প্রধান মন্ত্রী, শ্রী নরেন্দ্র মোদীনা “পি.এম. বিশ্বকর্মা কৌশল সম্মান”গী হীরমদা বজেত মতুংগী ৱেবিনারদা ৱা ঙাংখ্রে। কেন্দ্রগী বজেত ২০২৩দা লাউথোকখিবা তোঙানবা খোঙথাং কয়াবু থবক্তা নিংথীনা ওন্থোকপা ঙম্নবগীদমক্তা মীয়ামদগী পাউতাক অমদি ৱাখল্লোন কয়া লৌনবগীদমক্তা সরকারনা শীন-লাঙবা বজেত মতুংগী ৱেবিনার ১২গী পরিংগী মনুং চনবা খ্বাইদগী অরোইবা ৱেবিনার অমা মসিনা ওইরি।
ঙসি তিনখিবা মীওইশিংগী মফমদা প্রধান মন্ত্রীনা ফোংদোকখিবদা বজেতকী মতুংদা স্তেকহোলদরশিংগা লোয়ননা ৱারী শাবগী চৎনবী অমা মমাংগী চহি অহুমদগী চৎনবা হৌরক্লে হায়খি। মসিগুম্বা ৱারী ৱাতাইশিং অসিদা স্তেকহোলদরশিংনা কান্নগদবা মওংদা শরুক য়াবসিদা মহাক্না নুংঙাইবা ফোংদোকখি। বজেত করম্না শেমগদগে হায়না খন্নবগী মহুত্তা, বজেত্তা য়াওরিবা ৱাফমশিংবু মতৌ করম্না থবক্তা নিংথীনা পাংথোক্কদগে হায়না স্তেকহোলদরশিংনা খন্ন-নৈনবগী মতৌবু মহাক্না শকখঙখি। হায়রিবা বজেত মতুংগী ৱেবিনারগী পরিং অসিদি পার্লিয়ামেন্তকী মীওইশিংনা পার্লিয়ামেন্ত মনুংদা শাবা ৱারী ৱাতাইশিংবু স্তেকহোলদরশিংনা খন্ন-নৈনবগী থৌওং পাংথোকপা অনৌবা তাঙ্কক অমগী অহৌবনি অমসুং চৎনবী অসিদগী স্তেকহোলদরশিংদগী মমল য়াম্লবা পাউতাক অমুক লৌবসি য়াম্না কান্নবা থবক-থৌরম অমনি হায়না প্রধান মন্ত্রীনা ফোংদোকখি।
ঙসিগী ৱেবিনার অসিদি ভারত মচা করোর কয়াগী স্কিল অমসুং মহৈ-মশিংদা কত্থোক্লবনি হায়না প্রধান মন্ত্রীনা হায়খি। স্কিল ইন্দিয়া মিসন অমসুং কৌশল রোজগার কেন্দ্রগী খুত্থাংদা নহা করোর কয়াদা স্কিল পীবা অমসুং থবক পীবগী থৌওংশিংদা মিৎয়েং চঙলদুনা, প্রধান মন্ত্রীনা পান্দম অমা থমদুনা অখন্ননা থবক পায়খৎপগী তঙাই ফদবা লৈরে হায়না পনখি। পি.এম. বিশ্বকর্মা কৌশল সম্মান য়োজনা নত্ত্রগা পি.এম. বিশ্বকর্মা অসিদি মসিগুম্বা ৱাখল্লোনগী মহৈনি হায়না প্রধান মন্ত্রীনা হায়খি। স্কিম অসিগী তঙাই ফদবা অমসুং “বিশ্বকর্মা” হায়না মিংথোল্লিবা অসিগী মতাংদা প্রধান মন্ত্রীনা শন্দোক্না তাক্লদুনা ভারতকী চৎনবীদা লৈরিবা ভগ্বান বিশ্বকর্মগী মশক নাইরবা থাক অমসুং মশাগী মখুৎ শিজিন্নদুনা থবক তৌবগী চৎনবীবু ইকায় খুম্নবগী মতাংদা ৱাফম থমখি।
সেক্তর খরগী আর্তিসানশিংনা মীয়ামগী মিৎয়েং খরা ফংলবসু, খুন্নাইগী তৎন-থানবা য়াদ্রবা শরুক অমা ওইরিবা উ-শুবা, য়োৎ শুবা, মুর্তী শাবা, চেক চনবা অমসুং আর্তিসানগী মনুং চনবা অতোপ্পা কাঙলুপ কয়া অমনা খুন্নাইগী তঙাই ফদবা কয়া পীনবগীদমক্তা মতম্না পুরকপা অহোংবশিংগা চুননা চৎপা ঙম্নবা হোৎনদুনা লাক্লিবা অসিবু থৱা শাবীদে হায়না প্রধান মন্ত্রীনা হায়খি।
“অপীকপা আর্তিসানশিংনা লোকেলগী ক্রাফ কয়া পুথোকপদা মরু ওইবা থৌদাং লৌরি। পি.এম. বিশ্বকর্মা য়োজনানা মখোয়বু মপাঙ্গল লৈহন্নবা অহেনবা মিৎয়েং চঙলি”, প্রধান মন্ত্রীনা হায়খি। স্কিল লৈবা ক্রাফমেনশিংনা অরিবা মতমগী ভারত্তা মশাগী ওইবা পাম্বৈ শিজিন্নদুনা মীরমদা পোৎলম থাদোকপগী হীরমদা মশাগী শরুক তমদুনা লাকখি হায়না মহাক্না পাউদমখি। অদুবু মীখা পোন্দুনা লৈখিবা মতমশিংগী মনুংদা স্কিল লৈবা থবক তৌবা মীওইশিংবু মতম কয়াদগী মিৎয়েং চঙবীদনা লাকখি অমসুং মখোয়গী থবকশিংবু নিংথীনা শকখঙবীখিদবা অসিবু প্রধান মন্ত্রীনা নুংঙাইতবা ফোংদোকখি। লৈবাক অসিনা নিংতম্বা ফংলবা মতুংদা ফাওবা, মখোয়গী য়াইফ-থৌরাংগী মতাংদা সরকারনা করিসু পাংথোক্তনা লাকখি অমসুং মসিনা মরম ওইদুনা, অতোপ্পা শেন্দান লম্বী অমা থিরুনবগীদমক্তা স্কিল অমসুং ক্রাফমেনশিপকী নাৎকী ওইবা চৎনবী কয়া অমবু মরী লৈনবা ইমুংশিংনা থাদোকখি হায়না প্রধান মন্ত্রীনা নুংনাংবা ফোংদোকখি। মসিগুম্বা ৱর্কিং ক্লাস খরনা নাৎকী ওইবা থৌওং শিজিন্নবা খুৎশারোলগী চৎনবীশিংবু চহি চা কয়াদগী য়োকখত্তুনা লাকখি অমসুং মখোয়গী তোপ-তোপ্পা অমসুং তোঙানবা মহৈ অমসুং পোত্থোকশিংনা মখোয়গী মমিং ঙাক্তুনা লৈবা ঙম্লি হায়না প্রধান মন্ত্রীনা মীয়ামগী পুক্নিং চিংশিনখি। “স্কিল লৈবা ক্রাফমেনশিং অসি মরোমদোম লেপচবা ঙম্বা ভারতকী ইথিলগী তসেংবা খুদম্নি অমসুং ঐখোয়গী সরকারনা মখোয়গুম্বা মীওইশিংবু অনৌবা ভারতকী বিশ্বকর্মনি হায়না লৌরি”, মহাক্না মখা তাখি। পি.এম. বিশ্বকর্মা কৌশল সম্মান য়োজনা অসি মখোয়গীদমক্তা অখন্ননা হৌদোকপনি অমসুং মশাগী মখুৎ-মশা শিজিন্নদুনা পুন্সি মহিং তাল্লিবা খুঙ্গং অমসুং শহর মচাশিংদা লৈবা স্কিল লৈরবা মীওইশিং অসিগী মফমদা মরু ওইবা মিৎয়েং অদুমক চঙলি হায়না প্রধান মন্ত্রীনা ফোংদোকখি।
মীওইবগী খুন্নাইগী মতাংদা লৈজবা মহৌশাগী চৎনরোলদা অহেনবা মিৎয়েং চঙলদুনা, প্রধান মন্ত্রীনা খুন্নাইগী পুন্সিগী মসিগুম্বা থৌওংশিং অসি খুন্নাই অমা লৈবা অমসুং মদুনা চাউখৎপগী ওইনা য়াম্না তঙাই ফদে হায়না ফোংদোকখি। তেক্নোলোজীনা কয়া য়াম্না চাউখৎলবসু, মসিগুম্বা থবকশিং অসিগী মফম অদুমক লৈরি। পি.এম. বিশ্বকর্মনা চোইনা তারবা মখোয়গুম্বা আর্তিসানশিংদা মিৎয়েং চঙলি হায়না মহাক্না হায়খি।
প্রধান মন্ত্রীনা গান্ধীজীগী গ্রাম স্বরাজকী ৱাখল্লোনগী মতাংদা পল্লদুনা খুঙ্গংগী পুন্সি মহিংদা মসিগুম্বা থবকশিংগা লোয়ননা লৌউ-শিংউবগী থবকশিংনা লৌরিবা থৌদাংশিংদা মীয়ামগী পুক্নিং চিংশিনখি। “খুঙ্গংগী কাঙলুপ খুদিংবু মখোয়গী চাউখৎ-থৌরাংগীদমক্তা মপাঙ্গল হাপ্পা হায়বসি ভারতকী চাউখৎপগী খোঙচত্তা য়াম্না মরু ওই”, মহাক্না হায়খি। পি.এম. স্বনিধীগী খুত্থাংদা লম্বীদা দুকান ফম্বশিংনা ফংলিবা খুদোংচাবশিংগা মান্ননা পি.এম. বিশ্বকর্মা য়োজনানা আর্তিসানশিংদা খুদোংচাবা কয়া পীগনি হায়না প্রধান মন্ত্রীনা হায়খি।
“ঐখোয়গী লৈবাক্কী বিশ্বকর্মশিংগী তঙাই ফদবশিংগী মতুং ইন্না ঐখোয়না ঐখোয়গী স্কিল ইনফ্রাস্ত্রকচর সীস্তেম্বু নৌনা শীন্দোকপগী মথৌ তারি”, প্রধান মন্ত্রীনা হায়খি। বেঙ্ক গেরেন্তী অমত্তা য়াওদনা লুপা করোর কয়াগী লোন পীরিবা মুদ্র য়োজনাগী মতাংদা প্রধান মন্ত্রীনা খুদম ওইনা পীখি। মসিগী স্কিম অসিনা ঐখোয়গী বিশ্বকর্মশিংদা খ্বাইদগী চাউবা খুদোংচাবা পীগদবনি হায়না মহাক্না ফোংদোকখি অমসুং বিশ্বকর্মা শাথীশিংগীদমক্তা দিজিতেল লিতরেসী কেম্পেন পাংথোকপগী থৌওং অসিদসু অহেনবা মিৎয়েং চঙবগী তঙাই ফদবা লৈ হায়নসু মহাক্না ফোংদোকখি।
খুৎনা শাবা পোত্থোকশিংনা মীয়ামগী পুক্নিং লেপ্তনা চিংশিল্লিবা অসিগী মতাংদা পল্লদুনা, প্রধান মন্ত্রীনা ঐখোয়গী সরকারনা লৈবাক্কী বিশ্বকর্মা খুদিংগী মফমদা হোলিস্তিক ইন্সতিত্যুস্নেল সপ্পোর্ত পীগনি হায়না ফোংদোকখি। মসিনা লোন ফংহনবা, স্কিলিং তৌবা, তেক্নিকেল সপ্পোর্ত পীবা, দিজিতেল ইম্পাৱর্মেন্ত তৌবা, ব্রান্দ প্রোমোসন তৌবীবা, মার্কেতিং অমসুং রো মেতরিএলগী হীরমশিং পাংথোকপদা হেন্না লায়থোকহনগনি। “পি.এম. বিশ্বকর্মা য়োজনা অসিনা ত্রেদিস্নেল আর্তিসান অমসুং ক্রাফমেনশিংবু চাউখৎহনবগা লোয়ননা মখোয়গী মশক নাইরবা চৎনবীশিংবুশু ঙাক শেন্দুনা থম্নবা পান্দম থম্লি”, মহাক্না হায়খি।
“ঙসিগী বিশ্বকর্মশিংনা হয়েংগী ওন্তোপ্রিনর ওইবা ঙমগনি হায়বসি ঐখোয়গী পান্দম্নি। মসিগীদমক্তা, মখোয়গী বিজনেস মোদেলদা সস্তেনেবিলিতী লৈহনবা হায়বসি য়াম্না মথৌ তাই”, প্রধান মন্ত্রীনা হায়খি। সরকারনা লোকেলগী কৈথেলখক্তা নত্তনা মালেমগী কৈথেলশিংদসু পান্দম থমদুনা মিৎয়েং চঙলিবা অসিনা মরম ওইরগা কস্তমরশিংগী অপাম্বশিংগী হীরমসু নিংথীনা য়েংশিল্লে হায়না প্রধান মন্ত্রীনা মরু ওইনা পনখি। স্তেকহোলদর খুদিংনা বিশ্বকর্মশিংবু নিংথীনা লমজিং লমতাকপীদুনা মখোয়গী মফমদা মরী লৈনবা ই-পাউশিং নিংথীনা খঙহন্দুনা মখোয়না তুংলমচত্তা চঙশিনবদা তেংবাংবীয়ু হায়না প্রধান মন্ত্রীনা ফোংদোকখি। মসিগীদমক্তা অদোম্না গ্রাউন্দদা চৎপা তাবনি অমসুং মখোয়গুম্বা বিশ্বকর্মা মরুপশিংগী মরক্তা তিনবগী মথৌ তাই হায়না প্রধান মন্ত্রীনা স্তেকহোলদরশিংদা মখা তানা হায়খি।
আর্তিসান অমসুং ক্রাফমেনশিংনা ভেল্যু চেনগী শরুক অমা ওইরকপা মতমদা মখোয়গী মপাঙ্গল হেন্না লৈহনবা য়াগনি অমসুং মখোয়গী মনুংদগী য়াম্লবা মীওই কয়ানা ঐখোয়গী এম.এস.এম.ই. সেক্তরগী সপ্লাইয়র অমসুং প্রদ্যুসর ওইবা ঙমগনি হায়না প্রধান মন্ত্রীনা হায়খি। মতিক চাবা তুল অমসুং তেক্নোলোজীগী মতেংদগী মখোয়বু ঐখোয়গী শেন্মিৎলোনগী মরু ওইবা শরুক অমা ওইহনবা য়াগনি হায়না পল্লদুনা, ইন্দস্ত্রীশিংনা মখোয়গী তঙাই ফদবগী মতুং ইন্না মীওইশিং অসিদা স্কিল অমসুং ক্বালিতী ত্রেনিং কয়া পীদুনা মখোয়গা মরী লৈনবা মতমদা ইন্দস্ত্রীশিংনা মখোয়গী পোত্থোক পুথোকপগী চাংসু হেনগৎহনবা য়াগনি হায়না প্রধান মন্ত্রীনা হায়খি। “মসিদি স্তেকহোলদর খুদিংনা মায় পাকপা ফংবা থৌওং অমা ওইবা য়াগনি। কোর্পোরেত কম্পেনীশিংনা অফবা মমলদা মগুন লৈবা পোত্থোক ফংগনি। বেঙ্কশিংগী শেলশিংসু থাজবা য়াবা স্কিমশিংদা থাদবা য়ারগনি। মসিনা সরকারগী স্কিম অসিগী পাক শন্না কান্নবা পীবা অমসুং ফংবগী মতৌসু মমি তাহনবা ঙমগনি”, মহাক্না হায়খি। স্তার্তঅপশিংনা মখোয়গী মফমদা হান্নদগী হেন্না ফবা তেক্নোলোজী, দিজাইন, পেকেজিং অমসুং ফাইনান্সিংগী মতেং পাংবগা লোয়ননা মখোয়গী ই-কম্মর্স মোদেলগী খুত্থাংদা ক্রাফকী পোত্থোকশিংগী অচৌবা কৈথেল অমসু শেমগৎপা ঙমগনি হায়না মহাক্না মিৎয়েং চঙখি। প্রাইভেত সেক্তরগা লৈনরিবা মরীশিংবু পি.এম. বিশ্বকর্মগী খুত্থাংদা হেন্না কলহনবা ঙমগনি অমসুং প্রাইভেত সেক্তরগী ইন্নোভেসন তৌবগী শক্তি অসুং কারবার তৌবগী থোওংশিংবু হেন্না পাকথোক চাউথোকহনবা ঙমগনি হায়বগী থাজবা লৈ হায়না প্রধান মন্ত্রীনা হায়খি।
মরী লৈনবা স্তেকহোলদর খুদিংনা অচৌবা ব্লুপ্রিন্ত অমা শেম্বীয়ু হায়রদুনা প্রধান মন্ত্রীনা মহাক্কী ৱারোল লোইশিনখি। সরকারনা লৈবাক্কী খ্বাইদগী মনুং-হঞ্জিনবা মফমশিংদা য়ৌশিন্নবা কন্না হোৎনরি অমসুং মখোয়গী মনুংদগী মীওই কয়া অমনা মপুন্সিগী অহানবা ওইনা সরকারগী স্কিমগী কান্নবা ফংবসু হৌরে হায়না প্রধান মন্ত্রীনা হায়খি। অয়াম্বা আর্তিসান কয়া অমদি দলিত, ত্রাইবেল, শোত্থরবা খুন্নাই নত্ত্রগা নুপীশিংনি অমসুং মখোয়গী মফমদা কান্নবা কয়া য়ৌহন্নবগীদমক্তা প্রেক্তিকেল ওইবা থৌরাং অমগী মথৌ তাই। “ঐখোয়না মসিগীদমক্তা অকক্নবা মতমগী মনুংদা মিসন মোদতা থবক পায়খৎপগী মথৌ তাই”, হায়রদুনা প্রধান মন্ত্রীনা মহাক্কী ৱারোল লোইশিনখি।
The announcement of PM Vishwakarma Yojana in this year's budget has attracted everyone's attention. pic.twitter.com/mcXf2EetGY
— PMO India (@PMOIndia) March 11, 2023
Small artisans play an important role in the production of local crafts. PM Vishwakarma Yojana focuses on empowering them. pic.twitter.com/0EFc1XtRuT
— PMO India (@PMOIndia) March 11, 2023
PM Vishwakarma Yojana is aimed at development of traditional artisans and craftsmen while preserving their rich traditions. pic.twitter.com/7Clp8VwbQI
— PMO India (@PMOIndia) March 11, 2023
The Vishwakarmas of today can become entrepreneurs of tomorrow. pic.twitter.com/GD9AziCpPo
— PMO India (@PMOIndia) March 11, 2023
