পদ্ম বিভুষন পন্দিৎ ছন্নুলাল মিশ্রা জি লৈখিদবদা প্রধান মন্ত্রী শ্রী নরেন্দ্র মোদীনা অৱাবা ফোঙদোকখ্রে।
প্রধান মন্ত্রীনা হায়খি পন্দিৎ ছন্নুলাল মিশ্রা লৈখিদবা অসি ভারতকী ঈশৈগী তাইবংদা মেনশিনবা ঙম্লরোইদবা অৱাৎপা অমা ওইরগনি। পন্দিৎ ছন্নুলাল মিশ্রানা কলা অমসুং নাৎকীদমক মহাক্কী পুন্সি কৎথোকখি অমসুং বারানস ঘারানাগী ঈশৈগী চৎনবীশিং অনৌবা থাকশিংদা পুখৎপদা অচৌবা থৌদাং অমা লৌরমখি।
প্রধান মন্ত্রীনা হায়খি পন্দিৎ ছন্নুলাল মিশ্রানা মহাক্কী খোঞ্জেল অমসুং ঈশৈশিংনা কাসিগী কুহ্মৈ খুদিংমক মপুংফাহল্লমখি। মনিকরনিকা ঘাত্ত য়াওশঙ ওইবা য়াই নত্ত্রগা সাৱনগী থাদা মহাক্কী কাজরি ঈশৈশিং ওইবা য়াই, মহাক্কী ঈশৈনা মতম পুম্নমক্ত কাসি খোন্থাং য়ৈগনি। মালেমগী ফম্বাক্ত খুন্নুঙগী চৎনবীশিংগী মরুওইবা মীয়ামদা শক তাক্নবা হোৎনবদা পন্দিৎ ছন্নুলাল মিশ্রানা লৌখিবা থৌদাংশিং প্রধান মন্ত্রীনা থাগৎপা ফোঙদোকখি।
মহাক্না থেংনখিবা থৌদোকশিংগী মতাংদা, প্রধান মন্ত্রীনা হায়খি মহাক্না পন্দিৎ ছন্নুলাল মিশ্রাগা কয়ারক উনখ্রে অমসুং মহাক্কী থৌজাল ফংখি। ২০১৪ গী মীখলদা পন্দিৎ ছন্নুলাল মিশ্রানা মহাক্কী প্রোপোজর ওইখি। পন্দিৎ ছন্নুলাল মিশ্রানা কাসিগা লৈনবা অচেৎপা থম্মোয়গী মরী অসি তশেংনা অঙকপনি।
প্রধান মন্ত্রীনা মখা তানা হায়খি কাসিগী চাউখৎ-থৌরাং অমসুং চৎনবীশিংগী মতাংদা পন্দিৎ ছন্নুলাল মিশ্রানা মঙোন্দা মমল য়াম্লবা পাউতাকশিং পীখি। মহাত্ম গান্ধীগী ১৫০ শুবা মপোক নুমিত্ত মহাক্না পন্দিৎ ছন্নুলাল মিশ্রানাগী য়ুমদা চৎখিবা অদু নিংশিংলি অমসুং মহাক্না গান্ধী জয়েন্তিদা পাউজেল ইখিবা অদু নিংশিংলি।
প্রধান মন্ত্রীনা হায়খি পন্দিৎ ছন্নুলাল মিশ্রা ঐখোয়গী মরক্ত লৈত্রবসু, ভারত্ত ঈশৈ পামজবা মীওই খুদিংমক মখা তানা পন্দিৎ ছন্নুলাল মিশ্রাগী পুন্সিদগী ইথিল ফংগনি অমসুং থৌরম খুদিংমক্ত মহাক্কী লাইশোন ঈশৈশিংগী খুৎথাংদা কাসিনা মহাক নিংশিংগনি।
পন্দিৎ ছন্নুলাল মিশ্রা জিগী ইমুং-মনুংগী অৱাবদা শরুক য়ারদুনা, প্রধান মন্ত্রীনা হায়খি মখোয়গী ইমুং-মনুংগী অৱাবা অসি ঐ ইশাগী অৱাবনি। পন্দিৎ ছন্নুলাল মিশ্রা জি মহাক্কী খুয়াদা চঙজফম পীনবা অমসুং অৱাবা তানফম অসিদা মহাকপু নুংশিজবশিংগী থৌনা হাপ্নবা বাবা বিশ্বনাথকী মফমদা প্রধান মন্ত্রীনা থৌনিজখি।
