প্রধান মন্ত্রী শ্রী নরেন্দ্র মোদীনা ঙসি মণিপুরদা লুপা কোতি ৭৫০গী দিবেলপমেন্ত প্রোজেক্তশিং হৌদোকখ্রে। মহাক্না নেস্নেল স্পোর্তস য়ুনিবর্সিতী, আঙ্গলৱাড়়ী সেন্তর ১০০০ অমসুং তোঙান তোঙানবা মরুওইবা দিবেলপমেন্ত প্রোজেক্তশিংগী উরেপ উয়ুং তমখি। মহাক্না লুৱাংপোকপা মল্তি স্পোর্তস কমপ্লেক্স, রানি গাইদিনল্যু পার্ক অমসুং অতোপ্পা দিবেলপমেন্ত প্রোজেক্তশিং শঙ্গাখি। লুৱাংশংবমদা পাংথোকপা মীয়ামগী মীফম অমদশু মহাক্না ৱা ঙাংখি।
থৱায় য়াওনা তিনখিবা মীয়ামগী মীফম অদুদা ৱা ঙাংলদুনা, হৌখিবা চহি অমদা রাজ্য সরকারনা পাংথোকখিবা থবকশিং অদুদা প্রধান মন্ত্রীনা অপেনবা ফোংদোকখি।
ঙসি হৌদোক্লিবা প্রোজেক্তশিং অসি মফম অসিগী নহাশিংগী মংলান, মখোয়গী তেলেন্ত, মখোয়গী এমপ্লোইমেন্ত, নুপীশিংগী এমপৱারমেন্তকা মরি লৈনৈ হায়না মহাক্না হায়খি। নেস্নেল স্পোর্তস য়ুনিবর্সিতী অসি অৱাং নোংপোক্তা লৈরিবা নহাশিংগী তেলেন্ত অমসুং স্পোর্তিং কেপেবিলিতী অদু ৱাখলদা থম্দুনা লিংখৎপনি হায়না মহাক্না হায়খি। হন্দক্তা হৌদোকখিবা খেলো ইন্দিয়া ইনিসিয়েতিবকী খুদোংচাবা লৌহৌনবা মহাক্না মণিপুরগী নহাশিংদা তকশিনখি। হন্দক্তা লোইশিনখিবা খেলো ইন্দিয়া গেম্সতা মণিপুরগী ফজরবা পর্ফোমেন্স অদুগীদমকশু মহাক্না নুঙাইবা ফোংদোকখি। মল্তি স্পোর্তস কমপ্লেক্স অসিনা ত্রেনিং অমসুং চাংদম্নবদা খুদোং চাবা অদুশু ফংহল্লগনি হায়না মহাক্না ফোংদোকখি।
শান্ন-খোৎনবনা ৱুমেন এমপৱারমেন্তকী পাম্বৈ অমা ওইরকপা ঙমহল্লি হায়বদু মণিপুরনা উৎলরে হায়না প্রধান মন্ত্রীনা ফোংদোকখি। মহাক্না মিরাবাই চনু অমসুং সরিতা দেবী য়াওনা রাজ্যগী মমিং চৎলবা শান্নরোইশিংবু থাগৎপা ফোংদোকখি। ৱুমেন এমপৱারমেন্তকীদমক রাজ্য সরকারনা পায়খৎলিবা অতোপ্পা ইনিসিয়েতিবশিং অদুশু মহাক্না থাগৎপা ফোংদোকখি। মসিগা মরি লৈননা, মহাক্না ঙসি আঙ্গলৱাড়়ী সেন্তর ১০০০ উরেপ উয়ুং তমখিবা অদু পনখি। হন্দক্তা হৌদোকখিবা নেস্নেল ন্যুত্রিসন মিসনগী মতাংদশু মহাক্না ৱা ঙাংখি।
প্রধান মন্ত্রীনা হায়খি মদুদি অৱাং নোংপোক্কীদমক কেন্দ্র সরকারগী ভিজন অসি ‘ত্রান্সফোর্মেশন বাই ত্রান্সপোর্তেশন’ ওইরি। প্রধান মন্ত্রীনা হায়খি মদুদি অৱাং নোংপোক অসি ভারতকী গ্রোথকীদমক অনৌবা ইঞ্জিন অমা ওইবা য়াই । হৌখিবা চহি ৪গী মনুংদা মহাক্না অৱাং নোংপোক লমদমদা ২৫দগী হেন্না লাকখ্রে হায়না মহাক্না ফোংদোকখি।
রিজন অসিদা ইনফ্রাস্ত্রকচর ফগৎহন্নবা কেন্দ্র সরকারনা চাওনা শাফু পীরি হায়না প্রধান মন্ত্রীনা হায়খি।
রিজন অসিদা লম্বী অমসুং রেল কনেক্তিবিতী ফগৎহন্নবা লৌখৎলিবা খোংথাংশিং অদু মহাক্না ফোংদোকখি। রাজ্য সরকারগী সিতিজেন-সেন্ত্রীক ইনিসিয়েতিবশিং অদুদা প্রধান মন্ত্রীনা থাগৎপা ফোংদোকখি। ১৯৪৪গী এপ্রিল থাদা নেতাজী সুভাশ চন্দ্রগী আই এন এনা মণিপুরদা নিং তম্বগী বেঙ্গুল খোংখিবা অদু প্রধানমন্ত্রীনা নৌহৌনা নিংশিংখি। অনৌবা ভারত অমা শেমগৎপদা মণিপুরনা মরুওইবা থৌদাং অমা লৌনবা ৱারেপ লৌরে হায়না মহাক্না ফোংদোকখি।
