প্রধান মন্ত্রী শ্রী নরেন্দ্র মোদীনা ঙসি প্রগতিগী থোংদা ২৮ শুবা ৱারী-ৱাতাইগী ময়াই তাংবল লৌখ্রে। প্রগতি অসি অচেৎপা লৈঙাকলোন অমসুং মতম চানা থবক পাইখৎনবগীদমক্তা আই.সি.তি.দা য়ুমফম ওইবা প্লেৎফোর্ম অমনি।
প্রধান মন্ত্রীনা প্রগতিগী থোংদা ইনকম তেক্সকা মরি লৈনবা ৱাকৎশিং লোইশিনবগী খোংজেল য়েংশিনখি। শেল-থুমগী মন্ত্রালয়গী ওফিসিএলশিংনা প্রধান মন্ত্রীদা মসিগী খোংজেল অদুগী মতাংদা পাউদমখি। প্রধান মন্ত্রীনা অমুক হন্না পনখি মদুদি থৌওং খুদিংমক তেক্নোলোজীগী মতেংনা পাইখৎকদবনি, অমসুং মীনা থবক তৌবগী শরুক্তু য়ামহল্লোইদবনি। প্রধান মন্ত্রীনা শেঞ্জা-থুমজা তৌবা ওফিসরশিং চৈরাক পীবগী খোংজেলগী মতাংদা পল্লদুনা হায়খি মদুদি ইনকম তেক্স বিভাগনা পাইখৎলিব, মীয়ামগী তেংবাংগীদমক লৌখৎলিবা খোংথাংশিংগী মতিক চাবা ই-পাউশিং অদু তেক্স থিরিবশিংগী মফমদা খঙহনগদবনি।
হৌজিক ফাওবদা প্রগতিগী মীফম ২৭তা অপুনবা ইনভেস্তমেন্ত লুপা লাখ ১১.৫তগী হেন্না তৌবা প্রোজেক্তশিং মপুং ফানা য়েংশিনবগী থবক পাইখৎখ্রে। তোঙান তোঙানবা লমশিংদা মীয়ামগী ৱাকৎশিং ৱারোইশিন পুরকপগী খোংজেলসু য়েংশিনখ্রে।
ঙসি ২৮ শুবা মীফমদা প্রধান মন্ত্রীনা রেল, লম্বী লোইননা পেত্রোলিয়মগী লমদা মরু ওইবা ইনফ্রাস্ত্রকচর প্রোজেক ৯ য়েংশিনখি। প্রোজেক্তশিং অসি আন্ধ্রা প্রদেশ, অসম, গুজরাত, দিল্লী, হরিয়ানা, তমিলনাদু, উরিশা, কর্নাতক, পঞ্জাব, উত্তর প্রদেশ অমসুং উত্তরাখন্দা পাইখৎলি।
প্রধান মন্ত্রীনা আয়ুশ্মান ভারতকী মখাদা হৌদোকখিবা জন আরোগ্য য়োজনাগী মাইকৈদা চংশিল্লিবা খোংজেলগী মতাংদা য়েংশিনখি। মহাক্না প্রধান মন্ত্রী জন ঔশধী পরিয়োজনাসু য়েংশিনখি।
