ঙসি প্রধান মন্ত্রী শ্রী নরেন্দ্র মোদীনা লুচিংদুনা, কেন্দ্র অমসুং রাজ্য সরকারশিং শরুক য়াদুনা আই.সি.তিদা য়ুম্ফম ওইবা মল্তি-মোদাল প্লেতফোর্ম প্রাগাতি(প্রো-এক্তিপ গনর্ভনান্স এন্দ তাইম্লি ইমপ্লেমেন্তেসন)গী ৪১শুবা মীফম পাংথোকখ্রে।
মীফম অদুদা মরুওইবা ইনফ্রাস্ত্রকচর প্রোজেক ৯গী ফিবম হন্না য়েংশিনখি। প্রোজেক ৯ অদুগী মনুংদা রোদ ত্রান্সপোর্ত অমসুং হায়ৱেজগী প্রোজেক অহুম, রেলৱেজ মিনিস্ত্রিগী প্রোজেক অনি, পৱার মিনিস্ত্রি,কোএল মিনিস্ত্রি, পেত্রোলিয়ম অমসুং নেচরেল গ্যাস মিনিস্ত্রি অমসুং হেল্থ অমসুং ফেমিলি ৱেলিফিয়ার মিনিস্ত্রিগী প্রোজেক অমমম য়াওখি। হায়রিবা প্রোজেক ৯ অদুগী অপুনবা শেনফম লুপা করোর ৪১,৫০০ হেনবনি অমসুং রাজ্য ১৩ হায়বদি ছতিসগর, পঞ্জাব, বিহার, মধ্য প্রদেস, উত্তর প্রদেস, ঝারখান্দ, কেরলা, কর্নাতকা, তামিল নাদু, অসাম, গুজরাত, মহারাস্ত্রা অমসুং অরুনাচল প্রদেসতা প্রোজেকশিং পায়খৎলি। মীফম অদুদা মিসন অমৃত সারোবর অমুক হন্না য়েংশিনখ্রে।
ইনফ্রাস্ত্রকচর প্রোজেকশিংগী থৌরাং তৌনবা পি.এম গাতিশক্তি পোর্তেল শীজিন্ননবা প্রধান মন্ত্রীনা মিনিস্ত্রিশিং অমসুং রাজ্যশিংদা পাউতাক পীখ্রে। মহাক্না হায়খি প্রোজেকশিং মতম চানা লোইশিন্নবা লম লৌশিনবা, খুৎলায়শিং পুথোক-পুশিন তৌবা অমসুং অতোপ্পা থবকশিং অথুবা মতমদা লোইশিনগদবনি। কেন্দ্র সরকার অমসুং রাজ্য সরকারশিংগী মরক্তা মপুংফানা মতেং পীনগদবনি।
মীফম মনুংদা, প্রধান মন্ত্রীনা মিসন অমৃত সারোবরশু অমুক হন্না য়েংশিনখ্রে। বিহারগী কিসানগঞ্জ অমসুং গুজরাতকী বোতাদতা লৈরিবা অমৃত সারোবর মফমশিং দ্রোনশিংগী খুৎথাংদা খুদক্তা প্রধান মন্ত্রীনা য়েংখি। নোংজু থা মমাঙদা মিসনগী মওংদা অমৃত সারোবরগী থবকশিং মপুংফানা লোইশিন্নবা মিনিস্ত্রি খুদিংমক অমসুং রাজ্য সরকারশিংদা পাউতাক পীখ্রে। স্কিমগী মখাদা অমৃত সারোবর ৫০,০০০ মতম চানা লোইশিন্নবা ব্লোক্কী থাক্তা য়েংশিন্নবা প্রধান মন্ত্রীনা তকশিনখি।
তুংগীদমক ঈশিং য়োক্তুনা থম্নবা লৈবাক শীনবা থুংনা লৈরিবা ঈশিং লৈবা মফমশিং অমুক হন্না শেমগৎনবা পান্দমদা ‘মিসন অমৃত সারোবর’ থবক পায়খৎলি। মিসন অসি হেক মপুংফাবদা, ঈশিং য়োকশিন্দুনা থম্বা ঙম্বা অসি চাউরাক্না কিউবিক মিল্লিয়ন করোর ৫০ রোম ওইগনি অমসুং চহি অমদা কার্বোন তন ৩২,০০০ চুপশিনগনি হায়না পানরি অমসুং লৈনুংদা ঈশিং কিউবিক মিতর মিল্লিয়ন ২০ হেন্না হাপচিনগনি। অমৃত সারোবর মফমশিংদা শ্বাছ্চতা রেল্লি, ঈশিং তুংশিন্নবা জল সাপাথ, স্কুল অঙাংশিংগী রঙ্গোলি চাংদম্নবা, ছথ পুজাগুম্বা লাইনিংগী কুহ্মৈশিং পাংথোক্লি।
হৌজিক ফাওবদা প্রাগাতি মীফমশিংদা লুপা করোর লাখ ১৫.৮২গী প্রোজেক ৩২৮ হন্না য়েংশিনখ্রে।
