প্রধান মন্ত্রী শ্রী নরেন্দ্র মোদীনা ঙসি নিংতম লান্মী, খোঙজং চংশিনখিবা, অওনবা পুরকপশিং অমসুং নিংতম লান্মীশিং পুম্বদা শ্রদ্ধাঞ্জলী কৎখ্রে। মহাক্না অখন্ননা ইন্দিয়াগী নিংতম লান্দা মশক নিংথিনা খঙহৌদ্রবা খোঙজং চংশিনখিবা, অওনবা পুরকপশিং অমসুং নিংতম লান্মীশিংদা ইকাই খুম্নবা উৎখি। মহাক্না ঙসি অহমেদবাদকী সাবরমতী আশ্রম‘আজাদী কা অমরুত মহোৎসব’ (India@75) হৌদোকখ্রবা মতুং ৱা ঙাংবদা হায়খিবনি।
মশক নিংথিনা খঙহৌদ্রবা খোঙজং চংশিল্লিবা অমসুং লান্থেংনরিবশিং অসিগী থৌদাংশিং অসি থাগৎপা ফোংদোক্লদুনা প্রধান মন্ত্রীনা হায় মদুদি থেংনখিবা লান অমসুং খোঙজং খুদিংমক অরানবা কয়া অমগী মায়োক্তা অচুম্বনা য়াম্না কনখিবা, ভারতকী নিংখা তম্বগী মওং অসিনি। মহাক্না হায় মদুদি, লানফম অসি রাম, মহাভারতকী কুরুক্ষেত্রা, হালদীঘাতী অমসুং শিবাজী মতমগী ওইখিবা ৱাখল্লোল অমসুং মথৌনাশিংগা মান্নবা উৎলি।
প্রধান মন্ত্রীনা কোল, খাসি, সন্থল, নাগা, ভিল, মুন্দা, সন্যাসি, রামোশি, কিত্তুরগী খোঙজং, ত্রাবানকোরগী খোঙজং, বার্দোলিগী সত্যগ্রহ, সমভলপুর, চৌর, বুন্দেল অমসুং কুকাগী খোঙজং পনখি। শ্রী মোদীনা হায় মদুদি অসিগুম্বা খোঙজং কয়া অসিনা লৈবাক অসিগী মফম কয়াদা নিংতম্বগী মৈরীনা কন্না চাকখি। সিখ গুরুগী চৎনবী অসিনা লৈবাক অসি কলচর অমসুং চৎনবী কয়াদগী ঙাক-শেন্দুনা থম্লি হায়না মহাক্না হায়খি।
প্রদান মন্ত্রীনা হায়খি মদুদি লৈবাক অসিদা মুনিশিং, মহান্তশিং অমসুং আচার্য়াশিং মঙাল থোক্না চোকথবা লৈতনা মৈচাক অসি মতম পুম্বদা কাওরোইদবনি। মসিনা লৈবাক শিনবা থুংনা নিংতম্বগী অচেৎপা মফম অমা ওইখি।
প্রধান মন্ত্রীনা হায় মদুদি নোংপোক্লোমদা মুনিশিং হায়বদি চৈতন্যা মহাপ্রভু অমসুং শ্রীমন্ত সানকারা দেবনা সমাজ অসিদা লম্বী উৎখি অমসুং মখোয়বু পন্থুংদা মিয়েং চংদুনা লৈ। নোংচুপ্লোমদা মীরাবাই, এক্নাথ, তুকারাম, রামদাস অমসুং নার্সি মেহ্তা, অৱাংদা সান্ত রমানন্দ, কাবির্দাস, গোস্বামী তুলসিদাস, সুর্দাস, গুরু নানক দেব, সান্ত রাইদাস্না য়েংলকখি। মসিগী মান্ননা, খাদা মাধবাচার্য়া, নিম্বার্কাচার্য়া, বলাভাচার্য়া অমসুং রামানুজাচার্য়ানা কোল্লি।
প্রধান মন্ত্রীনা হায় মদুদি ভক্তিগী মতম মনুংদা শক্নাইরবা মালিক মোহমদ জায়াসি, রাস খান, সুরদাস, কেশাবদাস অমসুং বিদ্যাপতিনা সমাজ অসিদা অৱাৎপা মেমখৎপদা পুক্নিং থৌগৎখি। মসিগী শক্নাইরবশিং অসিনা নিং-খা তম্বগী পান-ইন্দিয়া অসিগী থৌদাং লৌখি। প্রধান মন্ত্রীনা মীয়ামদা থৌনা ফরবা অমসুং ফরবীশিং অসিগী পুন্সি ৱারী খঙহনবা মথৌ তাই হায়না মরুওইবা পীখি। মসিগী ৱারীশিং অসিনা লাক্কদৌরিবা মীরোল অসিদা মমল য়াম্লবা পারা অমা তম্বিদুনা অমত্তা ওইবা অমসুং পন্থুং ফংনবা চংশিনবদা পুক্নিং থৌগৎলগনি, হায়রগা প্রধান মন্ত্রীনা লোইশিনখি।
