ঙসি ২০১৭কী অরোইবা নুমিৎনি অমসুং ঐগী লাইবক ফবনি মদুদি ঙসিগী নুমিৎ অসিদা ঐনা শ্রী নারায়ণ গুরু অমসুং ফম্বাক অসিদা ঙানথোইবীরিবা লম্বোইবশিংগী আশীর্বাদ লৌজনবগী তাঞ্জা ফংজরে।
শ্রী নারায়ণ গুরুগী আশীর্বাদতগী ২০১৮গী অহানবা মঙাল লৈবাক অপুনবা, মালেম পুম্নমক্কীদমক্তা শান্তি–নুংশি চানবা অমসুং চাওখৎপগী অনৌবা অয়ুক অমা পুদুনা লাক্লগনি, অসুম্না ঐনা থাজৈ।
শিবগিরি মথতা লাকপা অসি ঐগীদমক্তদি মহৌশাদগী অদুক্কী মতিক আধ্যাত্মিক্কী নুংঙাইবা ফংফম ওইরি। ঙসি শিবগিরি পিলগ্রিমেজ হৌদোকপগী খুদোংচাবা পীবীদুনা অদোম্না নুংঙাইবা অসি অমুক্কা হেন্না হেনগৎহনবীরে। ঐনা শ্রী নরায়ণ ধর্ম সংঘম ত্রস্ত অমসুং অদোম পুম্নমক্কী লমন হন্না হন্না তোনসিঞ্জরি।
ইচিল–ইনাও অমসুং ইচল–ইচেশিং,
ঐখোয়গী লৈবাক, ঐখোয়গী খুন্নাইগী থোইদোকপা মগুন অমা ওইদুনা লাক্লি মদুদি মসিদা নুংগী অশোনবশিং, নুংগী ফত্তবশিংবু লাপথোকহনখিনবগী থৌওংসু হোৎনদুনা লাক্লি। থৌওং অসিবু খোংজেল য়াংহন্নবা,
মতম–মতমগী লম্বোইবা ঋষি মুনি, অথোইবা থৱাইশিংনা অবতার তৌবীদুনা লাক্লি। অসিগুম্বা শেংলবা থৱাইশিং অসিনা খুন্নাইগী ফত্তবশিং অসিদগী নান্থোক্ননবা হোৎনবদা মখোয়গী মপুন্সি কৎথোকখি।
পরম পুজ্য স্বামী নারায়ণ গুরুগুম্বা শেংলবা থৱাইনসু জাতিগী খেন্নবা, অনেম–অৱাং, কাংলুপ নাইবা ৱাখল্লোন্দগী খুন্নাইবু মিকপ থোকহনখি, খুন্নাইবু অমত্তা ওইহনখি। ঙসি মহৈ–মশিংগী লমদা মাই পাকপগী ৱাফম্বু ওইরো, খুন্নাইগী ফত্তবশিংদগী নান্থোকপগী ৱাফম্বু ওইরো, শোক্ন–পন্না য়াদবগী মায়োক্তা খুন্নাইগী হঙ্গোই–তুকচ্চবগী ৱাখল্লোনবু ওইরো মসি অসুম্না মথন্তা ওইরকখিবা নত্তে।
মরূপশা,
শ্রী নারায়ণ গুরুজীগী মন্ত্রদি –
“ফ্রীদম থ্রু এজুকেসন,
স্ত্রেংথ থ্রু ওর্গনাইজেসন
ইকোনোমিক্স ইন্দিপেন্দেন্স থ্রু ইন্দস্ত্রীজ”নি।
(মহৈ–মশিংগী থোংদা নীং তম্বা, লুপশিংগী থোংদা নীং তম্বা, ইন্দস্ত্রীগী থোংদা শেনমিৎলোনগী নীং তম্বা। )
খুন্নাইবু শেমদোক্নবগীদমক্তা, দলিৎশিং, চৈথেং ফংলবশিং, নমথবীরবশিং, শোৎথহৌরবশিংবু মপাঙ্গল কলহন্নবা মহাক্না লম্বী অসি পুথোকপীখি। মহাক্না খনখি মদুদি লাইরবা দলিৎ অমসুং শোৎথহৌরবা পুম্নমক্না মখোয়গী মফমদা মহৈগী পাঙ্গল লৈরবতদা মখোয় মাংদা চখৎপা ঙমগনি। মহাক্না খঙখি মদুদি খুন্নাই অসিনা মহৈ–মশিং হৈরবদতা মশানা মশাবু থাজবা হেনগৎলক্কনি অমসুং মশাবু য়েংশিঞ্জবা ঙম্লগনি। মরম অসিনা মখোয়না শুপ্নগী কেরল খক্তা নত্তনা নাক য়েৎকী রাজ্য কয়াদা মহৈ–মশিং অমসুং নাৎকী লমশিংদা শাফু পীবা লুপশিং লিংখৎখি। ঙসি লৈবাক মনুং অমসুং মপান্দা শ্রী নারায়ণ গুরুজীগী মিৎয়েংবু মখা শমথনবা লুপ কয়ানা শরুক য়ারক্লি।
শ্রী নারায়ণ গুরুনা খুন্নাইগী মীপুম খুদিংমকপু পুন্সিন্নবগী থবক তৌবীরম্মি। মিত্রং অমসুং অমম্বদগী লাপ্না মহাক্না মন্দিরশিংদা অচুম্বা, লুবা–নানবগী ৱাফম ফোংদোকপীরম্মি। মহাক্না মন্দিরদা মোৎশিনবা হেনগৎহনবা অদুগুম্বা পুজা তৌবগী থৌওং অদু হোংদোক্লম্মি। পুজা তৌবগী থৌওংদা মথৌ তাদবা পোৎলমশিং লৌথোক্তুনা শ্রী নারায়ণ গুরুনা অনৌবা থৌওং অমগী লম্বী তাকপীরম্মি। মহাক্না মন্দিরশিংদা পুজা তৌবদা পুম্নমক্কী হক ফংহনবীরম্মি। শিবগিরি পিলগ্রিমেজসু অমরোমদা মহাক্কী খুন্নাই শেমদোকপগী পাক চাওরবা মিয়েং অমগী খুদম্নি।
মসি শ্রী নারায়ণ গুরুগী পুন্সিমক্কী খুদম্নি মদুদি মহাক্না শিবগিরি পিলগ্রিমেজবু মহৈ–মশিং, লুবা নানবা, অচুম্বগী পাঙ্গল, অপুনবগী পাঙ্গল, জ্ঞান–বিজ্ঞান লৌমী পুম্নমক পুন্সিনখি অমসুং মখোয়বু চাওখৎহন্নবা পিলগ্রিমেজগী পান্দমশিংদা হাপিনখি।
মহাক্না হায়বীরম্মি–
“মেক অজ ওফ ওল দেৎ নোলেজ ইন প্রাক্তিকেল লাইফ।
দেন দ পিপল এন্দ কন্ত্রী ৱিল প্রোগেস এন্দ প্রোস্পর। দিস ইজ দ ম্যেন ওবজেক্তিব ওফ শিবগিরি পিলগ্রিমেজ”
(অশেংবা পুন্সিদা লৌশিং পুম্নমক শিজিন্নগদবনি।
মদুতদা মীয়াম অমসুং লৈবাক অসিনা চাওখৎপা অমসুং ৱাৎত–পাদবা ওইগনি। মসিনি শিবগিরি পিলগ্রিমেজগী অশেংবা পান্দম)
ঐহাক নুংঙাইবা পোকচৈ মদুদি চহি ৮৫দগী লেপ্তনা শিবগিরি পিলগ্রিমেজগী মতমদা লমদম অসিগী অখঙ–অহৈশিংবু কৌনৈ, মখোয়গী খঙ–হৈবশিং তানৈ। ঙসিসু মফম অসিদা থৌরম অসিদা তোঙান তোঙানবা লমদমদগী অখঙ–অহৈশিং তিল্লরি। ঐনা অদোম পুম্নমকপু তরাম্না ওকচরি, নোল্লুকপসু উৎচরি অমসুং থাজবা অসিসু থমজরি মদুদি অদোমগী ৱাখল্লোন্দগী মীয়াম্না করিগুম্বা অনৌবা খরা খঙজ–তমজবা ফংলগনি।
ইচিল–ইনাওশা, শিবগিরি পিলগ্রিমেজ অসি অমরোমদা লৌশিংগী অদুগুম্বা কুম্ভ অমনি, মসিদা লুপলুবশিং মঙাল শোইদনা ফংই।
কুম্ভ মেলাগী মতমদসু ঐখোয়গী চাওরবা লৈবাক অসিবু অমখক্তা ওইনা পুন্সিন্নবা হোৎনৈ। সাধু–লম্বোইবা, ঋষি–মুনি পুল্লরৈ, খুন্নাইগী অৱা–নুংঙাইগী মতাংদা খন্না–নৈনৈ। মতমগা লোইননা অহোংবা খরা শোইদনা পুজরক্লবসু কুম্ভ মেলাগী মশক্তা তোঙানবা অখন্নবা অমদি অদুম্মক য়াওরি। চহি ১২ খুদিংগী সাধু–লম্বোইবশিং পুল্লৈ মতুংদা তুংলমচৎকীদমক্তা খুন্নাইগী মাইকৈ করোমদা লেপকনি খন্নৈ,
লৈবাক্কী মাইকৈ করোমদা লেপকনি, খুন্নাইগী থবক–থৌরমদা করম্বা অহোংবা পুরক্কনি?
মসি অমরোমদা খুন্নাইগী ৱারেপ অমনি। মসিগী মতুংদা চহি অহুম খুদিংগী তোঙান তোঙানবা মফমশিং, করিগুম্বদা নাসিক, করিগুম্বদা উজ্জৈন, করিগুম্বদা হরিদ্বারদা কুম্ভগী মতমদা মসিগী এনলাইসিস তৌনৈ মদুদি লেপ্নখিবা অদুদা ঐখোয় কদাই ফাওবা য়ৌশিল্লে। পোৎলম খুদিংমক নীংথিজনা য়েংশিল্লি।
ঐনা থাজৈ মদুদি অদোম পুম্নমক্না চহিগী অরোইবদা তাঞ্জা অসিদা উন্নবদা, মসিগী মতাংদা কান্নবা মওংদা ৱারি–ৱাতাই তৌই মদুদি মমাংগী চহিদা পাংথোকখিবা খন্ন–নৈনবা অদুগী ফল করি ফংলে? অদুগুম্বা পান্দম অদু ফংনবা লম্বী শ্রী নারায়ণ গুরুনা তাকপীরম্বা অদুগী মাইকৈদা ঐখোয় খোংথাং খরগা হেন্না চংসিল্লবরা?
মরূপশা,
শিবগিরি পিলগ্রিমেজবু ওইরো, কুম্ভ–মহাকুম্ভবু ওইরো, খুন্নাইদা লম্বী তকপীবা, লৈবাক অসিবু মাগী নুংগী ফত্তবশিংদগী লাপথোকহনবা ঙম্বা অসিগুম্বা চৎনবী অসি ঙসিসু অদুক্কী মতিক মরু ওইরি। লৈবাক অসিগী তোঙান তোঙানবা রাজ্যশিংদা অসিগুম্বা মখলগী পিলগ্রিমেজশিংনা লৈবাক অসিবু অমত্তা ওইনা পুন্সিল্লি। তোঙান তোঙানবা রাজ্যশিংদগী মীয়াম্না লাক্নৈ, তোঙান তোঙানবা ৱাখল্লোনগী মীওইশিং লাকই, অমনা অমগী চৎনবীবু য়েংনৈ খঙনৈ অমসুং থৱাই অমত্তগী ৱাখল্লোন্দা পুল্লৈ।
মরূপশা, কেরলগী শেংলবা লৈমাই অসিমক্তদা আদি শঙ্ক্রচার্য়না অদৱৈত (অমত্তা ওইবা)কী ৱাখল্লোন হৌদোকপীরম্মি। অদৱৈত হায়বদি অনিশুদবা হায়বনি। মসিদা নঙ অমসুং ঐ তোঙানবা নত্তে। মসিদা ঐগী মীগী নাইদে। ৱাখল্লোন অসি পোকখিবদা মদুতদা অদৱৈত অসি শাফোংলকই অমসুং লম্বী অসি নারায়ণ গুরুনা উৎপীরম্বনি।
নারায়ণ গুরুনা শুপ্নগী অদৱৈতকী ৱাখল্লোন অদুদা হিংবতা নত্তনা মালেমগী খুন্নাই খুদিংমক্তা মসিদা মতৌ করম্না হিংবা য়াবগে হায়বগী লম্বী তাকপীরম্মি।
ঐঙোন্দা হায়খি মদুদি রিলিজিয়স পালিয়ামেন্তকী এন্ত্রান্সতা গুরুজীনা ইহনখি –
“ৱি মীৎ হিয়র নোৎ তু আর্গু এন্দ ৱিন,
বৎ তু নো এন্দ নোন”
(ঐখোয়না মফম অসিদা মরৈ য়েৎননবা অমসুং অঙম তান্ননবা উন্নবা নত্তে,
খঙনবা অমসুং খঙহন্নবনি)
অমগা অমগা ৱারি শান্নদুনা, অমগা অমগা ৱাখল তামিন্ননবগী থৌওং অসি য়াম্না মরু ওই।
ঙসি ঐখোয়না মালেমগী ওইবা ফিভমগী মতাংদা পন্নবদা মসি খঙলকই মদুদি মতৌ করম্না ঐখোয়গী লম্বোইবা খুন্নাইনা অৱাবশিংনা লাকপা অদু উখি অমসুং লেপ্তনা চেকশিলহনবিরম্মি।
ইচিল–ইনাওশা, করিগুম্বা ঐখোয়না তরামাপলশুবা অমসুং কুনশুবা চহি চাগী অপুনবা মতম অদু য়েংলুরগদি নীং তম্বগী খোংজংদা মতম অদুগী খুন্নাই শেমদোকপীরম্বশিং–ধর্মগুরুশিংগী থৌদাং চাওনা য়াওখি। তোঙান তোঙানবা জাতিদা খাইদোক্লবা খুন্নাই, তোঙান–তোঙানবা থাক্তা য়েন্থোক্লবা খুন্নাইনা অংগ্রেজশিংগা মায়োক্নবা ঙম্লমদে। অশোনবা অসিবু কোকহন্নবগীদমক মতম অদুদা লৈবাক অসিগী তোঙান–তোঙানবা শরুকশিংদা জাতি খেন্নবা ৱাখল্লোনগী মায়োক্তা পাক চাওনা খোংজং চংশিনখি। খোংজংশিং অদুদা, অদুগুম্বা শেমদোকপগী থবক–থৌরমশিং অদুগী ৱাখল্লোন অদু লৈবাক অসিবু মাংদা চখৎহনবা, মীনাই ওইবগী য়োৎহ্লিং থদৎকে হায়রবদি ঐখোয়গী নুংগী অশোনবশিংদগী কঞ্জগদবনি হায়বসি ওইরম্মি।
খোংজংশিং অদুগী চুপ্লি পাইবশিংনা লৈবাক অসিগী মীচম মীয়াম্বু মান্নবা থাক পীবীরম্মি, ইকাই খুম্নবীরম্মি। মখোয়না লৈবাক অসিগী তঙাইফদবশিং অদুবু খঙবীদুনা মখোয়গী আধ্যাতমিক্কী ওইবা খোংচৎপু লৈবাক শেম্বগা পুন্সিল্লম্মি। মীয়াম্না জাতিগী থাক্তগী কাখৎনা খন্নবা হৌরক্লবদা লৈবাক অসি কাখৎপা হৌরকখি। ভারতকী অমত্তা ওইনা পুন্সিল্লবা মীয়াম্না অংগ্রেজবু নম্দুনা তান্থোকখি।
মরূপশা, ঙসি লৈবাক অসিগী মাংদা অদুগুম্বা মতম অদু অমুক লাক্লে। লৈবাক্কী মীয়াম্না লৈবাক অসিগী নুংগী অশোনবশিং অসি কোকহনবা পাম্লে। অদোমগুম্বা লুপ, লোইশঙ লিশিং লিশিংনা মসিদা অচৌবা থৌদাং লৌবীবা য়াই। শুপ্নগী জাতিগী ৱাফমতা নত্তনা লৈবাক অসিদা পীরিবা ফত্তবা পুম্নমক লৌথোকখিবদা, মখোয়গী মায়োক্তা মীয়াম্বু য়কাইহন্নবগীদমক্তা অদোমগী থৌদাং হেনগৎহনবীবগী তঙাইফদবা লৈ।
১৫ ওগস্ত, ১৯৪৭দা ঐখোয়না মীনাই য়োৎহ্লিং থদৎচখ্রবসু অদুগুম্বা য়োৎহ্লিং অদুগী মমি ঐখোয়গী খুন্নাইগী শেনমিৎলোনগী থৌরাংদা হৌজিকসু তাহৌরি। মমিশিং অসি মুথৎপা অসি অদোমগী মতেং খকক্তনা ওইথোকপা ঙমগনি।
ইচিল–ইনাওশা,
জ্যোতিবা ফুলে, সাবিত্ত্রী বাই, রাজা রাম মোহন রায়, ইশ্বর চন্দ্র বিদ্যাসাগর অমসুং দয়ানন্দ সরস্বতীগুম্বা অফাওবা মীওইশিংনা নুপীগী চাওথোকচবা নুপীগী ইকাই খুম্নবগীদমক লান্থেংনখি। ঙসি মসি উরগা মখোয়গী থৱাইনা অপেনবা পোক্লমগনি মদুদি লৈবাক অসিদা নুপীশিংগী হক্কীদমক কয়াদা চাওরবা খোংথাং থিংজিল্লবনো হায়না।
তলাক অহুম্না মরম ওইদুনা মুস্লিম ইচল–ইচে, ইমাশিংনা মতম কুইনা অৱাবা খাংদুনা লাকখি, মদু কনাদসু লোৎপা লৈতে। চহি কয়া চুপ্না লান্থেংনরবা মতুংদা মখোয় তলাক অহুমদগী নান্থোকচনবগী লম্বী ফংলে।
ইচিল–ইনাওশা, ঐখোয়গী অসিদা লম্বোইবশিং, ঋষিশিং মুনিশিংনা হায়বীরম্মি –
“নর করনী করে তো নারায়ণ হো জাই” ।
ৱারি লিদুনা নত্তে, পুং কয়া পুজা তৌদুনা নত্তে, “করনী” হায়বদি থবক তৌদুনা নারায়ন ফংবা ঙম্মি।
“করনী” অসিদি ৱাশক্তগী মপুং ফাহনবগী খোংচৎ অদুনি। “করনী” অসিদি ভারত মচা কোতি চাম্মগীদমক্তা ন্যু ইন্দিয়াগী খোংচৎনি।
২০১৮দা খোংচৎ অসি হেন্না য়াংশিনগনি। অরোনবা শেল–শেঞ্জা–থুমজাদগী হৌরগা অরোনবা লন–থুমদা অহকপা খোংজংদগী হৌরগা, লালহৌবা অমসুং জাতিগী ৱাফমগী মায়োক্তা থবক পাইখৎতুনা রিফোর্ম, পার্ফোর্ম অমসুং ত্রান্সফোর্মগী মন্ত্রদা চৎতুনা, পু্নমক্কা লোইননা, পুম্নমক চাওখৎহন্দুনা, ২০১৮দা ঐখোয় ভারত মচাশিং পুন্না লৈবাক অসিবু অনৌবা মতোলদা পুখৎকনি। ৱাশকশিং, পান্দমশিং অসিগা লোইননা ঐহাক ঐগী ৱা মসিদা লোইশিঞ্জরি। অদোম পুম্নমকপু অমুক্কা হন্না,
শ্রী নারায়ণ গুরুগী ভক্তশিংবু শিবগিরি পিলগ্রিমেজ অমসুং অনৌবা চহিগী হন্না হন্না য়াইফ–পাউজেল পীজরি।
হন্না–হন্না থাগৎচরি!!!
