ইতালিয়ন রিপব্লিক্কী মন্ত্রী পরিসদকী প্রসিদেন্ত, জোর্জিয়া মেলোনীনা বর্তন তৌরকপদগী ভারতকী প্রধান মন্ত্রী, শ্রী নরেন্দ্র মোদীনা মে ১৯-২০, ২০২৬তা ইতালিদা ওফিসিএল ভিজিৎ চৎখি। ২০২৪গী জুনদা জি.৭ সম্মিৎকীদমক প্রধান মন্ত্রী মোদীগী ইতালি খোঙচৎ অমসুং ২০২৩দা জি.২০ সম্মিৎকীদমক প্রধান মন্ত্রী মেলোনিগী ভারত খোঙচৎকী মতুংদা লাকখিবা খোঙচৎ অসিনা নাকল অনিগী ওইবা মরীশিংদা অনৌবা ইনোৎ অমা হাপলগনি। লুচিংবা অনিনা ভারত-ইতালিগী মরীশিং অখন্নবা স্ত্রেতেজিক পার্তনরশিপকী থাক্তা পুখৎনবা ৱারেপ লৌখি।
পোলিতিকেল দাইলোগ
প্রধান মন্ত্রী অনিমক্না অৱাংবা থাক্কী এক্সচেঞ্জশিংগী অকনব খোঙজেল অদু নুংঙাইবা ফোংদোকখি অমসুং মল্তিলেতরেল ইভেন্তশিং য়াওনা লুচিংবশিংগী চহিগী ওইবা মীফমশিং পাংথোক্নবা অমসুং মিনিস্তরেল অমসুং ইন্সতিত্যুস্নেলগী থাক্তা চাং নাইনা মীফম পাংথোক্নবা য়ানখি।
নবেম্বর, ২০২৪দা রিও দি জেনেরোদা পাংথোকখিবা জি-২০ সম্মিৎ মনুংদা লুচিংবা অনিমক্না য়ানবা পুরকখিবা জোইন্ত স্ত্রেতেজিক এক্সন প্লান ২০২৫-২০২৯গী তোঙান তোঙানবা য়ুম্বীশিংদা ফংখিবা অওনবা অদু মখোয়না থাগৎখি। মখোয়না ইন্দিয়া-ইতালি জোইন্ত স্ত্রেতেজিক এক্সন প্লান ২০২৫-২৯ য়েংশিন্নবা অমসুং ইন্দিয়া-ইতালি স্পেসিএল স্ত্রেতেজিক পার্তনরশিপতা স্ত্রেতেজিক গাইদেন্স পীনবা ফোরেন মিনিস্তরশিংনা লুচিংবা মেকানিজম অমা লিংখৎনবা য়ানখি।
ইকোনোমিক কোওপরেসন অমসুং ইনভেস্তমেন্তশিং
লুচিংবা অনিনা হৌখিবা চহিদগী অৱাংবা থাক্কী বিজিনেস ফোরম অহুম পাংথোকখিবা অসিদা নাকল অনিগী ওইবা ইকোনোমিক অমসুং ইন্দস্ত্রীএল কোওপরেসনগী হেনগৎলক্লিবা দাইনামিজম অসিদা অপেনবা ফোংদোকখি। ভারতকী খোঙজেল য়াংনা অমসুং লেপ্পা লৈতনা চাউখৎলক্লিবা শেন্মিৎলোন অমসুং ই.য়ু.-ইন্দিয়া ফ্রী ত্রেদ এগ্রীমেন্তগীদমক নেগোসিএসন মাইপাক্না লোইশিনখিবা অদুদা য়ুম্ফম ওইদুনা, মখোয়না ২০২৯ ফাওবদা য়ুরো বিল্লিয়ন ২০ য়ৌনবা পান্দম থমদুনা নাকল অনিগী ওইবা ললোন-ইতিক হেনগৎহন্নবগী অপাম্বা অদু অমুক হন্না ফোংদোকখি।
মখোয়না মরুওইবা সেক্তরশিংদা লৈবাক অনিগী ওইবা ইনভেস্তমেন্ত হেনগৎলকপবু তরাম্না ওকখি অমসুং মরী লৈনবা ইন্দস্ত্রীশিংদা ইন্দস্ত্রীএল অমসুং তেক্নোলোজী পার্তনরশিপ শেমগৎনবা পুক্নিং থৌগৎখি। তেক্সতাইল, ক্লিন তেক্নোলোজী, সেমিকন্দক্তর, ওতোমোতিব, ইনর্জী, তুরিজম, ফার্মাস্যুতিকেল্স অমসুং মেদিকেল তেক্নোলোজী, দিজিতেল তেক্নোলোজী, ক্রিতিকেল রৌ মেতরিএল, স্তীল, পোর্তস অমসুং ইনফ্রাস্ত্রকচরদা হেন্না ইনভেস্তমেন্ত তৌনবগী ওইথোকপা অদু মখোয়না তরাম্না ওকখি। মখোয়না ইন্দস্ত্রীশিংবু লৈবাক অনিমক্তা লৈরিবা পোলিসী ইন্সেন্তিবশিং অমসুং স্কিমশিং শীজিন্ননবা পুক্নিং থৌগৎখি। স্কিমশিং অসিনা বিজিনেস লিঙ্কেজ অমসুং প্রদক্সন ফেসিলিতীশিং হেনগৎহন্নবা হোৎনরি।
স্তোক এক্সচেঞ্জশিং, ইনভেস্তমেন্ত ফন্দশিং, ভেঞ্চর কেপিতেল, বেঙ্কশিং, ইন্সুরেন্স কম্পেনীশিং অমসুং ফাইনান্সিএল ইন্সতিত্যুসনশিংগী মরক্তা ৱারী শানবা অমসুং মতেং পীনবা পুক্নিং থৌগৎনবা প্রধান মন্ত্রী অনিমক্না য়ানখি।
সপ্লাই চেনশিংবু হেন্না চেৎশিলহন্নবা, এস.এম.ই.শিংগী মরক্তা য়াওনা ইন্দস্ত্রীএল পার্তনরশিপশিংবু লায়থোকহন্নবা মখোয়না য়ানখি। মখোয়না লাক্কদৌরিবা থাশিংদা নাকল অনিগী পুক্নিং চিংশিনগদবা মরুওইবা লমশিংদা অনৌবা সেক্তরেল মিসনশিং পুক্নিং থৌগৎখি।
প্রধান মন্ত্রী অনিমক্না ক্রিতিকেল মিনরেলশিংদা তেংবাং পীননবা য়ানা ৱারোলদা খুৎয়েক পীনখিববু তরাম্না ওকখি। মখোয়না সস্তেনেবিলিতী অমসুং রেসিলিয়েন্ত সপ্লাই চেনশিংদা অখন্নবা মীৎয়েং থমদুনা, ক্রিতিকেল মিনরেলশিংগী লমদা পুন্না থবক তৌমিন্ননবগী স্ত্রকচর তৌরবা ফ্রেমৱার্ক অমা শেমদুনা নাকল অনিগী ওইবা মতেং পীনবা মখা তানা মপাঙ্গল কনখৎহন্নবা অমসুং পাকথোক চাউথোকহন্নবা য়ানখি। মখোয়না সর্ক্যুলর ইকোনোমীগী খোঙথাংশিংগী তঙাই ফদবা শরুক অমা ওইনা ইলেক্ত্রোনিক ৱেস্ত অমসুং মাইন স্তেইলিং য়াওনা অরেপ্পা সোর্সশিংদগী মরুওইবা মিনরেলশিং পুশিল্লকপদা পুন্না হোৎনমিন্নবগী মরুওইবা অদু ফোংদোকখি। মখোয়না মরী লৈনবা মন্ত্রালয়শিং অমসুং ইন্সতিত্যুসনশিংগী মরক্তা লৌউ-শিংউ অমসুং এগ্রিকলচরেল রিসর্চকী লমদা তেংবাং পীননবগীদমক মেমোরেন্দম ওফ অন্দর্স্তেন্দিং খুৎয়েক পীনবদা নুংঙাইবা ফোংদোকখি।
কন্নেক্তিবিতী
প্রধান মন্ত্রী অনিমক্না ইন্দিয়া-মিদল ইস্ত-য়ুরোপ ইকোনোমিক কোরিদোর (আই.এম.ই.সি.) দা পুন্না থবক তৌমিন্ননবা মখোয়গী অচেৎপা ফিরেপ অদু অমুক হন্না ফোংদোকখি। মখোয়না মসিগী ত্রান্সফোর্মেস্নেল পোতেন্সিএল অসি গ্লোবেল ত্রেদ, কন্নেক্তিবিতী অমসুং চাউখৎপা অমুক হন্না শাহৌ পীবা অমসুং প্রমোৎ তৌনবা অদু খঙখি। প্রোজেক্ত অসিগী মতাংদা অহানবা খন্ন-নৈনখিবা অদু থাগৎপা ফোংদোক্লদুনা, মখোয়না ২০২৬তা মসিগী খোঙথাং অসি খুমাং চাউশিলহন্নবা কন্ত্রক্তিব খোঙথাংশিং লৌখৎনবা অহানবা আই.এম.ই.সি. মিনিস্তরেল মীফমদা পুক্নিং থৌগৎখি।
মখোয়না মেরিতাইম ত্রান্সপোর্ত অমসুং পোর্তশিংগী মতাংদা এম ও য়ু অমা খুৎয়েক পীনবদা নুংঙাইবা ফোংদোকখি অমসুং এম ও য়ু অসি অথুবা মতমদা ইমপ্লিমেন্ত তৌনবা জোইন্ত ৱার্কিং গ্রুপ অমা শেম্নবা মখোয়গী মন্ত্রালয়শিং/ দিপার্তমেন্তশিংদা খঙহনখি।
সাইন্স, তেক্নোলোজী, ইন্নোবেসন, স্তার্ত-অপশিং অমসুং আর্তিফিসিএল ইন্তেলিজেন্স
অনৌবা পুথোকপা, সাইন্স অমসুং তেক্নোলোজী অসি ইন্দিয়া-ইতালি পার্তনরশিপকী কোর দ্রাইভরশিংনি হায়না প্রধান মন্ত্রী অনিমক্না অমুক হন্না ফোংদোকখি।
মখোয়না ইন্নোবেসন ইকোসিস্তেমশিংগী মরক্তা মতেং পীনবা, স্তার্ত-অপ এক্সিলরেসন প্রোগ্রামশিং, মার্কেত এক্সেস অমসুং বিজিনেস মেৎচিং, জোইন্ত রিসর্চ, য়ুনিভর্সিতী কোলাবোরেসন, অমসুং ফিনতেক, হেল্থকেয়র, সেমিকন্দক্তরশিং, লোজিস্তিক্স অমসুং সপ্লাই চেনশিং, এগ্রিতেক, ইনর্জী, ক্বান্তম কম্প্যুতিং অমসুং আর্তিফিসিএল ইন্তেলিজেন্স য়াওনা সেক্তরশিংদা তেলেন্ত মোবিলিতীবু মপাঙ্গল কনখৎহন্নবা পান্দম থমদুনা ভারত্তা লৈবা ইন্নোবেসন হব অমা ওইরিবা ইন্নোভিৎ ইন্দিয়া লিংখৎনবা লাউথোকখি। লুচিংবা অনিমক্না এপ্রিল ২০২৫দা দিল্লীদা ভারত অমসুং ইতালিগী য়ুনিভর্সিতীশিং অমসুং রিসর্স সেন্তরশিংগী মরক্তা পাংথোকখিবা অহানবা সাইন্স অমসুং ইন্নোবেসন দাইলোগ অদু তরাম্না ওকখি।
লুচিংবা অনিমক্না ইন্নোবেসন অমসুং ইকোনোমিক গ্রোথকী পুক্নিং থৌগৎপা অমা ওইরিবা ওপন, ফ্রী, সেক্যুর, স্তেবল, এক্সেসিবল অমসুং শান্তি লৈবা আই.সি.তি.গী অকোয়বগী ফিভমগী মরুওইবা অদু পনখি। ২০২৬গী ফেব্রুৱারী ১৯দা ন্যু দিল্লীদা পাংথোকখিবা এ.আই. ইম্পেক্ত সম্মিৎতা ইতালিনা কন্সত্রক্তিব ওইনা শরুক য়াখিবগীদমক প্রধান মন্ত্রী মোদীনা প্রধান মন্ত্রী মেলোনিদা থাগৎপা ফোংদোকখি। লুচিংবা অনিমক্না মীওইবদা মীৎয়েং থম্বা, সেক্যুর, থাজবা য়াবা অমসুং মপাঙ্গল লৈবা আর্তিফিসিএল ইন্তেলিজেন্স অমগীদমক মখোয়গী অচেৎপা ফিরেপ অমুক হন্না ফোংদোকখি। মখোয়না অহুমশুবা লৈবাকশিং য়াওনা হীরম অসিদা তেংবাং পীননবা য়ানখি।
প্রধান মন্ত্রী অনিমক্না সুপরকম্প্যুতরগী লমদা তেংবাং পীনবগী খুদোংচাবশিংদা অখন্নবা মীৎয়েং থমখি।
সাইন্তিফিক কোওপরেসনগীদমক ২০২৫-২০২৭ এক্সেক্যুতিব প্রোগ্রামদা য়ুম্ফম ওইদুনা, মখোয়না ক্বান্তম তেক্নোলোজীশিং, রিন্যুএবল ইনর্জী, গ্রীন হায়দ্রোজেন অমসুং সস্তেনেবল ব্লু ইকোনোমীগী লমদা রিসর্চরশিংগী মোবিলিতী ফগৎহন্নবা অমসুং জোইন্ত প্রোজেক্তশিং পায়খৎপদা মতেং পাংখি। মখোয়না সাইন্তিফিক রিসর্চকী লমদা তেংবাং পীননবা মেমোরেন্দম ওফ অন্দর্স্তেন্দিং অমসুং রিসর্চ প্রোজেক্তশিংদা শেল থাদনবগীদমক জোইন্ত কোল অমা হৌদোকপদা নুংঙাইবা ফোংদোকখি।
প্রধান মন্ত্রী অনিমক্না ইন্দিয়ন একাদেমি অমসুং ত্রিস্তেদা লৈবা ইন্তর্নেস্নেল সেন্তর ফোর থিওরেতিকেল ফিজিক্স (আই.সি.তি.পি.) গী মরক্তা মতম শাংনা লৈরক্লবা সাইন্তিফিক কোলাবোরেসন অদু শকখঙখি। ইন্দিয়ন রিসর্চ তৌরিবশিংনা ইতালিগী ত্রিস্তেদা লৈবা সিঙ্ক্রোত্রোন রেদিএসন ফেসিলিতীদা এক্সেস তৌবা ঙম্নবা ইন্দিয়ন দিপার্তমেন্ত ওফ সাইন্স এন্দ তেক্নোলোজী অমসুং ইতালিগী ইলেক্ত্রা সিঙ্ক্রোত্রোন সেন্তরগী মরক্তা লেতর ওফ ইন্তেন্ত অমা খুৎয়েক পীনবদা মখোয়না নুংঙাইবা ফোংদোকখি।
স্পেস
ইতালিয়ন স্পেস এজেন্সী অমসুং ইন্দিয়ন স্পেস রিসর্চ ওর্গনাইজেসনগী মরক্তা হৌজিক ফাওবদা চৎথরিবা তেংবাং পীনবগীদমক থাগৎপা ফোংদোক্লদুনা লুচিংবা অনিনা থিমেতিক এঙ্গেজমেন্ততা মীৎয়েং থমদুনা অমসুং স্পেসকী ইনফ্রাস্ত্রকচরগী এক্সেস অমসুং প্রোতেক্সনদা তেংবাং পীননবা পৃথীবি ওবজর্বেসন, হেলিওফিজিক্স অমসুং স্পেস এক্সপ্লোরেশনদা পার্তনরশিপ মপাঙ্গল কনখৎহন্নবা য়ানখি। মখোয়না মখোয়গী স্পেস ইন্দস্ত্রীগী দেলিগেসনশিংগী হন্দক পাংথোকখিবা মরী লৈনবা খোঙচৎশিং অদুদা নুংঙাইবা ফোংদোকখি অমসুং অহুমশুবা লৈবাকশিংদসু এক্সপর্তশিংগী একচেঞ্জ অমসুং জোইন্ত ইনিসিএতিবশিংগী খুত্থাংদা কম্মর্সিএল কোলাবোরেসন মখা তানা প্রমোৎ তৌনবা থাজবা ফোংদোকখি।
ঙাকশেল
প্রধান মন্ত্রী অনিমক্না মিনিস্তরেল একচেঞ্জ, সর্বিস-তু-সর্বিস লিঙ্কশিং, পোর্ত ভিজিৎ য়াওনা দিফেন্স কোওপরেসন হেন্না চেৎশিল্লকপদা নুংঙাইবা ফোংদোকখি। তেক্নোলোজিকেল কোওপরেসন, কো-প্রদক্সন অমসুং কো-দিবেলপমেন্ত প্রোজেক্তশিং, হেলিকোপ্তরশিং, নেভেল প্লেৎফোর্মশিং, মেরিন আর্মামেন্ত অমসুং ইলেক্ত্রোনিক ৱারফেয়র য়াওনা পার্তনরশিপশিং প্রমোৎ তৌনবা জোইন্ত দিক্লারেসন ওফ ইন্তেন্ত অমসুং দিফেন্স ইন্দস্ত্রিএল রোদমেপ অমা এদোপ্ত তৌবদা মখোয়না তরাম্না ওকখি। মখোয়না ইন্দস্ত্রীএল রেসিলিয়েন্সকী মপাঙ্গল কনখৎহন্দুনা ক্রিতিকেল ইনফ্রাস্ত্রকচরশিং অমসুং মখোয়গা মরী লৈনবা সপ্লাই চেনশিংবু ঙাকথোক্নবগী মরুওইবা অদুসু খঙখি।
মায়কৈ অনিমক্না জোইন্ত দিফেন্স কম্মিতী অমসুং মিলিতরী কোওপরেসন গ্রুপকী থবকশিং মপুং ফাহন্নবগীদমক চহিগী ওইবা অৱাংবা থাক্কী মিলিতরী স্ত্রকচর দাইলোগ অমা লিংখৎপগী ওইথোকপা য়াবশিং য়েংশিন্নবা অমসুং জোইন্ত এক্সরসাইজশিং অমসুং ইন্তর-ফোর্স কোর্সশিং প্রমোৎ তৌনবা য়ানখি।
লুচিংবা অনিনা মেরিতাইম সেক্যুরিতীদা মতেং পীনবা হেনগৎহন্নবা অমসুং মেরিতাইম দোমেনদা ইনফোর্মেসন অমসুং খ্বাইদগী ফবা থৌওংশিং এক্সচেঞ্জ তৌনবগী পান্দমদা মেরিতাইম সেক্যুরিতীদা দাইলোগ অমা হৌদোক্নবা য়ানখি।
সেক্যুরিতী
লুচিংবা অনিনা তেরোরিজম অমসুং হিংসাগী ওইবা এক্সত্রিমিজমবু মসিগী মওং অমসুং মওং খুদিংমক্তা, ঙমখৈ লান্থোকপা তেরোরিজম য়াওনা অকনবা মওংদা য়ানিংদবা ফোংদোকখি। লুচিংবা অনিমক্না এপ্রিল ২০২৫দা পাহলগামদা থোকখিবা তেরোরিস্ত এতেক অদু কন্না য়ানিংদবা ফোংদোকখি অমসুং তেরোরিস্তশিং অমসুং তেরোরিস্ত গ্রুপশিং অমসুং মখোয়গা মরী লৈনবা মীওইশিং, য়ু.এন. সেক্যুরিতী কাউন্সিলগী ১২৬৭ সেঙ্কসন রিজিমদা য়াওরিবশিং অদু থেংনবদা মতেং পীননবা মখোয়গী অচেৎপা ফিরেপ অদু অমুক হন্না ফোংদোকখি। ফাইনান্সিএল এক্সন টাস্ক ফোর্সকী গাইদলাইনশিংগা চুনবা মওংদা তেরোরিস্ত সেফ হেভেনশিং অমসুং ইনফ্রাস্ত্রকচরশিং মুত্থৎনবা, তেরোরিস্ত নেটৱার্কশিং থিংনবা অমসুং তেরোরিস্তকী শেল থাদবা থেংননবা লৈবাক পুম্নমক্না মখা তানা থবক তৌনবা মখোয়না হায়খি। লুচিংবা অনিমক্না য়ু.এন., এফ.এ.তি.এফ. অমসুং অতোপ্পা মল্তিলেতরেল প্লেৎফোর্মশিংদা পুন্না থবক তৌমিন্নবগী মখোয়গী ফিরেপ অদু অমুক হন্না ফোংদোকখি।
লুচিংবা অনিনা তেরোরিজম ফাইনান্সিং থেংননবা ভারত অমসুং ইতালিগী মরক্তা পর্মনেন্ত টাস্ক ফোর্সকী অহানবা মীফম অমসুং তেরোরিজম থেংননবা জোইন্ত ৱার্কিং গ্রুপকী লাক্কদৌরিবা মীফম অদু তরাম্না ওকখি।
লুচিংবা অনিমক্না ইতালিয়ন গার্দিয়া দি ফাইনান্সা অমসুং ভারতকী এনফোর্সমেন্ত দাইরেক্তোরেতকী মরক্তা এম ও য়ু অমা লোইশিনখিবদা নুংঙাইবা ফোংদোকখি অমসুং ক্লাসিফাইদ ইনফোর্মেসন একচেঞ্জ অমসুং ম্যুচুএল প্রোতেক্সনগী মতাংদা এগ্রীমেন্ত অমসুং পুলিস কোওপরেসন মপাঙ্গল কনখৎহন্নবা এগ্রীমেন্ত অথুবা মতমদা লোইশিনবগীদমক থাজবা থমখি। এক্সত্রাদিসন ত্রেৎ অমসুং ম্যুচেল লিগেল এসিস্তেন্স ত্রেৎ য়াওনা অতোপ্পা এগ্রীমেন্তশিংগী মতাংদা হৌজিক চত্থরিবা খন্ন-নৈনবশিংদুসু মখোয়না তরাম্না ওকখি।
মাইগ্রেসন অমসুং মোবিলিতী
লুচিংবা অনিনা মহৈরোইশিং, রিসর্চ তৌবা মীওইশিং অমসুং স্কিল লৈরবা শিন্মীশিং, মরুওইনা এস.তি.এম. সেক্তরশিংদা চৎথোক-চৎশিন তৌবা হেনগৎনবা অমসুং ভারতদগী ইতালিদা নর্সশিং চৎথোক-চৎশিন তৌবদা মতেং পাংনবা অখন্নবা জোইন্ত দিক্লারেসন ওফ ইন্তেন্ত য়াওনা লেবর মার্কেতকী মথৌ তাবশিংগা চুনবা মওংদা স্কিল দিবেলপমেন্তদা মতেং পীনবা হেনগৎনবা য়ানখি। মতাং অসিদা, মখোয়না সোসিএল সেক্যুরিতী এগ্রীমেন্ত (এস.এস.এ.) গী মতাংদা মরী লৈনবা এজেন্সীশিংগী মরক্তা হৌজিক চত্থরিবা খন্ন-নৈনবশিংবু তরাম্না ওকখি।
মখোয়না "আই.সি.আই. - ইতালি কোল্স ইন্দিয়া: য়ুনিভর্সিতী-এন্তরপ্রাইজ তেলেন্ত ব্রিজ" হৌদোকপবু তরাম্না ওকখি। মসিগী পান্দমদি ইতালিগী য়ুনিভর্সিতীশিংদা মিং চনখ্রবা ভারতকী মহৈরোইশিংগী তেলেন্ত হেনগৎহন্নবা অমসুং ইতালিগী ইন্তরপ্রাইজশিংদা লমজিং-লমতাকপী, মান্নবা অমসুং মতিক চাবা ইন্তিগ্রেসনগীদমক্তা অকনবা লম্বীশিং পীবনি।
মখোয়না সেফ অমসুং লিগেল মাইগ্রেসন ফংহন্নবগীদমক আইন্না য়াদবা মাইগ্রেসন, লেবর এক্সপ্লোইতেসন অমসুং মীওইবগী ত্রাফিকিং থেংননবা মতেং পীনবা হেনগৎহনবগী ওইথোকপা অদুসু খন্নখি।
কলচরেল অমসুং এজুকেস্নেল একচেঞ্জশিং
লুচিংবা অনিনা লৈবাক অনিগী মরক্তা চৎন-কাঙলোনবু মরুওইবা য়ুম্বী অমা ওইনা থমখি অমসুং লোথালদা লৈবা নেস্নেল মেরিতাইম হেরিতেজ কমপ্লেক্স শেমগৎপদা ইতালিনা শরুক য়াবগী মতাংদা য়ানা ৱারোল অমা খুৎয়েক পীনবদা নুংঙাইবা ফোংদোকখি। মখোয়না ২০২৬তা পাংথোক্কদৌরিবা ভেনিস আর্ত বাইনেলেদা ইন্দিয়ন নেস্নেল পেভিলিয়নবু শকখঙখি। মখোয়না ২০২৭ অসি "ইতালি অমসুং ভারতকী মরক্তা কলচর অমসুং তুরিজমগী চহি" ওইনা পাংথোক্নবা মখোয়গী অপাম্বা ফোঙদোকখি। মসিদা ইতালি অমসুং ভারতকী মরক্তা লৈবা অরিবা মতমগী কলচরগী মরীশিংদা মরুওইবা একজিবিসন অমা কলচরগী মন্ত্রালয় অনিনা পুন্না শীন-লাংদুনা পাংথোক্নবা লম্বী য়াৎলগনি।
লুচিংবা অনিমক্না ইথিলিয়া-ইন্দিয়া কলচরেল ফোরম অমা ইন্সতিত্যুসনশিং, এক্সপর্তশিং অমসুং ক্রিয়েতিব ইন্দস্ত্রীশিংগী মীহুৎশিং পুনশিন্নবা থৌগৎখি। লুচিংবা অনিনা কলচরেল হেরিতেজ ঙাক-শেনবা, হেনগৎহনবা অমসুং মেনেজমেন্তদা মতেং পীনবা হেনগৎহন্নবা পান্দম থমদুনা য়ুনেস্কোগী ৱার্ল্দ হেরিতেজ লিস্ততা য়াওরিবা ভারত অমসুং ইতালিগী মফমশিংগী মরক্তা ত্বিনিং প্রোগ্রাম হৌদোকপগীদমক থাগৎপা ফোংদোকখি।
লুচিংবা অনিনা লৈবাক অনিগী মরক্তা ফিল্ম অমসুং ওদিও-ভিজুএল কোওপরেসন মখা তানা চাউখৎহন্নবা য়ানখি। মখোয়না মখোয়গী ইন্দস্ত্রীশিংগী মপাঙ্গল অমসুং ইন্নোবেতিব কেপাসিতী অমসুং বাইলেতরেল কো-প্রদক্সন এগ্রীমেন্তনা পীরিবা লিগেল ফ্রেমৱার্ক অদুদা য়ুম্ফম ওইদুনা থবক পায়খৎখি।
প্রধান মন্ত্রী অনিমক্না হায়র এজুকেসনগী লমদা তেংবাং পীনবা হেনগৎহন্নবা মখোয়গী অপাম্বা অদু অমুক হন্না ফোংদোকখি অমসুং হায়র এজুকেসন অমসুং রিসর্সকী ইন্দো-ইতালিয়ন রোদমেপ চৎনহনবদা তরাম্না ওকখি। প্রধান মন্ত্রী মোদীনা ইতালিয়ন য়ুনিভর্সিতীশিং অমসুং ইন্সতিত্যুসনশিংবু ভারতকী অনৌবা এজুকেসন পোলিসীগী মখাদা ভারত্তা কেম্পসশিং হাংনবা কৌখি।
ভারত-ই.য়ু.গী মরীশিং
লুচিংবশিংনা ২০২৬গী জনুৱারী ২৭তা ইন্দিয়া-ই.য়ু. সম্মিৎতা য়ানখিবা অনৌবা জোইন্ত ইন্দিয়া-ই.য়ু. কম্প্রিহেন্সিব স্ত্রেতেজিক এজেন্দা অমসুং ইন্দিয়া-ই.য়ু. ফ্রী ত্রেদ এগ্রীমেন্তগী ৱারী শানবগী ৱারোইশিনবু তরাম্না ওকখি। মসিনা কৈথেলগী খুদোংচাবা হেনগৎহন্দুনা, ললোন-ইতিক্কী অথিংবা হন্থহন্দুনা অমসুং দাইভর্সিফাইদ ভেল্যু চেন অমসুং অনৌবা কৈথেলগী খুদোংচাবশিংগী খুত্থাংদা শেন্মিৎলোনগী সেক্যুরিতী অমসুং রেসিলিয়েন্স মপাঙ্গল কনখৎহন্দুনা মরী অসি অনৌবা থাক অমদা পুখৎকনি।
ভারত-ই.য়ু. ত্রেদ অমসুং তেক্নোলোজী কাউন্সিলবু ত্রেদ, ক্রিতিকেল তেক্নোলোজী অমসুং ইকোনোমিক সেক্যুরিতীদা মতেং পীনবগী মরুওইবা প্লেৎফোর্ম অমা ওইনা মপাঙ্গল কনখৎহন্নবা মখোয়না মখোয়গী মতেং অমুক হন্না ফোংদোকখি। লুচিংবশিংনা ইন্দিয়া-ই.য়ু.গী সেক্যুরিতী অমসুং দিফেন্স পার্তনরশিপপু তরাম্না ওকখি অমসুং মোবিলিতীগীদমক কমপ্রিহেন্সিব ফ্রেমৱার্ক অমগী এম.ও.য়ু. য়াওনা মোবিলিতী কোওপরেসনদা খুমাং চাউশিল্লকপগীদমক থাগৎপা ফোংদোকখি।
মল্তিলেতরেল কোওপরেসন
লুচিংবা অনিমক্না য়ুনাইতেদ নেসন্সপু হেন্না রিপ্রজেন্তেতিব ওইহন্নবা অমসুং হৌজিক্কী ওইরিবা ফিভমগা চান্নবা মওংদা শেমদোকপগী তঙাইফদবা অদুদা অকনবা ৱাফম থমখি।
লুচিংবা অনিমক্না য়ুনাইতেদ নেসন্স অমসুং জি.২০ য়াওনা অতোপ্পা মালেমগী প্লেতফোর্মশিংদা পুন্না থবক তৌমিন্নবগী মরুওইবা অদু মল্তিলেতরেলিজম ঙাক্নবা অমসুং রুলশিংদা য়ুম্ফম ওইবা মালেমগী ওইবা কাংলোন অমা ঙাক্নবা ফোংদোকখি।
লৈবাক অনিমক্না অফ্রিকাদা পীরিবা স্ত্রেতেজিক প্রাইওরিতি অদু খঙলদুনা, প্রধান মন্ত্রী অনিমক্না অফ্রিকাদা ভারতকী দিবেলপমেন্ত পার্তনরশিপ অমসুং ইতালিগী মাত্তে প্লানগী মতুং ইন্না দিজিতেল পব্লিক ইনফ্রাস্ত্রকচর (দি.পি.আই.), এগ্রিকলচর, এজুকেসন, হেল্থকেয়র, আর্তিফিসিএল ইন্তেলিজেন্স, কন্নেক্তিবিতী অমসুং ইনফ্রাস্ত্রকচর অমসুং রিন্যুএবল ইনর্জীগুম্বা লমশিংদা অফ্রিকাগী পার্তনরশিংগা লোয়ননা ত্রিলেতরেল ইনিসিয়েতিবশিংদা পুন্না থবক তৌমিন্ননবা য়ানখি।
লুচিংবশিংনা য়ু.এন.সি.এল.ও.এস. য়াওনা মালেমগী আইনগী মতুং ইন্না ইন্দো-পেসিফিক লমদম অসি ফ্রী, ওপন, শান্তি লৈবা অমসুং চাউখৎপা ওইহন্নবগীদমক মখোয়না শরুক য়ামিন্নবা অদু অমুক হন্না ফোংদোক্নখি। মখোয়না সাইন্স অমসুং তেক্নোলোজী অমসুং ইন্দো-পেসিফিক ওসিন ইনিসিএতিবশিংগী একাদমিক কোওপরেসন পিল্লরদা মখোয়গী মখা তানা পার্তনরশিপ তৌনবগীদমক থাজবা থম্লি।
লুচিংবা অনিমক্না নোংচুপ এসিয়া/মিদল ইস্ততা ওইরিবা ফীভম অমসুং লমদম অসিদা অমসুং মালেমগী অতৈ মফমশিংদা মসিনা পীরিবা শাফুদা অৱাবা ফোংদোক্নখি। লুচিংবশিংনা ২০২৬কী এপ্রিল ৮দা লাউথোকখিবা লান থিংবা অদু তরাম্না ওকখি অমসুং নোংচুপ এসিয়া/মিদল ইস্ত লমদমদা মতম শাংনা শান্তি লৈহন্নবগীদমক এস্কেলেসন হন্থহনবা, ৱারী শানবা অমসুং দিপ্লোমেসীগী মরুওইবা অদু ফোংদোকখি। মখোয়না নেভিগেসনগী নীংতম্বা অমসুং স্ত্রেত ওফ হোর্মজকী থোংদা মালেমগী ওইবা ফ্লোশিং অমুক হন্না হৌহন্নবা হায়খি।
লুচিংবা অনিমক্না য়ুক্রেনদা চত্থরিবা লানগী মরমদা নুংনাংবা ফোংদোকখি। মসিনা মীওইবা কয়াদা অৱাবা কয়া মায়োক্নহল্লি অমসুং মালেম পুম্বদা অৱাবা কয়া মায়োক্নহল্লি। মখোয়না ইন্তর্নেস্নেল লো অমসুং য়ু.এন. চার্তরগী প্রিন্সিপলশিংগী মতুং ইন্না দাইলোগ অমসুং দিপ্লোমেসীগী খুত্থাংদা য়ুক্রেনদা মপুং ফাবা, অচুম্বা অমসুং তুং কোইবা শান্তি অমা পুরক্নবা হোৎনরিবা অসিদা মখা তানা মতেং পাংনবা য়ানখি।
ৱারোইশিন
ভারত-ইতালিগী অখন্নবা স্ত্রেতেজিক পার্তনরশিপ চাউখৎলকপা অমসুং হেন্না চেৎশিল্লক্লিবা অদু পল্লদুনা লুচিংবা অনিনা সেক্তর খুদিংমক্তা মতেং পীনবা মখা তানা হেনগৎহন্নবা অমসুং মরুওইবা মালেমগী অমসুং লমদমগী ওইবা চাউখৎ থৌরাংশিংদা অৱাংবা থাক্কী খন্ন-নৈনবশিং মখা তানা চৎথনবা মখোয়গী অচেৎপা ফিরেপ অদু অমুক হন্না ফোংদোক্নখি।
প্রধান মন্ত্রী মোদীনা প্রধান মন্ত্রী মেলোনীবু ইতালিয়ন রিপব্লিক্কী সরকার অমসুং মীয়ামনা মীয়োক মীচান ফাবা মতৌগীদমক থাগৎপা ফোংদোকখি অমসুং মহাক্না প্রধান মন্ত্রী মেলোনীবু নাকল অনিমক্না খুদোংচাগদবা মতম অমদা ভারত্তা লাক্নবা বর্তন তৌখি।
