নই দিল্লীদা এসিস্তেন্ত সেক্রেতরীশিং (২০১৭ বেচগী আই.এ.এস. ওফিসরশি) ত্রেনিং লোইশিনবগী থৌরম প্রধান মন্ত্রীনরেন্দ্র মোদী শরুক য়াখ্রে।
ওফিসরশিং অদুনা প্রধান মন্ত্রীগী মমাংদা থৌরম কয়া উৎখি। উৎখিবশিং অদুগী পান্দমশিংগী মনুংদা অরোনবা লৈতনা অমসুং য়াংনা থবক পাংথোক্নবা মচিন তুমগৎলক্লিবা জিলাশিংদা পায়খৎলিবা লৈঙাক্কী থবকশিং য়াওখি।
অনৌবা ৱাখল্লোনশিং, অনৌবা থবকশিং অমসুং পান্দমশিংদা থবক পায়খৎনবা প্রধান মন্ত্রীনা ওফিসরশিংগী পুক্নিং থৌগৎখি। মীওই অমনা তোঙান-তোঙানবা মীওইশিংদগী মখোয়গী ৱারোলশিং লৌগদবনি, মদু নৈনগদবনি অমসুং মদুগী মতুংইন্না থবক পাংথোক্কদবনি হায়না প্রধান মন্ত্রীনা হায়খি। মহাক্না ওফিসরশিংদা লেপ্তনা তম্নবা অমসুং খঙনীংবা লৈহন্নবা তকশিনখি।
প্রধান মন্ত্রীনা হায়খি পাংথোক্লিবা থবক অদুগী মাইওন চুমহনবা অসি সিবিল সর্ভেন্ত অমগী মরুওইবনি অমসুং থবক অদু মীচং-মীখাই নাইদনা পাংথোক্কদবনি।
মহাক্না হায়খি সরকারগী স্কিমশিং মপুং ফানা পায়খৎনবা পুন্না থবক তৌমিন্নবা য়াম্না কান্নগনি। এসিস্তেন্ত সেক্রেতরী ওইনা কোর্স মনুংদা ফংখিবা লৌশিং কয়া অদু ওফিসরশিংনা ফজনা শীজিন্নগদবনি।
মখোয়না উৎখিবশিং অদুগীদমক নহা ওইরিবা ওফিসরশিং প্রধান মন্ত্রীনা থাগৎখি অমসুং মখোয়গী তুংগী থৌদাংশিংগীদমক য়াইফ-পাউজেল পীখি। প্রধান মন্ত্রীনা হায়খি, নখোয়না মাইপাকপা অসি লৈবাক্কী ওইনা মরুওইবনি। নখোয়না মাইপাকপনা মীওই কয়াগী পুন্সিদা অহোংবা পুরক্কনি।
