দেফএক্সপো-২০১৯দা পীখিবা প্রধান মন্ত্রীগী ৱারোল

তমিল নাদুগী রাজ্যপাল,

লোক সভাগী দিপুতী স্পীকর,

তমিল নাদুগী মুখ্য মন্ত্রী,

তমিল নাদুগী উপ মুখ্য মন্ত্রী,

ঐহাক্কী মন্ত্রীমন্দলগী খোংলোইশিং,

লেংবীরক্লিবা শক্নাইরবশিং,

মরূপশিং

ময়াম পুম্নমক্কী মফমদা য়াইফরবা অয়ুক্কী পাউজেল পীজরি।

মসি দেফ–এক্সপোগী ১০সুবা এদিসন্নি।

অদোম খরদি থৌরম অসি কয়ারক হন্না শরুক য়ারম্লগনি। খরা অমদি অহানবা হৌরকপদগী শরুকয়ারকপসু য়াওরমগনি।

অদুবু ঐহাক্কী ওইনদি দেফ–এক্সপোদা মসিনা অহানবনি। তমিল নাদু রাজ্যদা লৈরিবা কাঞ্চীপুরমগীপুৱারী ওইরবা লমদম অসিদা অসিগুম্বা মখলগী থৱায় য়াওনা তিল্লরিবা অসি উরুবদা অপেনবাঅমসুং শুমহৎপা অনিমক ফাওই।

অথৌবা চোলাশিংগী লমদম অসিদা লাকপা ফংজবদা ঐহাক য়াম্না নুংঙাইবা ফাওই। চোলাশিংনাললোন ইতিক অমসুং মহৈ–মশিংগী খুত্থাংদা ভারতকী পুৱারী ওইরবা চাউখৎপগী মরিশিংশেমগৎলম্মি। মসি ঐখোয়গী ফাওরবা মেরিতাইম লিগেসীগী লমদম্নি।

চহি লিশিং কয়াগী মমাংদা ভারতনা নোংপোক লোমদা য়েংখিবা অমসুং নোংপোক লোমদা থবক তৌখিবা অদুগুম্লবা লমদম অদু মসিনি।

মরূপশিং,

মফম অসিদা মীরমগী কম্পেনী চাম্মা য়াঙ্খৈ অমসুং ভারতকী কম্পেনী ৫০০ হেনবনা শরুক য়ারিবা অসি উরুবদা অঙকপা ফাওই।

লোয়ন-লোয়ননা লৈবাক নিফু হেনবনা মখোয়গী ওফিসিয়েল ওইবা মীহুৎ কাংবুসু থাবীরক্লি। মালেম পুম্বদা আর্ম ফোর্সেসকী সপ্লাই চেনগী মরুওইবশিং অদু খঙই। অদুবু মসি লানফম খক্তদা নত্তনা দিফেন্স মেন্যুফেকচরিং এন্তর্প্রাইজেসকী ফেক্তরী ফ্লোরশিংদসু চৎনরি, মদুনা স্ত্রাতেজিক্কী ওইবা ৱারেপশিং লৌরি।

ঙসিদি ঐখোয় অমগা অমগগী মরক্তা শম্নবা মালেম অমদা লৈরি। মেন্যুফেকচরিং এন্তর্প্রাইজেস অমা হেক্তদা সপ্লাই চেনগী ইফিসেন্সী অসি মরুওইবা মরম অমা ওইরি। মরম অদুনা ভারত্তগী মালেমদা সপ্লাই তৌনবা মেক ইন ইন্দিয়াদা, মেক ফোর ইন্দিয়া অসি হান্নদগী হেন্না মপাঙ্গল কনখৎহল্লে।

মরূপশিং,

ঐখোয়না কৈদৌনুংদা কনাগুম্বা অমত্তগী লম পাম্লুবা লৈতে হায়বা অদু ভারতকী চহি লিশিং কয়াগী পুৱারীদা উবা ফংলে।

লান তৌদুনা লৈবাকশিংবু খুদুম চনবগী মহুৎ থমোয়শিংবু খুদুম চনবদা ভারতনা থাজবা থম্মি। বেদিক্কী মতমদগী হৌরগা লমদম অসিদগী শান্তি অমসুং মালেম পুম্বা মচিল-মনাও ওইবগী পাউজেল অদু পীদুনা লাক্লি।

মালেম পুম্বদা বুদ্ধিজমগী মঙাল শন্দোকখিবা অদুগুম্লবা লমদম অদু মসিনি। তশেংনা হায়রবদা অশোক্কী মতম অমদি মদুগী মমাংদগী হৌরগা মীওই-লোনচৎকী খ্বাইদগী ৱাংবা ফিদম্নফম অদু ঙাক্তুনা থম্নবা পাঙ্গল শিজিন্নবদা ভারতনা থাজবা থম্লি।

অনৌবা মতমদা মমাংগী চহিচাদা ভারতকী লান্মী লিশিং চামগা কুনথ্রানা মালেমগী লাঞ্জাওশিংদা মখোয়গী পুন্সি কত্থোকখি। ভারতনা ঙমখৈশিংদা হক তাল্লুবা লৈতে । অদুবু ভারতকী লান্মীনা শান্তি হঞ্জিলহন্নবা অমসুং মীওইবগী মমল ঙাক্তুনা থম্নবা লানথেংনখি। নিং-খা তম্বা ভারতনা মালেমগী মফম কয়াদা মশিং য়াম্লবা য়ু.এন. পিছ-কীপর্স থারি।

মরূপশিং,

ঐখোয়না খঙই মদুদি দিফেন্স ইন্দস্ত্রীয়েল কমপ্লেক্স অমা শেমগৎপা অসি অচম্বা থবক নত্তে। ঐখোয়না মসিমসু খঙই মদুদি দিফেন্স মেন্যুফেকচরিং সেক্তর অসি সরকারনা শরুক য়ারিবা অমনি। মেন্যুফেকচর তৌনবগীদমক সরকারদগী লাইসেন্স লৌবা মথৌ তাই। অমদি এক্সপোর্ত তৌনবগীদমক অদোম্না সরকারদগী অয়াবা লৌবা মথৌ তাই।

দিফেন্স মেন্যুফেকচরিং লাইসেন্সশিংদা, দিফেন্স ওফসেৎশিংদা, দিফেন্স এক্সপোর্তস ক্লিয়ারেন্সতা, দিফেন্স মেন্যুফেকচরিংদা ফোরেন দাইরেক্ত ইনভেস্তমেন্ত তৌবদা, অমদি ঐখোয়গী দিফেন্স প্রোক্যুরমেন্ত রিফোর্ম তৌবদা ঐখোয়না খোংথাং কয়া অমা লৌখৎলে। ইন্দস্ত্রীয়েল লাইসেন্সকী ইনিসিয়েল ভেলিদিতী চহি ৩দগী ১৫দা হেঙ্গৎলে। মমাংদা হান্ননা খুৎয়েক পীনখিবা কন্ত্রেক্তশিং য়াওনা ইন্দিয়ন ওফসেৎ পার্তনর হোংদোকপদা অয়াবা পীদুনা ওফসেৎ গাইদলাইনশিংদা হেন্না লাইথোকহল্লে।

কন্ত্রেক্ততা খুৎয়েক পীনবা মতমদা ফোরেন ওরিজিনেল ইক্বিপমেন্ত মেন্যুফেকচর তৌরিবশিংনা ইন্দিয়ন ওফসেৎ পার্তনরশিং অমদি প্রদক্তশিংগী মতাংদা মচা নাইনা তাকপগী মথৌ তাদ্রে। এক্সপোর্ত ওথোরাইজেসনশিং ইসু তৌবগীদমক স্তেন্দর্দ ওপরেতিং প্রোসিদ্যুর অদু লায়থোকহল্লে অমদি পব্লিক দোমেন্দা থম্লে।

ইং ২০০১গী মে থা ফাওবদা প্রাইভেৎ সেক্তরদা দিফেন্স ইন্দস্ত্রী সেক্তর অসি অথিংবা থম্লম্মি, প্রাইভেৎ সেক্তরনা শরুক য়ানবা অতল বিহারী বাজপেয়ীজীগী সরকারনা অহানবা ওইনা হাংদোকখি।

দিফেন্স সেক্তরদা মাইক্রো অমসুং স্মোল ইন্তর্প্রাইজেসকী চাউখৎ-থৌরাংদা পুক্নীং থৌগৎনবগীদমক ২০১২দা নোৎ তৌখিবা মাইক্রো অমসুং স্মোল ইন্তর্প্রাইজেসকী ওইবা পব্লিক প্রাক্যুরমেন্ত পোলিসী অদু ইং ২০১৫গী এপ্রিল থাদগী শোইফদবা ওইহল্লে।

পুক্নীং থৌগৎনীংঙাই ওইবা রিজল্ত খরদি উবা ফংলে। ইং ২০১৪গী মে থাদা, দিফেন্স লাইসেন্স ইসু তৌখিবা অপুনবা মশিং অসি ২১৫নি। চহি মরি য়ৌদ্রিবা মতম অসিদা ঐখোয়না অহেনবা লাইসেন্স ১৪৪ হেন্না নুং-পান ফাওনা উবা মওংদা ইসু তৌখ্রে। 

ইং ২০১৪গী মে থাদা, অয়াবা পীখিবা দিফেন্স এক্সপোর্ত পর্মিসনগী অপুনবা মশিং অসি ১১৮ ওইখি, মদুগী অপুনবা ভেল্যুনা দোলর মিলিয়ন ১১৮ ওইখি। চহি মরি ফাদ্রিবা মতম অসিদা, ঐখোয়না দোলর বিলিয়ন ১.৩গী ভেল্যু ওইবা অহেনবা এক্সপোর্ত পর্মিসন ৭৯৪ ইসু তৌরে।

ইং ২০০৭তগী ২০১৩ ফাওবদা পান্দম থমখিবা ওফসেৎ ওব্লিগেসন অসি দোলর বিলিয়ন ১.২৪ ওইখি, মদুগী মনুংদা শুপ্নগী দোলর বিলিয়ন ০.৭৯ খক্কী ওইবা ওফসেৎশিং দিসচার্জ তৌখি। মদুগী এচিবমেন্ত রেৎ অদু শুপ্নগী চাদা ৬৩ খক্তনি।

ইং ২০১৪দগী ২০১৭ ফাওবদা তার্গেৎ তৌখিবা ওফসেৎ ওব্লিগেসন অসি দোলর বিলিয়ন ১.৭৯ ওইখি, মদুগী মনুংদা দোলর বিলিয়ন ১.৪২গী মমল ওইবা ওফসেৎশিং রিয়েলাইজ তৌখি। মসিগী এচিবমেন্ত রেৎ অসি চাদা ৮০ ওইখি।

দিফেন্স পব্লিক সেক্তর অন্দরতেকিংশিং অমসুং ওর্দিনান্স ফেক্তরীশিংনা মাইক্রো অমসুং স্মোল এন্তর্প্রাইজশিংদগী খোমজিল্লিবা অসি ইং ২০১৪-১৫দা লুপা কোতি ৩৩০০ ওইখিবা অদুদগী ইং ২০১৬-১৭তা লুপা কোতি ৪২৫০দা হেঙ্গৎখি। মসিনা চাদা ৩০গী চাংদা হেঙ্গৎখি।

হৌখিবা চহি ৪ অসিদা দিফেন্স প্রদক্সনদা স্মোল অমসুং মেদিয়ম স্কেল সেক্তরগী কন্ত্রীব্যুসন অসি চাদা ২০০গী চাংদা হেঙ্গৎলে।

মরূপশিং,

ঐখোয়না হৌজিক তৌগদবা কয়া অমা লৈরি হায়বা ঐহাক্না খঙই। অমদি পাংথোক্নবা ঐখোয়না ৱাশক্লি।

দিফেন্স ইন্দস্ত্রীয়েল কমপ্লেক্স অমা শেমগৎনবা ঐখোয়না অচেৎপা ৱাফম থম্লি মদুনা পব্লিক সেক্তর, প্রাইবেৎ সেক্তর অমদি ফোরেন ফর্মশিং পুম্নমক্কী মফম অমা ফংহল্লগনি।

দিফেন্স ইন্দস্ত্রীয়েল কোরিদোর অনি লিংখৎনবা ঐখোয়না অচেৎপা ৱাফম থম্লি- অমনা তমিল নাদু অসিমক্তদা অমসুং অতোপ্পা অমনা উত্তর প্রদেশতনি। মসিগী দিফেন্স ইন্দস্ত্রীয়েল কোরিদোর অসিনা রিজন অসিদা হৌজিক লৈরিবা দিফেন্স মেন্যুফেকচরিং ইকোসিস্তেমশিং শিজিন্নহল্লগনি । দিফেন্স ইনভেস্তর্স সেল অমসু ঐখোয়না লিংখৎলগনি মদুনা দিফেন্স প্রদক্সনদা শরুক য়ারিবা ইনভেস্তরশিংদা মতেং ওইরগনি।

মরূপশিং,

তেক্নোলোজি, ইনোবেসন, রিসর্স অমসুং চাউখৎ-থৌরাংকীদমক সরকারগী মতেং অসি দিফেন্স সেক্তরগীদমক মরু ওই।

হৌখিবা চহি খরা অসিদা, ঐখোয়না ভারতকী কমর্সিয়েল ইকো-সিস্তেমদা ইনোবেসন অমসুং এন্ত্রপ্রিনরশিপ্তা পুক্নীং থৌগৎনবা মেক ইন ইন্দিয়া, স্তার্ত অপ ইন্দিয়া অমসুং অতল ইনোবেসন মিসনগুম্বা তোঙান তোঙানবা ইনিসিয়েতিবশিংসু পায়খৎলে।

ঙসিদি, ঐখোয়না ‘ইনোবেসন ফোর দিফেন্স এক্সিলেন্স’ স্কিম হৌদোক্লে। মসিনা লৈবাক পুম্বদা দিফেন্স ইনোবেসন হবশিং লিংখৎলগনি।