মালেমগী তোঙান-তোঙানবা মফম কয়াদগী রোতারিয়ানশিংগী চাউরবা ইমুং-মনুংশিং, নুংশিরবা মরুপশিং, খুরুমজরি! রোতরী ইন্তর্নেস্নেল কনভেন্সন অসিদা ৱা ঙাংবা ফংবা অসিদা ঐহাক্না য়াম্না নুংঙাইবা ফাওই, অসিগুম্না চাউবা রোতরীগী মীতিন খুদিংমক অসি অপিকপা গ্লোবল এসেমব্লী অমগুম্বনি। মসিদা দাইভর্সিতী অমসুং ভাইব্রেন্সী য়াওরি। রোতরিবান পুম্নমক্না নখোয়গী হীরমশিংদা লোইনা মাইপাকই। অদুম ওইনমক নখোয়না নশাবু থবক তৌবা খক্তদা অকক্নবা থমদে। ঐখোয়গী গ্রহ অসিবু হেন্না ফবা অমা ওইহন্নবগী নখোয়গী অপাম্বা অনিংবা অদুনা মসিগী প্লেতফোর্ম অসিদা ময়াম পুম্নমকপু পুনশিনহল্লরে। মসি মাইপাকপা অমসুং সার্বিসকী অশেংবা তিন্নবা অমনি।
মরুপশিং,
মসিগী বোদী অসিগী মরু ওইবা মোতো অনি লৈ। অহানবা অসি – ইশাদগী হেন্না সার্বিসতা মরু ওইবা পীবা। অনিশুবদা – সেবা খ্বাইদগী হেন্নাতৌবনা খ্বাইদগী হেন্না কান্নবা। হায়রিবশিং অসি মীওইবা জাতি পুম্নমক্কী য়াফনবগীদমক্তা খ্বাইদগী মরু ওইবা প্রিন্সিপলশিংনি। চহি লিশিং কয়াগী মমাংদা ঐখোয়গী সাধু সন্তশিংনা য়াম্না শক্তি লৈরবা প্রার্থনা অমা পীরকখি-
'सर्वे भवन्तु सुखिनः,
सर्वे सन्तु निरामयः'।
মসিনা তাক্লিবসি, জিবা পানবা পুম্নমক নুঙাইনা লৈসনু অমসুং জিব পানবা পুম্নমক হকচাং ফবা মাইপাকপা পুনশি মহিং অমা হিংবা ওইসনু।
ঐখোয়গী কলচর মসিমসু হায়নৈ-
''परोपकाराय सताम् विभूतयः''।
মসিনা তাক্লিবসি, অফাওবা অচৌবা মীশিংনা অতোপ্পশিংগী য়াইফনবগীদমক্তা থবক তৌই অমসুং হিংঙি। ঐখোয়না লৈরিবা লমদম অসি অতোপ্পশিংগীদমক্তা ইংবা হায়বসি করিনো হায়বগী মতাংদা থবক ওইনা উৎলম্বা বুদধা অমসুং মহাত্মা গান্ধিগী লমদম্নি।
মরুপশিং,
ঐখোয় পুম্নমক অমনা অমগী মপাল তাংবা ঙাক্তনি, অমনা অমগা মরি লৈনবা ঙাক্তনি অমসুং অমনা অমগা শম্নবা মালেম অমদা লৈরিবা ঙাক্তনি। স্বামি ভিবেকানন্দানা হায়বা মতমদা মহাক্না য়াম্না ময়েক শেংনা ফোংদোক্লম্মি অমসুং ঐহাক্না কোত তৌরি:
“জগত অসিদা লৈরিবা এতোম অমনা মালেম পুম্ববু মশাগা লোইননা চিংদুনা পুদবিদা মতোমতা লেংবা ঙমদে।” মরম অদুনা ঐখোয়গী গ্রহ অসিবু হেন্না নুংঙাই য়াইফবা অমসুং লিশাং-শিৎনা চৎকদাবা মওংদা ওইহন্নবগীদমক্তা কনাগুম্বা মীওইশিংনা, ওর্গানাইজেশনশিংনা অমসুং সরকারশিংনা পুন্না থবক তৌমিন্নবা হায়বসি য়াম্না মরু ওই। রোতরী ইন্তর্নেস্নেলনা পঋধিবি অসিদা অফবা ইমপেক্ত অমা পুরক্নবা থবক হিরম কয়া অমদা কন্না হোৎনবা অসি ঐহাক্না য়াম্না নুংঙাইবা ফাওই। খুদম ওইনা মহৌশাগী ফিভম ঙাকশেন্দুনা থম্বা। পুংফম অসিগীখ্বাইদগী তঙাইফদবা অসি সস্তেন্নেবল দেবেলপমেন্ত অসিনা। চহি চা কয়া লিরবা মহৌশাগা তোৎনা-তিন্ননা লৈবগী অরিবা ইথোস অদুনা পুক্নিং থৌগৎলদুনা ভারত মচা বিলিয়ন ১.৪না ঐখোয়গী পৃথিবী অসিবু হেন্না লু-নান্না অমসুং হেন্না শংহন্নবা অঙম্বা মখৈ হোৎনরি। রিন্যুৱেবল ইনর্জী অসি ভারত্তা য়াম্না চাউখৎলক্লিবা সেক্তর অমনি। মালেমগী থাক্তা ভারতনা ইন্তর্নেস্নেল সোলর এলাইন্স শেম্বদা লুচিংলি। ভারতনা ৱান সন, ৱান ৱার্লদ, ৱান গ্রিদকী মাইকৈদা থবক তৌরি। গ্লাসগোদা হন্দক্তা পাংথোকখিবা সি.ও.পি.-২৬ সমিত্তা ঐহাক্না এল.এ.আই.এফ.ই. – লাইফস্তাইল ফোর এনভাইরনমেন্তকী মতাংদা ৱা ঙাংখি। মসিনা হায়রিবশি এনভাইরনমেন্তেলী কন্সিস ওইবা পুনশি মহিং অমা হিংলিবা মী খুদিমকপু তাক্লিবনি। ২০৭০ ফাওবদা নেত জিরো ওইনবগী ভারতকী অচেৎপা ফিরেপ অদু ৱার্লদ কম্যুনিতীনসু থাগৎপা ফোংদোরকখি।
মরুপশিং,
রোতরী ইন্তর্নেস্নেলনা থক্নবগী অশেংবা ঈশিং, সেনিতেসন অমসুং হাইজিন ফংহন্নবগীদমক্তা লেপ্তনা থবক পাংথোক্লিবা অসি য়াম্না চাউথোকনিংঙাইনি। ভারত্তা ঐখোয়না ২০১৪দা স্বচ্ছ ভারত নত্রগা ক্লিন ইন্দিয়া মুবমেন্ত হৌদোকখি। চহি মঙা মনুংদা ঐখোয়না তোতেল সেনিতেসন মপুং ফানা ফংবা ঙমগনি হায়না থাজৈ। মসিনা মরু ওইনা ভারতকী লায়রবা অমসুং নুপীশিংবু কান্নবা পীরি ময়াম্না পুন্দুনা ঈশিং য়োকশিন্নবগীদমক্তা অনৌবা মুবমেন্ত অমা ওইরক্লিলিবনি। মসিগী মুবমেন্ত অসি থায়না মমাংঙৈদা ঐখোয়না ঈশিং তুংশিন্দুনা থম্বা মওংশি অদুগা অনৌবা মতমগী চৎনবীশিংগা পুনশিল্লগা শেমগৎপা মুবমেন্ত অমনি।
মরুপশিং
লোকেল ইকোনোমীবু শৌগৎপা হায়বসি অদোমগী য়াম্না মরু ওইবা থৌদাংশিংগী মনুংদা অমা ওইরিবা অসি পোস্ত-কোবিদকী মালেম অসিদা য়াম্না মরু ওওই। ভারত্তা আত্মনির্ভর ভারতকী মুবমেন্ত অসি মওং-মরিল নাইরক্লি। মসিগী পান্দমদি ভারতপু মরোমদোম লেপচবা ঙম্বা অমা ওইহনবা অমসুং মালেমগী চাউখৎ-থৌরাংদা মতেং পাংবনি। ভারত অসি মালেম অসিদা খ্বাইদগী চাউবা অমসুং য়াংনা চাউখৎলক্লিবা স্তার্ত-অপ ইকো-সীস্তেমশিংগী মনুংদা অমনি । অসিগুম্বা স্তার্ত-অপ কয়ানা মালেমগী অৱাবা কয়াবু কোকহন্নবা ঙাইদুনা লৈরিবনি।
মরুপশিং,
লৈবাক অসিদা মালেমগী চৎনা কাংলোনশিংবু ঐখোয়না তমশিন্নবা অমসুং ঐখোয়গী চৎনবিসু মখোয়দা তম্বীনবা মতম পুম্নমক্তা লেংদনা লৈরি। ভারত অসি মীওইবগী শরুক তরেত থোকপগী শরুক অমগী তুংনফম ওইরিবনি। ভারতনা করিগুম্বা হিরম অমদা মায়পাকলকপা খুদিংমক্তা মালেম্না মদুগী ইথিল অদু উবা ফংলি। ঐ কোবিদ-১৯ ভেক্সিনগী খুদম অমা পীগে। চহি চামদা থোকপা কোবিদ-১৯ লাইনা অসিনা লাকপদা, মীশিংনা, ভারতনা মহাক্কী য়ামখ্রবা পোপুলেসন অসিগা লায়না অসিগা লান্থেংনবা ঙম্লোই হায়না খনখি। অদুবু ভারতকী মীশিংনা মখোয়বু লালি হায়না উৎখ্রে। হৌজিক ফাওবদা ভারতকী মীশিংনা দোজ মিলিয়ন ২ ময়া নক্না কাপখ্রে। অসুম্না ভারতনা ২০২৫ ফাওবদা তি.বি. মুথৎনবা হোৎনরি। মসি মালেমনা ২০৩০ ফাওবদা তি.বি. মুথৎপগী থম্লিবা তার্গেততকী চহি ৫ হাল্লিবনি। ঐহাক্না পীরিবসিদি খুদম খরা খক্তনি। মসিগী খোংথাং অসি মায়পাকহন্নবগীদমক ঐহাক্না রোতরী ক্লবশিংবুসু চেবাউ পীরি।
মরুপশিং
ঐহাক্না লোইশিন্দ্রিঙৈদা ঐহাক্না রোতরী ক্লবশিংদা ৱা খরদং হায়জনিংঙি। জুনগী তাং ২১দা মালেম অসিনা ইন্তর্নেস্নেল দে ওফ য়োগ পাংথোক্কনি। য়োগ অসিনা ঐখোয়গী, মেন্তেল, ফিজিকল, ইন্তেলেকচুএল অমসুং স্পীরিচুএল ৱেলনেসকী য়াম্না ফবা পাসপোর্তনি হায়বসি পুম্নমক্না খংলিবনি। রোতরী ফেমিলীনা য়োগ দে অসিবু মালেম শিনথুংনা পাংথোকপা ঙমগদরা? রোতরী ফেমিলীনা মহাক্কী মেম্বরশিংদা চাং নাইনা য়োগ তৌনবগীদমক শৌগৎপা ঙমগদরা? অদোম অসুম্না তৌবগী কান্নবা উবা ফংগনি।
ময়ামগী মীতিন অসিদা ৱা ঙানবগীদমক্তা চেবাউ পীবীরকপগীদমক্তা ময়াম্বু অমুক্কসু হন্না থাগৎচরি। রোতরী ইন্তর্নেস্নেল ফেমিলীবু ঐহাক্না য়াইফ পাউজেল পীজরি। থাগৎচরি! হন্না-হন্না থাগৎচরি।
