লাক্লো ঐখোয় পুম্নমক ‘অমুক্তং শিজিন্নবা প্লাস্তিক’ মুখৎনবা খুৎশম্নরসি মন কী বাত্তা প্রধান মন্ত্রী

ঐহাক্কী নুংশিজরবা ইরৈবাকচাশিং, খুরুমজরি। ঐখোয়গী লৈবাক অসিদা মফম খরদনা নোংজুগী নুংঙাইরবা মহাও লৌরি; অদুগা মফম খরদনা মখল কয়াগী কুম্মৈ ফিয়োং মদুনা দীৱালী ফাওবা চত্থগদৌরিবনি। তশেংনমক মসি ঐখোয়গী ইপা ইপুশিংনা রিতুগী খোংচৎ, শেল-থুমগী খোংচৎ অমদি মীয়ামগী পুন্সি মহিংবু অমত্তা কায়দনবা শেম শাবীরম্মি। মসিনা করিগুম্বা ফিভম অমত্তদা মীয়ামগী পুন্সি মহিংদা তপথবা ফাওহন্দে। ঙরাং হিন্দুস্তান পুম্বনা শ্রীকৃষ্ণগী পোকপগী কুম্মৈ পাংথোকখি, কয়াদা মতিক মঙাল চাউখ্রবা মপোক্নো। চহী লিশিং কয়াগী মতুংদা ফাওবা কুম্মৈ অসিদা অনৌ অনৌবা মহাও কয়া হাপতুনা অনৌবা থৌনাগা লোয়ননা পাংথোক্লি অদুগা চহী লিশিং কয়া লীরবা পুন্সি অসিদা ঙসিগী মীরোলগী পুন্সিদা লাক্লিবা খুদোংথীবা কয়া অসিবু ঙাকথোক্নবা পাম্বৈ অমা হায়রবদি শ্রীকৃষ্ণনি। মহাক্কী পুন্সিদগী হৌজিক মায়োক্নরিবা খুদোংচাদবশিং অসিগী পাম্বৈ থিবা য়াই। অসুক মতিক মঙাল লৈখ্রবা পুন্সি অসিনা করিগুম্বদা রাসতা ঙাওদুনা লৈ, করিগুম্বদনা শনবী শন শেনবশিংগী মরক্তা, করিগুম্বদনা শান্নদুনা বাঁসি খোংদুনা লৈ। শকওং য়াম্বা শক্লোন য়াম্বা মতিক মঙাল লৈরবা পুন্সি অসিনা মীওইবা সমাজকী মফমদা কত্থোক্লবা মীয়াম্বু ঙাক শেনবা অমগী শক্তমদা অনৌ অনৌবা মিংথোল কয়া ফংদুনা পুন্সি মহয় য়ানখি। মরূপ কদায়বু কৌবগে হায়বদু সুদামাগী থৌদোক্তগী খঙবা ঙমই কাওবা ঙমদে। অসিদা নত্তনা লানফমদা অসুক মতিক লৈখ্রবা অসিনা লানগী দোলাই থৌখি। অমুক্না নুঙজাও হেক থাংগৎলি, অমুক্না চাকলুক লা হেক থাংগৎলি, হায়বদি অনৌ অনৌবা থৌদোক কয়াদা শরুক য়াখি। মরম ময়াম অসিদগী ঙসি ঐনা মোহন অনিগী মরমদা ময়ামগী পুক্নিং চিংশিনজগে। অমনা সুদর্সন চক্র পায়বা মোহন অতোপ্পা অমনা তরেং পায়বা মোহন। সুদর্সন চক্র পায়বা মোহন্না জমুনা তোর্বান্দগী লাক্তুনা গুজরাতকী সমুদ্র মপান দ্বারিকা শহরদা পুন্সি লেনখি। অদুগা সমুদ্র মপান্দা পোকপা মোহন্না জমুনা তুরেল মপান্দা দিল্লীদা লাক্তুনা পুন্সিগী অরোইবা শোর হোনখি। সুদর্সন চক্র পায়বা মোহন্না মতমদুগী ফিভম, চহী লিশিং কয়াগী মমাংদসু খৎন চৈনবা লান তোক্নবগীদমক বুদ্ধী লৌশিং শিজিন্নদুনা মাগী মথৌদাং মাগী মতিক মঙাল অমদি ৱাখল্লোনবু শিজিন্নরদুনা অঙম্বা পাম্বৈ শিজিন্নখি। অদুগা তরেং পায়বা মোহন্না নীংখা তম্নবগীদমক, মীওইবগী হক কন্নবগীদমক পুন্সিগী মরুওইবা থৌরমশিংবু মতিক মঙাল নায়হন্নবগীদমক নীংতম্বগী লালোংবু অনৌবা মায়োন অমদা পুরকখি। মসিদা মালেম পুম্বনা ঙক্নখি, ঙসিসু ঙক্নরি। ওইজবা থিদবা থৌদাংগী মগুন লৌশিংগী মগুনবু ওইরবসু নত্রগা পুন্সিদা লাক্লিবা অকা অকুম কয়া অসিগী মরক্তা মোমোন নোক্তুনা চংশিন্নবগী মতৌ অসি ঐখোয়না ভগবান শ্রীকৃষ্ণদগী তমজনীংঙাই ওই। মরম ময়াম অসিমক্না শ্রী কৃষ্ণবু জগৎ গুরুনি হায়নরিবনি।

ঙসি ঐখোয়না কুম্মৈ ফিয়োংগী মরমদা খন্নরি, মরক অসিদা ভারতনা য়াম্না চাউরবা কুম্মৈ অমগীদমক থৌরাং তৌরি। কুম্মৈ অসি ভারত্তদা নত্তনা মালেম পুম্বদসু খঙনরিবনি। ঐহাক্কী নুংশিজরবা ইরৈবাকচাশিং, ঐহাক্না হায়জরিবা অসি মহাত্মা গান্ধীগী ১৫০শুবা কুমওনগী মরমদনি। ইং কুমজা ১৮৬৯গী ওক্তোবর ২দা পোর্বন্দরগী সমুদ্র মপান্দা, মফম অদু হৌজিক্তি ঐখোয়না কৃতি মন্দীর হায়রগা খঙনরে, পীকখ্রবা য়ুমদুদা মীওই অমা পোকখিবা নত্তে, মীওইবগী পুৱারীবু অনৌবা মায়োন অমদা পুদুনা অনৌবা মীংচৎ উরোং খিনবীরম্বা অনৌবা য়ুগকা পাংখক ওইরবা মীওই অদু পোকখিবনি। মহাত্মা গান্ধীগা ৱাফম অমা ইরোয় লোয়নদুনতা লৈরি, ৱাহৈ অমদা হায়রগনা মসি মহাক্কী পুন্সিগী শরুক অমনি, সেবা। সেবাগী ৱাফম, সেবাগীদমক মথৌ পাংথোকপা মহাক্কী পুন্সি অসি অসুম য়েংশি। খা-আফ্রিকাদা কাংলুপ নাইবগী থৌদোক্তা মায়োক্নরিবশিংগী সেবা তৌখি। মতমদুদা ৱাফম অসি তরাইবা ৱাফম অমা নত্তে। মহাক্না তাথি তাওই তৌবীরবা চম্পারনগী লৌমীশিংগী মতেং পাংখি। মহাক্না মতিক চাবা খুৎশুমল ফংদ্রবা মিলদা থবক তৌরিবা শিন্মীশিংগা মতেং পাংখি। মহাক্না কনা লৈজদ্রবা অশোনবা মীওইশিংগী সেবা তৌবা, মতেং পাংবা অসি অথোইবা থৌদাংনি খনখি। লেপ্রোসীগী মরমদা মীশিংনা লান্না থাজনৈ। লান্না থাজবা অদুবু কোকহন্নবগী মায়কৈদা লৈনা অসিনা নারবা মীওইশিংগী মরক্তা লৈদুনা, মখোয়গী সেবা তৌদুনা মীয়ামদা উৎখি। সেবা, মতেং পাংবা অসি মহাক্না ৱাহৈনা নত্তে থবক্না উৎখি। অচুম্বগা গান্ধীগা থানবা য়াদ্রবা মরী লৈনখি, মরী অদুমক মহাক্না সেবানসু থমখি। কনাগুম্বনা করিগুম্বা মতম অমদা করিগুম্বা মফম অমদা মহাক্কী তঙায়ফদবা লাকপদা মহাত্মা গান্ধীনা মহাক্কী মতেং পাংনবগীদমক থৌরাং তৌদুনা লৈ। মহাক্না সেবাদা নত্তনা মদুদগী ফংলকপা থমোইগী অপেনবা অদুবু থোইনা হেন্না পামজৈ। সেবা হায়বা ৱাহৈ অসিগী অচুম্বা ৱাহন্থোক্তি নুংঙাইনবা তৌবা অদুনি – ‘সেবা পর্মো ধর্ম’ সেবানা অথোইবা ধর্মনি। অদুবু মদুগা লোয়নরিবা ফংলিবা অথোইবা নুংঙাইবা হায়বা অসিদা সেবাগী নুংঙাইবা অদু মদুগী ৱাহন্থোক অদুদা য়াওরি। ৱাফমশিং অসি বাপুগী পুন্সিদগী তশেং তশেংনা খঙবা ঙম্মি। মহাত্মা গান্ধী, মশিং থিঙমদ্রবা ভারত মীয়ামগী খোঞ্জেলনি, অদুবু মীওইবগী পুন্সি অমদি পুন্সিগী মঙালগী মায়কৈদা য়েংলুরবদি মহাক অসি মালেম পুম্বগী খোঞ্জেলনি। মী অমদি খুন্নাই, মীওইবা অমদি মীওইবগী মতৌ হায়বসি মহাত্মা গান্ধীগীদি পুম্নমক্নি। আফ্রিকাগী ফোনিক্স ফার্ম নত্রগা তোল্সতোই ফার্ম ওইরো, সবরমতি অশ্রম নত্রগা ৱার্ধা ওইরো, মফম খুদিংদা কমুনিতী মোবিলাইজেসন্দা মহাক্না থৱায় য়াওখি। ইরাৎচনীংঙাই ওইরবা মহাত্মা গান্ধীগা মরী লৈনবা মরুওইবা মফমশিংদা চৎতুনা মহাক্কী মফমদা ইকোক নোঞ্জনবগী খুদোংচাবা ফংবা অসি ঐহাক্কীদি লাইবক য়াম্না ফবনি। গান্ধীজীনা সেবাগী ৱাখলদা নত্তনা অপুনবগী ৱাখলদসু থোইদোক্না পুক্নিং চংখি। মীয়ামগী সেবা অমদি মীয়াম্বু পুন্সিলহনবা হায়বা ৱাখল্লোন অসি ঐখোয়গী পুন্সিগী তৌদবা য়াদ্রবা থৌদাং ওইহনখি। তশেংনা হায়রবদা মসিনা মহাত্মা গান্ধীগী মফমদা তশেংনা নোলুকচবনি, তশেংবা থৌদাং কৎচবনি। মতৌ অসুম্না মতাং মতম কয়া লাকখি, ঐখোয়নসু লোয়নরি। অদুবু গান্ধীগী ১৫০ লাক্লগা অদুম চৎখ্রগদ্রা, ঐখোয়বু য়ারশিরা? নত্তে ঐহাক্কী নুংশিজরবা ইরৈবাকচাশিং। ঐখোয় ইশা ইশাদা হংলসি, নৈনশি, পুন্সিন্দুনা ৱারী শাশি। ঐখোয়না অঙাং অহল খায়দনা, কাংলুপ খুদিং পুন্দুনা, খুঙ্গং, শহর, নুপা, নুপী পুন্দুনা মীওই অমগীদমক হোৎনবা অসিদা ঐনা করি অমুক হায়রুগনি। ঐনা করিবু অমুক হাপচিনগদৌরিবনো, অপুনবগী পাঙ্গল অসি য়াম্না চাউই। গান্ধী ১৫০ অসিদা পাংথোক্কদৌরিবা থৌরম অসিদা অপুনবগী শক্তমগা লোয়ননা সেবাসু উবা ফংগনি, ঐখোয় লৈকাই হুপ্না থোকপসু য়াই। ঐখোয়গী ফুতবোল তীম লৈরবদি, ফুতবোলসু শান্নরগনি অমদি গান্ধীজীগী মতুং ইন্না সেবাসু তৌরনি। ঐখোয়গী লেদিজ ক্লব লৈরি! মতমগী চৎনবসু তৌগনি অমদি লেদিজ ক্লকী ইতা ময়াম পুল্লগা করিগুম্বা খরসু পাংথোকপা য়াই। য়াম্না তৌবা য়াখ্রে, অমনবা লাইরিকশিং খোমজিন্দুনা লায়রবশিংদা য়েন্থোকপা, মীয়ামদা লৌশিংসু শন্দোক্লে। ইরৈবাকচা কোতি ১৩০গী অপাম্বা কোতি ১৩০নি, থবক কোতি ১৩০ পাংথোকপা ঙমগনি, মসি ঐহাক্কী থাজবনি। মসিমক তৌগনি হায়বা লৈতে, পুক্নিংনা পাম্বদু পাংথোক্লগা লোয়রে। তৌবতবু সেবা অমদি কত্থোকপগা লোয়ননা পাংথোকসি, মদুদতা মপাল নাইদ্রবা নুংঙাইবা অদু ফংগনি।

ঐগী নুংশিরবা ইরৈবাকচাশিং, থা খরগী মমাংদা ঐহাক দান্দিদা চৎলুই। নীংখা তম্বগী লালোংদা থুমগী অন্দলোন্দা দান্দি অসি অচৌবা মায়োন অমা পুররকখিবা মফম্নি। দান্দিদা ঐহাক্না মহাত্মা গান্ধীদা কত্থোক্লবা য়াম্না অনৌবা মতমগী ম্যুজিয়ম অমা শঙ্গাখি। ঐনা ময়ামদা হায়জরি, ময়াম্না কোয়বা মতমদা মহাত্মা গান্ধীগা মরী লৈনবা মফম অমদি য়ৌবীয়ু। অমা হেক্তা য়াই, পোর্বন্দর, সবর্মতি অশ্রম, চম্পারন, ৱার্ধাগী অশ্রম অমদি দিল্লীদা লৈবা মহাত্মা গান্ধীগা মরী লৈনবা মফম অমা হেক্তা য়াই। অদুগা সোয়িয়েল মীদিয়াদা সেয়র তৌবীয়ু, অদুম্না তৌরবদি অতোপ্পা মীওইশিংসু চৎনীংলক্কনি। মখোয়না হেন্না চৎনীংনবা ৱাহৈ অহুম মরিসু ইবীয়ু। অদোমগী পুক্নিংদা ফাওরিবা ৱাখল অদুনা সাহিত্যগী ৱারেংদগী হেন্না মথৌ পাংগনি। হৌজিক্কী মতম অসিদা অদোম্না গান্ধীজীগী মরমদা ইবা অদুনা হেন্না মরী লৈনগনি। থৌরম কয়া, চাংদম্নবা কয়া, মেলা কয়া পাংথোক্নবা থৌরাংসু লৈরে। মতাং অসিদা য়াম্না নুংঙাইবা ৱাফম অমা পনজগে। ভেনিস বিন্নালে অসি য়াম্না মমিং চৎপা কলাগী উত্থোকপা কুম্মৈনি। মসিদা মালেম পুম্বগী লাইয়েকপশিং লাকই। হন্দক্তি মসিদা ভারতকী পেভিলিয়ন্দা গান্ধীজীগা মরী লৈনবা থৌদোকশিং উৎলি। মসিদা হরিপুরা পেনেল অসি থোইদোক্না পুক্নিং চিংশিন্নীংঙাইনি। নীংশিংবীরমগনি, গুজরাতকী হরিপুরাদা কংগ্রেসকী মীফম ফমখি, মদুদা সুভাস চন্দ্র বোসপু প্রসিদেন্ত ওইনা খনখি, মসি পুৱারীদা য়াওদুনা লৈরবনি। আর্ত পেনেলশিং অসিদা ঐখোয়গী ফজরবা মাংলমচৎ অদু উৎলি। কংগ্রেসকী হরিপুরা মীফমগী মাংওইননা, ইং কুমদা ১৯৩৭-৩৮ মহাত্মা গান্ধীনা শান্তিনিকেতন কলা ভবনগী মতমদুগী প্রিন্সিপাল নন্দলাল বোসপু বার্তন তৌদুনা কৌখি। গান্ধীজীনা ভারত্তা লৈরিবা তোঙান তোঙানবা মীওইশিংগী পুন্সি মহিংবু কালাগী মিৎয়েংদা উৎথোকপা পামলম্মি লোয়ননা মহাক্কী কালাগী থবকশিং অদু মীফম মনুংদা মীয়ামদা উহনবা পামখি। নন্দলান বোসনা হরিপুরাগী নাক য়েত্তা লৈরিবা খুলশিংদা কোয়চৎ চৎতুনা য়েংখি, মতুংদা মহাক্না ভারতকী খুঙ্গংগী পুন্সি মহিং উত্থোক্লদুনা আর্ত কেনবাস খরা শেমখি। অসিগুম্লবা মমল য়াম্লবা কালাগী পোত্থোকশিং অসিগী মরমদা ভেনিসতা মীয়াম্না কন্না নৈনখি। অমুক্কা হন্না গান্ধীজীগী পোকপগী চহী ১৫০শুবা কুমওন পালন লাকপা অসিদা নুংঙাইবা ফোংদোকপগা লোয়ননা ভারত মচা খুদিংনা করিগুম্বা অমা নত্রগা অমা পাংথোকপীরক্কনি হায়বগী থাজবা থমজরি। লৈবাক্কীদমক মীয়ামগীদমক করিগুম্বা খরা পাংথোকপা তাই। মসিনা বাপুগী মফমদা অশেংবা অফবা তৌবীমল খঙবা উৎপা ওইগনি।

ইমা ভারতকী অচংবা মচাশিং, হৌখিবা চহী খরদগী ঐখোয়না ওক্তোবর ২গী মাংওইননা চয়োল অনিগী মমাংদগী লৈবাক শিনবা থুংনা লু নানবনা সেবানি হায়বা খোংচৎ অসি চংশিন্দুনা লাক্লি, হন্দকসু সেপ্তেম্বর ১১দগী খোংজং অসি হৌগদৌরি। মতম অসিদা ময়াম্না থোকপীরক্তুনা শেংদোক খোৎতোকপগী থবক তৌবীদুনা মহাত্মা গান্ধীগী মফমদা থবক্না তৌবীমল খঙবা উৎলসি। ইমুং, লৈরক কোন্সাং, লম্বী লমখায়, ইরম নলা, স্কুল কোলেজদগী হৌরগা মীয়াম পুনফম মফমশিংদা লু নানবগী অচৌবা খোংজং চংশিনশি। হন্দক্তি প্লাসতিক্তা অকনবা মিৎয়েং চংশিনসি। ওগস্ত ১৫দা ঐহাক্না লাল কিলাদগী য়াম্না থাজবা অমদি থৌনাগা লোয়ননা মীয়াম কোতি ১২৫বু লু নানবগী খোংজং অসি চংশিনহনখিবনি, লমহাংদা অমাং অশোই তৌবা তোকহনখিবনি। মতৌ অদুম্না হন্দক্তি ঐখোয় পুম্নমক্না সিঙ্গল য়ুজ প্লাস্তিক শিজিন্নবা তোকহল্লসি। মায়কৈ অসোমদা খুন্নাই অসিগী মীওই মখল খুদিংনা শরুক য়ানীংবগী অপাম্বা লৈ। ললোন ইতিক তৌরিবা ইচিল ইনাও অমদি ইচল ইচেশিংনা মাগী মাগী দুকান্দা প্লেকার্দ থেত্তুনা পোৎ লৈবা লাকপশিংনা মশা মশাগী খাও পুরক্নবা খঙহনখ্রে। মসিনা পৈশাসু তিংহল্লরোই অমদি অকোইবগী ঙাকশেলদা ঐখোয়সু শরুক য়াবা ঙম্লগনি। হন্দক ওক্তোবর ২দা বাপুগী ১৫০শুবা কুমওন পাংথোকপদা শুপ্নতংগী লমহাংদা অমাং অশোয় তৌদ্রবা ভারত হায়না লাওথোকপদা নত্তনা প্লাসতিক্কী মায়োক্তা মীয়ামগী ইহৌগী য়ুমফমসু উরেপ উয়ুং তম্লগনি। ঐহাক্না খুন্নাই অসিগী মীওই মখল খুদিংদা, খুঙ্গংশিংদা, লৈকাইশিংদা অমদি শহরদা লৈরিবশিংদা খুৎ লোন্নদুনা হায়জরি, হন্দক্কী গান্ধীজীগী মপোক কুমওন অসি ভারত ইমাবু প্লাস্তিক্কী অমোৎপদগী কন্ননবগী মওংদা পাংথোক্লসি। মহাত্মা গান্ধীগী কুমওন নুমিৎ অসি থোইদোকপা থবক শুবা নুমিৎ ওইহনসি। লৈবাক অসিগী ম্যুনিসিপালিতীশিং, ম্যুনিসিপাল কোর্পোরেসনশিং, দিস্ত্রিক্ত এদমিনিস্ত্রেসন, গ্রাম পঞ্চায়ৎশিং, সরকারগী অমদি সরকারগী নত্তবা বোদীশিংদা ঐহাক্না হায়জরি, প্লাসতিক্কী অমোৎপশিং অসি খোমজিল্লগা থম্ননবগী থৌরাংশিং লৌখৎলসি। মতৌ অসুম্না দীৱালী ফাওবদা প্লাস্তিক্কী অমোৎপদগী ঙাকথোক্নবগী থবক মপুং ফানা পাংথোকপা ঙমগনি।

ঐহাক্কী নুংশিজরবা ইরৈবাকচাশিং, ঐখোয়গী সংস্কৃতকী শৈরেংগী খোমজিনবা লাইরিকশিং অসি মখল অমগী লৌশিংগী পুক্কৈনি। ঐখোয়না পুন্সি অসিদা অপাম্বা খুদিংমক মদুদগী ফংবা ঙমগনি। হৌজিক্তি ঐহাক মসিগা কয়া লোয়নদ্রে অদুবু হান্নদি ঐহাক মসিগা য়াম্না লোয়নরম্মি। ঙসি ঐহাক সংস্কৃতকী শৈরেং অসিদগী য়াম্না মরুওইবা ৱাফম অমা ফোংদোকচনীংই। মসি চহী চা কয়াগী মমাংদা ইখিবনি অদুবু ঙসি ফাওবা মসি য়াম্না মগুন লৈরি। মসিদা হায়রিবা অসিদি, মালেম অসিদা ঈশিং চিঞ্জাক অমসুং অফবা ৱাঙাং শঙাং অহুম অসি লনগী পুক্কৈনি, অপংবশিংনা নুঙবু মনিনি হায়নৈ। ঐখোয়গী চৎনলোনচৎতা চিঞ্জাক্কী থোইদোকপা মগুন লৈ। ঐখোয়না চিঞ্জাক্কী লৌশিংবু বিজ্ঞান্দা ওন্থোক্লে, মচল শুবা অমসুং মচী ওইবা চিঞ্জাক, ঐখোয় খুদিংমক্কীদমক মরু ওই। অখন্ননা নুপী অমসুং অঙাংশিংদা মরু ওই। মরমদি মখোয় অসি ঐখোয়গী খুন্নাইগী তুংগী য়ুমফম্নি। মচী ওইবা চিঞ্জাক পীজবগী খোংজংগী শরুক অমা ওইনা লৈবাক পুম্বদা অনৌবা বিজ্ঞানিক ওইবা মওংদা মচি ওইবা চিঞ্জাক পীজবা অসি মীয়ামগী ইহৌ ওইহনগদৌরিবনি।

মরূপশিং, ঐখোয়গী লৈবাক্কী মচল শুদবা চিঞ্জাক্কী মোয়োক্তা লান্থেংনবগী মওং অসি মখল য়াম্না লৈ। হৌজিক খঙবা ৱাৎপদগী লাইরবসু ইনাক খুনবসু অনিমক মচল শুদবা চিঞ্জাক্কী চৈথেং ফংলি। লৈবাক পুম্বদা সেপ্তেম্বর থা অসি মচল শুবা চিঞ্জাক পীজবগী খোংজং চংশিনগনি। ময়াম মসিদা শোয়দনা শরুক য়াবীয়ু, ৱাফম কয়া খঙজিনবীয়ু, অনৌবা কয়া হাপচিনবীয়ু, অদোমসু করিগুম্বা খরা মতেং পাংবীয়ু। করিগুম্বা অদোম্না মীওই অমা খক্তং ওইরবসু মচল শুদবা চিঞ্জাক্তগী কনবা ঙম্লগদি মদুনা লৈবাক অসি মচল শুদবা চিঞ্জাক চাবদগী কনবা ঙম্লগনি।

সৃস্তীজী অদোমগী ফোন কোল অসিগীদমক্তা থাগৎচরি, অদোমগুম্না হরিয়ানাগী সোহনাদগী কে.কে. পান্দেজী অমসুং সুরত্তগী ঐশ্বরিয়া শর্মাগা লোয়ননা মীওই কয়া অমনা দিস্কোভরী চেনেলদা উৎখিবা মেন ভর্সেস ৱাইল্দগী তাঙ্কক অদুগী মতাংদা খঙনীংই হায়না হায়বীরকই। হন্দক মন কী বাতকী মরমদা খল্লকপা মতমদা ঐহাক্না থাজখি মদুদি মসিগী মতাংদা শুংশোই শোইদনা ৱাহং য়াম্না লাক্কনি। চয়োল খরগী মনুংশিদা ঐনা চৎপা মফমশিংদা ঐহাক্কা থেংনবশিংনা মেন ভর্সেস ৱাইল্দগী মরমদা হৌদোরকই।

তাঙ্কক অমখক অসিনা ঐহাক ভারত্তা নত্তনা মালেম পুম্বগী নহাশিংগা পুনবগী তাঞ্জা ফংজরে। নহাশিং অসিগী থমোইদা ঐহাক্কী মফম অমা ফংগনি হায়বসি ঐহাক অমুক্তা খল্লুদে। ঐখোয়গী লৈবাক অমসুং মালেম অসিগী নহাশিং অসি তোঙান তোঙানবা খেৎনবা ৱাফম কয়াদা থৱাই য়াওরমগনি হায়বা খল্লুদে। মখোয়গী পুক্নিং চিংশিনবা ঙম্বগী খুদোংচাবা অদু ফংগনি খল্লুদে। মমাংগী চয়োলদা ঐহাক ভুতান্দা চৎলুই। প্রাইম মিনিস্তর অমা ওইনা মফম অমদা চৎপগী খুদোংচাবা ফংবদা মালেমগী য়োগগী নুমিৎনা মরম ওইরগা ঐগা হেক ফমিন্নবা মীওই অদুনা য়ামদ্রবদা মিনিৎ ৫-৭তি য়োগগী মরমদা হংলক্কনি। য়োগগী মরমদা ঐহাক্কা ৱারী শান্নদবা মালেমগী লুচিংবা অমত্তা লৈরমলোই খল্লি। অদুবু হন্দক মরক অসিনা অনৌবা অমা অমুক থেংনরে। মী অমা হেক থেংনবদা লমলক্কী পুন্সি অমসুং অকোইবগী ফিভমগী মতাংদা ৱারী শারকই।

দিস্কোভরীনা থৌরম অসি লৈবাক ১৬৫দা মখোয় মখোয়গী লোন্দা শন্দোক্নবা থৌরাং শেমখ্রে। হৌজিক অকোইবগী ফিভম, মালেমগী শাবগী চাং হেঙ্গৎলকপা, ঈশিং নুংশিৎকী হোংলক্লিবা ফিভমগী মতাংদা মালেমগী ওইবা খন্ন-নৈনবগী থৌরম কয়া চত্থরি। দিস্কোভরী চেনেলগী তাঙ্কক অসিনা ভারতকী পাওজেল, ভারতকী চৎন পথাপ, মহৌশাবু নুংশিজবা পুম্নমক অসি মালেম পুম্বদা খঙহনবদা মতেং ওইগনি হায়না ঐহাক্না থাজৈ। নুংঙাইরবা ৱাফম অমনা কনাগুম্বা খরনা চিংনব অমগা লোয়ননা হংবীরকই – মোদীজী অদোম্না হিন্দীদা ৱা ঙাংই অদুগা বিয়র গ্রিলসনা হিন্দী খঙদে, অদুগা অদুক কন্না মতৌ কম্না ৱারী শারিবনো? মদুবু কোন্না শেমদোক শাদোকপরা? হন্না হন্না শুতিং তৌখিবরা? য়াম্না খঙনীংনা মখোয়না হংবীরকই।

হৌজিক্তি মসিদা অরোনবা অমত্তা লৈতে। বিয়র গ্রিলসকা ৱারী শানবা অদুদা তেক্নোলোজী য়াম্না চাউনা শিজিন্নখি। ঐহাক্না করিগুম্বা ৱা অমা হেক হায়বগা খুদক্তা অংগ্রাজীদা হন্দোকখি। বিয়র গ্রিলসকী নাকোংদা অপীকপা কোর্দলেস খুৎলাই অমা হাপ্পি। ঐহাক্না হিন্দীদা ঙাংলে মানা অংগ্রাজিদা তারে। মসিনা মরম ওইরগা ৱারী ৱাতাই অদু য়াম্না লাইহল্লে। মসিনি তেক্নোলোজীগী অঙকপা।  

শো অসি ব্রোদকাস্ত তৌরবা মতুংদা য়াম্লবা মীয়াম্না জিম কোর্বেৎ নেস্নেল পার্ক্কী মতাংদা ৱারী শানদুনা খন্ন-নৈনরে। ময়ামসু মহৌশা অমসুং লমলক্কী শা উচেক্কা শম্নবা মফমদা শোয়দনা চৎপীয়ু। হান্নসু হায়জখরে অমুক্কসু হন্না হায়জরি, অৱাং নোংপোক ভারত্তা শোয়দনা চৎপীয়ু। মফম অদুগী মহৌশাগী ফজবদি অঙকপনি, অদোম মীফম হোংবা ঙম্লোই। ওগস্ত ১৫ নুমিৎতা ঐহাক্না মীয়ামদা লাল কিলাদগী চহী অহুমগী মনুংদা য়ামদ্রবদা মফম ১৫ ভারতকী মনুংদা ইমুং মনুংগী মীওইশিংগা কোয়বা চৎপীয়ু। মফম অদুদা মতম খরা লৈরগা মফম অদুগী মরমদা নৈনবীয়ু হায়জখি।

নুশিরবা ইরৈবাকচাশিং, মফম অসিদা অকোইবগী ফিভম য়েংশিনবগী থবক অসি মীয়ামগী পুক্নিংদা ফাওরে হায়না খঞ্জৈ। মমাংগী চহীদা কৈ মশিং থিবগী খুদোংচাবা অদু ফংজখি। ভারত্তা কৈ কয়া লৈবগে হায়বা ময়াম খঙবীবরা? ভারত্তা কৈগী মশিং অসি ২৯৬৭নি।

চহী খরগী মমাংদা মসি তঙ্খাই অমা ফাওবা ফারুদ্রবনি। কৈগী মরমদা ২০১০দা রুসিয়াগী সেন্ত পিতর্সবর্গতা তাইগর্স সম্মিৎ পাংথোকখি। মদুদা মালেম অসিদা কৈগী মশিং হন্থরক্লিবা অসি নুংনাংবা ফোংদোক্লদুনা ৱাশক অমা লৌখি। ৱাশক অদুদি চহী ২০২২দা মালেম পুম্বদা কৈগী মশিং অসি শরুক অনি হেঙ্গৎহনবা। অদুবু মসিদি অনৌবা ভারতনি, পান্দমশিংবু য়ারিবা মখৈ থুনা ফংহনবা। ঐখোয়না ২০১৯দা ঐখোয়গী ভারত্তা কৈগী মশিং অসি শরুক অনি হেঙ্গৎহল্লে। ভারত্তা কৈদা নত্তনা প্রোতেক্তেদ এরিয়াশিং অমসুং কম্যুনিতী রিজার্বশিংগী মশিংসু হেঙ্গৎলক্কনি।

ঐহাক্না কৈগী দেতা অসি মীয়ামদা খঙহনবা মতম অসিদা গুজরাতকী গীরগী নোংশাসু নীংশিংলকই। ঐহাক্না মফম অদুগী মুখ্য মন্ত্রী ওইনা পায়বা মতমদা গীরগী উমংশিংদা নোংশাগী লৈফম পীকশিনলক্লম্মি। মখোয়গী মশিং অসুম অসুম হন্থরকখি। ঐখোয়না গীরদা মথং মথং ওইনা থৌরাং কয়া পায়খৎলকখি। ২০০৭তা মফম অদুদা নুপী গার্দস ওইনা তাহন্নবা ৱারেপ লৌখি। তুরিজম চাউখৎনবা ইনফ্রাস্ত্রকচর শেমগৎখি। ঐখোয়না মহৌশা অমসুং লমলক্কী জীবশিংগী মরমদা খন্নরকপদা কঞ্জার্বেসনগী ৱা ঙাক্তা ঙাংনৈ, অদুবু হৌজিক্তি কঞ্জার্বেসন্দগী ককথৎলগা কম্পেজিয়ন ওইনা খন্নরসি।  

নুংশিরবা ইরৈবাকচাশিং, ১৮৯৩গী সেপ্তেম্বর ১১গী স্বামী বিবেকানন্দগী পুৱারীগী মশক ওইরবা ৱারোল অদুবু কনানা কাওবা ঙমগদগে। মালেম পুম্বগী মীওইবা কাংলুপ্পু থক থক নিকহনবা ঙম্বা নহা লম্বোইবা অসিনা মালেমগী মনুংদা ভারতকী মশেক মঙাল নাইরবা শক্তম অমা থনম্লে। মতম অদুদা মীখা পোল্লবা ভারতপু মালেম পুম্বনা হন্থবা মিৎয়েংদা য়েংলম্মি। অদুবু স্বামী বিবেকানন্দগী ১৮৯৩গী সেপ্তেম্বরগী ৱারোল অদু তারবা মতুংদা মখোয়গী মিৎয়েং অদু হোংদোকপা তারকখি। ঐখোয় পুন্না স্বামী বিবেকানন্দনা খনবীরম্বা ভারতকী তৌবা ঙম্বগী থৌনা অদু পুথোক্লসি।

নুংশিরবা ইরৈবাকচাশিং, ওগস্ত ২৯ অসি জাতিগী শান্ন-খোৎনবগী নুমিৎ হায়না পাংথোকই হায়বসি ময়াম নীংশিংবীরমগনি। তাঞ্জা অসিদা ঐখোয়না লৈবাক পুম্বদা ফিৎ ইন্দিয়া মুভমেন্ত হৌদোক্কদৌরি। ওগস্ত ২৯ ঙায়বিরো, ঐহাক ইশানা নুমিৎ অদুদা হিরম অসি শন্দোক্না হায়জগনি। মদুদা ময়াম্বু য়াওহন্দবা ঙমজরোই, মরমদি ঐহাক্না ময়াম্বু হকচাং ফনা উজনীংই।

নুংশিরবা ইরৈবাকচাশিং, ওগস্ত ২৯দা ফিৎ ইন্দিয়া, সেপ্তেম্বর থাদা মচল শুবা চিঞ্জাক্কী খোংজং, মরুওইনা সেপ্তেম্বর ১১দগী ওক্তোবর ২ ফাওবা স্বচ্ছতা অভিয়ান্দা ময়াম্বু ঙাইজরমগে। ওক্তোবর ২দা প্লাস্তিক্তগী নান্থোক্নবগীদমক ঐখোয় পুন্না য়ুম অমসুং য়ুমগী মপান্দা য়াম্না কন্না হোৎনসি। খোংজংশিং অসিগা মরী লৈনবা কয়া অমা সোসিয়েল মীদিয়াদা থাগৎলক্কনি হায়না থাজৈ। লাক্লো ঐখোয় পুন্না অনৌবা অশা অনৌবা ৱাশক অমসুং অনৌবা থৌনাগা লোয়ননা মাংলোমদা চংশিল্লসি।

নুংশিরবা ইরৈবাকচাশিং, ঙসিগী মন কী বাত মতাং অসিৱাইদা লোইশিল্লসি। অমুক উন্নসি। ঐহাক ময়ামগী ৱাফম, ময়ামগী ৱাখল্লোন ঙাইজরমগে। ঐখোয় ময়াম পুল্লগা নীংতম্বদা ঙাওজরম্বশিংনা মংজরম্বা ভারত, গান্ধীজীগী মংলান মংফাওননবা হোৎনরসি। নুংগী ওইবা নুংঙাইবা অদু তেংবাংবগী ৱাখল্লোন ওইনা ফোংদোকপগা লোয়ননা চৎলসি।

হন্না-হন্না থাগৎচরি।

খুরুমজরি।