কুনগামাথোইশুবা ৱর্ল্দ সস্তেনেবল দিবেলপমেন্ত সম্মিত য়াওবা ফংজবদা ঐহাক্না নুংঙাইবা পোকই। এনভাইরনমেন্ত অমসুং সস্তেনেবল দিবেলপমেন্ত অসি ঐহাক্কী ওইনা অহানবদা গুজরাত অমসুং হৌজিক্না জাতিগী থাক্তা চহি ২০ চুপ্না ওফিসতা লৈরকপা মরু ওইবা মীৎয়েং চংলিবা লমশিং ওইদুনা লাকখি।
মরুপশিং, ঐখোয়গী গৃহ অসিবু মীয়াম্না মপাঙ্গল শোল্লি হায়না হায়নবা ঐখোয়না তাই। অদুবু গৃহ অসি নত্তে শোল্লিবদি। মদু ঐখোয়নি। ঐখোয়না গৃহ, মহৌশাগীদমক লৌরিবা ফিরেপশিং অসি মপাঙ্গল শোল্লি। ১৯৭২গী স্তোলহোল কনফরেন্সতগী হৌদুনা হৌখিবা চহি ৫০ অসিদা ৱাফম কয়া অমা ফোঙদোকখ্রে। পাঙথোকপদি খরা খজিক্তমক পাঙথোকই। অদুবু ভারত্তা ঐখোয়না থবক ওইনা উৎখ্রে।
লায়রবদা চপ মান্ননা ইনর্জী এক্সেস তৌহনবা হায়বা অসিনা ঐখোয়গী এনভাইরনমেন্ত পোলিসীগী য়ুম্বী ওইখি। উজ্জ্বলা য়োজনাগী খুত্থাংদা য়ুমথোং মিলিয়ন ৯০ হেনবদা মৈখু চেন্দবা চাকথোক গ্যাস ফংহনবা ঙমখ্রে। পি.এম.কুসুম স্কিমগী মখাদা ঐখোয়না লৌমীশিংদা রিন্যুএবল ইনর্জী য়ৌহনবা ঙমখ্রে। ঐখোয়না লৌমীশিংদা সোলর পেনেলশিং খিন্নবা, মদু শীজিন্ননবা অমসুং অহেনবা পাৱর অদু গ্রীদতা য়োন্নবা পুক্নিং থৌগৎলি। স্তেন্দএলোন সোলর পম্পশিং লোয়ননা হৌজিক লৈরিবা পম্পশিং অসি সোলরাইজ তৌনবা খোঙথাংশিং পাইখৎলি। “কেমিকেল-ফ্রী নেচরেল ফার্মিং”দা মীৎয়েং থম্বনা সস্তেনেবিলিতী, অমসুং ইক্বিতী প্রোমোৎ তৌবদা মতেং ওইরগনি।
মরুপশিং, ঐখোয়গী এল.ই.দি. বল্বশিং য়েন্থোকপগী স্কিম অসি চহি তরেৎ হেন্না চত্থরক্লি। মসিনা চহি অমদা ইলেক্ত্রিসিতী য়ুনিৎ বিলিয়ন ২২০ হেন্না তুংশিনবদা অমসুং কার্বোন দাইওক্সাইদ ইমিসন বিলিয়ন তন ১৮০ হন্থহনবদা মতেং পাংখ্রে। ঐখোয়না নেস্নেল হাইদ্রোজেন মিসন লিংখৎনবসু লাউথোকখ্রে। মসিনা হান্নদগী লৈরবা তেক্নোলোজী অমা ওইরিবা গ্রীন হাইদ্রোজেন অসি তেপ তৌদুনা ঐখোয়গী তুংলমচৎতা পাৱর পীনবা পান্দম থম্মি। তি.ই.আর.আই.গুম্বা একাদেমিক অমসুং রিসর্চ ইন্সতিত্যুতশিং অসিনা গ্রীন হাইদ্রোজেনগী পোতেন্সিএল পুথোকহন্নবা অচৌবা সোল্যুসনশিং পুথোরক্নবা ঐহাক্না পুক্নিং থৌগৎলি।
মরুপশিং, ভারত অসি য়াম্না পাক-চাউবা লৈবাক অমনি। মালেমগী লেন্দ এরিয়া ২.৪% ওইবগা লোয়ননা ভারতনা মালেমগী স্পেসীসকী ৮%গী ময়া ওইরি। মসিগী ইকোলোজী অসি ঙাকশেনবা হায়বা অসি ঐখোয়গী থৌদাংনি। ঐখোয়না ঐখোয়গী প্রোতেক্তেদ এরিয়াগী নেৎৱার্ক মপাঙ্গল কনখৎহল্লি। আই.য়ু.সি.এন.না ঐখোয়গী খোঙথাংশিং অসিবু শকখঙবিখি। হরিয়ানাদা লৈরিবা অরাবাল্লি বাইওদাইভর্সিতী পার্ক অসি মখোয়না নীংথিনা বাইওদাইভর্সিতী কঞ্জর্বেসন তৌবগীদমক ও.ই.সি.এম. সাইৎ অমা ওইনা লাউথোকখি। হন্দক্তা ভারতকী অহেনবা ৱেতলেন্দ অনি রামসর সাইৎ ওইনা শকখঙখিবদসু ঐহাক্না নুংঙাইবা পোকই। ভারত্তা হৌজিক হেক্তর মিলিয়ন ১ হেন্না কোল্লিবা রামসর সাইৎ ৪৯ লৈরে। দিগ্রেদেদ লেন্দ অমুক হন্না রিস্তোর তৌবা হায়বা অসিনা ঐখোয়গী মপুং ওইনা মীৎয়েং চংলিবা লমশিং ওইরি। ২০১৫দগী হৌদুনা ঐখোয়না হেক্তর মিলিয়ন ১১.৫ হেন্না রিস্তোর তৌখ্রে। ঐখোয়না বোন চেলেঞ্জকী মখাদা লেন্দ দিগ্রেদেসন ন্যুত্রেলিতীগী নেস্নেল কম্মিৎমেন্ত ফংনবা লম্বীদা চংশিল্লি। য়ু.এন.এফ. সি.সি.সি.গী মখাদা ঐখোয়গী পান্দম পুম্নমক থুংহনবা ঙমগনি হায়না ঐখোয়না চেৎনা থাজবা থম্মি। ঐখোয়না গ্লাসগোদা পাঙথোকখিআ সি.ও.পি.-২৬ মনুংদা ঐখোয়গী পান্দমশিংসু ফোঙদোকখি।
মরুপশিং, ক্লাইমেৎ জস্তিসকী খুত্থাংদা খক্তা এনভাইরনমেন্ত সস্তেনেবিলিতী ফংবা ঙমগনি হায়না ঐহাক্না চেৎবা থাজৈ, অমসুং নখোয় পুম্নমক্না য়ারক্কনি হায়নসু থাজৈ। মথংগী চহি কুনগা মঙা অসিদা ভারতকী মীয়ামগী মথৌ তাবা ইনর্জী অসিসু শরুক অনি হেনগৎলক্লবা য়াই। ইনর্জী অসি ফংহনদবা হায়বা অসিনা পুন্সি মিলিয়ন কয়া মাংহনবগা পাঙখক ওই। মাইপাক্না লৌখৎপা ক্লাইমেৎ এক্সন্দা ফাইনান্স মরাং কাইনা তৌবসু মথৌ তাই। মসিগীদমক চাউখৎলবা লৈবাকশিংনা ফাইনান্স অমসুং তেক্নোলোজী ত্রান্সফর তৌবগী মখোয়গী ফিরেপশিং অদু থুংহনবা মথৌ তাই।
মরুপশিং, সস্তেনেবিলিতীনা মালেম পুম্বগী ওইবা কো-ওর্গদিনেতেদ এক্সন মথৌ তাই। ঐখোয়গী খোঙথাংশিং অসি অমনা অমগী মখা পোল্লি হায়বা খঙবা ঙম্লে। ইন্তর্নেস্নেল সোলর এলাইন্সকী খুত্থাংদা, ঐখোয়গী পান্দম “ৱান সন, ৱান ৱর্ল্দ, ৱান গ্রীদ” হায়বা অসিনা ওইরি। ঐখোয়না মতম চুপ্পা মফম খুদিংমক্তা ৱর্ল্দ-ৱাইস গ্রীদ অমদগী ক্লিন ইনর্জী ফংহন্নবা মাইকৈদা থবকশিং পাইখৎপা তাই। মসি ভারতকী ভেল্যুশিংবু মশক তাক্লিবা “হোল ওফ দি ৱর্ল্দ” এপ্রোচ অদুনি।
মরুপশিং, দি কোলিজন ফোর দিজাস্তর রেসিলিএন্ত ইনফ্রাস্ত্রকচর (সি.দি.আর.আই.)না তোয়না মহৌশাগী খুদোংথিবশিং থোক্কনবা মফমশিংদা মপাঙ্গল কনবা ইনফ্রাস্ত্রকচর শেমগৎনবা পান্দম থম্মি। সি.ও.পি.-২৬ পাঙথোক্লিঙৈ মনুংদা ঐখোয়না “ইনফ্রাস্ত্রকচর ফোর রেসিলিএন্ত আইলেন্দ স্তেৎস” কৌবা ইনিসিএতিব অমসু হৌদোকখি। চাউখৎলক্লিবা ঈথৎ ওইবা লৈবাকশিং অসি খ্বাইদগী খুদোংথীনীংঙাই ওই অমসুং মরম অসিনা অথুবদা ঙাকশেল মথৌ তাই।
মরুপশিং, মসিগী খোঙথাং অনি অসিদা ঐখোয়না এল.আই.এফ.ই. – লাইফস্তাইল ফোর এনভাইরনমেন্ত হৌজিক হাপচিনখ্রে। এল.আই.এফ.ই. অসি ঐখোয়গী গৃহ ফগৎহন্নবা লাইফস্তাইল শেম্বা অদুনি। এল.আই.এফ.ই. অসি সস্তেনেবল লাইফস্তাইল থৌগৎলিবা মালেমদা লৈরিবা ৱাখল মান্নবা কাংলুপশুংগী ওইবা কোলিজন অমনি। ঐহাক্না মখোয়বু ৩পি – প্রো প্লেনেৎ পিপল হায়না কৌই। প্রো প্লানেৎ পিপল (৩-পি)গী গ্লোবেল মুফমেন্ত অসি এল.আই.এফ.ই.গী কোলিজন অমনি। মসিগী গ্লোবেল কোলিজন অহুম অসিনা মালেম পুম্বগী ওইনা ফগৎহন্নবা ঐখোয়গী অকোইবগী ওইবা খোঙথাংশিং অসিগী ত্রিনিতী ওইরগনি।
মরুপশিং, ঐখোয়গী চৎনবী অমসুং নাৎ অসি ঐখোয়না ইথিল লৌনবগী হৌরকফমশিং ওইরি। ২০২১দা ঐহাক্না মীয়ামগী অমদি গৃহগী হকশেল অসি করম্নবা অমগা-অমগী মরক্তা মরী লৈনবগে হায়বগী মতাংদা ফোঙদোকচখ্রে। ভারত মচাশিংনা মহৌশাগা লোয়ননা মতম চুপ্পদা পুন্না হিংমিন্নদুনা লাক্লি। ঐখোয়গী নাৎ, নাৎকী ওইবা থৌরমশিং, নোংমগী থবক-থৌরমশিং অমসুং লৌরোকপগী কুহ্মৈ কয়া অসিনা মহৌশাগা অচেৎপা মরী অমা লৈ হায়না আক্লি। রিদ্যুস, রিয়ুজ, রিসাইকল, রিকবর, রি-দিজাইন অমসুং রি-মেন্যুফেকচর অসিনা ভারতকী কলচরেল ইথোসকী শরুক অমা ওইদুনা লাক্লি। ভারতনা ক্লাইমেৎ রিজিলিএন্ত পোলিসীশিং অমসুং প্রেক্তিসশিংগীদমক মতম চুপ্পদা তৌদুনা লাকপা অসিগুম্না মখা তানা তৌখিগনি।
ৱাহৈশিং অসিগা লোয়ননা, অমসুং শেংলবা ৱাশক্কা লোয়ননা ঐহাক্না তি.ই.আর.আই. অমসুং সম্মিত অসিদা মালেম শিনবা থুংবদগী শরুক য়ারিবা পুম্নমক্তা য়াইফ-মঙ্গোল পীজরি।
থাগৎচরি!
হন্না-হন্না থাগৎচরি!
