প্রধান মন্ত্রীনা লুচিংদুনা মার্চ ৩ দা গিরদা নেসনেল বোর্দ ফোর ৱাইল্দলাইফকী ৭শুবা মীফম পাংথোকখ্রে

ঙসি প্রধান মন্ত্রী শ্রী নরেন্দ্র মোদী গুজরাতকী গির নেসনেল পার্ক য়েংখ্রে অমসুং মফম অদুদা মহাক্না লুচিংদুনা নেসনেল বোর্দ ফোর ৱাইল্দলাইফকী ৭শুবা মীফম পাংথোকখ্রে। 

লম্লক্কী শা-উচেকশিং কন্নবা সরকারনা পায়খৎলিবা থবকশিং নেসনেল বোর্দ ফোর ৱাইল্দলাইফনা হন্না য়েংশিল্লি অমসুং অনৌবা ঙাক-শেন্দুনা থম্বা মফমশিং শেমগৎপগী থবকশিং অমসুং প্রোজেক্ত তাইগর, প্রোজেক্ত ইলিফেন্ত, প্রোজেক্ত শ্নো লিওপার্তগুম্বা থবকশিংগী মতাংদা মাইপাকপশিং পাউদমখি। দোলফিনশিং অমসুং এসিয়াতিক লাইওনশিং ঙাক-শেন্নবা পায়খৎলিবা থবকশিং অমসুং ইন্তরনেসনেল বিগ কেতস এল্লাইন্স লিংখৎপগী মতাংদশু নেসনেল বোর্দ ফোর ৱাইল্দলাইফনা খন্নখি।

মীফম মনুংদা, প্রধান মন্ত্রীনা লৈবাক অসিগী অহানবা তুরেলগী দোলফিন মশিং ফোঙখ্রে, অপুনবা দোলফিন মশিং ৬,৩২৭ ওইগনি হায়না পানরি। থবক অসিদা রাজ্য নিপালগী তুরেল ২৮ সর্ভে পাংথোকখি অমসুং মসিদা মেনদে ৩১৫০ অমসুং কিমি ৮,৫০০ কোনশিনখি। উত্তর প্রদেসতা মশিং খ্বাইদগী য়াম্না থেংনখি, মতুং তারকপদা বিহার, নোংচুপ বেঙ্গল অমসুং অসাম লৈখি।

মফমশিং অদুগী মীওইশিং অমসুং খুঞ্জাশিং শরুক য়াদুনা দোলফিন ঙাক-শেনবগী মরুওইবা খঙহন্নবা প্রধান মন্ত্রীনা তকশিনখি। দোলফিন লৈবা মফমশিংদা স্কুলগী অঙাংশিং য়েংহন্নবা থৌরমশিং পাংথোক্নবশু প্রধান মন্ত্রীনা পাউতাক পীখি।

প্রধান মন্ত্রীনা জুনাগাধদা নেসনেল রিফরেল সেন্তর ফোর ৱাইল্দলাইফকী উরেপ-উয়ুং তমখ্রে। মসি লম্লক্কী শা-উচেকশিংগী হকশেল অমসুং লায়নাগী মতাংদা থবক পায়খৎনবা মফম অমা ওইগনি।

চহি মঙাগী মনুংদা অমুক্তং এসিয়াতিক নোংশাশিং মশিং থিবগী থবক পাংথোক্লি। ইকোন কোনবা মশিং থিবা ২০২০ দা পাংথোকখ্রে। প্রধান মন্ত্রীনা ২০২৫ দা পাংথোক্কদবা ১৬শুবা এসিয়াতিক লাইওন পোপুলেসন ইস্তিমেসন হৌদোক্লে হায়না লাউথোকখ্রে।

হৌজিক এসিয়াতিক নোংশাশিং বারদা ৱাইল্দলাইফ সেঞ্চুরিদা মখোয়গী লৈফম ওইরে হায়না লৌরদুনা, মখোয়না ফাদুনা চানবা শাশিং মশিং হেনগৎহন্দুনা অমসুং অতোপ্পা শাশিংগী লৈফম ফগৎনবা থবকশিং পায়খৎতুনা বারদাদা নোংশা ঙাক-শেনবগী থবক শৌগৎনবা প্রধান মন্ত্রীনা লাউথোকখি। শা-উচেকশিংগী লৈফমশিং শেমগৎপা অমসুং ঙাক-শেন্নবগী পাম্বৈ অমা ওইনা ইকো-তুরিজমগী মরুওইবা পল্লদুনা, প্রধান মন্ত্রীনা হায়খি ৱাইল্দলাইফ তুরিজমগীদমক চৎথোক-চৎশিন অমসুং লম্বী-থোং নুংঙাইহনবা য়াম্না মরুওই।

মীওইবা-লম্লক্কী শা-উচেকশিং মুক্নবা হন্থহন্নবা প্রধান মন্ত্রীনা কোইয়ম্বতুরগী সাকোনদা সেন্তর ফোর এক্সলেন্স লিংখৎনবা লাউথোক্লে। অৱাংবা থাক্কী তেক্নোলোজি, খুঙ্গুল লিনবা খুৎলায়শিং, থিজিনবা অমসুং মীওইবা অমসুং শাশিং মুক্নবা মফমশিংদা মীওইবনা চঙবা খঙদোক্নবা সিস্তেম থমদুনা অমসুং কেপাসিতি শেমগৎতুনা অমসুং লমদম অদুগী মীওইশিংদা মুক্নবা ফনবা পাম্বৈশিং তাকপা লোয়ননা রেপিদ রেসপোন্স ফোর্সশিং থমদুনা কেন্দ্রনা রাজ্যশিং অমসুং য়ু.তিদা মতেং পাংগনি।

লান্মৈ চাকপা অমসুং মীওইবা-শাশিং মুক্নবা লাকশিন্নবা রিমোত সেন্সিং অমসুং জিওস্পাসিএল মেপ্পিং অমসুং এ.আই অমসুং মেছিন লার্নিং শীজিন্ননবা প্রধান মন্ত্রীনা তকশিনখ্রে। মীওইবা-লম্লক্কী শা-উচেক মুক্নবগী খুদোংচাদবশিং কোকহন্নবা ৱাইল্দলাইফ ইন্সতিতুৎ ওফ ইন্দিয়ানা ভাস্কারচার্য়া নেসনেল ইন্সতিতুৎ ফোর স্পেস এপ্লিকেসনস এন্দ জিও-ইনফোর্মেতিক্স (বিসাগ-এন) গা থবক তৌমিন্ননবা প্রধান মন্ত্রীনা পাউতাক পীখি।

লান্মৈ চাকপা য়েংশিন্নবা অমসুং মৈ কনবগী থবকশিং ফগৎনবা, মাঙজৌননা খঙদোকপা, ঙাকথোকপা অমসুং কনবগী থবকশিংদা মীৎয়েং থমদুনা, স্পেস তেক্নোলোজিগী খুৎথাংদা ফোরেস্ত সর্ভে ওফ ইন্দিয়া অমসুং ভাস্কারচার্য়া নেসনেল ইন্সতিতুৎ ফোর স্পেস এপ্লিকেসনস এন্দ জিও-ইনফোর্মেতিক্স পুন্না থবক তৌমিন্ননবা প্রধান মন্ত্রীনা পাউতাক পীখ্রে।

মধ্য প্রদেসকী গান্ধীসাগরদা অমসুং গুজরাতকী বান্নি গ্রাসলেন্দশিং য়াওনা অতোপ্পা মফমশিংদা চিতাহ থাদোকপগী থবক হেনগৎহল্লগনি হায়না প্রধান মন্ত্রীনা লাউথোকখ্রে।

তাইগর রিজার্বশিংগী ৱাংমদা, কৈ ঙাক-শেনবগী থবকশিংগী স্কিম অমশু প্রধান মন্ত্রীনা লাউথোকখ্রে। থবক অসিনা হায়রিবা রিজার্বশিং অসিগী ৱাংমদা মফম অদুগী মীওইশিংগা পুন্না হিংমিন্নদুনা মীওইবা অমসুং কৈগী মরক্ত মুক্নবা অমসুং অতোপ্পা শাশিংগী মরক্ত মুক্নবা হন্থহন্নবা থবকশিং পায়খৎনবা পান্দম থম্লি।

ঘারিয়েলশিংগী মশিং হন্থরকপা অসি খঙলদুনা অমসুং ঘারিয়েলশিং ঙাক-শেন্নবা, ঘারিয়েলশিং ঙাক-শেন্নবা অনৌবা প্রোজেক অমা পায়খৎনবা প্রধান মন্ত্রীনা লাউথোকখ্রে।

গ্রেত ইন্দিয়ান বুস্তার্দ ঙাক-শেন্নবা পায়খৎলিবা থবকশিং প্রধান মন্ত্রীনা থাগৎপা ফোঙদোকখ্রে। ঙাক-শেনবগী থবকশিং মপাঙ্গল কনখৎহনবগী মরুওইবা অদু খন্নরদুনা, নেসনেল গ্রেত ইন্দিয়ান বুস্তার্দ কঞ্জর্বেসন এক্সন প্লান অমা প্রধান মন্ত্রীনা লাউথোক্লে।

হন্না য়েংশিনবা মীফম মনুংদা, থিজিনবা অমসুং চাউখৎ-থৌরাংগীদমক উমংশিং অমসুং লম্লক্কী শা-উচেকশিং কনবা অমসুং য়েংশিনবগী মতাংদা ভারতকী তোঙান তোঙানবা মফমশিংগী খুৎই লাইরিকশিং অমসুং মমাংঙৈগী লৌশিং কয়া খোমজিন্নবা প্রধান মন্ত্রীনা ৱাইল্দলাইফ বোর্দ অমসুং ইনভাইরোনমেন্ত মিনিস্ত্রিদা খঙহনখ্রে। শা-উচেকশিং ঙাক-শেন্নবগী লাল্লোংগী লম্বী অমা অমসুং মিনিস্ত্রিগী তুংগী থবকশিং প্রধান মন্ত্রীনা পুথোকখ্রে অমসুং  ইন্দিয়ান স্লোত বিয়ার, ঘারিয়েল অমসুং গ্রেত ইন্দিয়ান বুস্তার্দ ঙাক-শেন্নবগী তোঙান-তোঙানবা তাক্স ফোর্সশিং শেম্নবা খঙহনখ্রে।

প্রধান মন্ত্রীনা মীফম অদুদা হায়খি মদুদি নোংশা অমসুং কোবো কৈ ঙাক-শেনবগী মতাংদা গির মাইপাকপা ৱারি অমনি। অতোপ্পা নেসনেল পার্কশিং অমসুং সেঞ্চুরিশিংদা শীজিন্ননবা এ.আইগী মতেংগা লোয়ননা ঐখোয়গী মসিগী মমাংঙৈগী লৌশিং অসি লৌশিন্দুনা থমগদবনি

কঞ্জর্বেসন ওফ মাইগ্রেতোরি স্পেসিস ওফ ৱাইল্দলাইফ এনিমেলস (সি এম এস) গী য়ুনাইতেদ নেসন্স কনভেন্সনগী মখাদা কো-ওর্দিনেসন য়ুনিত্ত মতেং পাংনবা হেনগৎহন্নবশু প্রধান মন্ত্রীনা পাউতাক পীখি। 

লৈকায়গী রিজার্বশিং লিংখৎতুনা ঙাক-শেনবগী থবকশিংদা লমদম অমগী মীয়াম থৱায় য়াওনা শরুক য়াবদা প্রধান মন্ত্রীনা থাগৎপা ফোঙদোকখি। হৌখিবা চহি ১০ দা, কম্মুনিতি রিজার্বশিং শরুক তরুক হেনগৎলকপা লৈবাক অসিনা উবা ফংলে। শা-উচেকশিং ঙাক-শেনবগী থবকশিংদা আর্তিফিসিএল ইন্তিলিজেন্স য়াওনা অৱাংবা থাক্কী তেক্নোলোজিশিং শীজিন্নবগী মরুওইবা অদু প্রধান মন্ত্রীনা পনখি।

শা-ষনশিংগী লায়নাশিং লায়েংবদা মরুওইবা থৌদাং অমা লৌরিবা উমংশিংদা ফংলিবা হিদাক ওইনা শীজিন্নরিবা পাম্বীশিংগী মরমদা থিজিন্নবা অমসুং ই-পাউ খোমজিন্নবগী মতাংদা প্রধান মন্ত্রীনা পাউতাক পীখি। মালেমগী থাক্ত শা-ষনশিংগী হকশেলগীদমক পাম্বীশিংদা য়ুম্ফম ওইবা মেদিসিনগী থবকশিং য়োকখৎনবগী ওইথোকপশিং প্রধান মন্ত্রীনা পনখি।

মীফম মতুংদা, মাংজিল থানা থবক তৌরিবা ফোরেস্ত স্তাফশিং চৎথোক-চৎশিন নুংঙাইবা হেনগৎহন্নবা মোতোরসাইকলশিং প্রধান মন্ত্রীনা লমথাখি। মহাক্না গিরদা স্তাফশিং, ইকো গাইদশিং অমসুং ত্রেক্করশিং য়াওনা থাক কয়াগী থৌমীশিংগশু ৱারি শানখি।