২০১৯গী দিসেম্বর ৭-৮তা পুনেদা পাংথোকখিবা ৫৪শুবা দি জি পিশিং/আই জি পিশিংগী মীফমদা প্রধান মন্ত্রী শরুক য়াখ্রে। মীফম অসি লোইশিনবা থৌরমদা মহাক্না ৱা ঙাংখি। ইন্তিলিজেন্স ব্যুরোগী ওফিসরশিংদা শিংথানীংঙাই ওইবা থবক পাংথোকপগীদমক প্রধান মন্ত্রীনা প্রসিদেন্ত পুলিস মেদল য়েন্থোকখি।
প্রধান মন্ত্রীগী লমজিং মখাদা, মতম অমদা নোংমা খক পাংথোক্লম্বা থৌরম অসি ২০১৫দগী নুমিৎ ৩গী থৌরম ওইনা পাংথোক্তুনা লাকলি। মীফম অসি দিল্লিগী ৱাংমদগী লৈবাক্কী মফম কয়া পাংথোক্তুনা লাক্লি। প্রধান মন্ত্রী অমসুং হোম মিনিস্তর শরুক য়াদুনা মীফম অসিগী মওং হোংদোক্লে। মীফম মনুংদা থৌশিলশিং ফগৎহন্নবগী মতাংদা তোঙান-তোঙানবা মীফম মচাশিং পাংথোক্তুনা খন্নখি। লৈবাক মনুংগী তেরোরিজম, নক্সেলিজম, সাইবরগী অকিবশিং, রেদিকেলাইজেসন অমসুং নার্কো তেরোরিজম থেংননবা কোর গ্রুপ ১১ শেমদুনা মরুওইবা ৱাফম কয়া খন্নখি।
লৈবাক্কী পুলিস ফোর্সনা শান্তি থম্নবা পায়খৎলিবা থবকশিং থাগৎলদুনা প্রধান মন্ত্রীনা হায়খি মখোয়গী তুংদা লৈরিবা ইমুং-মনুংশিংগী মতেং ঐখোয়না কাওরোইদবনি। নুপী অমসুং অঙাংশিং য়াওনা খুন্নাইগী কাংলুপ খুদিংমক্কী থাজবা হেনগৎহন্নবা পুলিসকী মিংচৎ হেনগৎহনগদবনি। নুপীশিং অশোই-অঙাম থোকহনদনবা পুলিসকী থৌদাং য়াম্না চাউই।
প্রধান মন্ত্রীনা হায়খি কনফরেন্স অসিগী ৱাখল্লোল অসি পুলিস দিপার্তমেন্তশিংনা রাজ্যদগী হৌরগা জিলা থাক্কী পুলিস স্তেসনশিংদা য়ৌহনগদবনি। রাজ্যশিং অমসুং য়ু তিশিংনা চৎনরিবা খ্বাইদগী ফবা থবকশিংগী লিস্ত অমা শেমগদবনি।
মীচম মীয়ামগী ৱাখল্লোনশিং লৌরবা মতুংদা পুলিসকী থবক ফগৎহন্নবা তেক্নোলোজীনা ঐখোয়দা মতিক চাবা খুৎলায় পীবগীদমক প্রধান মন্ত্রীনা থাগৎখি।
সরকারগী এক্ত ইস্ত পোলিসীগী মরুওইবা অমা ওইরিবা অৱাং-নোংপোক রাজ্যশিং চাউখৎহন্নবা মহাক্কী অখন্নবা থৱায় য়াওবা অদু প্রধান মন্ত্রীনা ফোংদোকখি অমসুং চাউখৎ-থৌরাংগীদমক লমদম অসি অফবা মফম অমা ওইহন্নবা অখন্নবা থবক পায়খৎনবা হায়রিবা রাজ্যশিং অসিগী দি জি পিশিংদা মহাক্না তকশিনখি।
পুলিস ওফিসরশিংনা নোংম-নোংমগী মথৌশিং পাংথোক্নবা হোৎনবদা থেংনরিবা খুদোংচাদবশিং শকখঙবা উৎলদুনা প্রধান মন্ত্রীনা মহাক্কী ৱারোল অদু লোইশিনখি। মহাক্না হায়খি মখোয়না সিবিল সর্বিস এগজামশিং মায়োক্নবা মতমদা লৈখিবা থৌনা অমসুং ফিদমশিং অদু মখোয়না নিংশিংগদবনি অমসুং খু্ন্নাইগী খ্বাইদগী শোৎথরবা অমসুং শোল্লবশিংগী য়াইফনবা ৱাখল খনগদবনি।
