ইকায় খুম্ননীংঙাই ওইরবশিং,
ভারতনা ক্লাইমেৎ এদাপ্তেসন সম্মিৎপু তরাম্না ওক্লি অমসুং হীরম অসিগী মতাংদা প্রধান মন্ত্রী, মার্ক রুত্তেনা লুচিংলিবা অসিবুসু ঐহাক্না থাগৎলি।
ক্লাইমেৎ এদাপ্তেসন অসি ঙসিদি হান্নদগী হেন্না মরু ওইবা ৱাফম অমা ওইরে।
অমসুং হীরম অসিগী ভারতকী চাউখৎপগী থৌওংশিংদা মরু ওইনা হোৎনবা থৌওং অমা ওইরি।
ঐখোয়না মখাগী হীরমশিং অসিগা মরী লৈননা ইশাদা ৱাশকচগদবনিঃ
- ঐখোয়না পেরিস এগ্রীমেন্তকী পান্দমশিং অসি য়াবতা নত্তনা থবক ওইনসু পাংথোক্কদবনি;
- ঐখোয়না অকোয়বগী ফিভম কায়থরকপবু থিংবতা নত্তনা মসিবু অমুক্কা হন্না ফগৎহন্নবা হোৎনগদবনি; অমসুং
- ঐখোয়না অনৌবা তৌবা ঙম্বা শেম-শাবতা নত্তনা মখোয়শিং অসিবু মালেমগী কান্নবা ওইহন্নবা এজেন্ত ওইহনগদবনি।
ঐখোয়গী থবকশিংনা ঐখোয়গী খোঙফম চেৎপগী থৌওংবু উৎলি।
ঐখোয়না ইং ২০৩০ ফাওবগী মনুংদা গিগাৱাৎ ৪৫০গী রেন্যুএবল ইনর্জী কেপাসিতী ফংনবা পান্দম থম্লি।
ঐখোয়না এল.ই.দি. লাইৎশিংবু খুমাং চাউশিলহন্দুনা চহি খুদিংগী ওইনা কার্বোন-দাই-ওক্সাইদ মিলিয়ন ৩৮ থাদোকপবুসু কনবা ঙম্লি।
ঐখোয়না ইং ২০৩০ ফাওবগী মনুংদা কায়থখ্রবা হেক্ত্যার মিলিয়ন ২৬কী লম্বু অমুক্কা হন্না শিজিন্নবা য়াহনগনি।
ঐখোয়না খুঙ্গংগী ইমুং-মনুং মিলিয়ন ৮০দা চাক থোংবগী অশেংবা ফুএল পীরি।
ঐখোয়না ইমুং-মনুং মিলিয়ন ৬৪দা পাইপ শমদুনা থক্নবা তোতিগী ঈশিং পীরি।
অমসুং, ঐখোয়গী খোঙথাংশিং অসি ভারত খক্তদা লোইবা ওইদ্রি।
ইন্তর্নেস্নেল সোলার এলাএন্স অমসুং কোএলিসন ফোর দিজাজতর রেজিলিএন্ত ইনফ্রাস্ত্রকচর অসিনা মালেমগী ওইবা অইং-অশাগী মতাংদা খুৎশম্নবগী শক্তি উৎলি।
ঐহাক্না গ্লোবেল কম্মিসন ওন এদাপ্তেসনবু মালেমগী ইনফ্রাস্ত্রকচরগী নীংহন্নদববু হেনগৎহন্নবা সি.দি.আর.আই.গা থবক তৌমিন্ননবা হায়জরি।
অমসুং, ঐহাক্না নখোয় খুদিংমকপু ভারত্তা চহিসিদা পাংথোক্কদৌরিবা দিজাজতর রেজিলিএন্ত ইনফ্রাস্ত্রকচরগী অহুমশুবা মালেমগী কনফরেন্সতা শরুক য়াবীনবা পাউজেঞ্জরি।
ইকায় খুম্ননীংঙাই ওইরবশিং,
ভারতকী চাউখৎপগী ভেল্যু অসিনা ঐখোয়দা মহৌশাগা নুংশী-চান্ননা হিংমিন্নবগী কান্নবশিং তাকপীরি।
ঐখোয়গী অরিবা লাইরিক, য়জুর্বেদনা ঐখোয়গা পৃথীবীগা লৈনরিবা মরী অসি মমা অমসুং মহাক্কী মচাগা লৈনবা মরীগা মান্নৈ হায়না তাকপীরি।
ঐখোয়না ইমা পৃথীবিবু চেকশিন্না তেক্ত-কায়দনবা থম্বীরবদি, মহাক্নসু ঐখোয়বু মখা তানা য়োকপীগনি।
অইং-অশা হোংলক্লিবা অসিগা হৈনহন্নবগীদমক্তা, ঐখোয়গী পুন্সি মহিংসু মসিগা চান্ননবা শিনগদবনি।
মসিগী ৱাখল্লোন অসিনা নখোয়গী তুং লমচত্তা লমজিংবীগনি।
ঐহাক্না মীয়াম্বু থাগৎচরি।
