ঙসি প্রধান মন্ত্রী শ্রী নরেন্দ্র মোদীনা কলম্বোদা প্রসিদেন্সিএল সেক্রেতরিয়েত্ত শ্রী লঙ্কাগী রাস্ত্রপতি অনুরা কুমারা দিসানায়াকাগা মীফম অমা পাংথোকখ্রে। ৱারি শান্দ্রিঙৈ মমাঙদা, ইন্দিপেন্দেন্স ইসক্বারদা চৎনবীগী মতুংইন্না প্রধান মন্ত্রী তরাম্না ওকখি। সেপ্তেম্বর ২০২৪ দগী রাস্ত্রপতি দিসানায়াকানা ওফিস হেক পায়রকপদগী শ্রী লঙ্কাদা সরকারগী খোঙচত্ত অহানবা ওইনা লাকপা মপান লৈবাক্কী লুচিংবা প্রধান মন্ত্রীনা ওইরে।
2. শরুক য়ামিন্নরিবা পুৱারি অমসুং মীগা মীগা লৈনবা অচেৎপা মরীশিংদা য়ুম্ফম ওইবা লৈবাক অনিগী অখন্নবা অমসুং অচেৎপা মরীশিং মখা তানা ফগৎনবা অকক্নবা অমসুং মীহুৎ কাংবুগী থাক্ত লুচিংবা অনিনা ৱাফম কয়া কুপ্না খন্নখ্রে। চৎথোক-চৎশিন, চাউখৎ-থৌরাংগী মতেং পাংনবা, শেন-থুমগী মরীশিং, ঙাক-শেনগী মরীশিং, ৱাখল তামিন্নবা অমসুং ঙামীগী ৱাফমশিংগী মতাংদা মতেং পাংনরিবা অসি মখোয়না অমুক হন্না য়েংশিনখ্রে। ভারতকী য়ুম্লোন্নবনা অহানবা থৌশিল অমসুং ভিজন মহাসাগরদা শ্রী লঙ্কাগী মরুওইবা অদু প্রধান মন্ত্রীনা অমুক হন্না থমখি। শ্রী লঙ্কাগী শেন-থুমগী ফিবম অমুক ফগৎলক্নবা অমসুং তংদু-লৈতানা লৈনবা ভারতনা মখা তানা মতেং পাংনবা মহাক্না থাজবা পীখি।
3. ৱারি শানরবা মতুংদা, লুচিংবা অনিনা প্রোজেক কয়া ভর্চুএল ওইনা শঙ্গাখি। প্রোজেকশিং অদুগী মনুংদা শ্রী লঙ্কা শীনবা থুংনা লাইশঙ কয়াদা সোলার রুপতোপ ৫০০০ থম্বা অমসুং দাম্বুল্লাদা পোৎ-চৈ থমফম অমা য়াওখি। মখোয়না ভর্চুএল ওইনা মেগাৱাত ১২০ গী সামপুর সোলার পৱার প্রোজেক উরেপ-উয়ুং তম্বগী থৌরমশু শরুক য়াখি।
4. ইনর্জি, দিজিতাইজেসন, দিফেন্স, হকশেল অমসুং হিরম কয়াদা মতেং পাংন্নবগী লমদা এম.ও.য়ু তরেৎ খুৎশীন্নবা থৌরমদা লুচিংবা অনি শরুক য়াখি। ত্রিনকোমালীদা তিরুকোনেশ্বরাম লাইশঙ শেমগৎনবা, নুৱারাদা সিতা ইলিয়া লাইশঙ শেমগৎনবা অমসুং অনুরাধাপুরদা সেক্রেদ সিতি কমপ্লেক্স প্রোজেক শেমগৎনবা মতেং পাংনবা প্রধান মন্ত্রীনা লাউথোকখি। কেপাসিতি শেমগৎপা অমসুং শেন-থুমগী মতেং পাংনবা, চহি খুদিংগী শ্রী লঙ্কামচা ৭০০ ত্রেনিং পীনবা অপুনবা পেকেজ অমা অমসুং দেব রিস্ত্রকচরিংদা বাইলেতরেল এমেন্দতোরি এগ্রিমেন্তশিং লোইশিন্নবশু লাউথোকখ্রে। লৈবাক অনিগী মরক্ত বুদ্ধিস্তকী চৎনবীশিং শরুক য়ামিন্নরিবা অসি য়েংলগা, মালেমগী বেসাক থৌরমশিংগীদমক গুজরাত্তগী শ্রী লঙ্কাদা ভগবান বুদ্ধগী শেংলবা হকচাংগী শরুকশিং পুরক্লগনি। এম.ও.য়ুশিং অমসুং লাউথোকখিবশিং মমিংশিং মফম অসিদা উবা ফংলগনি।
