“মদ্ধা ধাম অসিদি চরন খুন্নাইগী লাইনিংবা, পাঙ্গল-শক্তি, ইরাৎ থৌনি অমসুং চৎনবীগী ময়োলনি”
“শ্রী সোনাল মাতাগী স্পিরিচুএল ইনর্জী, মীওইবা খুন্নাইগী মতাংদা তাকপীবা অমসুং পেনান্স তৌবগী মতৌনা মহাক্কী মওং-মতৌসিনা ঐখোয়না ঙসি ফাওবা ফাউবা ঙম্বা লাইগুম্না ফজবা মতৌ অসি শেমখিবনি”“সোনাল মাতাগী মপুন্সি চুপ্পা অসি মীয়ামগী য়াইফ য়ুম্বাল, লৈবাক শেবা অমসুং ধর্মদা কত্থোখ্রবনি”“লৈবাক নীংবা ঈশৈ ওইরো নত্ত্রগা স্পিরিচুএল সর্মন ওইরো, চরনগী লিতরেচরনা চহি চা কয়াদা মরু ওইবা থৌদাং কয়া লৌদুনা লাক্লি”“সোনাল মাতানা রমায়নগী ৱারী লিবা হেক তারুরগদি কৈদৌনুংদা কাওবা ঙম্লোই”বর্তমান গনপতী – পুজ্য কঞ্চন মা ব্যবস্থাপক – পুজ্য গিরিশ আপা পাউশকী শেংলবা থা অসিদা ঐখোয় পুম্নমক্না ঙসিদি আই শ্রী সোনাল মাতাগী চাম্মা শুবা মপোক কুমওন হকথেংননা থেংনরি। ইমা সোনালগী থৌজালদগী ঐহাক্না ঙসি মসিগুম্বা শেংলবা থৌরম অসিগা মরী লৈনবসিদা য়াম্না নুংঙাইবা পোকই। ঐহাক্না অপুনবা চরন খুন্নাই অমসুং থৌপুবশিং অমসুং ইমা সোনালবু নীংজবা মীপুম খুদিংবু থাগৎচরি। মদ্ধা ধাম অসিদি চরন খুন্নাইগী লাইনিংবা, পাঙ্গল-শক্তি, ইরাৎ থৌনি অমসুং চৎনবীগী ময়োলনি। ঐহাক্না শ্রী আইগী খুয়াখাদা কোক নোন্দুনা ইকায় খুম্নবা উৎচরি।
ঐহাক্কী ইমুংগী মীওইশিং,
সোনাল মাতাগী চাম্মা শুবা মপোক কুমওনগী নুমিৎ হুম্নিগী কুহ্মৈগী মতমশিংদু হৌজিকসু নীংশিংলি। ভগ্বতী স্বরুপা সোনাল মাতানা ভারত্তা য়ুগ খুদিংগী অথোইবা মীওই অদুম লৈখি হায়বসিগী অহিংবা খুদম অমনি। গুজরাত অমসুং সৌরাস্ত্রা অসি শক্নাইরবা সন্ত অমসুং অথোইবা মীওই কয়াগী হৌরকফম ওইদুনা লাক্লি। সন্ত অমসুং অথোইবা মীওই কয়ানা মীওই খুন্নাইবু ঙালহনগদবা মঙাল অদু মফমসিদা শন্দোকখি। শেংলবা গির্নার অসিদি ভগ্বান দত্তাত্রেয়া অমসুং মশিং থীঙমদ্রবা সন্ত কয়াগী লৈফম ওইদুনা লাক্লি। সৌরাস্ত্রগী সন্তশিংগী ওইবা মসিগুম্বা লাইওইরবা চৎনবী অসিদা শ্রী সোনাল মাতানা হৌজিক্কী মতমগী য়ুগ অসিগী মঙাল অমগুম্বনি। শ্রী সোনাল মাতাগী স্পিরিচুএল ইনর্জী, মীওইবা খুন্নাইগী মতাংদা তাকপীবা অমসুং পেনান্স তৌবগী মতৌনা মহাক্কী মওং-মতৌদা ঐখোয়না ঙসি জুনাগর অমসুং মদ্ধাগী সোনাল ধামশিংদা ফাউবা ঙম্লি।
ইচিল ইনাওশিং,
সোনাল মাতাগী মপুন্সি চুপ্পা অসি মীয়ামগী য়াইফ য়ুম্বাল, লৈবাক শেবা অমসুং ধর্মগীদমক্তা কত্থোকখি অমসুং মসিগী মনুংদা মহাক্না ভগৎ বাপু, বিনোবা ভাবে, রবি শঙ্কর মহারাজ, কানবাই লাহেরী, কলয়ান সেথকুম্বা শক্নাইরবা মীওইশিংগা থবক শুমিন্নখি। চরন খুন্নাইগী স্কোলরশিংনা মহাকপু অখন্ননা ইকায় খুম্নরম্মি অমসুং নহা কয়া অমদা মাইকৈ তাক্তুনা মখোয়গী পুন্সিদা অহোংবা কয়াসু পুরকখিবনি। খুন্নাইদা শরুক তমখিবশিংগী মতাংগী ওইনা মহাক্না খুন্নাইগী এজুকেসন অমসুং দি-এদিক্সনগী মতাংদা মশক নাইরবা থবক কয়া পাংথোকখি। ফত্তবা থবক কয়াদগী খুন্নাইবু কন্নবা সোনাল মাতানা থবক তৌখিবগা লোয়ননা কৎচকী ভোৱর খুঙ্গংদা মীয়াম্না শুবা নোম্বা কন্দুনা অমসুং শা-শনশিং ঙাক শেন্দুনা মরোমদোম লেপচবা ঙম্নবা হোৎনবদা অহেনবা মিৎয়েং চঙবা চাউরবা ৱাশক লৌবগী খোঙথাং অমসু মহাক্না হৌদোক্লমখি।
মরুপশিং,
সোনাল মাতানা স্পিরিচুএল অমসুং সোসিএল ৱর্ক কয়া তৌরম্বগা লোয়ননা লৈবাক্কী অমত্তা ওইবগী শক্তম ঙাকখি। লৈবাক খ্বাইদোক্নবগী মতমদা জুনাগরবু কাইহন্নবা লৌতুনরকপগী মাইয়োক্তা মহাক্না ইমা চান্দীগুম্না লেপখিবনি।
ঐহাক্কী ইমুংগী মীওইশিং,
শ্রী সোনাল মাতা অসিদি চরন খুন্নাইনা লৈবাক অসিদা শরুক কয়া তম্লম্বশিংগী নীংথিরবা খুদম অমনি। খুন্নাই অসিবু অখন্নবা থাক্তা থম্মি অমসুং ইকায় খুম্নৈ। ভগ্বত পুরানগুম্বা শেংলবা লাইরিকশিংদা চরন খুন্নাইবু শ্রী হরিগী হকথেংনবা চারোন শুরোন্নি হায়না পল্লি। ইমা সরস্বতীনসু খুন্নাই অসিদা অখন্নবা থৌজালসু পীখি। খুন্নাই অসিদা শক্নাইরবা স্কোলর কয়া পোকখ্রে অমসুং মখোয়শিংগী মরক্তগী খুদম ওইনা পনবা য়াবদি, পুজা থরন বাপু, পুজ্য ইসার দাসজী, পিঙ্গালসী বাপু, পুজ্য কাগ বাপু, মেরুভা বাপু, শঙ্কর্দান বাপু, শম্বুধঞ্জী, ভজনিক নরানস্বামী, হেমুভাই গরভী, পদ্মশ্রী কবি দাদ অমসুং পদ্মশ্রী ভিখুদান গরভী অমসুং চরন খুন্নাইবু হেন্না মগুন লৈহনখিবা মখোয়গুম্বা মীওই কয়ানি। পাক-চাউরবা চরনগী লিতরেচর অসিনা হায়রিবা চৎনবী অসিগী খুদম ওইরি। লৈবাক নীংবগী ঈশৈ নত্ত্রগা স্পিরিচুএল সর্মন ওইরো, চরন লিতরেচরনা চহি চা কয়াদা অচৌবা থৌদাং য়াদুনা লাকখি। ৱাফম অসিমক্কী মতিক চারবা খুদম অমসু ওইরিবসিদি সোনাল মাতাগী শাফু লৈবা ৱারোল অদুনি। সোনাল মাতানা চৎনবীগী খুত্থাংদা পীবা মহৈ-মশিং কৈদৌনুংদা ফংলক্ত্রবসু, মহাক্না সংস্কৃতকুম্বা লোল নীংথিনা খঙখি অমসুং স্কৃপচরশিংগী মতাংদসু অকুপ্পা লৌশিং লৈখি। মহাক্না রমায়নগী ৱারী লিবা তারুবশিংনা কৌদৌনুংদা কাওবা ঙম্নদে। জনুৱারী 22দা অয়োধ্যাগী শ্রীরাম মন্দিরদা পাংথোক্কদৌরিবা প্রান প্রতিস্থাগী থৌরমগী মতাংদা মহাক্না করিগুম্বা খঙবা তারগদি মহাক্কী নুংঙাইবগী মতৌনা ঙমখৈ নাইরোই। জনুৱারী 22গী শেংলবা নুমিৎ অসিদা মীপুম খুদিংনা শ্রী রাম জ্যোতী থানবীয়ু। লৈবাক্কী লাইশঙশিংবু শেংদোক্তুনা লু-নান্না থম্বগী ঙরাংদগী কেম্পেন অমা হৌখ্রে। ঐখোয়না মাইকৈ অসিদসু পুন্না হোৎনমিন্নবা তাবনি। মসিগুম্বা থৌওং কয়া অসিনা শ্রী সোনাল মাতাবু হেন্না হরাও নুংঙাইহনগনি হায়না ঐহাক্না থাজৈ।
মরুপশিং,
শ্রী সোনাল মাতাগী ইথিলনা ভারতনা চাউখৎপা অমসুং মরোমদোম লেপচবা ঙম্বা লৈবাক অমা ওইহন্নবা হোৎনরিবসিদা ঐখোয়দা অনৌবা পাঙ্গল অমসু হাপ্পীরি। সোনাল ইমানা পীবিরম্বা থৌদাং 51না চরন খুন্নাইগী লমজিং লমতাক্নি। চরন খুন্নাইনা খুন্নাইদা এৱিয়র্নেস শন্দোকপগী থবকশিং মখা তানা চত্থবীখো। খুন্নাই নুংশি চান্ননা লৈবগী মতৌবু হেন্না খুমাং চাউশিলহন্নবগীদমক্তা মদ্ধা ধামদা লেপ্তনা পাংথোক্লিবা সদব্রতগী য়গ্যবু ঐহাক্না থাগৎচরি অমসুং লৈবাক শেম্বগীদমক্তা পাংথোক্লিবা মসিগুম্বা ইরাৎ থৌনী কয়াবু তুংগী মতমদা লেপ্তনা পাংথোক্নবা মদ্ধা ধাম্না ইথিল পীগনি হায়বগী থাজবসু ঐহাক্কী ইফমদা লৈ।
মসিগা লোয়ননা ঐহাক্না পুম্নমকপু অমুক হন্না থাগৎচরি।
