প্রধান মন্ত্রী, শ্রী নরেন্দ্র মোদীনা সোনাল মাতাগী চহি চাম্ম শুবা মপোক কুমওন্দা ঙসি ভিদিও মেসেজকী খুত্থাংদা ৱা ঙাঙখ্রে।
ঙসি তিনখিবা মীয়ামদা ৱা ঙাঙবদা, প্রধান মন্ত্রীনা আই শ্রী সোনাল মাগী চাম্ম শুবা মপোক কুমওনগী থৌরম অসি পাউশকী শেংলবা থা অসিদা পাংথোক্লি অমসুং মসিগুম্বা শেংলবা থৌরম অসিগা মরী লৈনবসিদা য়াম্না নুংঙাইবা পোকই হায়না ফোংদোক্লদুনা সোনাল মাতাগী থৌজাল ফংজবগী তৌবীমল খঙবা উৎখ্রে। প্রধান মন্ত্রীনা অপুনবা চরন খুন্নাই অমসুং থৌপুবশিংবু থৌরম অসিগী মনুংদা থাগৎখ্রে। “মদ্ধা ধাম অসিদি চরন খুন্নাইগী লাইনিংবা, পাঙ্গল-শক্তি, ইরাৎ থৌনি অমসুং চৎনবীগী ময়োলনি। ঐহাক্না শ্রী আইগী খুয়াখাদা কোক নোন্দুনা ইকায় খুম্নবা উৎচরি”, মহাক্না হায়খি।
সোনাল মাতাগী চাম্মা শুবা মপোক কুমওনগী নুমিৎ হুম্নিগী কুহ্মৈগী মতমশিংদু হৌজিকসু নীংশিংলি হায়না পল্লদুনা, প্রধান মন্ত্রীনা ভগ্বতী স্বরুপা সোনাল মানা ভারত্তা য়ুগ খুদিংগী অথোইবা মীওই অদুম লৈখি হায়বসিগী অহিংবা খুদম অমনি হায়না ফোংদোকখি। গুজরাত অমসুং সৌরাস্ত্রা অসি শক্নাইরবা সন্ত অমসুং অথোইবা মীওই কয়াগী হৌরকফম ওই হায়না পল্লদুনা, পি.এম. মোদীনা সন্ত অমসুং অথোইবা মীওই কয়ানা মীওই খুন্নাইবু ঙালহনগদবা মঙাল অদু মফমসিদা শন্দোকখি হায়না ফোংদোকখি। শেংলবা গির্নার অসিদি ভগ্বান দত্তাত্রেয়া অমসুং মশিং থীঙমদ্রবা সন্ত কয়াগী লৈফম ওইদুনা লাক্লি হায়না মহাক্না হায়খি। সৌরাস্ত্রগী সন্তশিংগী ওইবা মসিগুম্বা লাইওইরবা চৎনবী অসিদা “শ্রী সোনাল মাতানা হৌজিক্কী মতমগী য়ুগ অসিগী মঙাল অমগুম্বনি। শ্রী সোনাল মাতাগী স্পিরিচুএল ইনর্জী, মীওইবা খুন্নাইগী মতাংদা তাকপীবা অমসুং পেনান্স তৌবগী মতৌনা মহাক্কী মওং-মতৌদা ঐখোয়না ঙসি জুনাগর অমসুং মদ্ধাগী সোনাল ধামশিংদা ফাউবা ঙম্লিবা লাইগুম্না ফজবা মতৌ অসি শেমখিবনি” হায়না হায়খি।
প্রধান মন্ত্রীনা হায়খি, “সোনাল মাতাগী মপুন্সি চুপ্পা অসি মীয়ামগী য়াইফ য়ুম্বাল, লৈবাক শেবা অমসুং ধর্মগীদমক্তা কত্থোকখি অমসুং মসিগী মনুংদা মহাক্না ভগৎ বাপু, বিনোবা ভাবে, রবি শঙ্কর মহারাজ, কানবাই লাহেরী, কলয়ান সেথকুম্বা শক্নাইরবা মীওইশিংগা থবক শুমিন্নখি”। চরন খুন্নাইগী স্কোলরশিংনা মহাকপু অখন্ননা ইকায় খুম্নরম্মি অমসুং নহা কয়া অমদা মাইকৈ তাক্তুনা মখোয়গী পুন্সিদা অহোংবা কয়াসু পুরকখিবনি হায়না প্রধান মন্ত্রীনা মিৎয়েং চঙখি। খুন্নাইদা শরুক তমখিবশিংগী মতাংদা হায়রদুনা, প্রধান মন্ত্রীনা মহাক্না খুন্নাইগী এজুকেসন অমসুং দি-এদিক্সনগী মতাংদা পাংথোকখিবা মশক নাইরবা থবক কয়া অমসু পনখি। ফত্তবা থবক কয়াদগী খুন্নাইবু কন্নবা সোনাল মাতানা থবক তৌখিবগা লোয়ননা কৎচকী ভোৱর খুঙ্গংদা মীয়াম্না শুবা নোম্বা কন্দুনা অমসুং শা-শনশিং ঙাক শেন্দুনা মরোমদোম লেপচবা ঙম্নবা হোৎনবদা অহেনবা মিৎয়েং চঙবা চাউরবা ৱাশক লৌবগী খোঙথাং অমসু মহাক্না হৌদোক্লমখি হায়না প্রধান মন্ত্রীনা কুপ্না পাউদমখি।
সোনাল মাতানা স্পিরিচুএল অমসুং সোসিএল ৱর্ক কয়া তৌরম্বগা লোয়ননা লৈবাক্কী অমত্তা ওইবগী শক্তম ঙাকপগী মতাংদা মপাঙ্গল লৈনা লেপখিবগী ৱাফম্বু প্রধান মন্ত্রীনা পাউদম্লদুনা লৈবাক খ্বাইদোক্নবগী মতমদা জুনাগরবু কাইহন্নবা লৌতুনরকপগী মাইয়োক্তা মহাক্না ইমা চান্দীগুম্না লেপখিবগী মতাংদসু মখা তানা পাউদমখি।
“শ্রী সোনাল মাতা অসিদি চরন খুন্নাইনা লৈবাক অসিদা শরুক কয়া তম্লম্বশিংগী নীংথিরবা খুদম অমনি”, প্রধান মন্ত্রীনা ভারতকী স্কৃপচরশিংগী মতাংদা খুন্নাই অসিবু অখন্নবা থাক্তা থম্বীবা অমসুং ইকায় খুম্নবগী মতাংদা পল্লদুনা হায়খি। ভগ্বাত পুরানগুম্বা শেংলবা লাইরিকশিংদা চরন খুন্নাইবু শ্রী হরিগী হকথেংনবা চারোন শুরোন্নি হায়না পল্লি হায়না প্রধান মন্ত্রীনা হায়খি। ইমা সরস্বতীনসু খুন্নাই অসিদা অখন্নবা থৌজালসু পীখি। খুন্নাই অসিদা শক্নাইরবা স্কোলর কয়া পোকখ্রে অমসুং মখোয়শিংগী মরক্তগী খুদম ওইনা পনবা য়াবদি, পুজা থরন বাপু, পুজ্য ইসার দাসজী, পিঙ্গালসী বাপু, পুজ্য কাগ বাপু, মেরুভা বাপু, শঙ্কর্দান বাপু, শম্বুধঞ্জী, ভজনিক নরানস্বামী, হেমুভাই গরভী, পদ্মশ্রী কবি দাদ অমসুং পদ্মশ্রী ভিখুদান গরভী অমসুং চরন খুন্নাইবু হেন্না মগুন লৈহনখিবা মখোয়গুম্বা মীওই কয়ানি হায়না প্রধান মন্ত্রীনা হায়খি। “পাক-চাউরবা চরনগী লিতরেচর অসিনা হায়রিবা চৎনবী অসিগী খুদম ওইরি। লৈবাক নীংবগী ঈশৈ নত্ত্রগা স্পিরিচুএল সর্মন ওইরো, চরন লিতরেচরনা চহি চা কয়াদা অচৌবা থৌদাং য়াদুনা লাকখি”, ৱাফম অসিমক্কী মতিক চারবা খুদম অমসু ওইরিবা সোনাল মাতাগী শাফু লৈবা ৱারোলগী মতাংদা পল্লদুনা প্রধান মন্ত্রীনা হায়খি। সোনাল মাতানা চৎনবীগী খুত্থাংদা পীবা মহৈ-মশিং কৈদৌনুংদা ফংলক্ত্রবসু, মহাক্না সংস্কৃতকুম্বা লোল নীংথিনা খঙখি অমসুং স্কৃপচরশিংগী মতাংদসু অকুপ্পা লৌশিং লৈখি হায়না মহাক্না পাউদমখি। “মহাক্না রমায়নগী ৱারী লিবা তারুবশিংনা কৌদৌনুংদা কাওবা ঙম্নদে”, প্রধান মন্ত্রীনা হায়খি। জনুৱারী 22দা অয়োধ্যাগী শ্রীরাম মন্দিরদা পাংথোক্কদৌরিবা প্রান প্রতিস্থাগী থৌরমগী মতাংদা মহাক্না করিগুম্বা খঙবা তারগদি মহাক্কী নুংঙাইবগী মতৌনা ঙমখৈ নাইরোই হায়না পল্লদুনা, প্রধান মন্ত্রীনা জনুৱারী 22গী শেংলবা নুমিৎ অসিদা মীপুম খুদিংনা শ্রী রাম জ্যোতী থানবীনবা হায়খি। লৈবাক্কী লাইশঙশিংবু শেংদোক্তুনা লু-নান্না থম্বগী ঙরাংদগী হৌখিবা কেম্পেনগী মতাংদা পল্লদুনা, প্রধান মন্ত্রীনা হায়খি, “ঐখোয়না মাইকৈ অসিদসু পুন্না হোৎনমিন্নবা তাবনি। মসিগুম্বা থৌওং কয়া অসিনা শ্রী সোনাল মাতাবু হেন্না হরাও নুংঙাইহনগনি হায়না ঐহাক্না থাজৈ”।
প্রধান মন্ত্রীনা মহাক্কী ৱারোল লোইশিনবা ওইনা, শ্রী সোনাল মাতাগী ইথিলনা ভারতনা চাউখৎপা অমসুং মরোমদোম লেপচবা ঙম্বা লৈবাক অমা ওইহন্নবা হোৎনরিবসিদা ঐখোয়দা অনৌবা পাঙ্গল অমসু হাপ্পীরি হায়খি। “সোনাল ইমানা পীবিরম্বা থৌদাং 51না চরন খুন্নাইগী লমজিং লমতাক্নি”, প্রধান মন্ত্রীনা চরন খুন্নাইনা খুন্নাইদা এৱিয়র্নেস শন্দোকপগী থবকশিং মখা তানা চত্থবীখো হায়রদুনা ফোংদোকখি। খুন্নাই নুংশি চান্ননা লৈবগী মতৌবু হেন্না খুমাং চাউশিলহন্নবগীদমক্তা মদ্ধা ধামদা লেপ্তনা পাংথোক্লিবা সদব্রতগী য়গ্যবু প্রধান মন্ত্রীনা থাগৎখি অমসুং লৈবাক শেম্বগীদমক্তা পাংথোক্লিবা মসিগুম্বা ইরাৎ থৌনী কয়াবু তুংগী মতমদা লেপ্তনা পাংথোক্নবা মদ্ধা ধাম্না ইথিল পীগনি হায়বগী থাজবা লৈ হায়না ফোংদোকখি।
