ঙসি ভিদিও মেসেজগী খুৎথাংদা পি এম নরেন্দ্র মোদীনা গুজরাতকী একল বিদ্যালয় সঙ্গথন্দা ৱা ঙাংখি। খুঙ্গং অমসুং ত্রাইবেল অঙাংশিংদা লাইরিক তম্বীনবা পান্দম থম্লিবা ‘একল স্কুল অভিয়ান’ শন্দোকপগীদমক প্রধান মন্ত্রীনা একল বিদ্যালয় সঙ্গথন থাগৎখি। ভারত অমসুং নেপালগী মনুং হুঞ্জিনবা মফমশিংদা লৈরিবা খুঙ্গং অমসুং ত্রাইবেলগীঅঙাংশিং মিল্লিয়ন ২.৮ হেনবদা লাইরক তম্বীদুনা লৈবাক শেমগৎপদা থৌদাং লৌবগীদমক মহাক্না একল বিদ্যালয় সঙ্গথন থাগৎখি।
ভারত শীনবা থুংনা স্কুল লাখ ১ রোম লিংখৎপগী সঙ্গথন থাগৎলদুনা প্রধান মন্ত্রীনা হায়খি কৎথোকপগা লোয়ন্না থবক তৌবদগী ফংবা ঙম্লোইদবা পান্দম অমা ফংলে। লৈবাক্কী ফিদম্নফম অমা ওইবা অমসুং খুন্নাইগী য়াইফনবা থবক তৌবগীদমক সঙ্গথন অসি গান্ধী পিছ প্রাইজ পীখ্রে।
প্রধান মন্ত্রীনা হায়খি লৈবাক অসিদা অফবা লাইরিক তম্বীবা অমসুং স্কিল হেনগৎহন্নবগীদমক কেন্দ্র সরকারনা থবক পায়খৎলি। সেদুল ত্রাইব অঙাংশিং স্কোলারসিপ পীবা, এক্লাব্য মোদেল রেসিদেন্সিয়েল স্কুল, পোসান অভিয়ান, মিসন ইন্দ্রধনুস অমসুং ত্রাইবেলগী কুম্মৈশিংদা স্কুল ছুতি থাবা য়াওনা অঙাংশিং য়াইফনবা থবক কয়া পায়খৎলে।
প্রধান মন্ত্রীনা হায়খি ২০২২দা পাংথোক্কদৌরিবা নিংতম্বা চহি ৭৫শুবা থৌরমদা ভারতকী নিংতম ইহৌদা ত্রাইবশিংনা লৌখিবা থৌদাং খঙহন্নবা স্কিতশিং, ঈশৈ চাংদম্নবা, দিবেতশিং অমসুং খন্ন-নৈবশিং সঙ্গথন অসিনা শীনগদবনি। চাংদম্নবা অসি চহি অসিদগী হৌবা য়ারে অমসুং ২০২২দা লৈবাক পুম্নমক্কী চাংদম্নবা পাংথোক্কনি। একল ফেমিলিনা ভারতকী মমাংঙৈগী মশান্নশিংগী খেল–মহাখুম্ভ পাংথোকপা য়াই।
‘এক ভারত–শ্রেস্থভারত’কী ৱাখল্লোন চাউখৎনবা খুঙ্গংগী অঙাংশিংনা সহরগী মহৈরোয়শিংদগী তম্নবা লনাই অমসুং সরকারগী স্কুলশিং পুন্না থবক তৌমিন্নবা ৱাখল্লোন অমা প্রধান মন্ত্রীনা পুথোকখি। একল সন্থান্না পায়খৎলিবা ই–ইজুকেসন অমসুং দিজিতাইজেসনগী থবকশিং থাগৎলদুনা প্রধান মন্ত্রীনা হায়খি একল বিদ্যলাশিংগী খুমাং চাউশিনবা য়েংশিন্নবা রিয়েল তাইম দাসবোর্দ অমা শেমগৎপা য়াই।
মহাক্না হায়খি নুমিৎ অসি দোক্তর বাবা সাহেব অম্বেকারগী ‘পুন্য তিথি’ নুমিৎতা থোক্লে। নুপীমচাশিং অমসুং নুপামচাশিংদা থোং মান্নবা লাইরিক তম্বীনবগী বাবা সাহেবকী মঙলান অদু একল সঙ্গথান্না মপুং ফাহল্লে। চহি ৪০ রোম অসিদা সঙ্গথান্না ;পঞ্জাতন্ত্র মোদেল ওফ ইজুকেসন’গী খুৎথাংদা লৌউ উবদা বাইও-ফরতিলাইজর শীজিন্নবা, হিদাক কান্নবা পাম্বীশিং শীজিন্নবগী লৌশিং, থবক ফংনবা ত্রেনিং অমসুং খুন্নাই ভাব তাহনবগী থবক কয়া পায়খৎতুনা লাক্লি। একল বিদ্যালয়দগী পাস তৌরকপা মহৈরোয় কয়া ইজুকেসন, পুলিস, ইন্দস্ত্রি অমসুং আর্মিদা লৈদুনা লৈবাক অসিগী থবক তৌরি।
প্রধান মন্ত্রীনা হায়খি ভারতনা নিংতম্বা চহি ৭৫ মপুংফারকপা লোয়ন্না গ্রাম শ্বারাজ, বাবা সাহবেকী খুন্নাইগী অচুম্বা, দিন দয়াল উপাধ্যগী অন্তয়োদে অমসুং শ্বামি ভিবেকানন্দগী মতিক লৈবা ভারত অমগী মঙলান মঙফাওনহনবদা একল সঙ্গথান্না মতেং পাংগনি।
একল বিদ্যালয়গী মরমদা
একল বিদ্যালয়গী খোঙজং অসি ভারত অমসুং নেপালগী খুঙ্গং অমসুং ত্রাইবেলগী মফমশিংদা পায়খৎপা চাউখৎ-থৌরাংগী খোঙজং অমনি। মসিগী মরুওইবা থবক্তি খুঙ্গং অমসুং ত্রাইবেলগী মফমশিংগী অঙাংশিংদা লাইরিক তম্বীনবা ৱান-তিচর স্কুলস(একল বিদ্যালয়)শিং ভারত শীনবা থুংনা লিংখৎপনি।
