প্রধান মন্ত্রী শ্রী নরেন্দ্র মোদীনা ঙসি নই দিল্লীগী পুসাদা লৈবা ইন্দিয়ন এগ্রিকলচরেল রিসর্চ ইন্সত্যিত্যুত্তা ঙসি পাংথোকপা শশক্ত নারী – বিকশিৎ ভারত প্রোগ্রামদা শরুক য়াখ্রে অমসুং নমো দ্রোন দিদিনা লৌউ-শিংউদা শিজিন্নগদবা দ্রোন পাইবগী মতৌবুসু মিৎয়েং তাখ্রে। লৈবাক শিনবা থুংবগী তোঙান-তোঙানবা মফম 10গী নমো দ্রোন দিদিশিংনা ঙসিগী থংন-থংননা দ্রোন পাইবগী থৌরমদা শরুক য়াখি। প্রধান মন্ত্রীনা থৌরম মনুংদা নমো দ্রোন দিদি 1000গী মফমদা দ্রোন কয়া খুৎশিন্নখি। বেঙ্কশিংনা জিলা খুদিংদা শেমগৎলিবা বেঙ্ক লিঙ্কেজ কেম্পশিংগী খুত্থাংদা সবসিদাইজ ওইরবা শেন্দোইগা লোয়ননা পীরিবা চাউরাকপা লুপা করোর 8,000গী বেঙ্ক লোনশিংসু প্রধান মন্ত্রীনা সেল্ফ হেল্প গ্রুপ (SHG)শিংদা য়েন্থোকখি। প্রধান মন্ত্রীনা SHGশিংদা লুপা করোর 2000গী কেপিতেলাইজেসন সপ্পোর্ত ফন্দসু য়েন্থোকখি। প্রধান মন্ত্রীনা বেনেফিশরীশিংগা ৱারীসু শাখি।
প্রধান মন্ত্রীনা ঙসিগী থৌরমদা ৱা ঙাঙবদা ঙসিগী থৌরম অসিদি পুৱারী ওইবা থৌরম্নি অমসুং দ্রোন দিদি অমসুং লাক্ষপতি দিদিশিংনা মায় পাকপগী অনৌবা ৱারী ইরে হায়না ফোংদোকখি। মখোয়গুম্বী মায় পাক্লবী নুপী ওন্তোপ্রিনর্শিংনা লৈবাক্কী তুংগী অফবা মতম অমা পুরক্লগনি হায়বগী মহাক্কী মফমদা থাজহল্লে হায়না মহাক্না হায়খি। নারী শক্তিগী ৱাখল চেৎপা অমসুং হোৎনবা কনবগী মতৌবু মহাক্না থাগৎখি। “লাক্ষপতি দিদি করোর 3 শেম্নবা খোঙচৎ অমা চৎকদৌরিবা অসিদশু ঐহাক্না থাজবা লৈরে”, মহাক্না হায়খি।
“নারী শক্তিগী খুদোংচাবা শেম্বীরবা অমসুং মখোয়গী ইকায় খুম্নবগী মতৌবু ঙাক্না চৎলবতদা খুন্নাই অমনা চাউখৎপা ঙমগনি”, প্রধান মন্ত্রীনা হায়খি। নারী শক্তিদা মতেং খরা পীবা মতমদা মখোয়না মতেংগী মথৌ তাবা হন্থরক্তুনা অতোপ্পদা ওইনা তেংবাংবা ঙম্লক্কনি হায়না পি.এম. মোদীনা মখা তাখি। মহাক্না অমাংশঙ, সেনিতরী পেদ, মৈখু খুদবা চাকখুম, খুদোংচাদবা কয়াদগী নুপীশিংবু কনবীনবা তোতি ঈশিং ফংহনবা, নুপী খুদিংগী জন ধন একাউন্ত হাংবা, নুপীশিংদা অথীবা ৱাহৈ শিজিন্নবগী মাইয়োক্তা ৱাফম থমখিবা, অমসুং নারী শক্তিগী মায়কৈদা অফবা লিচত চৎনবা ইমুংগী ইচানুপাশিংবু তাকপী তম্বীবগী হীরম কয়াবু লাল কিলাগী ফম্বাক্তা পুথোকখিবা অহানবা প্রধান মন্ত্রী ওইরি হায়না মহাক্না হায়খি।
“মোদীনা মীয়ামগী অৱা-অনা খঙবগী মতৌ অমসুং মোদীগী স্কিমশিং অসিদি নোংমগী পুন্সিদা থেংনবা এক্সপেরিএন্সশিংদগী থোক্লকপনি”, পি.এম. মোদীনা হায়খি। পুন্সিগী তসেংবা মতৌ থেংনবনা মীয়ামগী মসিগুম্বা অৱা-অনা খঙবা ঙম্লিবনি, চুনবা স্কিম শেম্বা ঙম্লিবনি, মহাক্না হায়খি। মসিনা মরম ওইরগা, স্কিমশিং অসিনা লৈবাক্কী ইমা অমসুং ইচানুপীশিংগী পুন্সিদা মহিংদা নুংঙাই য়াইফবগী চাং হেনগৎহল্লিবনি।
নারী শক্তিনা পুন্সিগী থেংখাং খুদিংদা থেংনবা হীরম কয়াদা মিৎয়েং চঙলিবা স্কিম কয়াগী মতাংদা প্রধান মন্ত্রীনা ৱাফম থমখি। নুপীমচাশিংবু পোক্ত্রিঙৈদা লৌথোকপা থিংনবগীদমক্তা, বেতি বচাও বেতি পরহাও, মীরোনবী মমাশিংদা ন্যুত্রিসন ফংহন্নবা লুপা 6000গী তেংবাং পীবা, এজুকেসনগী মতমদা রিসোর্স ফংহন্নবা পায়খৎপা সুকনয়া সামৃধী, ওন্তোপ্রিনরগী হীরমদা মশাগী ফিবম শেম্বা ঙমজনবা মুদ্র য়োজনাগী তেংবাং, মেতর্নিতী লীব শাংদোকপা, লেম্না লাইয়েংবা, অহোঙবা হিদাক লাংথক ফংহনবা, পি.এম. অৱস য়ুমশিংবু নুপীশিংগী মিংদা পীবগী থৌওংশিংনা পায়খৎপগা লোয়ননা থৌওংশিং অসিনা অরিবা ৱাখল্লোনশিংবু মুত্থৎলি। লৈবাক্কী নুপীশিংনা দ্রোন তেক্নোলোজী শিজিন্নদুনা লৌউবগী থৌওংদা অহোংবা পুরক্লিবা অসিবুশু মহাক্না শকখঙখি। প্রধান মন্ত্রীনা দ্রোন দিদি অমগা ৱারী শাখিবগী থৌদোক নীংশিংলদুনা, চাগা, স্কিল হেনগৎহনবা অমসুং দ্রোন দিদিশিংবু শকখঙবনা নুপীশিংগী পাঙ্গল হাপ্লিবা অসিবুশু মহাক্না মখা তানা পনখি। “লৈবাক্কী নুপীশিংনা তেক্নোলোজীগী ইহৌবু লুচিংগনি হায়বা ঐহাক্না থাজৈ”, প্রধান মন্ত্রীনা হায়খি। দ্রোন তেক্নোলোজী শিজিন্নদুনা শঙ্গোম অমসুং মনা –মশিংগী পোত্থোকপু কৈথেলদা য়ৌহনবা, হিদাক য়ৌহনবগুম্বা অনৌবা এভেন্যু কয়া অমসু দ্রোন দিদিশিংগীদমক্তা হাংদোক্লি হায়না প্রধান মন্ত্রীনা মখা তাখি।
“মমাংগী দিকেদতা লৈবাক্কী সেল্ফ হেল্প গ্রুপশিংনা পাকথোক চাউথোকখিবা অসিদি মশক থোকপা মতৌ অমনি। কাঙলুপশিং অসিনা নুপীবু মপাঙ্গল হাপ্পগী হীরমদা অনৌবা থৌওং অমা হৌদোক্লি”, মহাক্না হায়খি। সেল্ফ হেল্প গ্রুপশিংদা নুপীশিংনা য়ারিবা মরু ওইবা থৌদাংশিং নীংশিংলদুনা, প্রধান মন্ত্রীনা অসুম্না হায়রদুনা নুপীশিংগী মফমদা তৌবীমল খঙবা উৎখি, “ঐহাক্না ঙসি লৈবাক্কী সেল্ফ হেল্প গ্রুপকী ইচে-ইচল খুদিংবু থাগৎচরি। মখোয়না হোৎনবা কনবগী মতৌনা মখোয়বু লৈবাক শেম্বদা লুচিংবগী থৌদাং লৌবা ঙমহল্লে”। সেল্ফ হেল্প গ্রুপশিংদা নুপীশিংনা শরুক য়াবগী মশিং মশক থোক্না হেনগৎলক্লিবা অসিবু মহাক্ন শকখঙলদুনা অদুম্না হায়খি, “ঙসিদি সেল্ফ হেল্প গ্রুপশিংদা শরুক য়ারিবা নুপীশিংগী মশিংনা করোর 10 হেনখ্রে”। সেল্ফ হেল্প গ্রুপশিংবু শৌগৎনবা সরকারনা পায়খৎলিবা খোঙথাংশিং পল্লদুনা, প্রধান মন্ত্রীনা অসুম্না হায়খি, “হৌখিবা চহি 10 অসিদা ঐখোয়গী সরকারনা সেল্ফ হেল্প গ্রুপশিংবু পাকথোক চাউথোকহনখিবগা লোয়ননা গ্রুপশিং অসিগী চাদা 98কী বেঙ্ক একাউন্ত হাংবদা তেংবাংখি”। মসিগুম্বা গ্রুপ্তা পীরিবা শেলগী তেংবাংশু লুপা লাক্ষ 20দা হেনগৎখ্রে অমসুং গ্রুপশিং অসিগী একাউন্তশিংদা লুপা করোর লাক্ষ 8 হেন্না হাপখ্রে। মতমগা চুনবা ইনফ্রাস্ত্রকচরগী তঙাই ফদবা লৈরকপদগী, হায়রিবা সেল্ফ হেল্প গ্রুপশিং অসিগী চাগাদশু শরুক অহুম থোক্না হেনগৎখ্রে হায়না প্রধান মন্ত্রীনা হায়খি।
শেন্মিৎলোনগী মপাঙ্গল হাপ্পগী মথক্তা, প্রধান মন্ত্রীনা সেল্ফ হেল্প গ্রুপশিং অসিনা খুন্নাইদা অফবা ইথিল পীরিবা অসিবুসু পনখি অমসুং অসুম্না হায়খি, “গ্রুপশিং অসিনা খুঙ্গংগী ইনফ্রাস্ত্রকচর অমসুং খুঙ্গংগী খুন্নাইশিংবু মপুং ওইনা চাউখৎহনবদা মশক থোক্না তেংবাংখি”। বেঙ্ক শখী, কৃষি শখী, পশু শখী অমসুং মতস্যা শখীগী থৌদাং অমসুং সেবাশিংবু প্রধান মন্ত্রীনা পাউদমখি। “দিদিশিং অসিনা লৈবাক্কী ওইবা হকশেলদগী হৌরগা দিজিতেল ইন্দিয়া ফাওবগী কেম্পেনশিংদা অনৌবা ইনোৎ হাপ্লি। প্রধান মন্ত্রী গ্রামীন দিজিতেল সাকশর্তা অভিয়ান চলায়রিবশিংগী চাদা 50 হেনবদি নুপীশিংনি অমসুং মসিগী বেনেফিশরীশিংগী চাদা 50 হেনবশু নীপা ঙাক্তনি। মসিগুম্বা মায় পাকপগী থৌদোক কয়া অসিনা ঐহাক্কী নারী শক্তিদা লৈবা থাজবগী চাংশু হেনগৎহল্লি”, প্রধান মন্ত্রীনা হায়খি।
প্রধান মন্ত্রীনা সেল্ফ হেল্প গ্রুপশিংনা মাঙজিল থানা থোক্লক্তুনা পি.এম. সুর্য়ঘর মুফ বিজলী য়োজনাবু তেংবাংসি হায়খি। সেল্ফ হেল্প গ্রুপকী মেম্বরশিংনা থৌদাং লৌরবদি, স্কিম অসিগী ওইনা মখোয়গী মফমদা অহানবা প্রাইওরিতী পীগনি হায়না মহাক্না হায়খি।
কেন্দ্র মন্ত্রী, শ্রী অর্জুন মুন্দা, দাঃ মনশুখ মন্দাবিয়া অমসুং শ্রী গিরিরাজ সিংহনশু ঙসিগী থৌরমদা অতোপ্পা মীথুংলেন কয়াগা লোয়ননা শরুক য়াখি।
নমো দ্রোন দিদি অমসুং লাক্ষপতি দিদি অসিদি প্রধান মন্ত্রীগী শেন্মিৎলোনগী মপাঙ্গল হাপ্পা হেনগৎপা অমসুং নুপীশিংগী মরক্তা শেল থুমগী নিংতম্বা পুরকপা, অখন্ননা খুঙ্গংগী মফমশিংদা, হায়বগী পান্দমগী মরু ওইবা খোঙথাংশিংনি। পান্দম অসিবু ফংবদা তেংবাংনবগীদমক্তা, দীন্দয়াল অন্ত্যোদয়া য়োজনা, নেস্নেল রুরেল লাইবলিহুদ মিসনগী তেংবাংদগী মায় পাকপা ফংখ্রবা অমসুং সেল্ফ হেল্প গ্রুপশিংবু মখা তানা চাউখৎহন্নবা মখোয়গী মেম্বরশিংবু পুক্নিং থৌগৎলিবী লাক্ষপতি দিদিশিংবু ইকায় খুম্নগনি।
कोई भी देश हो, कोई भी समाज हो, वो नारीशक्ति की गरिमा बढ़ाते हुए, उनके लिए नए अवसर बनाते हुए ही आगे बढ़ सकता है: PM @narendramodi pic.twitter.com/RS5a296wCg
— PMO India (@PMOIndia) March 11, 2024
हमारी बहनें देश को सिखाएंगी कि ड्रोन से आधुनिक खेती कैसे होती है: PM @narendramodi pic.twitter.com/eJ4HsFbiVf
— PMO India (@PMOIndia) March 11, 2024
मेरा विश्वास है, देश की नारीशक्ति, 21वीं सदी के भारत की तकनीकी क्रांति को नेतृत्व दे सकती है: PM @narendramodi pic.twitter.com/x3l8LXpqRA
— PMO India (@PMOIndia) March 11, 2024
बीते 10 वर्षों में जिस तरह भारत में महिला स्वयं सहायता समूहों का विस्तार हुआ है, वो अपने आप में अध्ययन का विषय है: PM @narendramodi pic.twitter.com/PvyeStwybk
— PMO India (@PMOIndia) March 11, 2024
