প্রধান মন্ত্রী শ্রী নরেন্দ্র মোদীনা ঙসি ভিদিও মেসেজ অমগী থোংদা গুজরাতকী বেচারজীদা নীংতম লান্মী শ্রী প্রহলাদজী পতেলগী ১১৫শুবা মপোক কুমওন অমসুং মহাক্কী পুন্সি ৱারী ফোঙবগী থৌরমদা ৱা ঙাংখ্রে। থৌরম অদুদা গুজরাতকী মুখ্য মন্ত্রী, শ্রী বুপেন্দ্রভাই পতেলসু শরুক য়াখি।
প্রধান মন্ত্রীনা বেচারজীগী মতিক-মঙাল লৈরবা লমদম অসিবু ইকাই খুম্নবা উৎখি অমসুং নীংতম লান্মী, সোসিএল ৱার্কর, শ্রী প্রহলাদজী পতেলবু নীংশিংদুনা মকোক নোন্না খুরুমখি। প্রধান মন্ত্রীনা শ্রী প্রহলাদজী পতেলনা সোসিএল সর্ভিসতা উৎখিবা পুকচেল চাউবা মতৌ অমসুং মহাক্না কত্থোকখিবা অদু থমখি। নীংতম লান্মী অসিনা মহাত্মা গান্ধীনা হায়রকপদগী নীংতম ইহৌদা শরুক য়াখি অমসুং সাবরমতী অমসুং য়রবদাদা কৈশুমশঙদা লৈখি।
প্রধান মন্ত্রীনা শ্রী প্রহলাদজী পেলদা য়াওরিবা ‘লৈবাক হান্না’ হায়বা ৱাখল্লোন অদু উৎলিবা থৌদোক্কী মতাংদা পাউতমখি। শ্রী পতেলগী মপা অসি মহাক্না কৈশুমশঙদা লৈরিঙৈ মতমদা লৈখিদে অদুবু মহাক্না মমাগী অরোইবা মথৌ মঙম পাঙথোকপা য়ানবা লোইলম লৈঙাকশিংনা মঙোন্দা লাল্লে হায়না হায়জৌ হায়দুনা কন্দিসনশিং থমখি অদু শ্রী প্রহলাদজী পতেলনা য়াখিদে। মহাক্না অন্দরগ্রাউন্দদা লান্থেংনখিবা নীংতম লান্মী কয়াবু শৌগৎখি। প্রধান মন্ত্রীনা নীংতম্বা ফংলবা মতুংদা নীংথৌ পানবা লৈবাকশিং পুনশিন্নবা শ্রী প্রহলাদজী পতেলনা সরদার পতেলগী মতেং পাংবদা লৌখিবা থৌদাং অদুসু থমখি। প্রধান মন্ত্রীনা অসিগুম্বা অথৌবা নীংতম লান্মীশিং অসি হিস্তরীগী লাইরিকশিংদা পন্দবা অসিদা নুংঙাইতবা ফোঙদোকখি। প্রধান মন্ত্রীনা শ্রী প্রহলাদজী পতেলগী লোইনবী কাশী বাদসু ইকাই খুম্নবা উৎখি। প্রধান মন্ত্রীনা মশক নাইবা মীওইশিংগী পুন্সি ৱারী অমসুং মখোয়না থবক তৌরম্বগী মওং-মতৌশিং দোক্যুমেন্তেসন তৌবা আসি য়াম্না মরু ওই মরমদি মসিনা হৌরক্লিবা মীরোলদা ইথিল পীরি হায়না ফোঙদোকখি।
প্রধান মন্ত্রীনা য়ুনিভর্সিতীশিংদা নীংতম লান্মীশিংগী মীয়াম্না খঙনদনা লৈরিবা হীরমশিংদা রিসর্চ তৌনবা অমসুং পব্লিশ তৌনবা অপীল তৌখ্রে। ঐখোয়না অনৌবা ভারত অমা শেমগৎপদা শ্রী প্রহলাদ পতেলগুম্বা নীংতম লান্মীশিংবু নীংশিংগদবনি হায়না প্রধান মন্ত্রীনা ফোঙদোকখ্রে।
