প্রধান মন্ত্রী শ্রী নরেন্দ্র মোদীনা ঙসি ভিদিও কনফরেন্সকী থোংদো সৌরাষ্ট্রীয় পতেল কলচরেল সমাজগী ৮শুবা ইন্তর্নেস্নেল কনভেন্সন্দা ৱা ঙাংখ্রে। চহি অসিগী ওইনা সৌরাষ্ট্রীয় পতেল কলচরেল সমাজগী ইন্তর্নেস্নেল কনভেন্সন অসি য়ুনাইতেদ স্তেৎস ওফ অমেরিকাগী কেলিফোর্নিয়াদা পাংথোক্লি।
এন.আর.আই.শিংনা অখন্ননা সৌরাষ্ট্রীয় পতেল কম্যুনিতীনা হোৎনরিবশিং অদু থাগৎলদুনা এন.আর.আই.শিংনা মতম পুম্নমক্তা ভারতপু চাউথোকহল্লি হায়না প্রধান মন্ত্রীনা হায়খি। মখোয়না হোৎনবিরিবশিং অদুনা ভারতকী পাসপোর্ত অসি মফম পুম্নমক্তা ইকায় খুম্নহল্লি হায়না মহাক্না মখা তাখি।
প্রধান মন্ত্রীনা হায়খি মদুদি স্বচ্ছ ভারতকুম্বা সরকারগী তোঙান তোঙানবা স্কিমশিংনা ভারতকী তুরিজমদা ইনোৎ হাপ্লি। ভারত দর্শনগীদমক চহি খুদিংগী য়ামদ্রবদা মীরৈবাক্কী ইমুং মঙা মঙা ভারত্তা কোয়বা লাকহন্নবগীদমক পুক্নীং থৌগৎনবা মহাক্না এন.আর.আই. কম্যুনিতীদা আপিল তৌখি। মসিনা এক ভারত শ্রেস্থ ভারত অভিয়ানগী পান্দম অদু মপুং ফানা পাংথোক্নবা লম্বী অমা পীরগনি অমদি ভারতকী তুরিজম দিবেলপমেন্তসু চাউনা ইনোৎ হাপ্লগনি। মহাত্মা গান্ধীগী মংলান স্বচ্ছ ভারতপু মায় পাকহনবদা এন.আর.আই.শিংনা মতৌ করম্না শরুক য়াগনি হায়বগী মতাংদসু প্রধান মন্ত্রীনা ঙাংখি।
ওক্তোবর ২দগী হৌরগা ভারতনা মহাত্মা গান্ধীগী ১৫০শুবা মপোক কুমওন থৌরম পাংথোক্কদৌরি হায়না প্রধান মন্ত্রীনা ফোংদোকখি। ভারতকী আইরন মেন সর্দার বল্লব ভায় পতেলগী মিংদা নর্মদা তুরেলদা অচৌবা মীতম অমা ২০১৮গী ওক্তোবর ৩১ ফাওবদা লোইশিল্লগনি। মসিনা মপুং ফানা শাবা হেক লোয়বগা মালেমদা খ্বাইদগী ৱাংবা মীতম ওইরগনি।
মীয়াম তিনখিবা থৌরম অদুদা ৱা ঙাংলদুনা নরেন্দ্র মোদীনা হায়খি মদুদি হৌজিক্তি ভারত অসি অরংবা থৱান মিচাক অমগুম উবা ফংলে। ঙসিদি ভারত অসি শেল-থুমগী ফিভমদা খোংজেল য়াংবা অমদি পুকচেল শেংবা অমসুং ত্রান্সপরেন্ত ওইবা গবর্নান্সকা লোয়নরি। জি.এস.তি.গুম্বা অনৌবা খোংথাংশিং অমসুং শেঞ্জা-থুমজাগী মায়োক্তা অকনবা খোংথাংনা মীয়াম্বু পুকচেল শেংনা ললোন ইতিক তৌবদা মতেং ওইরি। অনৌবা খোংথাংশিং অসিনা মরম ওইরগা হৌখিবা চহি মরি অসিদা ইজ ওফ দোইং ব্যুজিনেস্তা ভারতনা মফম ৪২ কাখৎপা ঙম্লে হায়না মহাক্না মখা তাখি।
প্রধান মন্ত্রীনা এন.আর.আই. কম্যুনিতীগী মফমদা অনৌবা ভারত অমা শেম্নবা মংলানগী মায়কৈদা থবক তৌনবসু অপিল তৌখি।
