ঙসি থাইলেন্দগী বেঙ্কোক্তা প্রধান মন্ত্রী শ্রী নরেন্দ্র মোদী ১৬শুবা অসিয়ান-ইন্দিয়া সমিৎ শরুক য়াখি।
মহাক্কী হৌদোকপগী ৱারোলদা, ১৬শুবা অসিয়ান-ইন্দিয়া সমিৎ শরুক য়াবগীদমক প্রধান মন্ত্রী হরাওবা ফোংদোকখি। খ্বাইদগী ফজবা অমসুং অফবা মওংদা শীন-লাংবগীদমক মহাক্না থাইলেন্দ থাগৎখি অমসুং অসিয়ানগী চেয়র ওইগদৌরিবা অমসুং মথং অসিগী ইস্ত এসিয়া মীফমশিংগীদমক ভিয়েতনামদা য়াইফ-পাউজেল পীজখি।
প্রধান মন্ত্রীনা হায়খি ভারতকী এক্ত ইস্ত পোলিসি অসি ইন্দো-পেসিফিক স্ত্রাতেজিগী য়াম্না মরুওইবা অমনি; অসিয়ান অসি এক্ত ইস্ত পোলিসিগী ময়োন্নি। মপাঙ্গল কনবা অসিয়ান অমনা ভারত্ত কান্নবা পীগনি। কংফাল, সমুদ্র অমসুং নোংথক্কী অমসুং দিজিতেল লিঙ্কগী খুৎথাংদা মরি ফগৎহন্নবা পায়খৎলিবা থবকশিং প্রধান মন্ত্রীনা চাউরাক্না পনখি। মহাক্না হায়খি লম্বী-থোং অমসুং দিজিতেলগী লমদা শম্নবা ফগৎহন্নবা ভারতনা দোল্লর বিল্লিয়ন ১গী ক্রেদিৎ পীরগনি।
মমাং চহিগী কম্মেমোরেতিপ সমিৎ অমসুং শিঙ্গাপুরগী ইনফোরমেল সমিৎতা লৌখিবা ৱারেপশিংনা ভারত অমসুং অসিয়ান নকশিন্নবা হেনগৎহনখিবা অদু প্রধান মন্ত্রীনা ফোংদোকখি। নাকল অনিমক কান্নবা মওংদা ভারত অমসুং অসিয়ানগী মরক্ত মতেং পীনবা হেনগৎহন্নবা ভারতনা পাম্লি অমসুং লৌউ-শিংউ, সাইন্স, রিসর্স, আই সি তি অমসুং ইঞ্জিনিয়ারিংগী লমদা ত্রেনিং পীবা হেনগৎহন্নবা থৌরাং তৌরি।
প্রধান মন্ত্রীনা হায়খি সমুদ্র ঙাক-শেনবা অমসুংব্লু ইকোনোমিদা মতেং পীনবগী থবক হেনগৎহনবা ভারতনা পাম্মী। হন্দক অসিয়ান-ইন্দিয়া এফ তি এ রিভিয়ু তৌখিবা অদু মহাক্না তরাম্না ওক্লদুনা হায়খি মসিনা লৈবাক অনিগী মরক্ত শেন-থুমগী মতেং পাংনবা হেনগৎহল্লগনি।
