প্রধান মন্ত্রী শ্রী নরেন্দ্র মোদীনা ঙসি বনাসকান্ত জিলাগী ভব-থরাদতা মীয়ামগী মীফম অমদা ৱা ঙাংখ্রে। মহাক্না অৱাং গুজরাতকী চাউরাক্না লুপা ক্রোর ২০,০০০গী দিবেলপমেন্ত প্রোজেক্তশিং শঙ্গাখ্রে অমসুং উরেপ উয়ুং তমখ্রে। নবরাত্রিগী অশেংবা কুমহৈ লোইশিনখ্রে অমসুং নুমিৎ অসি ভগবান মহাবীর জয়ন্তীনি হায়না পল্লদুনা প্রধান মন্ত্রীনা মা অম্বাজী অমসুং ভগবান শ্রী ধরানিধার্জীদা ইকায় খুম্নবা উৎখি।
অহানবা ওইনা দিসা এয়রবেজদা হকথেংননা লেন্দ তৌবদা হরাওবা ফোংদোক্লদুনা, প্রধান মন্ত্রীনা ইন্তর্নেস্নেল বোর্দরদগী কিলোমীতর ১৩০ খক্তং লাপ্না লৈবনা মসিগী স্ত্রেতেজিক ওইবা মরুওইবা অদু পনখি। মহাক্না হায়খি মদুদি দেসা এয়রপোর্ত পাকথোক চাউথোকহনবগী থবক অসি লৌমীশিংনা প্রোজেক্ত অসিগীদমক্তা মখোয়গী লম খুদোংচাবা পীবীরবসু চহী তরাগী খুজিং কয়াগী মমাংদগী লেপখিবনি। প্রধান মন্ত্রী মোদীনা হায়খি, "ঐখোয়গী সরকারনা থবক অসি অখন্নবা মওংদা লোইশিনখি।" এয়রপোর্ত অসি চাউখৎ-থৌরাংগী মাইলস্তোন অমসুং লৈবাক অসিগী মরুওইবা স্ত্রাতেজিক এসেৎ অমনি হায়না মহাক্না হায়খি।
ভব-থরাদ অমসুং বনাসকান্ত লমদমগা মহাক্কী মরী লৈনবগী মতাংদা প্রধান মন্ত্রীনা পনখি। মহাক্না ওর্গনাইজেসনগী থবক তৌরম্বা মতমগী মতাংদা পনখি। মহাক্না লমদম অসিগী খুঙ্গংশিংদা মতম শাংনা চৎখি। মফম অদুগী মমা অমসুং ইচিল-ইনাওশিংনা নুংশি-চান্ননা শেমজবা বজরা রোটলা, ঘি, গাউদ অমসুং শিয়েরা অদু মহাক্না নুংশি-চান্ননা নিংশিংখি।
লমদম অসিগী চাউখৎ-থৌরাংগা লোয়ননা মহাক্না চহি ২৫ শুরবা অসিদা মিৎয়েং থম্লদুনা, প্রধান মন্ত্রীনা হায়খি মদুদি মহাক্না মুখ্য মন্ত্রী ওইনা হৌদোকখিবা চাউখৎ-থৌরাংগী চেন অসি লেপ্পা লৈতনা মখা চত্থরি, হৌজিক হৌজিক লৈরিবা সরকার অসিনা ২০১৪দগী হেন্না মপাঙ্গল কনখৎহল্লে। ঙসি হৌদোকখিবা প্রোজেক্তশিং অসি ইনর্জী, লম্বী-থোং, রেলৱেজ অমসুং হাউজিংগী প্রোজেক্তশিংনি হায়না পল্লদুনা প্রধান মন্ত্রী মোদীনা হায়খি, "কোতি ২০,০০০গী প্রোজেক্তশিং অসিনা মফম অসিগী অপুনবা মশক হোংদোক্লগনি অমসুং মফম অসিগী পুন্সিদা অনৌবা থৌনা পীরগনি।"
লম্বীগী ইনফ্রাস্ত্রকচরগী প্রোজেক্তশিংগী অকুপ্পা ৱারোল পীরদুনা প্রধান মন্ত্রীনা ইদরদগী ভদালি বাইপাস ফাওবগী লম্বী মরিগী হাইৱে, ধোলভিরাদগী সান্তলপুর ফাওবগী হাইৱেগী অপগ্রেদেসন অমসুং অহমেদাবাদ-ধোলেরা এক্সপ্রেসৱে কোরিদোর শঙ্গাখিবগী মতাংদা পনখি। অসিগুম্বা কনেক্তিবিতী অসিনা ইন্দস্ত্রীশিং, ইনবেস্তমেন্ত অমসুং খুদোংচাবশিং পুরক্কনি হায়না মহাক্না অকনবা ৱাফম থমখি। রেল কনেক্তিবিতীগী মতাংদা, মহাক্না হিম্মতনগরদগী খেদব্রহ্মা ফাওবগী গেজ হোংদোকপা, মসিনা অৱাং গুজরাতকী ত্রাইবেল এরিয়াশিংবু নেস্নেল ব্রোদ গেজ নেতৱর্ককা শম্নহল্লিবা অমসুং খেদব্রহ্মা, হিম্মতনগর অমসুং অসার্বা শম্নহল্লিবা অনৌবা ত্রেন সর্বিস অমা হৌদোকখিবা অদু পনখি। শ্রী মোদীনা হায়খি, "কুহ্মশিং অসি কৈথেলগা, লৌমীশিং অসি খুদোংচাবশিংগা, অমসুং নহাশিং অসি থবক ফংহনবদা শম্নরকপা হায়বসি তশেংনা চাউখৎপা অমনি।"
ইন্দস্ত্রীএল গ্রোথ অমসুং অনৌবা ইনবেস্তমেন্ত পুরকপদা ইনর্জীগী মরুওইবা থৌদাং অদু পল্লদুনা, প্রধান মন্ত্রীনা কাভদা রিন্যুএবল ইনর্জী পার্ককা মরী লৈনবা ত্রান্সমিসন প্রোজেক্তশিংগী মতাংদা পনখি। মসিনা গিলাগাৱাৎ ৪.৫গী ইলেক্ত্রিসিতী পুথোক্কনি। মহাক্না ২০১০দা গুজরাতকী মুখ্য মন্ত্রী ওইরিঙৈদা লৈবাক অসিগী অহানবা সোলার পার্ক চরঙ্কাদা হৌদোকখিবা অদু নীংশিংলদুনা মহাক্না হায়খি মদুদি অঙনবা মতমগী খোংথাং অসিনা গুজরাতকী হৌজিক্কী রিন্যুএবল ইনর্জীগী লুচিংবগী য়ুম্ফম ওইখি। "গুজরাতনা রিনিউএবল ইনর্জীগী মরুওইবা গ্লোবেল সেন্তর অমা ওইরকপা নুমিৎ অদু ইরাপ লাপত্রে" হায়না প্রধান মন্ত্রী মোদীনা ফোংদোকখি।
মালেমনা ভারতকী চাউখৎপগী ৱারীগী মতাংদা খন্ন-নৈনরকপা মতমদা, 'গুজরাত মোদেল' অসি পাক শন্না থাগৎপা ফোংদোকখি। মসিনা ইনফ্রাস্ত্রকচর দিবেলপমেন্ত অমসুং মীয়ামগী য়াইফ-থৌরাং অসি অমত্তা ওইনা চৎমিন্নগদবনি হায়বা উৎলি। ঙসিগী থৌরম অদুদা প্রধান মন্ত্রী অৱাস য়োজনাগী মখাদা চাউরাক্না ইমুং ৪০,০০০দা পক্কা য়ুমশিং ফংহনখিবগী মতাংদা পল্লদুনা মহাক্না হায়খি, "পক্কা য়ুম অমনা ইমুং অমগী পুন্সিদা পুরক্লিবা অহোংবা অদু কান্নবা ফংলবা মীওইশিংগী মায়কৈদা উবা ফংই। লম্বীশিং অমসুং হাইৱেশিং শেমগদবনি, অদুবু মীচম প্রজাগী পুন্সি মহিংসু ফগৎহনগদবনি।"
অৱাং থংবা গুজরাত্তা চহী কয়াগী মমাংদা থোকখিবা অৱা-অনা, ঈশিংগী অৱাবা অদু নীংশিংলদুনা, প্রধান মন্ত্রীনা মতম অদুগী মতাংদা পনখি, মতম অদুদা নুপীশিংনা ঈশিং পুরক্নবা কিলোমীতর কয়া চৎপা মথৌ তাখি অমসুং লৌমীশিংনা মখোয়গী থবকশিংগী অচুম্বা মমল ফংবা ঙমখিদে। মহাক্না গুজরাতকী মীয়ামগী ইথিলবু মখোয়গী তুংগী পুন্সিদা অহোংবা পুরক্নবা ৱারেপ লৌখিবগীদমক থাগৎপা ফোংদোকখি। মহাক্না সুজালম সুফালম স্কিম অমসুং নর্মদাগী ঈশিং হেঙ্গৎহনবা অসি ত্রান্সফোর্মেতিব ইন্তরভেন্সনশিংনি হায়খি। প্রধান মন্ত্রীনা হায়খি, "হৌজিক্তি মফম অসিগী লৌমীশিং অসি মহৈ-মরোং অমখক্তদা মখা পোল্লমদ্রে। বনাসকান্তা অসি মরুওইবা আলু পুথোকপা মফম অমা ওইরকপা অসি মসিগী খুদম অমনি।"
গুজরাতকী চহী ২৫গী চাউখৎপগী খোঙচৎপু থাগৎলদুনা প্রধান মন্ত্রীনা হায়খি মদুদি রাজ্য অসিনা মতৌ করম্না মশাগী রেকোর্দশিং লেপ্তনা শেমদুনা হেনগৎলক্লি। মহাক্না ২০০৫দা লুপা করোর ৬৫০গী বজেৎ অমগা লোয়ননা 'অর্বান দিবেলপমেন্ত ইয়ার' হৌদোকখিবা অদু নীংশিংখি, মসি হৌজিক লুপা করোর ৩৩,০০০ হেনখ্রে। অনৌবা ম্যুনিসিপাল কোর্পোরেসন ৯গীদমক লুপা করোর ২,৩০০গী অপীবা প্রপোজেল ৩০০রোম অয়াবা পীরকপা, ম্যুনিসিপালিতী ৭২গী অপগ্রেদেসন অমসুং লুপা করোর লাখ ৪ হেনবা রাজ্যগী বজেৎ পীরকপগী মতাংদা পল্লদুনা মহাক্না চাউখৎ-থৌরাং অসি খুঙ্গং, শহর অমসুং সহর খুদিংমক্তা য়ৌহল্লগনি হায়না থাজবা পীখি। "অদোমগী থাজবা অসি পঞ্চায়ততগী পার্লিয়ামেন্ত ফাওবা লৈরি, দিবেলপমেন্তকী সুপরফাস্ত এক্সপ্রেস অসি খোঙজেল অসুম্না চত্থদুনা লৈগনি" হায়না শ্রী মোদীনা ফোংদোকখি।
মালেমগী ফিভমগী মতাংদা প্রধান মন্ত্রীনা হায়খি মদুদি লৈবাক কয়ানা লান, অরেপ্পা লৈতবা অমসুং থাইগী মমল হেনগৎলকপা, দিজেল অমসুং পেট্রোলগী মমল ১০দগী ২৫% ফাওবা হেনগৎলকপা অসিগা লোয়ননা সুপর পৱার নেসন্দা ভারতনা মায় পাকপা ফোরেন পোলিসী অমসুং মীয়ামগী অপুনবগী মতেংনা ফিভম অসি কন্ত্রোল তৌরি।
কোবিদ লাইচৎ মনুংদা লৈবাক অসিনা অমত্তা ওইনা থেংনখিবা অদু নীংশিংলদুনা প্রধান মন্ত্রীনা হৌজিক ওইরিবা অৱাবা মতম অসিদা লৈবাক মীয়াম্বু অমত্তা ওইনা লেপ্নবা তকশিনখি। "ভারতনা মালেমনা লান্থেংনরিঙৈদা অচেৎপা থাক্তা লৈবতা নত্তনা, মসিনা নোংম-নোংমগী চাউখৎপগী লম্বীদা মাংলোমদা চংশিল্লি, অমসুং ঙসিগী প্রোজেক্তশিং অসি মসিগী ৱারেপ অসিগী অতোপ্পা খুদম অমনি।" হায়না প্রধান মন্ত্রীনা ফোংদোকখি।
