প্রধান মন্ত্রী, শ্রী নরেন্দ্র মোদীনা লুচিংদুনা অনৌবা ভেরিএন্ত ওফ কন্সর্ন (ভি.ও.সি.) ওইরিবা ওমিক্রোন অমসুং কোবিদ-১৯, লাইচৎ অসিবু লাকশিন্নবা কন্তেনমেন্ত অমসুং মেনেজ তৌনবা পব্লিক হেল্থ রেস্পোন্সকী থবক-থৌরমশিং, হিদাক-লাংথক, ওক্সীজেন সিলিন্দর অমসুং কন্সেন্ত্রেতর, ভেন্তিলেতর, পি.এস.এ. প্লান্ত, আই.সি.য়ূ./ওক্সীজেন লৈবা ফমুং, হ্যুমেন রিসোর্স, আই.তি.গী তেংবাংবগী থৌওং অমসুং ভেক্সিন কাপ্পগী হৌজিক্কী ফিভম য়াওনা হকশেলগী ইনফ্রাস্ত্রকচর মপাঙ্গল লৈহন্নবা পায়খৎলিবা থবক-থৌরমশিং য়েংশিনবগী ঙসি অৱাংবা থাক্কী মীফম অমা ফমখ্রে।
ভেক্সিন য়াম্না কাপ্পগী থৌওং লৈবা লৈবাকশিংদা কেস মশিং য়ামখৎলকপা অমসুং ওমিক্রোন ভেরিএন্ত ফংবনা মরম ওইরগা অনৌবা ভেরিএন্ত অসিনা মালেমগী হকশেলগী ফিভমদা ওইহল্লিবা খুদোংচাদবশিংগী মতাংদা পি.এম.গী মফমদা ওফিসিএলশিংনা পাউদমখি। মহাক্কী মফমদা ওমিক্রোন ভেরিএন্তকী মতাংদা দবল্যু.ঐচ.ও.না পীবা তেক্নিকেল পাউতাক অমসুং হান্না পাংথোক্কদবা থৌওংশিংগী মতাংদসু পাউদমখি। কেস মশিং য়াম্না লৈ হায়না পাউদমলকপা রাজ্য, পোজিতিব মশিং য়াম্বা জিলা অমসুং ক্লস্তর মশিং য়াম্বশিং য়াওনা লৈবাক অসিগী হৌজিক ওইরিবা কোবিদ-১৯ অমসুং ওমিক্রোনগী ফিভমসু মহাক্কী মফমদা খঙহনখি। ত্রাভেল হিস্তরী, ভেক্সিন কাপ্পগী স্তেতস অমসুং রিকোভর তৌবগী স্তেতস য়াওনা লৈবাক অসিদা লৈরে খঙলবা ওমিক্রোন কেসশিংগী অকুপ্পা মরোলশিংসু প্রধান মন্ত্রীগী মফমদা লান্থোকখি।
কেন্দ্রগী হকশেল মন্ত্রালয়না নবেম্বর ২৫, ২০২১দা রাজ্যশিংদা খ্বাইদগী অহানবা এদ্ভাইজরী পীবদগী হৌদুনা হৌজিক ফাওবগী মনুংদা পায়খৎলক্লিবা থবক-থৌরমশিংগী মতাংদা পি.এম.দা খঙহনখি। ইন্তর্নেস্নেল পেসেঞ্জরশিংগীদমক্তা নৌনা শেম্লবা ত্রাভেল এদভাইজরী, কোবিদ-১৯ পব্লিক হেল্থ রেস্পোন্সকী থৌওংসিংগী মতাংদা রাজ্য/য়ু.তি.শিংগা পাংথোকখিবা মীফম, ভেক্সিন কাপ্পগী থবক হেনগৎপা, ওক্সীজেন সপ্লাই তৌনবা খুৎলায় খিনবনচিংবা থবক থৌরমশিংগী মতাংদা পি.এম.গী মফমদা খঙহনখি।
ওফিসিএলশিংনা হৌজিক ওইরিবা ফিভমশিংগী অকুপ্পা মরোল তাকখ্রবা তুংদা, প্রধান মন্ত্রীনা ওফিসিএলশিংদা থাক খুদিংমক্তা মিৎকুপ নাহুম হান্নদগী হেন্না শিংনা লৈনবা খঙহনখি। রাজ্যশিংনা কন্তেনমেন্ত অমসুং মেনেজমেন্ত তৌরিবশিংদা ‘হোল ওফ গবর্নমেন্ত’কী থৌরাং মখাদা শৌগৎনবগীদমক্তা কেন্দ্রনা রাজ্যশিংগা নক্ননা থবক তৌমিন্ননবা মহাক্না খঙহনখি। লাইচৎ অসিগা মাইয়োক্ননবা হকথেংনবা, মিৎয়েং চঙবা, পুন্না পাংথোকমিন্নবা অমসুং তেংবাংনবগী কেন্দ্রনা য়াৎলিবা থৌরাং অসিনা ঐখোয়না তুংদা পায়খৎলক্কদবা থবক-থৌরম খুদিংদা লমজিংগদবনি হায়না পি.এম. ওফিসিএলশিংদা পাউতাক পীখি।
ঐখোয়না অনৌবা ভেরিনেত অসিগী মতাংদা খন্থদুনা সতর্ক অমসুং সাবধান ওইনা লৈগদবনি হায়না প্রধান মন্ত্রীনা ফোংদোকখি। লাইচৎ অসিগা লান্থেংবসি হৌজিক লোইদ্রি অমসুং কোবিদতগী তেক্ত-কায়দনা লৈনবা চুনবা লিচৎ-শাজৎ লেপ্তনা ইনবা হায়বসিনা, ঙসিমকসু, ঐখোয়গী খ্বাইদগী মরু ওইবা ইথৌ ওইগদবনি হায়না মহাক্না হায়খি।
অনৌবা ভেরিএন্ত অসিনা ওইহল্লক্লিবা শিংনবশিংবু থেংনবা ঙম্নবগীদমক্তা রাজ্যশিংনা মখোয়গী জিলাশিংদগী হৌদুনা লৈরিবা হকশেলগী ইনফ্রাস্ত্রকচরশিং খুদিংমক মপাঙ্গল হেন্না লৈখৎহন্নবা শোইদনা হোৎননবা পি.এম.না ওফিসিএলশিংদা খঙহনখি। রাজ্যশিংনা ওক্সীজেন পীনবা খুৎলায়শিংবু নীংথিনা খিন্দুনা মথৌ পাংথোকপা ঙমহন্নবা হোৎনবা অসি য়াম্না মরু ওইবনি হায়না মহাক্না ওফিসিএলশিংগী মফমদা খঙহনখি। মহাক্না ওফিসিএলশিংনা রাজ্যশিংগা তোয়না পাউ ফাওনদুনা হ্যুমেন রিসোর্সশিংগী ত্রেনিং অমসুং কেপাসিতী বিলদিং, এম্ব্যুলেন্স মতম চানা ফংহনবা, কোবিদ ফেসিলিতী লৈরিবশিংবু ইন্সতিত্যুস্নেল ক্বারেন্তাইনগীদমক্তা রাজ্যশিংনা শিজিন্নবা ঙম্নবা শেম-শাবগী চাং অমসুং হোম আইসোলেসন্দা লৈরিবশিংবু নীংথিনা য়েংশিনবগী থৌওং য়াওনা হকশেল ইনফ্রাস্ত্রকচরশিংগী তোঙানবা হীরমশিংদা শেম-শাদুনা লৈবগী ফিভম য়েংশিন্নবা খঙহনখি। মহাক্না ওফিসিএলশিংদা তেলি-মেদিসিন অমসুং তেলি-কন্সলতেসনগীদমক্তা আই.তি.গী খুৎলায়শিংবু নীংথিনা শিজিন্ননবা খঙহনখি।
ক্লস্তর অমসুং হোৎস্পোত কয়া থোক্লক্লিবা অসিবু খুদক্তা, হকথেংনবা অমসুং নীংথিনা সর্ভেলিএন্স তৌবগী খুত্থাংদা য়াম্না কুপ্না য়েংশিনবগী থৌওংসু মখা তানা চত্থগদবনি হায়না মহাক্না ফোংদোকখি। পোজিতিব সেম্পল মশিং য়াম্ববু ইন্সাকোগ লেবতা জিনোম সিক্বেন্সিং তৌনবা খুদক্তা থানবসু মহাক্না খঙহনখি। মতম চানা কন্তেনমেন্ত অমসুং লাইয়েংবা ঙম্নবগীদমক্তা কেসশিংবু অথুবা মতমদা খঙদোক্নবগীদমক্তা তেস্তিং তৌবগী থৌওংশিংগী খোঙজেল য়াঙখৎহন্নবা ৱাফমসু প্রধান মন্ত্রীনা থমখি। লাইচৎ অসিনা মখা তানা শন্দোকপা থিংনবগীদমক্তা কন্তেক্ত ত্রেসিং নীংথিনা পাংথোকপদা অহেনবা মিৎয়েং চঙগদবনি হায়না মহাক্না হায়খি। ভেক্সিন কাপ্পগী চাং নেম্বা, কেস মশিং ৱাংখৎলকপা অমসুং হকশেলগী ইনফ্রাস্ত্রকচর মতিক চাদবা রাজ্যশিংদা লৈরিবা ফিভমশিংবু ফগৎহন্নবগীদমক্তা কেন্দ্র সরকারনা রাজ্যশিং অসিদা তেংবাংনবা তীম থানবা ৱাফমসু পি.এম. না ওফিসিএলশিংদা খঙহনখি।
পি.এম.গী মফমদা লৈবাক শিনবা থুংবগী ভেক্সিন কাপ্পগী চাংগী মতাংদসু পাউদমখি। মতিক চাবা মীশিংগী ৮৮%দা কোবিদকী অহানবা দোজ কাপখ্রে অমসুং ৬০% হেনবগী মীশিংদনা অনিশুবা দোজ কাপখ্রে হায়বা ৱাফমসু প্রধান মন্ত্রীগী মফমদা থমখি। মীওই খুদিংদা য়ৌদুনা ভেক্সিন কাপ্নবা য়ুম্থোং খুদিং চৎপগী হর ঘর দস্তক অসিনা মীয়ামদা কোবিদ-১৯ ভেক্সিন কাপহন্নীংবগী ইথিল পীবদা মাই পাক্তুনা ভেক্সিন মশিং য়াম্না কাপ্পা ঙম্বগী মহৈ ফংখি হায়বগী ৱাফমসু ওফিসিএলশিংনা পি.এম.গী মফমদা পাউদমখি। মতিক চাবা মীশিংদা কোবিদ-১৯ ভেক্সিন শোইদনা কাপথোকহন্নবা অমসুং পান্দম অসিবু মীওই অমত্তা চিত্থদনা শোইদনা য়ৌহন্নবা থবক পাংথোক্নবা পি.এম.না রাজ্যশিংগী মফমদা খঙহনখি।
কেবিনেৎ সেক্রেতরী, দাঃ ভি.কে. পাউল; মেম্বর (হেল্থ), নিতি আয়োগ; শ্রী এ.কে. ভল্লা, হোম সেক্রেতরী; শ্রী রাজেশ ভুশন, সেক্রেতরী (এম.ও.ঐচ.এফ.দবল্যু.), সেত্রেতরী (ফার্মাস্যুতিকেল্স); দাঃ রাজেশ গোখলে, সেক্রেতরী (বাইওতেক্নোলোজী); দাঃ বলরাম ভার্গবা, দি.জি. আই.সি.এম.আর.; শ্রী বাইদ্যা রাজেশ কোতেচা, সেক্রেতরী (আয়ুশ); শ্রী দুর্গা শঙ্কর মিশ্রা, সেক্রেতরী (অর্বান দিভেলপমেন্ত); শ্রী আর.এস. শর্মা, সি.ই.ও. এন.ঐচ.এ.; প্রোফঃ কে. বিজয় রাঘবন (প্রিন্সিপাল সাইন্তিফিক এদভাইজর তু গোব. ওফ ইন্দিয়া) অমসুং অতোপ্পা সেনিয়র ওফিসিএলশিংনা মীফম অসিদা শরুক য়াখি।
