প্রধান মন্ত্রী শ্রী নরেন্দ্র মোদীনা ঙসি নই দিল্লীগী ভারত মন্দাপমদা ইমর্জিং সাইন্স এন্দ তেক্নোলোজী ইন্নোভেসন কনক্লেব (ESTIC) 2025 দা ৱা ঙাংখ্রে। থৌরম অদুদা ৱা ঙাংলদুনা, প্রধান মন্ত্রীনা ভারত অমসুং মপাল লৈবাক্কী সাইন্তিস্তশিং, ইন্নোভেতরশিং, একাদেমিয়াগী মেম্বরশিং অমসুং অতোপ্পা শক্নাইরবা মীথুংলেনশিংবু তরাম্না ওকখি। ICC ৱুমেন্স ৱার্ল্দ কপ 2025দা ভারতকী শিংথানিংঙাই ওইবা মায়পাকপগী মতাংদা পল্লদুনা শ্রী মোদীনা হায়খি মদুদি ভারতকী ক্রিকেৎ তীমগী মায়পাকপদা লৈবাক পুম্বনা নুংঙাইবা ফাওখি। মহাক্না মসি ভারতকী অহানবা ৱুমেন্স ৱার্ল্দ কপ থোইবনি হায়না অকনবা ৱাফম থমখি অমসুং নুপীগী ক্রিকেৎ তীমদা মহাক্কী থম্মোয়দগী নুংঙাইবা ফোংদোকখি। প্রধান মন্ত্রীনা হায়খি মদুদি লৈবাক অসিনা মখোয়দা চাউথোকচরি অমসুং মখোয়গী মায়পাকপনা লৈবাক শিনবা থুংনা লৈরিবা নহা লাখ কয়াদা ইথিল পীরগনি হায়না থাজবা থমখি।
প্রধান মন্ত্রীনা হায়খি মদুদি ঙরাং ভারতনা সাইন্স অমসুং তেক্নোলোজীগী লমদা চাউনা খুমাং চাউশিল্লে। মহাক্না ভারতকী সাইন্তিস্তশিংনা ভারতকী খ্বাইদগী চাউবা কম্ম্যুনিকেসন সেতলাইৎ মায় পাক্না লোঞ্চ তৌবদা থাগৎপা ফোংদোকখি অমসুং মিসন অসিদা শরুক য়াখিবা সাইন্তিস্ত পুম্নমক অমসুং ইসরোগী মফমদা নুংঙাইবা ফোংদোকখি। ঙসিগী নুমিৎ অসি সাইন্স অমসুং তেক্নোলোজীগী লমদসু য়াম্না মরু ওইবা নুমিৎ অমনি হায়না শ্রী মোদীনা অকনবা ৱাফম থমখি। মহাক্না হায়খি মদুদি 21শুবা চহিচা অসিদা, মালেমগী এক্সপর্তশিংনা পুনশিনবা অমসুং অনৌবা সাইন্স, তেক্নোলোজী অমসুং ইন্নোভেসনগী লমজিং-লমতাকপদা খন্ন-নৈনবগী তঙাইফদবা অদু লৈরি। মহাক্না হায়খি মদুদি মসিগী মথৌ তাবা অসিনা ৱাখল্লোন অমা পোকহনখি, মদু কনক্লেব অসিগী ভিজন ওইরকখি। মহাক্না নুংঙাইবা ফোংদোকখি মদুদি ভিজন অসি হৌজিক কনক্লেব অসিগী খুত্থাংদা মশক থোক্লক্লি। প্রধান মন্ত্রীনা খোঙথাং অসিদা তোঙান তোঙানবা মন্ত্রালয়শিং, প্রাইবেৎ সেক্তর, স্তার্ত-অপশিং অমসুং মহৈরোইশিংনা শরুক য়াখিবগীদমক থাগৎপা ফোংদোকখি। মহাক্না হায়খি মদুদি নোবেল লোরিএৎ অমা ঙসি ঐখোয়গী মরক্তা য়াওবা অসি ইকায় খুম্ননিংঙাইনি। কনক্লেব অসিদা শরুক য়ারিবা পুম্নমকপু মহাক্না তরাম্না ওকখি অমসুং কনক্লেব অসি মায় পাকপা ওইরসনু হায়না মহাক্কী য়াইফ পাউজেল পীখি।
21শুবা চহিচা অসি মমাংদা অমুক্তা ওইখিদ্রিবা অহোংবা লাকপা মতম অমনি হায়না পল্লদুনা শ্রী মোদীনা হায়খি মদুদি মালেমগী ওইনা অনৌবা অহোংবা অমা লাক্লি, অমসুং অহোংবা লাকপগী খোঙজেল অসি লিনিয়র নত্তে অদুবু এক্সপোনেন্সিএল ওই। অসিগুম্বা মীৎয়েংগা লোয়ননা, ভারতনা অনৌবা সাইন্স, তেক্নোলোজী অমসুং ইন্নোভেসনগা মরী লৈনবা তোঙান তোঙানবা হিরমশিংদা খুমাং চাউশিল্লি। মহাক্না খুদম অমা ওইনা রিসর্চ ফন্দিংগী লমদা পনখি অমসুং প্রধান মন্ত্রীনা 'জয় জৱান, জয় কিসান'কী ময়াম্না খঙনরবা নেস্নেল ভিজন অদু নীংশিংখি অমসুং রিসর্চতা অহেনবা মীৎয়েং থমদুনা, 'জয় ভিজ্ঞান' অমসুং 'জয় অনুসন্ধান' অসি ভিজন অসিদা হাপচিনখ্রে হায়না পনখি। ভারতকী য়ুনিভর্সিতীশিংদা রিসর্চ অমসুং ইন্নোভেসন পাকথোক চাউথোকহন্নবগীদমক অনুসন্ধন নেস্নেল রিসর্চ ফাউন্দেসন লিংখৎখ্রে হায়না মহাক্না হায়খি। মসিগী মথক্তা, প্রধান মন্ত্রীনা লুপা করোর লাখ 1গী এলোকেসনগা লোয়ননা রিসর্চ, দিবেলপমেন্ত অমসুং ইন্নোভেসন স্কিম হৌদোক্নবা লাউথোকখি। প্রাইবেৎ সেক্তরদসু রিসর্চ অমসুং দিবেলপমেন্ত প্রমোৎ তৌনবা হোৎনরি হায়না মহাক্না অকনবা ৱাফম থমখি। শ্রী মোদীনা হায়খি, অহানবা ওইনা, রিস্ক ৱাংবা অমসুং ইম্পেক্ত ৱাংবা প্রোজেক্তশিংগীদমক কেপিতেল ফংহল্লে।
প্রধান মন্ত্রীনা হায়খি, "ভারতনা মোদর্ন ইন্নোভেসন ইকোসিস্তেম অমা শেমগৎনবা হোৎনরি অমসুং রিসর্চ তৌবদা লায়থোকহনবদা মীৎয়েং থম্লি।" সরকারনা ফাইনান্সিএল রুলশিং অমসুং পোৎ-চৈ পুথোকপগী পোলিসীশিংদা রিফোর্ম কয়া অমা পায়খৎলে। মসিগী মথক্তা, প্রোতোতাইপশিং অসি লেবোরেতরীদগী কৈথেলদা অথুবা মতমদা চঙশিনবা ঙম্নবগীদমক রিগুলেসনশিং, ইন্সেন্তিবশিং অমসুং সপ্লাই চেনশিংদা রিফোর্মশিং পাংথোকখ্রে।
ভারতপু ইন্নোভেসন হব অমা ওইহন্নবা হৌখিবা চহিশিংদা লৌখৎখিবা পোলিসীশিং অমসুং ৱারেপশিং অসিনা হৌজিক ময়েক শেংবা মহৈশিং উৎলি হায়বা ৱাফম থম্লদুনা শ্রী মোদীনা মরুওইবা স্তেতিস্তিক্সশিং অদু চাউথোকচবা পোকচখি। ভারতকী R&D গী শেনফম হৌখিবা দিকেদ অমদা শরুক অনি হেনগৎখ্রে; রেজিস্তর তৌরবা পেতেন্তশিংগী মশিং অসি শরুক 17 হেনগৎখ্রে; অমসুং ভারত অসি মালেমগী খ্বাইদগী চাউবা স্তার্তঅপ ইকোসিস্তেমগী অহুমশুবা মফম ওইরে। মহাক্না হায়খি মদুদি হৌজিক ভারত্তা দিপ-তেক স্তার্ত-অপ 6000 হেনবনা ক্লিন ইনর্জী অমসুং এদভান্স মেতিরিএলশিংগুম্বা লমশিংদা থবক তৌরি। প্রধান মন্ত্রীনা মখা তাখি মদুদি ভারতকী সেমিকন্দক্তর সেক্তর অসি হৌজিত্তি খুমাং চাউশিল্লক্লে। মহাক্না ভারতকী বাইও-ইকোনোমীগী চাউখৎলকপগী মতাংদসু পনখি, মসি 2014দা বিলিয়ন দোলর 10 ওইরম্বা অদুদগী ঙসিদি বিলিয়ন দোলর 140 ওইরে।
হৌখিবা চহিশিংদা ভারতনা গ্রীন হাইদ্রোজেন, ক্বান্তম কম্প্যুতিং, দীপ সী রিসর্চ অমসুং ক্রিতিকেল মিনরেলশিং য়াওনা হিরম কয়াদা চাউনা খুমাং চাউশিল্লে হায়না পল্লদুনা শ্রী মোদীনা হায়খি মদুদি ভারতনা হিরমশিং অসিদা থোইদোক হেন্দোক্না মীৎয়েং চংলি।
প্রধান মন্ত্রীনা হায়খি, "সাইন্স অসি স্কেল তৌরকপা, ইন্নোভেসন অসি ইনক্লুসিব ওইরকপা, অমসুং তেক্নোলোজীনা ত্রান্সফোর্মেসনবু থৌগৎপা মতমদা, মসিনা অচৌবা মায়পাকপশিংগী য়ুম্ফম ওইরকই।" হৌখিবা চহি 10-11দা ভারতনা চৎখিবা খোঙচৎ অসিনা মসিগী মীৎয়েং অসিগী খুদম অমনি হায়না মহাক্না ফোংদোকখি। ভারত অসি হৌজিক্তি তেক্নোলোজীগী কঞ্জ্যুমর অমা খক্তা ওইদ্রে, তেক্নোলোজীগী খুত্থাংদা ত্রান্সফোর্মেসনগী পাইওনিয়র অমা ওইরে হায়না শ্রী মোদীনা হায়খি। মহাক্না নীংশিংখি মদুদি কোবিদ-19গী লাইচৎ মনুংদা, ভারতনা অতেনবা মতমগী মনুংদা মশাগী ওইবা ভেক্সিন অমা পুথোকখি অমসুং মালেমগী খ্বাইদগী চাউবা ভেক্সিনেসন প্রোগ্রাম অমা পাংথোকখি।
ভারতনা মতৌ করম্না অসিগুম্বা অচৌবা স্কেল অমদা পোলিসী অমসুং প্রোগ্রামশিং মায় পাক্না পায়খৎপা ঙম্লিবগে হায়বদুগী মতাংদা প্রধান মন্ত্রীনা হায়খি মদুদি মসিগী মায়পাকপা অসি ভারতকী মালেমদা মকোক থোংবা দিজিতেল পব্লিক ইনফ্রাস্ত্রকচরনা ঙমহনবনি। গ্রাম পঞ্চায়ৎ লাখ অনি হেন্না ওপ্তিকেল ফাইবরগী খুত্থাংদা শম্নহনখ্রে অমসুং লৈবাক শীনবা থুংনা মোবাইল দেতা দেমোক্রেতাইজ তৌখ্রে হায়না মহাক্না ফোংদোকখি।
শ্রী মোদীনা হায়খি মদুদি ভারতকী স্পেস প্রোগ্রাম্না থা অমসুং মার্সতা য়ৌরক্লবসু, স্পেস সাইন্স এপ্লিকেসনশিংগী খুত্থাংদা লৌমীশিং অমসুং ঙামীশিংদা কান্নবা ফংহন্নবা হোৎনরি। মহাক্না মসিগী মায়পাকপশিং অসিগীদমক স্তেকহোল্দর পুম্নমক্কী থৌদাংশিংবু থাগৎপা ফোংদোকখি।
ইনক্লুসিব ইন্নোভেসনগী মরুওইবা অদু পল্লদুনা প্রধান মন্ত্রীনা হায়খি মদুদি ইন্নোভেসন অসি ইনক্লুসিব ওইরবা মতমদা, মসিগী প্রাইমরী বেনিফিসরীশিং অসি মাগী লুচিংবশিংসু ওইগনি। মহাক্না ভারতকী নুপীশিংবু অসিগুম্বা অহোংবা অসিগী খ্বাইদগী মশক থোকপা খুদম অমা ওইনা পনখি। ভারতকী স্পেস মিসনশিংগী মতাংদা মালেমগী থাক্তা খন্ন-নৈনরকপা মতমদা, ভারতকী নুপী সাইন্তিস্তশিংনা মশক থোকপা শকখঙবা ফংলি হায়না মহাক্না ফোংদোকখি। পেতেন্ত ফাইল তৌবগী লমদা মহাক্না পনখি মদুদি চহি তরাগী মমাংদা ভারত্তা নুপীশিংনা চহিগী ওইনা পেতেন্ত 100দগী হন্থনা ফাইল তৌরম্মি, অদুগা ঙসিদি চহিগী ওইনা মশিং অসি 5000 হেনখ্রে। মহাক্না মখা তানা হায়খি মদুদি হৌজিক ভারত্তা স্তেম এজুকেসনগী এনরোলমেন্তকী মনুংদা নুপীশিংনা চাউরাক্না চাদা 43 ওইরি, মসিনা মালেমগী চাংচৎতগী হেল্লি। হায়রিবা মশীংশিং অসিনা ভারত্তা সাইন্স অমসুং তেক্নোলোজীগী লমদা নুপীশিংনা খোঙজেল য়াংনা খুমাং চাউশিল্লকপগী মমি তারি।
পুৱারীগী তাঙ্কক খরদি মীরোল কয়াগী পুক্নিং থৌগৎপগী মচাক অমা ওইরি হায়না প্রধান মন্ত্রী শ্রী মোদীনা ফোংদোকখি। মহাক্না চহি খরগী মমাংদা, ভারত শিনবা থুংনা লৈরিবা অঙাংশিংনা চন্দ্রয়ানগী খোঙচৎ অসি করম্না উবগে, মসিগী অশোইবশিং অমসুং মায়পাকপশিং অসি করম্না থেংনবগে, অমসুং সাইন্সকী মতাংদা কয়া য়াম্না পুক্নিং চংবগে হায়বদু নীংশিংখি। মহাক্না পনখি মদুদি গ্রুপ কেপ্তেন শুভাংশু শুক্লাগী হৌখিবা স্পেস স্তেসন মিসন অসিনা অঙাংশিংগী মরক্তা অনৌবা খঙনীংবা পোকহল্লে। প্রধান মন্ত্রীনা নহা ওইরিবা মীরোলশিংদা হেনগৎলক্লিবা খঙনীংবগী ৱাখল্লোন অসি শীজিন্নবগী মরুওইবা অদু পনখি। মহাক্না হায়খি মদুদি ভারতনা মঙাল লৈবা নহাশিংবু সাইন্স, তেক্নোলোজী অমসুং ইন্নোভেসনগী মায়কৈদা লমজিংবা ঙম্লিবমখৈ লৈবাক অসিগীদমক্তা হেন্না ফগনি। মসিগী ৱাখল্লোন অসিগী মতুং ইন্না, লৈবাক শিনবা থুংনা অতল তিঙ্করিং লেব 10,000 রোম লিংখৎখ্রে হায়না মহাক্না ফোংদোকখি। মসিদা অঙাং করোর অমা হেন্না ক্যুরিয়োসিতি অমসুং ক্রিএতিবিতীগা লোয়ননা এক্সপরিমেন্তশিং পাংথোক্লি। লেবশিং অসিগী মায় পাকপা অসিনা পুক্নিং থৌগৎলদুনা অনৌবা অতল তিঙ্করিং লেব 25,000 লিংখৎলগনি হায়না মহাক্না লাউথোকখি। প্রধান মন্ত্রীনা মখা তানা হায়খি মদুদি হৌখিবা চহিশিংদা অনৌবা য়ুনিভর্সিতী চাম্মরোম লিংখৎখ্রে। মসিগী মনুংদা অনৌবা IIT তরেৎ, IIIT তরাতরুক য়াওরি। অনৌবা এজুকেসন পোলিসীগী মখাদা, মহৈরোইশিংনা হৌজিক্তি মখোয়গী লোকেল লোলশিংদা সাইন্স অমসুং ইঞ্জিনীয়রিংগুম্বা STEM কোর্সশিং মখা চত্থবা য়াহনখ্রে হায়না মহাক্না মখা তাখি।
প্রধান মন্ত্রীগী রিসর্চ ফেল্লোশিপ অসি নহা ওইরিবা রিসর্চরশিংগী মরক্তা য়াম্না মায় পাক্লি হায়না পল্লদুনা, স্কিম অসিগী মখাদা পীরিবা গ্রান্তশিং অসিনা য়াম্না চাউনা মতেং পাংলি হায়না পল্লদুনা শ্রী মোদীনা হায়খি মদুদি মথংগী চহি মঙাদা, লৈবাক অসিদা R&Dবু হেন্না মপাঙ্গল কনখৎহন্নবা ফেল্লোশিপ 10,000 পীগনি।
প্রধান মন্ত্রীনা সাইন্স অমসুং তেক্নোলোজীগী ত্রান্সফোর্মেতিব পৱার অদু খঙমিন্নবা অমসুং মখোয় অসি ইথিক অমসুং ইনক্লুসিব ওইহন্নবা হোৎনবগী তঙাইফদবা অদুদা অকনবা ৱাফম থমখি। মহাক্না খুদম ওইনা আর্তিফিসিএল ইন্তেলিজেন্স পনখি। রিতেল অমসুং লোজিস্তিক্সতগী হৌরগা কস্তমর সর্ভিস অমসুং অঙাংশিংগী হোমৱার্ক ফাওবদা মসিগী পাক শন্না শীজিন্নবা অদু মহাক্না পনখি। ভারতনা খুন্নাইগী সেক্সন খুদিংমক্তা AIগী কান্নবা ফংহন্নবা হোৎনরি হায়না মহাক্না ফোংদোকখি। ইন্দিয়া AI মিসনগী মখাদা লুপা করোর 10,000 হেনবগী ইনভেস্তমেন্ত তৌরি।
প্রধান মন্ত্রীনা হায়খি মদুদি ভারতনা এথিকেল অমসুং হ্যুমেন-সেন্ত্রিক AIগীদমক মালেমগী ফ্রেমৱার্ক অমা শেমগৎলি। লাক্কদৌরিবা AI গবর্নান্স ফ্রেমৱার্ক অসি মসিগী মাইকৈ অসিদা অচৌবা খোঙথাং অমা ওইগনি। মসিগী পান্দমদি ইন্নোভেসন অমসুং সেফতী পুন্না চাউখৎহনবনি। মহাক্না ভারতনা 2026কী ফেব্রুৱারীদা গ্লোবেল AI সমিৎ পাঙথোক্কনি হায়না লাউথোকখি। মসিনা ইনক্লুসিব, ইথিক অমসুং হ্যুমেন-সেন্ত্রিক AIগী মাইকৈদা খোঙথাংশিং খোঙজেল য়াংশিনহল্লগনি।
চাউখৎলবা ভারত অমগী পান্দম ফংনবগীদমক মরুওইবা ওইরিবা হৌগৎলক্লিবা হীরমশিংদা হোৎনরিবশিং অদু হেন্না চেৎশিলহন্নবা হায়রদুনা শ্রী মোদীনা ফুদ সেক্যুরিতীদগী ন্যুত্রিসন সেক্যুরিতীদা অহোংবা পুরক্নবা ৱাফম কয়া থমখি। মহাক্না মরুওইবা ৱাহংশিং হংখি: মালেমগী ওইনা মালন্যুত্রিসন থেংনবদা মতেং পাংনবা ভারতনা মথংগী জেনরেসনগী বাইওফোর্তিফাইদ ক্রোপশিং শেমগৎপা ঙমগদ্রা? মমল হোংবা সোইল হেল্থ এনহেন্সমেন্তশিং অমসুং বাইও ফর্তিলাইজরশিংদা ইন্নোভেসনশিং অসি কেমিকেল ইনপুতশিংগী মহুৎ শিনবা অমসুং সোইল হেল্থ ফগৎহনবা ঙমগদ্রা? পর্সনেলাইজ মেদিসিন অমসুং লায়না মাংজৌননা খঙদোক্নবা ভারতনা মাগী জেনোমিক দাইভর্সিতীবু হেন্না ফজনা মেপ তৌবা ঙমগদ্রা? ক্লিন ইনর্জী স্তোরেজ, হায়বদি বেতরীগুম্বা অনৌবা অমসুং শেল চংদবা ইন্নোভেসনশিং শেমগৎপা ঙমগদ্রা? ভারতনা মালেমদা মখা পোল্লিবা মরুওইবা ইনপুতশিং মশক খঙদোকপা অমসুং হিরমশিং অসিদা মশা-মরোমদোম লেপচবগী মরুওইবা অদু মহাক্না ফোংদোকখি।
প্রধান মন্ত্রী শ্রী নরেন্দ্র মোদীনা সাইন্স অমসুং তেক্নোলোজীগী লমদা থবক তৌরিবা মীওই খুদিংমক্না হংলিবা ৱাহংশিং অদুগী ৱাংমদা চঙদুনা অনৌবা ওইথোকপা য়াবশিং থিগৎকনি হায়না থাজবা থমখি। মহাক্না ৱাখল্লোন লৈবা মীওই খুদিংমকপু মতেং পাংগনি হায়না ফোংদোকখি অমসুং রিসর্চকী শেন থাদনবা অমসুং সাইন্তিস্তশিংদা খুদোংচাবা পীনবা সরকারগী মপুং ফাবা ফিরেপ অদু অমুক হন্না ফোংদোকখি। প্রধান মন্ত্রীনা কনক্লেব অসিদগী অপুনবা রোদমেপ অমা পুথোক্নবা মহাক্কী অপাম্বা ফোংদোকখি। কনক্লেব অসিনা ভারতকী ইন্নোভেসনগী খোঙচৎপু অনৌবা অৱাংবা থাক্তা পুখৎকনি হায়না মহাক্না থাজবা থমখি। মহাক্না শরুক য়ারিবা পুম্নমক্তা য়াইফ-পাউজেল পীদুনা অমসুং জয় বিজ্ঞান, জয় অনুসন্ধানগী স্পিরিৎ পোকহন্দুনা ৱা ঙাংবা লোইশিনখি ।
থৌরম অদুদা কেন্দ্রগী মন্ত্রী, দা. জিতেন্দ্র সিংহ, ভারত সরকারগী প্রিন্সিপাল সাইন্তিফিক এদভাইজর, প্রো. অজয় কুমার সুদ, নোবেল লোরিএৎ সর আন্দ্রে গেম অমসুং অতোপ্পা শক্নাইরবশিংসু শরুক য়াখি।
বেকগ্রাউন্দ
লৈবাক অসিদা R&D ইকোসিস্তেমদা অচৌবা ইনোৎ অমা পীরদুনা, প্রধান মন্ত্রীনা লুপা করোর লাখ 1গী রিসর্চ দিবেলপমেন্ত এন্দ ইন্নোভেসন (RDI) স্কিম ফন্দ হৌদোকখ্রে। স্কিম অসিনা লৈবাক অসিদা প্রাইবেৎ সেক্তরনা লমজিংবা রিসর্চ অমসুং দিবেলপমেন্ত ইকোসিস্তেম অমা প্রমোৎ তৌনবা পান্দম থম্লি।
ESTIC 2025 অসি নবেম্বর 3দগী 5 ফাওবা পাংথোক্কনি। কনক্লেব অসিদা একাদেমিয়া, রিসর্চ ইন্সতিত্যুসন, ইন্দস্ত্রী অমসুং সরকারদগী শরুক য়ারিবা মীওই 3000 হেনবনা নোবেল লোরিএশিং, শক্নাইরবা সাইন্তিস্তশিং, ইন্নোভেতরশিং অমসুং পোলিসীমেকরশিংগা লোয়ননা শরুক য়াগনি। এদভান্স মেতরিএলশিং অমসুং মেনুফেকচরিং, আর্তিফিসিএল ইন্তেলিজেন্স, বাইও-মেনুফেকচরিং, ব্লু ইকোনোমী, দিজিতেল কম্ম্যুনিকেসন, ইলেক্ত্রোনিক্স অমসুং সেমিকন্দক্তর মেনুফেকচরিং, ইমর্জিং এগ্রিকলচর তেক্নোলোজীশিং, ইনর্জী, এনভাইর্নমেন্ত অমসুং ক্লাইমেৎ, হেল্থ অমসুং মেদিকেল তেক্নোলোজীশিং, ক্বান্তম সাইন্স অমসুং তেক্নোলোজী, অমসুং স্পেস তেক্নোলোজীশিং য়াওনা মরুওইবা হীরম 11দা খন্ন-নৈনগনি।
ESTIC 2025দা মশখ নাইবা সাইন্তিস্তশিংগী তোল্কস, পেনেল দিস্কসনশিং, প্রেজেন্তেসনশিং অমসুং তেক্নোলোজী শোকেসশিং য়াওগনি, মসিনা ভারতকী সাইন্স অমসুং তেক্নোলোজী ইকোসিস্তেম মপাঙ্গল কনখৎহন্নবগীদমক রিসর্চরশিং, ইন্দস্ত্রী অমসুং নহা ওইরিবা ইন্নোভেতরশিংগী মরক্তা তেংবাং পীননবা প্লেৎফোর্ম অমা পীগনি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
We are focusing on Ease of Doing Research so that a modern ecosystem of innovation can flourish in India. pic.twitter.com/wNvUcUDw9Z
— PMO India (@PMOIndia) November 3, 2025
When science meets scale,
— PMO India (@PMOIndia) November 3, 2025
When innovation becomes inclusive,
When technology drives transformation,
The foundation for great achievements is laid. pic.twitter.com/R3YH8kxhIS
India is no longer just a consumer of technology. It has become a pioneer of transformation through technology. pic.twitter.com/nvwH0dhzMg
— PMO India (@PMOIndia) November 3, 2025
Today, India has the world's most successful digital public infrastructure. pic.twitter.com/EZ2lOJXM9I
— PMO India (@PMOIndia) November 3, 2025
Today, India is shaping the global framework for ethical and human-centric AI. pic.twitter.com/rSUIJMRzSb
— PMO India (@PMOIndia) November 3, 2025
