প্রধান মন্ত্রী, শ্রী নরেন্দ্র মোদীনা ব্রহ্ম কুমারীশিংগী ‘জল জন অভিয়ান’ গী থৌরমদা ঙসি ভিদিও মেসেজকী খুত্থাংদা ৱারোল থমখ্রে।
প্রধান মন্ত্রীনা ঙসিগী মীয়ামদা ৱা ঙাংবদা ব্রহ্ম কুমারীগী জল জন অভিয়ান থৌরম হৌদোকপগী শরুক ওইবা ফংবসি য়াম্না লাইবক ফবা খুদোংচাবা অমনি হায়না ফোংদোকখি অমসুং মখোয়গী মতম পুম্বদা অখন্নবা পারা অদুমক তম্বা ফংই হায়না মখা তাখি। “লৈখিদ্রবী রাজয়োগীনি দাদী জানকীজীদগী ফংজখিবা থৌজালনা ঐহাক্কী খ্বাইদগী চাউবা থৌজালনি”, প্রধান মন্ত্রীনা হায়খি। মহাক্না ইং ২০০৭তা দাদী প্রকাশ মানীজী লৈখিদ্রবা তুংদা মাউন্ত অবুদা লাক্তুনা ইকায় খুম্নবা উৎচবগী খুদোংচাবা ফংখিবা অদুগী মতাংদা অমুক হন্না নিংশিংখি। মমাংগী চহিশিংদা ব্রহ্ম কুমারীগী ইচে-ইচলশিংনা তরাম্না ওকপীখিবশিংবু মহাক্না পনখি অমসুং মহাক্না মখোয়গী স্পিরিচুএল ওইবা ইমুং-মনুংগী মীওই অমা ওইনা মখোয়গী মরক্তা লৈনবা মহাক্না মতম পুম্বদা হোৎনখি হায়না ফোংদোকখি। মহাক্না ইং ২০১১গী অহমেদবাদতা পাংথোকপা ‘ফ্যুচর ওফ পাৱর’ থৌরম; ইন্সতিত্যুসন অসি লিংখৎপগী চহি ৭৫ মপুং ফাবগী ইং ২০১৩গী থৌরম; ইং ২০১৭কী ব্রহ্ম কুমারী সন্সথানগী ৮০শুবা ফাউন্দেসন দে নুমিৎ অমসুং অমৃত মহোৎসবকী মনুংদা পাংথোকখিবা থৌরমশিং নিংশিংলদুনা মখোয়গী মীনুংশি অমসুং থৌজালগীদমক্তা থাগৎপা ফোংদোকখি। ব্রহ্ম কুমারীশিংগা মহাক্কা লৈনবা অচেৎপা মরীদা মহাক্না অহেনবা মিৎয়েং চঙলদুনা ইশাগী অপাম্বা থাদোক্তুনা খুন্নাইগী তেংবাংগীদমক্তা থোক্লকপা হায়বসি মখোয় খুদিংগী স্পিরিচুএল ওইবগী শরুক অমনি হায়না মহাক্না পাউদমখি।
ঈশিং তাঙবগী থৌওং অসিবু মালেমদা হয়েং থোক্লক্কদবা ইরাং ওইনা য়েংনবা মতমসিদা জল-জন অভিয়ান হৌদোক্লি হায়না প্রধান মন্ত্রীনা মীয়ামগী পুক্নিং চিংশিনখি। ২১শুবা চহি-চাগী মালেম্না পৃথিবীদা ঈশিং তাঙবগী শিংনবা অসিদা পুক্নিং চঙনরকপা হৌনরে হায়না মহাক্না পল্লদুনা ভারতকী ওইনদি মশাগী মীশিং য়াম্না লৈবনা মরম ওইরগা ৱাতর সেক্যুরিতীগী মতাংদা অচৌবা ৱাহং অমা লৈরি হায়না মখা তাখি। “অমৃত কাল অসিদা ভারতনা ঈশিংবু তুংগী মতম্নি খল্লি। ঈশিং লৈরবা মতুংদা তুংগী মতম অমা লৈগদৌরিবনি”, প্রধান মন্ত্রীনা হায়রদুনা ঙসিদগী হৌনা ঐখোয় পুন্না হোৎনমিন্নবা হৌবা তাবনি হায়খি। ঈশিং য়োকশিনবগী থৌওংবু লৈবাক অসিনা মীয়ামগী ইহৌ ওইহনবা অসিদা প্রধান মন্ত্রীনা নুংঙাইবা ফোংদোক্লদুনা ইহৌ অসিদা মীয়াম পুম্বনা শরুক য়াহন্নবা হোৎনবগী মতৌসিদা ব্রহ্ম কুমারীশিংগী জল-জন অভিয়ান্না অহেনবা পাঙ্গল হাপকনি হায়খি। ঈশিং য়োকশিনবগী কেম্পেনশিং অসি মীয়াম মশিং য়াম্বদা য়ৌরগনি অমসুং মসিগী অহেনবা মহৈসু ফংলগনি হায়না মহাক্না পনখি।
চহি লিশিং কয়াগী মমাঙদা মহৌশা ইমা, অকোয়বগী ফিভম অমসুং ঈশিংগী মতাংদা চেকশিনবা, খল নাইবা অমসুং সেন্সিতিব ওইবা পথাপ শেম্লম্বা ভারতকী মুনিশিংগী মতাংদা প্রধান মন্ত্রীনা ফোংদোকখি। ঈশিং মাঙহনগনু, য়োকশিল্লু হায়বা চহি লিশাং শিৎপদগী হায়নদুনা লাক্লবা পাউরৌশিং মহাক্না নিংশিংলদুনা মসিগুম্বা ৱাখল্লোন অসিনা ভারতকী স্পিরিচুএলিতীগী শরুক অমা অমসুং ঐখোয়গী লাইনিং ওইনা চহি লিশিং কয়াদগী ওইদুনা লাক্লি হায়খি। “ঈশিং য়োকশিনবা হায়বসি ঐখোয়গী খুন্নাইগী চৎনবীনি অমসুং ঐখোয়গী খুন্নাইগী ৱাখল্লোনগী মপুং ওইবা ৱাফম্নি। মরম অদুনা, ঐখোয়না ঈশিংবু লাইনি অমসুং তুরেলবুনা ইমানি হায়না খল্লি”, হায়না মহাক্না মখা তাখি। ঐখোয়গী খুন্নাইনা মহৌশাগা অচেৎপা মরী লৈনরকপা মতমদা সস্তেনেবল দিভেলপমেন্তনা মহৌশাগী পুন্সি মহিং অমা ওইরক্কনি হায়বা ৱাফমদা মহাক্না মীয়ামগী পুক্নিং চিংশিনখি। থাইনা মমাংগী মতমগী ৱাখল্লোনশিং নিংশিংদুনা তুংগী মতমগী শিংনবগী ৱারোইশিন পুরক্নবা হোৎনবগী তঙাই ফদবা লৈ হায়নসু মহাক্না ফোংদোকখি। ঈশিং য়োকশিনবগী মাইকৈদা লৈবাক মীয়াম্না থাজবা থম্বা অমসুং ঈশিং মাংথোকপগী থৌওংশিং থোকহনবা অপনবা খুদিংমক লৌথোকপগী মথৌ তারে হায়না প্রধান মন্ত্রীনা মরু ওইনা ফোংদোকখি। ঈশিং য়োকশিনবগী মতাংদা ব্রহ্ম কুমারীগুম্বা ভারতকী স্পিরিচুএল ওর্গনাইজেসনশিংগী থৌদাংশিংদসু মহাক্না মিৎয়েং চঙখি।
পামদবা ৱাখল খনবগী মতৌ হৌরকখিবা অমসুং ঈশিং অমদি অকোয়বগী ফিভম য়োকখৎপবু য়াম্না লুবনি হায়না লৌরম্বা ভারতকী মমাংগী দিকেদশিংগী মতাংদা প্রধান মন্ত্রীনা নুংনাংবা ফোংদোকখি। মমাংগী চহি ৮-৯দা লাকপা অহোংবশিংদা মিৎয়েং চঙলদুনা, প্রধান মন্ত্রীনা মহাক্কী ৱাখল্লোন্দা অপুনবা অহোংবা লাক্লে হায়খি। প্রধান মন্ত্রীনা নমামী গঙ্গে কেম্পেনগী খুদম পীরদুনা, গঙ্গা তুরেল খক্তা নত্তনা মসিগী মশা মরেং খুদিংসু শেংদোকপা ঙম্লে অমসুং নেচরেল ফার্মিংগুম্বা কেম্পেন কয়াসু গঙ্গা তুরেল মপান্দা পাংথোক্লি হায়না পনখি। “নমামী গঙ্গে কেম্পেন অসিনা লৈবাক্কী তোঙানবা রাজ্য কয়াগী মোদেল ওইরক্লি”, প্রধান মন্ত্রীনা হায়খি।
প্রধান মন্ত্রীনা ‘কেৎচ দি রেন কেম্পেন’গী মতাংদা পাউদম্লদুনা লৈনুংগী ঈশিংগী চাং হন্থরক্লিবা অসি লৈবাক্কী অচৌবা শিংনবা অমনি হায়খি। অতল ভুজল য়োজনাগী খুত্থাংদা গ্রাম পঞ্চায়ত লিশিং কয়াদা ঈশিং য়োকশিনবগী মতাংদা পুক্নিং থৌগৎলি হায়না মহাক্না পাউদমখি। লৈবাক্কী জিলা খুদিংদা অমৃত সরোবর ৭৫ শাবা অসি ঈশিং য়োকশিনবগী মাইকৈদা থাংজিনবা অচৌবা খোঙথাং অমনি হায়না মহাক্না মখা তাখি।
প্রধান মন্ত্রীনা ঈশিং য়োকশিনবদা নুপীশিংনা য়াবা থৌরাংশিং পল্লদুনা খুঙ্গংগী নুপীশিংনা ৱাতর কম্মিতীগী খুত্থাংদা জল জীবন মিসনগুম্বা মরু ওইবা স্কিম কয়া লমজিংলি হায়খি। ব্রহ্ম কুমারীগী ইচে-ইচলশিংনা মান্নবা থৌদাং অমা লৈবাক অমসুং মালেমগী থাক্তা লৈবা য়াই হায়না মহাক্না ফোংদোকখি। ঈশিং য়োকশিনবগা লোয়ননা অকোয়বগী ফিভম য়োকখৎপগা মরী লৈনবা হীরম কয়াদা মিৎয়েং চঙবগী তঙাই ফদবা লৈ হায়না মহাক্না পনখি। লৌউ-শিংউদা ঈশিং শিজিন্নবগী খল ঙাক্নবগীদমক্তা দ্রিপ ইরিগেসনগুম্বা থৌওং কয়া লৈবাক অসিনা পুক্নিং থৌগৎলি হায়না প্রধান মন্ত্রীনা ফোংদোক্লদুনা লৌমীশিংনা মসিগুম্বা থৌওং শিজিন্নবা হেনগৎনবা ইথিল পীবিয়ু হায়না ব্রহ্ম কুমারীশিংগী মফমদা হায়জখি।
মালেম পুম্বনা মিল্লেতকী মালেমগী চহিগী হরাও নুংঙাইবা ফোংদোক্লি হায়না প্রধান মন্ত্রীনা ফোংদোকখি অমসুং মীয়াম্না মখোয়গী চিঞ্জাক্তা মিল্লেত য়াওহল্লসি হায়খি। শ্রী অন্না বাজ্রা অমসুং শ্রী অন্না জোৱার অসিনা চহি চা কয়াদগী ভারতকী লৌউ-শিংউ অমসুং চাকচা-হৈজাগী শরুক ওইদুনা লাক্লি হায়না মহাক্না হায়খি। মিল্লেত অসিদা মচি য়াম্না য়াওই অমসুং মসি থাবদা ঈশিং য়াম্না চঙদে হায়না মহাক্না হায়খি।
প্রধান মন্ত্রীনা মহাক্কী ৱারোল লোইশিনবা ওইনা জল-জন অভিয়ান অসি মীয়াম্না শরুক য়াদুনা মায় পাক্কনি অমসুং ভারতকী হয়েংগী অফবা মতম অমা শেম্বদা তেংবাংগনি হায়বগী থাজবা লৈ হায়না ফোংদোকখি।
‘जल-जन अभियान’ एक ऐसे समय में शुरू हो रहा है, जब पानी की कमी को पूरे विश्व में भविष्य के संकट के रूप में देखा जा रहा है। pic.twitter.com/nFgiEkUA95
— PMO India (@PMOIndia) February 16, 2023
हम जल को देव की संज्ञा देते हैं, नदियों को माँ मानते हैं। pic.twitter.com/R7iCUyUEMY
— PMO India (@PMOIndia) February 16, 2023
‘नमामि गंगे’ अभियान, आज देश के विभिन्न राज्यों के लिए एक मॉडल बनकर उभरा है। pic.twitter.com/QyVy469Sm0
— PMO India (@PMOIndia) February 16, 2023
