প্রধান মন্ত্রী শ্রী নরেন্দ্র মোদীনা ঙসি ভিদিও পাউজেলগী খুত্থাঙদা মালেমগী য়োগ নুমিৎ ২০২৩ লৈবাক শিনবা থুংনা পাঙথোক্লিবসিদা ৱা ঙাঙখ্রে। ৯শুবা মালেমগী য়োগ নুমিৎ ২০২৩ লৈবাক্কী থাক্তা পাঙথোকপগী থৌরম ভারতকী উপ-রাস্ত্রপতী শ্রী জগদিপ ধনখরনা লুচিংদুনা মধ্য প্রদেশগী জবলপুরদা পাঙথোক্লি।
তিল্লিবা মীয়ামদা ৱা ঙাঙলদুনা, প্রধান মন্ত্রীনা মালেমগী য়োগ নুমিৎনা লাকপদা লৈবাক মীয়ামগী মফমদা য়াইফ-পাউজেল পীখি অমদি মহাক হৌজিক তোঙান তোঙানবা ফীভম্না মরম ওইরগা য়ুনাইতেদ স্তেতস ওফ অমেরিকাগী খোঙচত্তা লৈবনা, মমাঙদা মহাক মশামক য়াওখিবগুম্না য়াওবা ঙমদবনা মহাক্না ময়ামগী ভিদিও পাউজেলগী খুত্থাঙদা পাউ ফাওনরিবনি হায়বা ৱাফম থমখি।
মহাকসু য়ুনাইতেদ নেসন্স হেদক্বার্তরদা ভারতপু মতমদা নুমিদাংৱাইরম পুং ৫.৩০ রোম তাবা মতমদা য়োগগী থৌরম শরুক য়াগনি হায়রদুনা, “ভারতকী পাউজেলদা লৈবাক ১৮০ হেনবনা পুনশিল্লকপা অসি পুৱারী ওইরে অমদি অসুম্না ওইরক্কনি খল্লুদবা অমনি,” হায়না প্রধান মন্ত্রীনা পাউদমখি। ২০১৪দা য়ু.এন. জেনেরেল এসেমব্লীদা য়োগবু মালেমগী ইহৌ অমা ওইহন্নবা অমদি মালেমগী য়োগ নুমিৎকী খুত্থাঙদা মালেমগী ইহুল অমা ওইহন্নবা ৱাফম হৌদোকপদা রেকোর্দ ওইবা মওংদা লৈবাক কয়াগী ঙাক্লৌ ফংখিববু মহাক্না নৌহৌননা নীংশিংখি।
য়োগগী নুমিৎপু হেন্না অখন্নবা ওইহল্লিবা ‘ওসীন রিং ওফ য়োগ’ হায়বসিগী ৱাখল্লোন থম্লদুনা, প্রধান মন্ত্রীনা ৱাফম অসি য়োগগী ৱাখল্লোন অমদি সমুদ্রগী পাক চাউবা অনিগী মরক্তা লৈনরিবা মরীদা য়ুম্ফম ওইবনি হায়খি। শ্রী মোদীনা ঈশিংগী হৌরকফমশিং শীজিন্নদুনা ভারত লান্মীনা শেমখিবা ‘য়োগ ভারতমালা অমদি য়োগ সাগরমালা’ অনিগী মতাঙদসু ৱাফম কয়া থমখি। মতৌ অসুম্না, মালেমগী পোল অনি – আর্কতিক্তগী অন্তার্কতিকা ফাওবদা লৈরিবা ভারতকী থিজিন হুমজিনবগী মফম অনিসু য়োগগী খুত্থাঙদা শম্নরি হায়না প্রধান মন্ত্রীনা মখা তাখি। অসিগুম্লবা তোপ তোপ্পা থৌরম অসিদা লৈবাকসিগী অমদি মালেমগী মফম পুম্বদগী মীওই করোর কয়ানা হৌনরুবা তৌদনা শরুক য়ারিবসিনা য়োগগী পাক চাউবা অমদি মমিং চৎপা মতৌবু উৎলি হায়বা ৱাফমসু মহাক্না থমখি।
“ঐখোয়বু পুনশিল্লিবসি য়োগননি”, হায়না প্রধান মন্ত্রীনা লাইনিংবশিংগী ৱাহৈশিং পল্লদুনা ফোঙদোকখি। য়োগ শন্দোকপগী থৌওং অসি মালেম পুম্বসি ইমুং অমত্তনি হায়বা ৱাখল্লোন অসিগী মশানি হায়না মহাক্না মখা তাখি। চহি অসিদা ভারতনা থৌরম মপু ওইদুনা পাঙথোক্লিবা জি২০ মীফমগী ‘মালেম অমা, ইমুং অমা, তুংলমচৎ অমা’ থীম অসিবু পল্লদুনা, প্রধান মন্ত্রীনা য়োগ শন্দোকপা অসি ‘বসুদৈব কুতুম্বকম’গী ৱাখল্লোনবু শন্দোকপনি হায়খি। “ঙসি মালেম পুম্বদগী মীওই করোর কয়ানা ‘বসুদৈব কুতুম্বকমগীদমক য়োগ’ হায়বা হীরমসিদা পুন্না য়োগ শান্নমিন্নরি”, হায়না মহাক্না মখা তাখি।
য়োগগী মরমদা ইরম্বা লাইরিকশিংদা য়াওবা ৱাফমশিং পল্লদুনা, প্রধান মন্ত্রীনা য়োগগী খুত্থাঙদা মীওই অমনা মশা মউ ফবা, মতিং লৈবা অমদি মপাঙ্গল কনবা তানফংই অমদি হায়রিবা থৌওং অসি চাং নাইনা তৌবা মীওইশিংনা মসিগী মতিক অসি ফাউবা ঙমই হায়খি। লনাই অমদি ইমুংগী থাক্তা মশা মউ ফনা লৈবগী মরুওইবা ৱাফমশিং থম্লদুনা, প্রধান মন্ত্রীনা, য়োগনা অপুনবগী মতিক য়াম্না লৈহনবা মশা মউ ফবা অমদি মপাঙ্গল কনবা খুন্নাই অমা শেম্মি হায়খি। স্বছ্চ ভারত অমদি স্তার্তঅপ ইন্দিয়ানচিংবা কেম্পেনশিংনা মরোমদোম লেপচবা ঙম্বা লৈবাক অমা শেমগৎপদা অমদি লৈবাকসিগী নাৎকী শক্তম ঙাকপদা মতেং পাংলি অমদি লৈবাক অসিনা অমদি মাগী নহাশিংনা মতিক অসি শেমগৎপদা থৌদাং চাউনা লৌরি হায়না মহাক্না ফোঙদোকখি। “ঙসি লৈবাকসিগী ৱাখল্লোন্দা অহোংবা লাক্তুনা মীয়াম অমদি মখোয়গী পুন্সিদা অহোংবা পুরক্লি,” হায়না মহাক্না মখা তাখি।
প্রধান মন্ত্রীনা ভারতকী নাৎ অমদি খুন্নাসগী মওং মতৌ, মাগী লাইনিংলোন অমদি ফিদম, অমসুং মাগী ৱাংউলোন অমদি মীৎয়েঙনা মতম পুম্নমক্তা পুম্নমকপু পুনশিনবা, য়াশিন্নবা অমদি কোনশিনবগী চৎনবীবু মখোঙ শোমদুনা লাক্লি হায়খি। লৈবাকসিগী ইনাক খুল্লবা শিংথানরিবা খেন্নবগী শক্তমবু পল্লদুনা, ভারত মচাশিংনা অনৌবা ৱাখল্লোনশিংবু তরাম্না ওক্লি অমদি মখোয়বু য়োকখত্তুনা থম্মি হায়না শ্রী মোদীনা হায়খি। য়োগনা অসিগুম্বা ইহুলবু মপাঙ্গল হাপ্লি, নুংগী ওইবা মীৎয়েঙবু পাকথোক চাউথোকহল্লি, অমদি থৱায় পানবশিংগী অপুনবগী ইহুলবু ফাউহন্দুনা থৱায় পানবশিংবু নুংশিবগী য়ুম্ফম থোল্লিবা ৱাখল্লোন অদুগা মরী শম্নহল্লি হায়না মহাক্না হায়খি। মরম অসিনা, ঐখোয়না য়োগগী খুত্থাঙদা ঐখোয়গী খেন্নবা, অথিংবা অমদি অপনবশিংবু মাঙহনখিবা তাই হায়না প্রধান মন্ত্রীনা হায়খি। “ঐখোয়না ‘এক ভারত শ্রেস্থ ভারত’কী ৱাখল্লোনবু মালেমসিদা খুদম অমা ওইনা পুথোকপা তাই,” হায়না মহাক্না মখা তাখি।
মহাক্কী ৱারোল লোইশিল্লকপদা, প্রধান মন্ত্রীনা য়োগগী শ্লোক থীরদুনা থবক থৌওংদা হৈথোই শিংথোইবা হায়বসি য়োগনি হায়খি। হায়রিবা লাইৱা অসি অজাদী কা অমৃৎ মহোৎসব অসিদা মীপুম খুদিংমক্কী মফমদা য়াম্না মরুওই অমদি য়োগগী লমদা হৈথোই শিংথোইবা হায়বসি মীওই অদুনা মাগী মথৌদাংদা তশেংনা মপুং ফানা পুক্নিং লুপ্লবা মতমদা ফংবা ঙমই হায়না মহাক্না হায়খি। “য়োগগী খুত্থাঙদা, ঐখোয়না ইশাগী ওইজবা থিদবা থৌওং খংই, কর্মদগী কর্ময়োগগী লমখোঙচৎ ঐখোয়না লেপচৈ,” হায়রদুনা শ্রী মোদীনা য়োগ শান্নবনা ঐখোয়না ঐখোয়গী হকশেলগী ফীভম ফগৎহনবা ঙমগনি অমদি হায়রিবা ফিরেপ অসিবুসু ইশাদা চুশিলহনবা ঙমগনি হায়বগী থাজবা ফোঙদোকখি। “ঐখোয়গী হকচাঙগী পাঙ্গল, ঐখোয়গী পুক্নিং ৱাখল পাকথোক চাউথোকপনা চাওখৎপা ভারত অমগী য়ুম্ফম ওইগদৌরিবনি,” হায়বা ৱাফমগা লোয়ননা প্রধান মন্ত্রীগী ৱারোল লোইশিনখি।
