ঙসি ভিদিও কনফরেন্সকী খুৎথাংদা প্রধান মন্ত্রী শ্রী নরেন্দ্র মোদীনা দেরাদুনদগী দিল্লি ফাওবা চেনবা বন্দে ভারত এক্সপ্রেস লমথাখ্রে। মহাক্না নৌনা ইলেক্ত্রিক ফংহল্লবা রেল সেক্সনশিং মীয়ামদা কৎথোকখ্রে অমসুং উত্তরখন্দ চাদা ১০০ ইলেক্ত্রিক ত্রেক্সন লৈবা রাজ্য ওইরে হায়না লাউথোক্লে।
থৌরম অদুদা তিনখিবা মীয়ামদা ৱা ঙাংবদা, দেরাদুনদগী দিল্লি ফাওবা বন্দে ভারত এক্সপ্রেস চেনবা হৌদোকপদা উত্তরখন্দগী মীয়াম থাগৎপা ফোঙদোক্লদুনা প্রধান মন্ত্রীনা হায়খি ত্রেন অসি উত্তখন্দগী দেবভুমিগা লৈবাক অসিগী কোনুংগা শম্নহনগনি। সহর অনিগী মরক্তা চৎথোক-চৎশিন তৌবদা চঙবা মতম হন্থরগনি অমসুং মসিনা চৎথোক-চৎশিনদা নুংঙাইবা অমা পীরগনি।
মহাক্কী জপান,পাপুৱা নিউ গিনি অমসুং অস্ত্রেলিয়া লৈবাক অহুমগী খোঙচৎ পল্লদুনা প্রধান মন্ত্রীনা হায়খি হৌজিক মালেম্না ভারত্তা অচৌবা থাজবা অমগা লোয়ন্না য়েংলে। লৈবাক অসিগী শেন-থুম ফগৎলকপা অমসুং লায়রবা কোকহনবদগী ভারত মালেমগী থাজবগী মঙাল অমা ওইরে। ভারতনা কোরোনা লাইচৎ লাকশিনখিবা অমসুং মালেমদা খ্বাইদগী চাউবা তিকা থাবগী থবক পাংথোকখিবা অদু মালেম্না শিংথানখি। বন্দে ভারত ত্রেন অসিনা উত্তরখন্দগুম্বা ফজরবা রাজ্য অমদা মালেমগী মফম কয়াদগী মীওই কয়া লাকপদা খুদোংচাবা অমা পীরগনি।
প্রধান মন্ত্রীনা হায়খি চৎলিবা দিকেদ অসি উত্তরখন্দগী দিকেদ অমা ওইরগনি। লো অমসুং ওর্দরগী ফিবম ফনা লৈবগা লোয়ন্না রাজ্য অসি চাউখৎপা হেনগৎলক্লি। দেবভুমি অসি মালেমদা স্পিরিচুএলগী মফম অমা ওইরগনি। মসিগী খুদোংচাবা অসি থবক ওইনা পাংথোক্নবা ঐখোয়না হোৎনগনি। চার ধামদা লাকপা লাইখুরম্বা মীওই মশিং অরিবা রেকোর্দশিং থুগাইরে। হরিদ্বার অমসুং কনৱার যাত্রাদা বাবা কেদরনাথ, কুম্ত/অর্ধ কুম্ত দর্সন তৌনবা ভক্তশিং লাক্নরি। রাজ্য কয়া মসিগী ভক্ত মশিং অসি য়ৌনা লাক্তে অমসুং খুদোল অমনি অমসুং অচৌবা থবক অমনি। মসিগী ‘ভগিরাথ’ থবক অসি লাইহন্নবা দবল পৱার অমসুং দবল স্পিৎকা লোয়ন্না দবল ইঞ্জিন সরকার থবক তৌরি।
প্রধান মন্ত্রীনা হায়খি চাউখৎপগী ‘নবরত্ন’দা সরকারনা অকনবা মীৎয়েং চঙলি। অহানবা রত্ন ওইনা, কেদরনাথ-বদ্রিনাথ ধাম লুপা করোর ১৩০০ চঙনা অমুক হন্না শেমগৎকনি। অনিশুবদা, গৌরিকুন্দ-কেদরনাথ অমসুং গোবিন্দ ঘাত-হেমকুন্ত সাহিবতা লুপা করোর ২৫০০০ চঙনা রোপৱে শেমগৎকনি। অহুমশুবদা, মনাস খান্দ মন্দির মালা প্রোগ্রামগী মখাদা কুমাওনদা অরিবা লাইশঙশিং অমুক হন্না শেমগৎকনি। মরিশুবদা, রাজ্য অসিদা হোমস্তে ৪০০০ হেন্না রেজিস্তার তৌখিবগা লোয়ন্না রাজ্য শীনবা থুংনা হোমস্তে য়োকখৎকনি। মঙাশুবদা, ইকোতুরিজমগী মফম ১৬ শেমগৎকনি। তরুকশুবদা, উত্তরখন্দদা হকশেলগী থবকশিং পাকথোক-চাউথোকহনগনি। উধাম সিংহ নাগরদা এ.আই.আই.এম.এস সেতেল্লাইত সেন্তর শেমগৎলে। তরেৎশুবদা, লুপা করোর ২০০০ চঙনা তেহরি লেক দিবলপমেন্ত প্রোজেক পায়খৎলে। নিপালশুবদা, য়োগা, এদভেঞ্চর তুরিজমগী কোনুং ওইনা হরিদ্বার রিকিকেস শেমগৎকনি। অরোইবদা তানাকপুর বাগেশ্বার রেল লাইন শেমগৎপা অসিনি।
প্রধান মন্ত্রীনা হায়খি হায়রিবা নবরত্নশিং অসিনা রাজ্য অসিদা ইনফ্রাস্ত্রকচর চাউখৎহনবদা অনৌবা ইনোৎ অমা পীগনি। লুপা করোর ১২,০০০ চঙনা চার ধাম মহাপরিয়োজনা থবক পায়খৎলি। দিল্লি দেরাদুন এক্সপ্রেসৱেনা চৎথোক-চৎশিন হেন্না নুংঙাইহল্লগনি। উত্তরখন্দদা রোপৱে শেমগৎলি। লাক্লিবা নুমিৎশিংদা পর্ভাত মালা প্রোজেক্না রাজ্য অসিগী মরাইবক্তা অহোংবা পুরক্লগনি। লুপা করোর ১৬,০০০ চঙনা পায়খৎলিবা রিসিকেস-কারানপ্রায়াগ রেল প্রোজেক চহি ২-৩গী মনুংদা লোইশিল্লগনি। প্রোজেক অসিনা উত্তরখন্দা চৎথোক-চৎশিন, ইনভেস্তমেন্ত, উদোগ অমসুং থবক ফংবা হেনগৎহল্লগনি।
প্রধান মন্ত্রীনা মখা তানা হায়খি কেন্দ্র সরকারগী মতেংগা লোয়ন্না উত্তরখন্দ অসি তুরিজম, এদভেঞ্চর তুরিজম, ফিল্ম নম্ফম অমসুং লুহোংনবা মফম অমা ওইরক্লে। রাজ্য অসিগী লমকোয়ফমশিং মালেম শীনবা থুংবগী মীওই কয়াগী পুক্নিং চিংশিল্লে অমসুং বন্দে ভারত এক্সপ্রেসনা মখোয়দা কান্নবা পীরগনি। মখোয়গী ইমুং-মনুংগা লোয়ন্না চৎলিবশিংনা অহানবদা ত্রেনশিং তোংনবা খল্লি অমসুং বন্দে ভারত অসি ইরাই লাইনা চৎথোক-চৎশিন য়াবা পাম্বৈ অমা ওইরক্লে।
প্রধান মন্ত্রীনা হায়খি ইনফ্রাস্ত্রকচরগী খুদোংচাবশিং হেনগৎহন্দুনা ২১শুবা চহিচাগী ভারত মখা তানা চাউখৎহনবা ঙমগনি। মমাঙগী সরকারশিং শেঞ্জা-থুমজা অমসুং শাগৈগী রাজনিতি তৌদুনা লৈখিবদগী মখোয়না ইনফ্রাস্ত্রকচরগী মরুওইবা খঙখিদে। ভারত্তা অয়াবা ত্রেনশিং চেলহন্নবা মমাঙগী সরকারশিংনা কয়ারক ৱাশকখ্রবসু, মখোয়না রেল নেতৱার্কশিংদা মী শেন্নদবা গেতশিং লৌথোকপা ঙমখিদে অমসুং রেল লাইনশিং ইলেক্ত্রিক ফংহনবগী থবক হান্নদগী হেন্না ফৎখিদে। ২০১৪দা লৈবাক অসিগী রেল নেতৱার্ককী শরুক অহুম থোকপগী শরুক অমা খক ইলেক্ত্রিক ফংলমখি অমসুং মসিনা অয়াংবা ত্রেন চেন্নবা ৱাখল খনবা ঙমখিদে। ২০১৪গী মতুংদা রেলৱেদা অওনবা পুরক্নবা থবক হৌখিবনি। নেতৱার্ক শীনবা থুংনা সেমি-হায়-স্পিৎ ত্রেনশিং চেন্নবা থৌরাং তৌরিঙৈদা লৈবাক অসিগী অহানবা হায়-স্পিৎ ত্রেনগী মঙলান থবক ওইনা পাংথোক্নবা থবক হৌরে। ২০১৪গী মমাঙদা চহি অমদা রেল লাইন কিলোমিতর ৬০০ ইলেক্ত্রিক ফংহল্লমখি অমসুং হৌজিক চহি অমদা রেল লাইন কিলোমিতর লিশিং ৬ ইলেক্ত্রিক ফংহল্লে। ঙসিদি, লৈবাক অসিগী রেল নেতৱার্ককী চাদা ৯০ হেন্না ইলেক্ত্রিক ফংহল্লে। উত্তরখন্দদা চাদা ১০০ রেল নেতৱার্ক ইলেক্ত্রিক ফংলে।
প্রধান মন্ত্রীনা হায়খি অচুম্বা মীৎয়েং, থৌশিল অমসুং কৎথোকপনা চাউখৎপা হেনগৎহল্লি। রেল বজেত হেনগৎহনবা অসিনা উত্তরখন্দদা হকথেংন্না কান্নবা পীরে। ২০১৪গী মমাঙদা রাজ্য অসিগী রেল বজেত চাউরাক্না লুপা করোর ২০০ ওইরমখি অদুবু ঙসিদি রেল বজেত শরুক ২৫ হেনগত্তুনা লুপা করোর লিশিং ৫ য়ৌরে। লম্বী-থোংগী খুদোংচাবা ৱাৎপদগী চীংগী রাজ্য অমদা মীয়াম্না খুঙ্গংদগী য়ুম হোংলকপনি অমসুং মসি থিংনবা থবক পায়খৎপা সরকারনা পাম্মী। অনৌবা লম্বী-থোং অসিনাঐখোয়গী ঙমখৈগী শরুকশিংদা চৎথোক-চৎশিন তৌবা লাইহনগনি অমসুং লান্মীশিংনা লৈবাক ঙাক-শেনবদা খুদোংচাদবা অমতা লৈহল্লোই।
মহাক্কী লোইশিল্লকপগী ৱারোলদা, প্রধান মন্ত্রীনা হায়খি উত্তরখন্দ চাউখৎনবা দবল ইঞ্জিন সরকারনা থবক পায়খৎলি। উত্তরখন্দ য়াংনা চাউখৎলকপা অসিনা ভারত য়াংনা চাউখৎপদা মতেং পাংগনি। লৈবাক অসি হৌজিক লেপকদবা নত্তে, হৌজিক লৈবাক অসি খুমাঙ চাউশিল্লি। বন্দে ভারতকী খোঙজেলদা হৌজিক লৈবাক শীনবা থুংনা মাঙলোমদা চঙশিল্লি অমসুং মখা তানা মাঙলোমদা চঙশিনগনি।
নুঙগীৱারোল
মসি উত্তরখন্দগী অহানবা বন্দে ভারতনি। মালেম থাক্কী খুদোংচাবশিং পীদুনা, ত্রেন অসিনা মরুওইনা রাজ্য অসিদা চৎপা মীওইশিংদা অনৌবা যুগকী চৎথোক-চৎশিনগী নুংঙাইবা অমা পীরগনি। ত্রেন অসি লৈবাক অসিনা মশানা শাজবনি অমসুং মসিদা কভচ তেক্নোলোজি য়াওনা অৱাংবা থাক্কী অশোই-অঙাম থোক্তনা খুৎলায় য়াওরে। অনৌবা বন্দে ভারত এক্সপ্রেসনা দেরাদুনদগী দিল্লি ফাওবা অসি পুং ৪.৫দা চেনগনি।
মৈখু থাংদবা মীয়ামগী চৎথোক-চৎশিনগী খুদোংচাবা ফংহন্নবা প্রধান মন্ত্রীগী পান্দম মখাদা লৈবাক অসিগী রেল রুতশিং মপুংফানা ইলেক্ত্রিক ফংহন্নবা ভারত রেলৱেজনা থবক পায়খৎলি। মাইকৈ অসিদা য়াংনা চঙশিন্দুনা, প্রধান মন্ত্রীনা উত্তরখন্দদা নৌনা ইলেক্ত্রিক ফংহল্লবা রেল লাইনশিং মীয়ামদা কৎথোক্কনি। মসিগা লোয়ন্না রাজ্য অসিগী রেল রুপ পুম্নমক চাদা ১০০ ইলেক্ত্রিক ফংলে। ইলেক্ত্রিক ফংলবা সেক্সনশিংদা চেনবা ত্রেনশিংনা খোঙজেল য়াংবা অমসুং হোলেজ কেপাসিতি হেনগৎহনবা ঙম্মি।
उत्तराखंड के सभी लोगों को वंदे भारत एक्सप्रेस ट्रेन की बहुत-बहुत बधाई। pic.twitter.com/WlCnbFasyV
— PMO India (@PMOIndia) May 25, 2023
आज पूरा विश्व, भारत को बहुत उम्मीदों से देख रहा है। pic.twitter.com/j50caAFyQU
— PMO India (@PMOIndia) May 25, 2023
सरकार का पूरा जोर, विकास के नवरत्नों पर है। pic.twitter.com/Q2ZdzBIjvh
— PMO India (@PMOIndia) May 25, 2023
