ন্যু য়োর্কতা সেপ্তেম্বর ২৫দা য়ুনাইতেদ নেসন্স জেনরেল এসেম্বলী মীফমগী নাকলদা প্রধান মন্ত্রী মোদীনা করিকোম কাংবুগী লৈবাকশিংগী লুচিংবা ১৪গা উনদুনা করিবিয়ান লৈবাকশিংগা ভারতকা লৈনবা পুৱারী ওইবা অমসুং অফবা মরিশিং অদুগী অনৌবা শক্তম অমা উরে। করিকোমগী হৌজিক চেয়রমেন ওইরিবা অমসুং সেন্ত লুসিয়াগী প্রধান মন্ত্রী অলেন চাস্তেনেতনা মীফম অদু কো-চেয়র লৌখি। মীফম অদুদা এন্তিগুৱা অমসুং বারবুদা, বারবাদোস, দোমিনিকা, জামাইকা, সেন্ত কিৎস অমসুং নেভিস, সেন্ত লুসিয়া, সেন্ত ভিনসেন্ত অমসুং গ্রেনাদাইন্স, ত্রিনিদাদ অমসুং তোবাগোগী লুচিংবশিং, সুরিনামগী ভাইস প্রসিদেন্ত অমসুং বাহমাস, বেলিজ, গ্রেনেদা, হাইতি অমসুং গুয়ানাগী ফোরেন মিনিস্তশিং শরুক য়াখি।
লমদম অসিগী ওইনা করিকোমগী লুচিংবশিংগা প্রধান মন্ত্রী মোদীগা উনবা অসি মসিনা অহানবনি অমসুং নাকল অনিখক্তগী নত্তনা লমদম অসিগী লৈবাকশিংগী মরক্ত ভারত অমসুং করিবিয়ান লৈবাকশিংগী মরক্ত লৈনরিবা মরি চেৎশিনহনবা ঙমগনি। করিকোমদা লৈবাক অসিনা রাজনিতী, শেন-থুম অমসুং কলচরগী মতেং পীগনি হায়না প্রধান মন্ত্রী মোদীনা ভারতনা থমখিবা থাজবশিং অদু অমুক হন্না থমখি। করিববিয়ানগা লৈনবা মরি তুংকোইনা লৈনবা ভারতমচা মিল্লিয়ন কয়া লৈরিবা অদু প্রধান মন্ত্রী মোদীনা নিংশিংখি।
মীফম অদুদা রাজনিতিগী ৱারী শানবা হেনগৎহন্নবা, শেন-থুমগী মতেং পীনবা হেনগৎহনবা, ললোন-ইতিক অমসুং শেন থাদবা হেনগৎহনবা অমসুং মীগা মীগা মরি ফগৎহন্নবা ৱাফমশিং খন্নখি। ত্রেনিং, চাউখৎ-থৌরাংগী মতেং অমসুং দিজাস্তর মেনেজমেন্ত অমসুং রিসিলিয়েন্সকী লমদা মতেং পীন্নবা প্রধান মন্ত্রী মোদীনা তকশিনখি। ইন্তর্নেসনেল সোলর এল্লাইন্স অমসুং কোলিয়েসন ফোর দিজাস্তর রিসিলিয়েন্ত ইনফ্রাস্তকচর য়াওনবা মহাক্না করিকোম লুচিংবশিংদা খঙহনখি। হুরিকেন দোরিয়ান্না লমদম অদু শোকহনবদা প্রধান মন্ত্রী মোদীনা অৱাবা ফোংদোকখি অমসুং খ্বাইদগী হেন্না শোকহল্লবা বাহামাস ইথৎশিংদা ভারতনা য়ু.এস. দোল্লর মিল্লিয়ন অমগী মতেং পীখি।
করিকোমদা মীয়ামগী চাউখৎ-থৌরাং পায়খৎনবা প্রধান মন্ত্রী মোদীনা য়ু.এস. দোল্লর মিল্লিয়ন ১৪গী মতেং লাউথোকখি অমসুং সোলর, রিনিউয়েবল ইনর্জী অমসুং ক্লাইমেত চেঞ্জগা মরি লৈনবা প্রোজেকশিংগী অতোপ্পা মিল্লিয়ন ১৫০গী লাইন ওফ ক্রেদিৎ লাউথোকখি। গুয়ানাগী জর্জতাউন্দা ইনফোরমেসন তেক্নোলোজীগী রিজনেল সেন্তর অমা লিংখৎনবা মহাক্না লাউথোকখি। করিকোমগী পর্লিয়ামেন্তরী মীহুৎ কাংবু অমা ভারত্ত লাক্নবা মহাক্না চেবাও পীখি।
নাকল অনিগী মরক্ত মতেং পীনবা হেনগৎহন্নবা প্রধান মন্ত্রী মোদীনা পুখৎলকপা ৱাফমশিং করিকোমগী লুচিংবশিংনা তরাম্না ওকখি অমসুং মখোয় মখোয়গী সরকারশিংনা মপুং ফানা শৌগৎকনি হায়না থাজবা থমখি।
মতেং পীনবা য়ানবা লম্বীশিং খঙদোক্নবা অমসুং খুমাং চাউশিন্নবা লম্বী থিদোক্নবা অপুনবা তাক্স ফোর্স অমা লিংখৎপা হায়না ৱারেপ লৌখি।
