প্রধান মন্ত্রী, শ্রী নরেন্দ্র মোদী অমসুং ওস্ত্রিয়াগী চান্সেলর হিস এক্সিলেন্সী শ্রী কার্ল নেহামরনা অপুনবা ওইনা ইনফ্রাস্ত্রকচর, ওতোমোবাইল, এনর্জী, ইঞ্জিনীয়রিং অমসুং স্তার্ত অপশিংগী তোঙান-তোঙানবা সেক্তরদা লৈবা মকোক থোংবা ওস্ত্রিয়ান অমসুং ইন্দিয়ন সি.ই.ও.শিংদা ৱা ঙাংখ্রে।
লুচিংবা অনিমক্না ইন্দস্ত্রীগী লুচিংবশিং অসিনা লৈবাক অনিগী মরী অমসুং ভারত অমসুং ওস্ত্রিয়াগী মরক্তা শেন্মিৎলোনগী মতেং ফগৎনবা হোৎনরিবশিংগী মতাংদা ফোঙদোকখি। লুচিংশিং অসিনা লৈবাক অনিগী মরক্তা লৈনরিবা লল্লোন ইতীক্কী মরী অসি চহি খরা অসিদা হেনগৎলক্লি হায়না থমখি অমসুং ভারত-ওস্ত্রিয়া মপাং অসি হেন্না মতেং পীনদুনা মপুং ফাবা শক্তি পুথোক্নবা হোৎনমিন্ননবা থমখি।
প্রধান মন্ত্রীনা ওস্ত্রিয়াগী বিজিনেস স্তেকহোল্দরশিংবু লৈবাক অসিনা লাক্কদবা চহি খরা অসিদা মালেমদা খ্বাইদগী চাউবা শেন্মিৎলোন অহুমশুবা ওইরগদবা মতম অসিদা ভারত্তা অথুবদা খুদোংচাবা কয়া লৈরিবসি য়েংবীনবগী অপাম্বা ফোংদোকখি। মহাক্না ফোঙদোকখি মদুদি ভারতনা হৌখিবা চহি তরারোম অসিদা অহোংবা কয়া অমা পুরকখ্রে, অমসুং রাজনিতীগী তংদু লৈতাবা, থৌশিল লেপ্পা অমসুং রিফোর্মদা হেন্না মায় ওনশিল্লিবা শেন্মিৎলোনগী এজেন্দা কয়াগা লোইননা লম্বী অসিমক্তদা মখা তানা চৎখিগনি হায়না ফোংদোকখি। লৈঙাক অসিনা লল্লোন ইতীক তৌবদা লায়থোকহন্নবা লৌখৎলিবা থৌদাংশিংগী মতাংদা থমখি, মসিনা মালেমগী মরুওইবা কয়া ভারত্তা চিংশিল্লি হায়না ফোংদোকখি। ভারতকী শেন্মিৎলোন চাউখৎপা অমসুং অহোংবশিংগী মতাংদা ফোংদোক্লদুনা মহাক্না ভারতকী স্তার্ত অপতা মায় পাকপা কয়া পুরক্লিবা, মথংগী চারোলগী ইনফ্রাস্ত্রকচর, অমসুং গ্রীন এজেন্দাদা হেন্না চঙশিল্লিবশিংগী মতাংদসু ফোংদোকখি। মহাক্না পনখি মদুদি ভারত অমসুং ওস্ত্রিয়াগী মরক্তা শেম্লিবা স্তার্ত অপকী থোং অসিনা মতীক চাবা ফল কয়া পুরকপা ঙমগনি। হীরম অসিগী মতাংদা, মহাক্না লৈবাক অনি অসিনা পুন্না হোৎনমিন্নদুনা অপুনবা হেকাথোন অমা পাঙথোক্নবা থমখি। মহাক্না মখা তানা লৈবাক অসিদা দিজিতেল পব্লিক ইনফ্রাস্ত্রকচর মায় পাকপা অমসুং লম্বী থোং অমসুং চৎথোক চৎশিন ফগৎনবগী লৌখৎলিবা থৌরাংশিংগী মতাংদসু থমখি।
ভারতকী শক্তি পল্লদুনা, প্রধান মন্ত্রীনা ওস্ত্রিয়ান মেজরশিংদা মেক ইন ইন্দিয়াগী থৌরাংগী মখাদা মগুন লৈবা অমসুং শেল চঙদবা মওংদা পোৎ পুথোক্তুনা ভারতকী শেন্মিৎলোনগী লেন্দস্কেপ অসি শীজিন্নদুনা দোমেস্তিক অমসুং ইন্তর্নেসনেল মার্কেত্তা পুথোক্নবা অমসুং মালেমগী সপ্লাই চেনগী পন্থুংফম ওইনবা হোৎনমিন্ননবা পুক্নিং চিংশিনখি। হীরম অসিগী মতাংদা, মহাক্না ভারতকী প্রদক্সন লিঙ্কেদ ইন্সেন্তিব স্কিম্না মালেমগী মেন্যুফেকচরিং কম্পেনীশিংবু সেমিকন্দক্তর, মেদিকেল দিভাইস, সোলার পি.ভি অসিনচিংবা কয়াগী হীরমদা চিংশিল্লিবা অসিগী মতাংদসু ঙাংখি। মহাক্না ভারতকী শেন্মিৎলোনগী পাঙ্গল অমসুং স্কিলশিং অমসুং ওস্ত্রিয়াগী তেক্নোলোজী অসি লল্লোন ইতীক, চাউখৎপা অমসুং তুংকোইনা চৎনবগীদমক্তদি মহৌশাগা চুন্নরবা মপাংনি হায়না থমখি।
মহাক্না ওস্ত্রিয়াগী বিজিনেসশিংবু ভারত্তা লৈরিবা ইনভেস্তমেন্তকী খুদোংচাবশিং অসি লৌবীনবা অমসুং ভারতকী চাউখৎপগী ৱারীদা শরুক য়াবীনবা কৌখি।
