প্রধান মন্ত্রী শ্রী নরেন্দ্র মোদীনা ঙসি রাজস্থানগী জয়পুরদা লৈবা জয়পুর একজিবিসন এন্দ কনভেন্সন সেন্তর (JECC) দা রাইজিং রাজস্থান গ্লোবেল ইনভেস্তমেন্ত সম্মিত ২০২৪ অমদি রাজস্থান গ্লোবেল বিজিনেস এক্সপো হৌদোকখ্রে। তিল্লিবা মীয়ামগী মফমদা ৱা ঙাংলদুনা, প্রধান মন্ত্রীনা ঙসি অসি রাজস্থানগী মায় পাকপগী খোঙচত্তা অখন্নবা নুমিৎ অমনি হায়খি। মহাক্না পিঙ্ক সিতী – জয়পুরদা পাঙথোক্লিবা রাইজিং রাজস্থান গ্লোবেল ইনভেস্তমেন্ত সম্মিত ২০২৪ দা শরুক য়ারিবা ইন্দস্ত্রী অমদি বিজিনেস লুচিংবশিং, ইনভেস্তরশিং, অমদি মীথুং পুম্নমক্কী মফমদা নুংঙাইবা ফোঙদোকখি। মহাক্না অচৌবা থৌরম অসি পাঙথোকপগীদমক রাজস্থান লৈঙাক্কী মফমদসু নুংঙাইবা ফোঙদোকখি।
বিজিনেস এক্সপর্তশিং অমদি ইনভেস্তরশিং ভারত্তা লৈরিবা বিজিনেস ক্লাইমেত অসিনা পুক্নিং চিংশিল্লি হায়না প্রধান মন্ত্রীনা হায়খি। ভারতনা পর্ফোর্ম, ত্রান্সফোর্ম অমদি রিফোর্মগী লাইৱাগা লোয়ননা চঙশিল্লিবা খোঙজেল অসি হীরম খুদিংদা উবা ফংলি হায়না মহাক্না মখা তাখি। ভারতনা নীংতম্লবা মতুং দেকেদ ৭ কী মতুংদা মালেমগী ১১শুবা খ্বায়দগী চাউবা শেন্মিৎলোনগী থাক্তা কাখৎলকপা ঙমখি, অদুবু হৌখিবা দেকেদ অসিখক্তদা ভারতনা মালেমগী ৫শুবা খ্বায়দগী চাউবা শেন্মিৎলোনগী থাক্তা কাখৎলকখি হায়না শ্রী মোদীনা ফোঙদোকখি। “ভারতকী শেন্মিৎলোন অমদি এক্সপোর্ত হৌখিবা চহি ১০ অসিদা শরুক অনিরোম হেনগৎলক্লে,” হায়না শ্রী মোদীনা ফোঙদোকখি। ফোরেন দাইরেক্ত ইনভেস্তমেন্ত ফাওবা ২০১৪ মমাঙদা য়েংনবদা হৌখিবা দেকেদ অসিদা শরুক অনি হেন্না হেনগৎলে হায়না মহাক্না মখা তাখি। ভারতকী ইনফ্রাস্ত্রকচর এক্সপেন্দিচরসু লুপা ত্রিলিয়ন ২ রোমদগী লুপা ত্রিলিয়ন ১১ দা হেনগৎলক্লে হায়না মহাক্না মখা তানা ফোঙদোকখি।
“ভারতকী মায় পাকপনা দিমোক্রেসী, দিমোগ্রাফী, দিগিতেল দেতা অমদি দেলিভরীগী অশেঙবা মতিক উৎলি,” হায়না প্রধান মন্ত্রীনা হায়খি। ভারতকুম্বা খেন্নবনা থল্লবা লৈবাক অমদা দিমোক্রেসীনা মায় পাকপা অমদি মসিগী মপাঙ্গল হাপ্পা অসি মশান অচৌবা মায় পাকপা অমনি হায়না মহাক্না মখা তাখি। মীয়ামগী লৈঙাক লৈবা লৈবাক অমা ওইবগা লোয়ননা মীওইবা খুন্নাইগী য়াইফনবা থবক পায়খৎপা হায়বসিনা ভারতকী ৱাংউলোনগী নুংদা চেল্লিবা ঈচেলনি হায়না প্রধান মন্ত্রীনা ফোঙদোকখি। মসি ভারতকী মচং ওইবা মচৎ অদুনি হায়না মহাক্না মখা তাখি। মহাক্না ভারতকী মীয়ামবু মখোয়গী দিমোক্রেতিসীগী মঙম শীজিন্নবা অমদি ভারত্তা মরা চেৎপা লৈঙাক অমা লৈহনবগীদমক থাগৎপা ফোঙদোকখি। শ্রী মোদীনা নহাগী মতিংবু ভারতকী অরিবা চৎনবী অসি মাঙদা পুখৎপগীদমক্তসু থাগৎখি। ভারতনা লাক্কদৌরিবা চহি কয়া নহা মীশিং খ্বায়দগী য়াম্না লৈবা লৈবাক ওইখিগনি অমদি ভারত্তা নহা মশিং খ্বায়দগী য়াম্না লৈবগা লোয়ননা হৈ-শিংবা নহা কাঙলুপ মশিং খ্বায়দগী হেন্না লৈবা লৈবাক ওইখিগনি হায়না মহাক্না ফোঙদোকখি। মায়কৈ অসিদা লৈঙাক্না খোঙথাং কয়া লৌখৎলি হায়না মহাক্না মখা তানা ফোঙদোকখি।
হৌখিবা দেকেদ অসিদা, ভারতকী নহাশিংগী মতিংনা ঐখোয়গী পাঙ্গলদা অতোপ্পা মায়ওন অমা হাপচিল্লে, অমদি হায়রিবা মায়ওন অদুদি ভারতকী তেক পৱার অমদি দেতা পৱার অসিনি হায়না শ্রী মোদীনা ফোঙদোকখি। ঙসিগী মালেম অসিগী সেক্তর খুদিংদা তেক্নোলোজী অমদি দেতাগী মরুওইবা ৱাফমশিং ফোঙদোক্লদুনা, শ্রী মোদীনা হায়খি, “হৌজিক অসি তেক-দ্রিভন অমদি দেতা-দ্রিভন সেঞ্চুরীনি”। হৌখিবা দেকেদ অসিদা, ভারতকী ইন্তরনেত শীজিন্নবা মীশিং শরুক ৪ রোম হেনগৎলে। দিজিতেল ত্রাঞ্জেক্সন্দা অনৌবা রেকোর্দশিং থম্লি। ভারতনা মালেমগী মফমদা মাগী দিমোক্রেসী, দিমোগ্রেফী অমদি দেতাগী অশেঙবা মতিং উত্থোক্লি হায়না প্রধান মন্ত্রীনা ফোঙদোকখি। “ভারতনা দিজিতেল তেক্নোলোজী দিমোক্রেতাইজ তৌবনা মতৌ করম্না সেক্তর অমদি কম্ম্যুনিতী খুদিংদা কান্নবা পীরিবগে হায়বা উৎলে,” হায়না শ্রী মোদীনা হায়খি। UPI, দাইরেক্ত বেনিফিত ত্রান্সফর সিস্তেম, গভর্নমেন্ত ই-মার্কেতপ্লেস (GeM), ওপন নেতৱর্ক ফোর দিজিতেল কম্মর্স (ONDVC) কুম্বা ভারতকী মশিং য়াম্লবা তেক্নোলোজীগী থৌশিলশিংগা লোয়ননা দিজিতেল ইকোইসিস্তেমগী মতিক উৎলিবা অসিগুম্বা ফম্পাক কয়া অমসু লৈরি হায়না মহাক্না হায়খি। মখোয়গী অচৌবা ইথিল রাজস্থান্দসু উবা ফংগনি হায়না মহাক্না মখা তাখি। লৈবাক অসিনা চাওখৎপা হায়বসি স্তেতশিংনা চাওখৎলক্লবা মতমদা ওইগদৌরিবনি, অমদি রাজস্থান্না চাওখৎপগী অনৌবা পন্দোল লোম্লকপা মতমদা ভারতকীসু অনৌবা পন্দোল লোমগদৌরিবনি হায়বগী থাজবা শ্রী মোদীনা ফোঙদোকখি।
পাক চাউবগী মতাঙদা রাজস্থান্না ভারতকী খ্বায়দগী চাউবা স্তেতনি হায়রদুনা, শ্রী মোদীনা রাজস্থানগী মীয়ামবু মখোয়গী পুকচেল চাওবা, হোৎনবা কন্বা মতৌ, পুকচেল শেংবা, খ্বায়দগী লুবা পান্দমশিং ফংনবা চেৎনা নীংবা, লৈবাক্না মাঙদা থম্বা হায়বা ৱাখল্লোন্দা থাজবা থম্বা, লৈবাক্কীদমক তৌবা য়াবা খুদিংমক তৌগনি হায়বগী অচেৎপা ফিরেপকীদমক থাগৎপা ফোঙদোকখি। নীংতম্লবা মতুংগী লৈঙাক্না মরুওইবা মীৎয়েঙ থমখিবসি লৈবাক চাওখৎপা নৎত্রগা লৈবাক্কী পারী পুরীগী লন য়োকখৎপা অনিমক্তা ওইখিদে, অমদি মদুগী মহৈ রাজস্থান্না ফুক্কৎলি হায়না মহাক্না মখা তাখি। মহাক্কী লৈঙঙাক্না চাওখৎপা অমদি পারী পুরীগী লন-থুম য়োকখৎপা হায়বা ৱাখল্লোন্দা থবক তৌরি অমদি মসিদগী রাজস্থান্না চাউনা কান্নবা ফংগনি হায়না মহাক্না থাজবা পীখি।
রাজস্থান অসি মাঙদা চঙশিল্লক্লিবা স্তেত অমখক্তা নত্তে, থাজবা য়াবা স্তেত অমসুনি হায়রদুনা, প্রধান মন্ত্রীনা রাজস্থান অসি রিসেপ্তিব ওই অমদি মতমগী মতুং ইন্না মশাবু কমদৌনা শেমজগনি হায়বা খঙই হায়খি। রাজস্থান অসি শিংনবশিং মায়োক্নবা অমদি অনৌবা খুদোংচাবশিং শেম্বগী অতোপ্পা মমিং অমনি হায়না মহাক্না মখা তাখি। মীয়াম্না থাগৎপা রেস্পোন্সিব অমদি রিফোর্মিস্ত ওইবা লৈঙাক অসিনা রাজস্থানগী R-ফেক্তরগী অনৌবা মায়ওন অমনি হায়না শ্রী মোদীনা হায়খি। মহাক্না রাজস্থানগী মুখ্য মন্ত্রী অমদি মহাক্কী তীম পুম্ববু তেনখ্রবা মতমগী মনুংদা অচৌবা থবকশিং পায়খৎপগীদমক থাগৎখি। স্তেত লৈঙাক অসি নুমিৎ খরনিগী মনুংদা চহি ফারক্লগনি হায়রদুনা, শ্রী মোদীনা মুখ্য মন্ত্রীবু মহাক্কী মতিং লৈবা, অমদি লায়রবা অমসুং লৌমীশিংগী য়াইফনবা, নহাশিংগী অনৌবা খুদোংচাবশিং শেমগৎপনচিংবা য়াইফ-থৌরাংগী থবকশিং, লম্বী-থোং, মৈ, ঈশিংনচিংবা চাওখৎ থৌরাংগী থবকশিং য়াওনা তোঙান তোঙানবা হীরমশিংদা লেপ্লিবা ফিরেপকীদমক থাগৎখি। ক্রাইম অমদি শেঞ্জা থুমজা লাকশিন্বদা লৈঙাক্না খোঙলৈ থুনা থবক পায়খৎলিবা অসিনা মীয়াম অমদি ইনভেস্তরশিংগী মফমদা অনৌবা মথুম মরাং হৌবা ইহুল অমা ফাওহল্লে হায়না মহাক্না মখা তাখি।
রাজস্থানগী অশেঙবা মতিং ফুদোকহন্বা মরু ওই হায়রদুনা, প্রধান মন্ত্রীনা রাজস্থান অসি মহৌশাগী মচাকশিংগী তুংনফম, ইনাক খুল্লবা পারী পুরীগী লনগা লোয়ননা মোদর্ন কন্নেক্তিবিতীগী নেতৱর্ক, অচৌবা লম অমদি মতিং নীংথিনা লৈবা নহাশিংগী লমদম অমনি হায়খি। লম্বী থোংদগী হৌরগা রেলৱেজ ফাওবদা, হোস্পিতেলিতীদগী হৌরগা হেন্দিক্রাফ্ত ফাওবদা, ফার্মদগী হৌরগা ফোর্ত ফাওবদা রাজস্থাক্না মীয়ামদা পীগদবা খুদোল কয়া লৈরি হায়না মহাক্না মখা তাখি। হায়রিবা রাজস্থানগী মতিংশিং অসিনা স্তেত অসিবু ইনভেস্তমেন্তকী পুক্নিং চিংশিন্নিংঙাই ওইরবা লমথুংফম অমা ওইহল্লি হায়না শ্রী মোদীনা হায়খি। রাজস্থান্দা তমশিন্নবা অমদি মাগী মতিং হেনগৎহন্নবা ক্বালিতী লৈ হায়রদুনা, মরম অসিননি লৈঙোয়গী লৈপুংশিংদা ফাওবা উ পাম্বীশিং মহৈ য়াল্লিবা, অমদি চোর্ফোন অমদি থাউনম পাম্বী থাবগী চাং হেনগৎলক্লিবা হায়না শ্রী মোদীনা হায়খি। জয়পুরগী হিগোক মচুগী চফু, প্রতাপগরগী থেবা জেৱেল্লরী, অমদি ভিলৱারাগী তেক্সতাইল ইনোভেসন তোঙান্না মমিং চৎলি অদুগা মক্রানা মার্বল অমদি কোতা দোরিয়াসু মালেম পুম্বদা মমিং চৎলি। নগৌরগী পান মেথিসু তোপ তোপ্পি অদুগা স্তেত লৈঙাক্না দিস্ত্রিক্ত খুদিংগী মতিং খঙদোক্নবা থবক তৌরি হায়না মহাক্না মখা তাখি।
জিঙ্ক, লীদ, কোপ্পর, মার্বলো লাইমস্তোন, গ্রেনাইইত, পোতাসনচিংবা ভারতকী মিনরেল রিজর্বশিংগী অয়াম্বা শরুক্তি রাজস্থান্দা লৈ হায়রদুনা, প্রধান মন্ত্রীনা হায়রিবশিং অসিনা মরোমদোম লেপচবা ভারতকী অচেৎপা য়ুম্ফম ওইরি অমদি রাজস্থান্না ভারতকী ইনর্জী সিক্যুরিতীদা অচৌবা থৌদাং য়ারি হায়খি। ভারতনা দেকেদ অসি লোইশিল্লকপদা রিনিউএবল ইনর্জী কেপাসিতীঈ গিগাৱাত ৫০০ শেমগৎনবা পান্দম থম্লি হায়না নৌহৌননা নীংশিংলদুনা, শ্রী মোদীনা ভারতকী খ্বায়দগী চাউবা সোলার পার্কশিং মফম অসিদা শাবগা লোয়ননা হীরম অসিদসু রাজস্থান্না অচৌবা থৌদাং লৌরি হায়খি।
রাজস্থান্না দিল্লী অমদি মুম্বাই হায়রিবা অচৌবা শেন্মিৎলোনগী মফম অনিবু, অমদি মহারাস্ত্র অমদি গুজরাতকী হিথাংফমশিংবু অৱাংথংবা ভারতকা শম্নহল্লি হায়রদুনা, শ্রী মোদীনা কিলোমিতর ২৫০ শাংবা দিল্লী-মুম্বাই ইন্দস্ত্রিএল কোরিদোর অসি রাজস্থান্দা লৈ হায়খি। মসিনা রাজস্থানগী অলৱর, ভারতপুর, দৌসা, সৱাই মাধোপুর, তোঙ্ক, অমদি কোতা দিস্ত্রিক্ততা চাউনা কান্নবা পীগনি হায়না মহাক্না ফোঙদোকখি। কিলোমিতর ৩০০ শাংবা রেল নেতৱর্ক দেদিকেতেদ ফ্রৈত কোরিদোর রাজস্থান্দা লৈ হায়রদুনা, শ্রী মোদীনা কোরিদোর অসিনা জয়পুর, অজ্মের, সিকার, নগৌর, অমদি অলৱর দিস্ত্রিক্তশিং ফাওদুনা চৎলি হায়খি। রাজস্থান্না অসিগুম্বা অচৌবা কন্নেক্তিবিতী প্রোজেক্তশিংগী ময়ায়দা লৈদুনা মফম অসি অচৌবা খুদোংচাবশিং, মরুওইনা অকংবা হিথাংফম অমদি লোজিস্তিক সেক্তরদা শেল থাদনবগী ফরবা লমথুংফম অমনি হায়না প্রধান মন্ত্রীনা হায়খি। লৈঙাক্না মল্তি-মোদেল লোজিস্তিক পার্কশিং, সেক্তর স্পেসিফিক ইন্দস্ত্রিএল পার্ক দজন অনিরোম, অমদি এয়র কার্গো কমপ্লেক্স অনি শেমগৎলি হায়না মহাক্না মখা তাখি। মসিনা ইন্দস্ত্রিএল কন্নেক্তিবিতীগী ফীভম ফগৎহন্বগা লোয়ননা রাজস্থান্দা ইন্দস্ত্রী লিংখৎপদা লায়হনগনি হায়না মহাক্না মখা তানা ফোঙদোকখি।
ভারতকী নীংথিরবা তুংলমচত্তা তুরিজমগী অচৌবা মতিংগী মতাঙদা ৱা ঙাংলদুনা, প্রধান মন্ত্রীনা ভারত্তা মহৌশা, নাৎ, এদভেঞ্চর, কন্ফরেন্স, দেস্তিনেসন ৱেদ্দিং, অমদি হেরিতেজ তুরিজমগী অচৌবা মতিং লৈ হায়বা ৱাফম থমখি। রাজস্থান অসি ভারতকী তুরিজম মেপগী মরুওইবা মফম অমনি অমদি মসিদা তুর, ত্রাভেল অমদি হোস্পিতেলিতী সেক্তরগী মথৌ তাবশিং মরাং কায়না ফংহনগদবা পুৱারী, পারী পুরীগী লন, অচৌবা লৈকঙলা, অমদি নীংথিরবা পাৎ লোয়ননা খেন্নবা মখলগী ঈশৈ নোংমাই অমদি চীঞ্জাকশিং লৈ হায়না মহাক্না মখা তাখি। রাজস্থান অসি মীয়াম্না লুহোংবগীদমক অমদি পুন্সিগী কাউঙম্লোইদবা মীৎকুপশিং শেম্নবগীদমক লাকপা পাম্নমকা মালেমগী খনগৎলপা মফমশিংগী মরক্তা অমনি। রাজস্থান্দা ৱাইল্দলাইফ তুরিজমগী মতিং চাউনা লৈ হায়রদুনা শ্রী মোদীনা রন্থমবোর, সরিস্কা, মুকুন্দ্রা হিল্সস, কিওলাদিও অমদি ৱাইল্দলাইফপু পামজবা মীওইশিংনা চৎনিংগদবা মফম কয়া অমা লৈরি হায়খি। রাজস্থান লৈঙাক্না লমকোয় লমথুংফমশিংগা হেরিতেজ সেন্তরশিংগা হেন্না ফবা কন্নেক্তিবিতীনা শম্নহনবগীদমক প্রধান মন্ত্রীনা অপেন্বা ফোঙদোকখি। ভারত লৈঙাক্না তোঙান তোঙানবা থীমগী সর্কিতশিংগা মরী লৈনবা স্কীমশিং হৌদোকখ্রে হায়রদুনা প্রধান মন্ত্রীনা ২০০৪ দগী ২০১৪ ফাওবদা ভারত্তা মপান লৈবাক্কী লমকোয়বা মীওই করোর ৫ রোম লাকখি, অদুগা ২০১৪ দগী ২০২৪ ফাওবদনা কোবিদনা শোকহল্লবা চহি অহুম মরি য়াওখ্রবসু মপান লৈবাকশিংদগী লম কোয়বা মীওই করোর ৭ হেন্না লাকখি হায়খি। কোবিদ লাইচৎ মনুংদা তুরিজম চপ লেপখ্রবসু, ভারত্তা লম কোয়বা লাকপা মীশিং ফনা য়াম্না হেনগৎলকখি। লৈবাক কয়াগী লম কোয়বশিংদা ফংহনখিবা ভারত্তা লাকপগী ই-ভিজা ফেসিলিতীনা মপানগী মীথুংশিংদা ফনা য়াম্না মতেঙ ওইখি হায়না মহাক্না ফোঙদোকখি। ঙসিদি ভারতকী দোমেস্তিক তুরিজম্নসু অনৌবা রেকোর্দশিং শেম্লি হায়রদুনা প্রধান মন্ত্রীনা উরাজ য়োজনা, বন্দে ভারত ত্রেন, প্রসাস স্কীম্নচিংবা স্কীমশিংনা রাজস্থান্দা চাউনা কান্নহল্লি হায়খি। রাজস্থান্না ভারত লৈঙাক্কী ভাইব্রেন্ত ভিলেজনচিংবা প্রোগ্রামশিংদগীসু কান্নবা ফংখি হায়না মহাক্না মখা তাখি। শ্রী মোদীনা লৈবাক মীয়ামগী মফমদা রাজস্থান্দা লাক্তুনা লুহোংনবা হায়রদুনা মসিনা রাজস্থান্দা চাউনা কান্নহনগনি হায়খি। রাজস্থানগী হেরিতেজ তুরিজম, ফিল্ম তুরিজম, ইকো-তুরিজম, রুরেল তুরিজম, বোর্দর এরিয়া তুরিজম পাকথোক চাউথোকহন্নবা মতিং চাউনা লৈ হায়না মহাক্না হায়খি। প্রধান মন্ত্রীনা ইনভেস্তরশিংগী মফমদা হায়রিবা হীরমশিং অসিদা মখোয়না শেল থাদবনা রাজস্থানগী তুরিজম সেক্তর মপাঙ্গল কনখৎহনগনি অমদি মখোয়গী বিজিনেস পাকথোক চাউথোকহন্বদসু মতেঙ ওইগনি হায়খি।
মালেমগী সপ্লাই অমদি ভেল্যু চেনগা মরী লৈনবা শিংনবশিংগী মরমদা পল্লদুনা, প্রধান মন্ত্রীনা ঙসিগী মালেম অসিনা লাংফমগী মতমদা ফাওবা অয়েৎপা অপন্বা লৈতনা মথৌ তৌগদবা সিস্তেম অমা মথৌ তারি হায়খি। মসিগীদমক, ভারত্তা অচৌবা মেনিফেকচরিং বেজ অমা লৈহন্বা তাই, মসি ভারতকী মথৌ তাবখক নত্তনা মালেমগী শেন্মিৎলোনগীদমকসু মথৌ তারিবনি হায়না মহাক্না মখা তাখি। ভারতনা থৌদাং অসিবু খঙলদুনা, মেনুফেকচরিংগী লমদা মরোমদোম লেপচবা ঙম্নবা ফিরেপ অমা লৌখ্রে হায়না শ্রী মোদীনা ফোঙদোকখি। ভারতনা মাগী মেক ইন ইন্দিয়া প্রোগ্রামগী মখাদা শেল য়াম্না চঙদবা মেনুফেকচরিংদা মরুওইবা মীৎয়েঙ থম্লি, অমদি ভারতকী পেত্রোলিয়ম প্রদক্তশিং, হিদাক লাংথক অমদি ভেক্সিনশিং, ইলেক্ত্রোনিক্কী পোৎলমশিং অমদি রেকোর্দ মেনুফেকচরিংনা মালেম অসিদা চাউনা কান্নহল্লি হায়না মহাক্না মখা তাখি। হৌখিবা চহিদা রাজস্থান্দগী লুপা করোর লিশিং মরিফুমরিরোমগী পোত্থোক এক্সপোর্ত তৌখি, মসিদা ইঞ্জিনিয়র্দ ৱুদ, জেন, অমদি জেৱেল্লরী, তেক্সতাইল, হেন্দিক্রাফ্ত, এগ্রো ফুদ প্রদক্তশিং য়াওরি হায়না শ্রী মোদীনা হায়খি।
ভারত্তা মেনুফেকচরিং হেনগৎহন্বদা PLI স্কীমগী হেনগৎলক্লিবা থৌদাংগী মরমদা পল্লদুনা, প্রধান মন্ত্রীনা ঙসিদি ইলেক্ত্রোনিক্স, স্পিসিএল্তী স্তীল, ওতোমোবাইল অমসুং ওতো কম্পোনেন্ত, সোলার PV, ফার্মাসিউতিকেল দ্রগকী সেক্তরশিংদা মথুম মরাং হৌনরি হায়খি। PLI স্কীম্না লুপা করোর লাখ ১.২৫ রোমগী ইনভেস্তমেন্ত পুরকখৎ, লুপা করোর লাখ ১১ রোমগী পোত্থোকশিং পুথোকলখি অমদি এক্সপোর্তকী লমদা লুপা করোর লাখ ৪ রোম হেনগৎহনখি হায়না মহাক্না মখা তাখি। নহা লাখ কয়া নৌনা থবক পীরি হায়নসু মহাক্না ফোঙদোকখি। রাজস্থান্নসু ইলেক্ত্রিক ভেহিকল মেনুফেকচরিংগী মতিং চাউনা লৈবা ওতোমোতিব অমদি ওতো কম্পোনেন্ত ইন্দস্ত্রীগী অফবা বেজ অমসু শেম্লে হায়না প্রধান মন্ত্রীনা ফোঙদোকখি। ইলেক্ত্রোনিক মেনুফেকচরিংগীদমক মথৌ তাবা ইনফ্রাস্ত্রকচরসু রাজস্থান্দা ফংলি হায়না মহাক্না মখা তাখি। শ্রী মোদীনা ইনভেস্তরশিংদা রাজস্থানগী মেনুফেকচরিংগী মতিংবু শুকশোয় শোয়দনা য়েংননবা ৱাফম থমখি।
রাইজিং রাজস্থান অসি অচৌবা থৌনা অমনি হায়রদুনা, প্রধান মন্ত্রীনা রাজস্থান অসি MSME শিংগী মতাঙদা ভারতকী মকোক থোংবা স্তেত ৫ গী মনুংদা অমনি হায়খি। চত্থরিবা সম্মিত অসিদা MSME শিংগী ওইবা তোঙান্বা কনক্লেব অমসু পাঙথক্কদৌরি হায়না মহাক্না মখা তাখি। রাজস্থান্দা স্মোল এন্দ মাইক্রো ইন্দস্ত্রী লাখ ২৭ হেন্না লৈ অদুগা মীওই লাখ ৫০ রোম্না হায়রিবা অপীকপা ইন্দস্ত্রীশিং অসিনা থবক তৌরি হায়না শ্রী মোদীনা ফোঙদোকখি। মখোয়দা রাজস্থানগী মরায়বক লেপ্নবা মতিং লৈ হায়না মহাক্না মখা তাখি। লৈঙাক অসিনা তেনখ্রবা মতমগী মনুংদা অনৌবা MSMEs পোলিসী অমা পুথোরকপদা মহাক্না অপেন্বা ফোঙদোকখি। ভারত লৈঙাক্নসু মাগী খুজিল থৌরাং অমদি ফিরেপশিংগী খুত্থাঙদা MSME শিং লেপ্পা লৈতনা মপাঙ্গল কনখৎহল্লি হায়না মহাক্না ফোঙদোকখি। “ভারতকী MSME শিং অসিনা ভারতকী শেন্মিৎলোন মপাঙ্গল কনখৎহন্বতা নত্তনা মালেমগী সপ্লাই অমদি ভেল্যু চেন মপাঙ্গল হাপ্পদসু মরুওইবা থৌদাং য়ারি,” হায়না প্রধান মন্ত্রীনা হায়খি। কোবিদ লাইচৎ মনুংদা ফার্মাগা মরী লৈনবা সপ্লাই চেনগী ওইখিবা ফীভম নীংশিংলদুনা, ভারতকী অচেৎপা য়ুম্ফম্না মরম ওইরগা ভারতকী ফার্মে সেক্তরনা মালেম্বু লাংফমগী মতমদা মতেঙ পাংবা ঙমখিবনি হায়না শ্রী মোদীনা হায়খি। মতৌ অসুম্না, মহাক্না ভারতপু অতোপ্পা পোত্থোকশিংগী অকন্বা মেনুফেকচরিং বেজ অমা ওইহন্নবা ৱাফম থমখি অমদি মসিদা ঐখোয়গী MSME শিংনা অচৌবা থৌদাং য়াগদবনি হায়খি।
খুমাঙ চাওশিন্নবগী খুদোংচাবা হেন্না ফংননবগীদমক MSME গী দিফিনিসন হোংদোক্নবা লৈঙাক্না হোৎনরিবশিং পল্লদুনা, কেন্দ্র লৈঙাক্না MSME করোর ৫ রোমবু ফোর্মেল ইকনমীগা মরী শম্নহন্দুনা মখোয়দা ক্রেদিত ফংবদা হেন্না লায়হল্লে হায়না শ্রী মোদীনা হায়খি।
লৈঙাক্না ক্রেদিত লিঙ্ক গরেন্তী স্কীম অমসু হৌদোক্লে হায়রদুনা, স্কীম অসিগী মখাদা অপীকপা ইন্দস্ত্রীশিংদা লুপা করোর লাখ ৭ লোমগী তেংবাং ফংহনখ্রে হায়না প্রধান মন্ত্রীনা হায়খি। হৌখিবা দেকেদ অসিদা MSME শিংগী ক্রেদিত ফ্লো শরুক অনি হেন্না হেনগৎখ্রে হায়রদুনা, শ্রী মোদীনা ২০১৪ দা লুপা করোর লাখ ১০ রোম ওইরম্বদু ঙসিদি লুপা করোর লাখ ২২ হেল্লে হায়খি। মসিদগী রাজস্থান্নসু চাউনা কান্নবা ফংলি অমদি MSME শিংগী হেনগৎলক্লিবা মপাঙ্গল অসিনা রাজস্থানগী চাওখি খোঙথাংবু অনৌবা পন্দোল তম্না পুখৎলগনি হায়না মহাক্না ফোঙদোকখি।
“ঐখোয়না ইরোমদোম লেপচবা ভারতকী অনৌবা খোঙচৎ অমদা থোরকখ্রে,” হায়না প্রধান মন্ত্রীনা হায়খি। আত্মনিরভর ভারত অভিয়ানগী মঙলান অসি মালেম পুম্বগীনি অমনি মসিগী ইথিলসু মালেমগী ওইগদৌরিবনি হায়না মহাক্না মখা তাখি। লৈঙাক্কী থাক্তা মখোয়না হোল ওফ গভর্নমেন্তকী পরিংদা মাঙদা চঙশিল্লি হায়না শ্রী মোদীনা ফোঙদোকখি। লৈঙাক্না সেক্তর খুদিংমক অমদি ইন্দস্ত্রিএল অমসুং মেনুফেকচরিং গ্রোথকী ফেক্তর খুদিংমক য়োকখৎলি হায়না মহাক্না মখা তাখি। সবকা প্রয়াসকী ৱাখল্লোন অসিনা চাওখৎপা রাজস্থান অমদি চাওখৎপা ভারত অমা শেমগৎকনি হায়না শ্রী মোদীনা থাজবা ফোঙদোকখি।
মহাক্কী ৱারোল লোইশিল্লকপদা, শ্রী মোদীনা ইনভেস্তর পুম্নমক্কী মফমদা রাইজিং রাজস্থানগী ফিরেপ্পু মাঙদা পুখৎনবা ৱাফম থমখি। মহাক্না মালেম পুম্বদগী লেঙলক্লিবা মীথুংশিংগী মফমদা রাজস্থান অমদি ভারত কোয়ননবা ৱাফম থম্লদুনা মসিনা মখোয়গী মফমদা কাউঙম্লোইদবা মীৎকুপশিং থেংনহনগনি হায়খি।
রাজস্থানগী গভর্নর শ্রী হরিভাউ কিসনরাও বাগরে, রাজস্থানগী মুখ্য মন্ত্রী শ্রী ভজনলাল শর্ম, মন্ত্রীশিং, MP শিং, MLA শিং, ইন্দস্ত্রী লুচিংবশিং অমদি অতৈ মীথুংশিংসু থৌরমদুদা শরুক য়াখি।
বেকগ্রাউন্দ
চহি অসিগী দিসেম্বর ৯ দগী ১১ ফাওবা পাংথোক্কদৌরিবা ইনভেস্তমেন্ত সম্মিৎ অসিগী থিমদি "রিপ্লিত, রেস্পোন্সিবল, রেদী"নি। সম্মিৎ অসিদা ৱাতর সিক্যুরিতী, সস্তেনেবল মাইনিং, সস্তেনেবল ফাইনান্স, ইনক্লুসিব তুরিজম, এগ্রী-বিজিনেস ইন্নোবেসন অমসুং নুপীশিংনা লুচিংবা স্তার্তঅপশিং য়াওনা অতোপ্পা হিরমশিংদা সেক্তরগী ওইবা সেসন ১২ পাংথোক্কনি। সম্মিৎ অসিগী মনুংদা শরুক য়ারিবা লৈবাকশিংগা লোয়ননা "ৱাতর মেনেজমেন্ত ফোর লিভেবল সিতিজ", "ভর্সেতেলিতী ওফ ইন্দস্ত্রিস-মেন্যুফেকচরিং এন্দ বিয়োন্দ" অমসুং "ত্রেদ এন্দ তুরিজম" অসিনচিংবা হিরমশিংদা লৈবাকশিংগী ওইবা সেসন নিপান পাংথোক্কনি।
প্রভাসী রাজস্থানী কনক্লেব অমসুং MSME কনক্লেবসু নুমিৎ হুমনি পাংথোক্কনি। রাজস্থান গ্লোবেল বিজিনেস এক্সপো অসিদা রাজস্থান পেভিলিয়ন, কন্ত্রী পেভিলিয়ন, স্তার্তঅপ্স পেভিলিয়ন অসিনচিংবা থিমেতিক পেভিলিয়নশিং য়াওগনি। লৈবাক ৩২ হেনবনা, পার্তনর লৈবাক ১৬ অমসুং ইন্তর্নেস্নেল ওর্গনাইজেসন ২০ য়াওনা সম্মিৎ অসিদা শরুক য়াগনি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
Experts and investors around the world are excited about India. pic.twitter.com/umKkGMymZw
— PMO India (@PMOIndia) December 9, 2024
India's success showcases the true power of democracy, demography, digital data and delivery. pic.twitter.com/0TUVAUMKXB
— PMO India (@PMOIndia) December 9, 2024
This century is tech-driven and data-driven. pic.twitter.com/7SxqXLHHIP
— PMO India (@PMOIndia) December 9, 2024
India has demonstrated how the democratisation of digital technology is benefiting every sector and community. pic.twitter.com/fTLhdDIqH6
— PMO India (@PMOIndia) December 9, 2024
Rajasthan's R factor... pic.twitter.com/hyoisSRkm3
— PMO India (@PMOIndia) December 9, 2024
Having a strong manufacturing base in India is crucial. pic.twitter.com/GlXNCWZt0T
— PMO India (@PMOIndia) December 9, 2024
