প্রধান মন্ত্রী শ্রী নরেন্দ্র মোদীনা ইন্দিয়া অমসুং বঙ্গলাদেশ অনিগী মরক্তা লৈবা ‘মাইত্রি সেতু’ ২০২১গী মার্চকী ৯গী নুমিৎয়ুংবা পুং ১২দা ভিদিও কনফরেন্সকী খুত্থাংদা শঙ্গারগনি। প্রধান মন্ত্রীনা থৌরম অসিদা ত্রিপুরাদা ইনফ্রাস্ত্রকচর প্রোজেক্ত কয়া অমশু শঙ্গারগনি অমসুং উরেপ উয়ুং তমগদৌরি।
‘মাইত্রি সেতু’ থোং অসি ত্রিপুরা স্তেত অমসুং বঙ্গলাদেশকী মরক্তা লৈবা ইন্দিয়াগী ঙমখৈদা চেনবা ফেনি তুরেলগী মথক্তা শাবনি। ‘মাইত্রি সেতু’ হায়রিবা মমিং অসি ইন্দিয়া অমসুং বঙ্গলাদেশ নাকন অনিগী মরী অমসুং মরুপ-মপাং হেনগৎলকপা অসিগী মশক তাকপনি। শাগৎলিবা থবক অসি নেস্নেল হায়ৱে অমসুং ইনফ্রাস্ত্রকচর দিবলপমেন্ত লিমিতেৎনা লুপা করোর ১৩৩গী প্রোজেক্তা লৌখৎখিবনি। কিলোমিতর ১.৯ শাংবা থোং অসি ইন্দিয়া মনুংগী সাব্রুমগা বঙ্গলাদেশকী রামগরগা শম্নরি। হায়রিবা অসিনা ইন্দিয়া অমসুং বঙ্গলাদেশ অনিগী মরক্তা ললোন-ইতিক অমসুং মীওই অমগা মীওই অমগা ফাওনবগী অনৌবা পন্দুপ অমা ওইরগনি। শঙ্গাবা অসিগা লোয়ননা, ত্রিপুরা অসি বঙ্গলাদেশকী চিতাগোং পোর্ততা চংফম ওইদুনা ‘গেতৱে ওফ নোর্থ ইস্ত’ ওইরগনি, হায়রিবা অসি সাব্রুমদগী কিলোমিতর ৮০ খক্তনি।
প্রধান মন্ত্রীনা সাব্রুমদা ইন্তিগ্রেতেৎ চেক পোস্ত অমা লিংখৎনবগী গী উরেপ উয়ুং অমসু তমগনি। মসিনা লৈবাক অনি অসিগী মরক্তা পোৎ-চৈ অমসুং পেসেঞ্জর কোম্না চৎপদা মতেং পাংগনি, অৱাং নোংপোক স্তেতশিংগী পোত্থোকশিংদা অনৌবা মার্কেত অমগী খুদোংচাবা ফংলগনি অমসুং ইন্দিয়া অমসুং বঙ্গলাদেশ অনিগী মরক্তা চৎথোক চৎশিন্দা অপনবা লৈররোই। প্রোজেক্ত অসি লেন্দ পোর্তস ওথোরিতি ওফ ইন্দিয়ানা লুপা করোর ২৩২ চংনা পায়খৎপনি।
প্রধান মন্ত্রীনা কাইলাশাহারদা লৈবা উনাকোতি হেদক্বাতরগা খোৱাই দিস্ত্রীক্ত হেদক্বাতরগা শম্নবা এন.ঐচ. ২০৮ অসিগী উরেপ উয়ুং তমগনি। মসিনা এন.ঐচ. ৪৪দা অতোপ্পা লম্বী অমা পীগনি। কিলোমিতর ৮০ শাংবা এন.ঐচ. ২০৮ প্রোজেক্ত অসি নেস্নেল হায়ৱেজ অমসুং ইনফ্রাস্ত্রকচর দিবলপমেন্ত কোর্পোরেসন লিমিতেৎনা লুপা করোর ১০৭৮ চংনা পায়বা প্রোজেক্তনি।
প্রধান মন্ত্রীনা স্তেত সরকারনা লুপা করোর ৬৩.৭৫ চংনা পায়খৎপা স্তেত হায়ৱেজ অমসুং অতৈ দিস্ত্রীক্তকী লম্বীশিং শঙ্গাগনি। হায়রিবা অসিনা নোংজু-নুংশা খাক্তনা ত্রিপুরাগী লম্বীশিং ফাওনরগনি।
প্রধান মন্ত্রীনা লুপা করোর ৮১৩ চংনা শাবা লোইশিনখ্রবা প্রধান মন্ত্রী আৱাজ য়োজনা (আর্বান)গী মখাদা শাগৎপা ৪০৯৭৮ য়ুমশিং শঙ্গাগনি। মহাক্না অগর্তলা স্মার্ত সিতি মিসনগী মখাদা শাবা ইন্তিগ্রেতেৎ কম্মান্দ অমসুং কন্ত্রোল সেন্তরশু শঙ্গাগনি।
মখা তানা, প্রধান মন্ত্রীনা অরিবা মোতোর স্তেন্দা লৈবা থাক কয়া লৈবা পার্কিং শেমগৎপা অমসুং কম্মর্সিএল কম্প্লেক্সকী উরেপ উয়ুং তমগনি। মসি লুপা করোর ২০০ রোম চংনা শেমগৎকদবনি। মহাক্না লিচুবাগান্দগী এয়রপোর্ত ফাওবদা লৈবা মরম মরি লৈবা হান্ননা লৈবা লম্বী পাকথোকপগী উরেপ উয়ুং তমগনি। থবক অসি অগর্তলা স্মার্ত সিতি মিসনগী মখাদা চাওরাক্না লুপা করোর ৯৬ চংবা প্রোজেক্তনি।
