প্রধান মন্ত্রী শ্রী নরেন্দ্র মোদীনা ঙসি উত্তর প্রদেশকী কানপুরদা নেস্নেল গঙ্গা কাউন্সিলগী অহানবা মীফম লুচিংখ্রে।
গঙ্গা অমসুং মসিগী মশাশিং য়াওনা গঙ্গা বেসিন তুরেলগী পোলুসন ঙাকথোকপা অমসুং ফিভম ফগৎহনবগী থবক শিন্নবগী থৌদাং পুম্নমক কাউন্সিল অসিদা পীরি। কাউন্সিল অসিগী অহানবা মীফম্না রাজ্যশিংগী বিভাগ পুম্নমক্কা লোয়ননা মরী লৈনবা কেন্দ্রগী মন্ত্রালয়শিংদা ‘গঙ্গা–সেন্ত্রিক’ এপ্রোছকী মরুওইবা অদু পাংথোক্নবা পান্দম থম্লি।
ঙসিগী মীফম অদুদা জল শক্তি, এনভাইরনমেন্ত, এগ্রীকলচর অমসুং রুরেল দিবেলপমেন্ত, হকশেল, অর্বান এফিয়র্স, পাৱর, তুরিজম, শিপ্পিংগী কেন্দ্রগী মন্ত্রীশিং অমদি উত্তর প্রদেশ অমসুং উত্তরাখন্দগী মুখ্যমন্ত্রীশিং, বিহারগী উপ–মুখ্যমন্ত্রী, নীতি আয়োগকী ভাইস চিয়রমেন অমসুং অতোপ্পা মকোকথোংবা ওফিসিয়েলশিংনা শরুক য়াখি। মীফম অদুদা ৱেস্ত বেঙ্গল রাজ্য শরুক য়াখিদে অমদি হৌজিক চত্থরিবা মীখল অমসুং মোদেল কোদ ওফ কন্দক্ত থমখিবনা মরম ওইদুনা ঝার্খন্দনা শরুক য়াখিদে।
প্রধান মন্ত্রীনা ‘স্বচ্ছতা’, ‘অবিরলতা’ অমসুং ‘নির্মলতা’দা মিৎয়েং থমদুনা গঙ্গা তুরেল শেংদোকপগী তোঙান তোঙানবা এস্পেক্তশিংদা পায়খৎলিবা থবকশিং অমসুং খুমাং চাউশিল্লিবশিং য়েংশিনখি। মহাক্না হায়খি মদুদি ইমা গঙ্গা অসি সব–কন্তিনেন্ত অসিগী খ্বাইদগী শেংলবা তুরেলনি। গঙ্গাগী ফিভম ফগৎহনবা অসি লৈবাক অসিগী ওইনা মতম শাংনা পন্দুনা লৈরক্লবা শিংনবা অমনি হায়না প্রধান মন্ত্রীনা হায়খি। মহাক্না হায়খি মদুদি সরকারনা ২০১৪দা ‘নমামি গঙ্গে’ হৌদোকখিবা মতুংদগী থবক কয়া অমা মপুং ফানা পায়খৎখ্রে অদুবু কয়া অমা পায়খৎপা দরকার ওইরি।
অহানবা ওইনা, কেন্দ্র সরকারনা গঙ্গানা ফাওদুনা চেল্লিবা রাজ্য মঙাদা ২০১৫–২০গী মতমগীদমক লুপা কোতি ২০,০০০ লাউথোকখি। হৌজিক ফাওবদা লুপা কোতি ৭,৭০০ চাদিং তৌখ্রে।
প্রধান মন্ত্রীনা অকনবা ৱাফম থমখি মদুদি নির্মল গঙ্গাগীদমক হেন্না ফবা ফ্রেমৱার্ক অমা দরকার ওইগনি। থৌরাংশিং মপুংফানা পায়খৎনবগীদমক ইফেক্তিব ফ্রেমৱার্ক অমা শেম শাদুনা থম্নবগীদমক জিলা খুদিংমক্তা দিস্ত্রিক্ত গঙ্গা কম্মিতীশিং ফগৎহনগদবনি।
সরকারনা গঙ্গাগী ফিভম ফগৎহন্নবা প্রোজেক্তশিংগী ফন্দিংগীদমক লনাই মীওইশিং, এন.আর.আই.শিং, কোর্পোরেত এন্তাইতীশিংদগী কন্ত্রিব্যুসনশিং লাইথোকহন্নবগীদমক ক্লিন গঙ্গা ফন্দ (সি.জি.এফ.) হৌদোক্লে। ইকায় খুম্নরিবা প্রধান মন্ত্রীনা ২০১৪দগী ফংলকপা খুদোলশিং নিলাম লাওদুনা অমসুং সিওল পিছ প্রাইজকী প্রাইজকী মনীদগী ফংলকপা শেনফমদগী লুপা কোতি ১৬.৫৩ মশামক্না দান তৌখি।
নমামি গঙ্গে অমসুং অর্থ গঙ্গাগী মখাদা তোঙান তোঙানবা স্কিমশিং অমসুং অনৌবা খোংথাংশিংদগী থবক তৌবগী খোংজেল অমসুং থৌওংশিং মোনিতর তৌনবগীদমক প্রধান মন্ত্রীনা দিজিতেল দাসবোর্দ অমা হৌদোক্নবগীদমক পাউতাক পীখি। মদুদা খুঙ্গংশিং অমসুং অর্বান বোদীশিংদগী লাকপা দাতাশিং নুমীৎ খুদিংগী ওইনা নীতি আয়োগ অমসুং জল শক্তিগী মন্ত্রালয়না মোনিতর তৌগদবনি।
মীফম অদুগী মাংওইননা প্রধান মন্ত্রীনা চন্দ্রশেখর অজাদ এগ্রীকলচর য়ুনিভর্সিতীদা অথোইবা ফ্রীদম ফাইতর চন্দ্রশেখর অজাদকী মফমদা লৈ কত্তুনা ইকায় খুম্নবা উৎখি অমসুং ‘নমামি গঙ্গে’ ইন্তরভেনসন্স অমসুং প্রজেক্তশিংদা একজিবিসন অমা মীৎয়েং থমখি। তুংদা প্রধান মন্ত্রীনা অতল ঘাৎতা চৎখি অমদি সিসামউ নালাদা মায় পাক্না শেংদোকপগী থবক চত্থরিবা অদুসু য়েংশিনখি।
