাক অমা ওইনা ঐখোয়না লৈবাক পুম্নমক্কী মফমদা হায়রিবা অফবা খোঙথাঙ অসিদা শরুক য়াদুনা শৌগৎপিবগীদমক তৌবিমল খঙবা উৎচরি।
মমাঙ চহিদা, ২০২৩বু মালেমগী চনানগী চহি হায়না পাঙথোক্নবা ভারতনা হৌদোকখিবা ৱাফমবু মালেম পুম্বনা শৌগৎপিরকখি। চনান অসি সুপরফুদনি। মখোয় চাবনা হকচাঙ ফহল্লি অমদি অকোয়বগী ফীভমসু ফহল্লি। অদুগা ঙসি, মালেম পুম্বনা য়োগগীদমক পুনশিন্নবা উবদা নুংঙাইবা ফাওই।
মরূপশিং,
য়োগ ভারত্তগী হৌখিবনি। অদুগা মসি য়াম্না লিরবা চৎনবীনি। অদুবু অরিবা ভারতকী চৎনবী অতৈগুম, মসিসু অহিংবা অমদি ইচঙ থৌবা চৎনবী অমনি। য়োগ অসি কোপীরাইত লৈতে, পেতেন্ত লৈতে, অমদি রোয়েলতী পেমেন্ত লৈতে। য়োগ চহি, নুপা-নুপী, অমদি হকচাঙগী ফীভমগী মতুং ইন্না শেমদোক শাদোকপা য়াই। য়োগ অসি পোর্তেবল ওই – অদোম্না মসি য়ুমদা, নৎত্রগা থবক মফমদা নৎত্রগা চত্থোক চৎশিন তৌবদা অদুমক তৌবা য়াই।
য়োগ অসি ফ্লেক্সিবল ওই – অদোম্না মসি ইতোমতা তৌবা য়াই, নৎত্রগা পুন্না তৌমিন্নবা য়াই, ওজা অমদগী তম্বা য়াই নৎত্রগা ইশানা তমজবসু য়াই। য়োগ অসি তশেংনমক মালেম পুম্বগীনি।
মরূপশিং,
ঐখোয়না য়োগ তৌবা মতমদা ঐখোয়দা হকচাঙ ফিৎ ওইবা, পুক্নিং ইংবা, অমদি ৱাখল নুংঙাইবা ফাওই। অদুবু মসি ফক অমদা শাজেল তৌবগী ৱাফম খক্তা নত্তে। য়োগ হায়বসি পুন্সিগী লম্বী অমনি। মসি হকচাঙ ফবা অমদি তিঞ্জং কায়জঙদনা লৈনবগী পুম্নমক শুপচিল্লবা লম্বী অমনি। ৱাখল অমদি থবকশিংদা পুক্নিং চঙনবগী লম্বী অমনি। ইশাগা, অতোপ্পগা, অমদি মহৌশাগা পুকচেল খোইচেল তিন্ননা লৈমিন্ননবগী লম্বী অমনি। ময়াম অমনা য়োগগী মশকশিং অসিবু সাইন্তিফিক ওইনা তাক্নবা হোৎনবদা ঐ নুংঙাইবা ফাওই। তশেংনমক মসি চঙশিনগদবা লম্বীদুনি।
মরূপশিং,
ময়াম পুম্নমক হৌবা পাম্লম্লগনি হায়বা ঐ খঙই! ঐহাকসুনি। ঐনা য়ুনাইতেদ নেসন্সপু ঙসি মফমসিদা ঐখোয়বু তিলহনবিবগীদমক থাগৎপা ফোঙদোকচরি। থৌরম অসি মায় পাকহন্নবা হোৎনববা মতেঙ অমদি ঙাক্লৌ পীবিরকখিবগীদমক মেয়র অমদি নিউ য়োর্ক ময়োল্লমগী লমসু তোনশিঞ্জরে। অদুগা ময়ামসিগী মথক্তা, ঐনা ঙসি মফমসিদা তিনবিরিবা পুম্নমকপু থাগৎচবা ফোঙদোকচরি। ঐখোয় ইশা ফনা অমদি নুংঙাইনা লৈনবগীখক নত্তনা ঐখোয় ইশাদা অমদি অতোপ্পদা থৌজালগী মতৌ উৎনবগীদমক য়োগগী মতিকপু শীজিন্নরসি।
ঐখোয়না য়োগগী মতিকপু মরূপ মপাং ওইবগী থোং, ইং তপ্পা মালেম অমা, অমদি হেন্না লু-নানবা, অশং অমান্না থনবা অমদি তুং কোইগদবা তুংলমচৎ অমা শেম্নবা শীজিন্নরসি। ঐখোয় পুম্নমক খুৎশম্নদুনা “মালেম অমা, ইমুং অমা, তুংলমচৎ অমা’ হায়রিবা পান্দম অসিবু ফংনবা চঙশিনমিন্নরসি। ঐ য়াইফ-পাউজেল অমগা লোয়ননা লোইশিনঞ্জগে:
সর্বে ভবন্তু সুখিনঃ
সর্বে সন্তু নিরাময়াঃ
মীপুম খুদিং নুংঙাইবা ওইরসনু, মীপুম খুদিং হকচাঙ ফনা লৈরসনু!
ময়ামবু থাগৎচরি!
ময়ামবু হন্না হন্না থাগৎচরি!
