কেরলাগী রাজ্যপাল শ্রীমান আরিদ মোহম্মদ খান, মুখ্য মন্ত্রী শ্রীমান পিনারাই বিজয়নজী, কেরলা সরকারগী মন্ত্রীশিং, অতোপ্পা দিগনিতীশিং, কোচীগী ঐহাক্কী ইচিল-ইনাওশিং!
ঙসি কেরলাগী কাচিন-কোয়া খুদিংমক ওনামগী শেংলবা কুহ্মৈগী নুংঙাইবনা থল্লি। য়াইফরবা থৌরম অসিদা কেরলাদা লুপা করোর ৪৬০০ হেবগী কন্নেক্তিবিতী প্রোজেক্তশিং খুদোল তমজরি। ইজ ওফ লিবিং অমসুং ইজ ওফ দুইং বিজিনেসতা শাহৌ পীগদৌরিবা ইনফ্রাস্ত্রকচর অসিগীদমক ঐহাক্না ময়ামদা নুংঙাইবা ফোঙদোকচরি।
ভারত মচাশিংনা আজাদী কা অমৃত কালগী লাক্কদৌরিবা চহি ২৫ অসিদা চাউখৎপা ভারত অমা ওইহন্নবা অচৌবা ফিরেপ অমা লৌখি। ঙসি কেরলাগী অথোইবা লমদম অসিদগী চাউখৎপা ভারত অমা ওইনবগী মাইকৈদা অচৌবা খোঙথাং অমসু থাংলি।
মরুপশিং,
ঐহাক্না ২০১৭কী জুনদা কোচী মেত্রোগী অলুবাদগী পলারীবত্তোম সেক্সন শঙ্গাবগী খুদোংচাবা ফংজখিবা অদু নীংশিংলি। ঙসি কোচী মেত্রোগী ফেস I এক্সতেন্সন অসি শঙ্গারি অমসুং কোচী মেত্রোগী অনিশুবা ফেসকী উরেপ-উয়ুং তম্লি। কোচী মেত্রোগী অনিশুবা ফেস অসি জে.এল.এন. স্তদিয়মদগী ইনফোপার্ক ফাওবা চেনগনি। এস.ই.জেৎ অসিনা কোচী স্মার্ত সিতীবু কক্কানারাগা শম্নহনগনি। কোচী মেত্রোনা নহারোলশিং অমসুং প্রোফেস্নেলশিংগীদমক্তা খুদোংচাবা অমা ওইরগনি।
কোচীদা লৈবাক পুম্বগী অর্বান দিবেলপমেন্ত, ত্রান্সপোর্ত দিবেলপমেন্তগী অনৌবা মাইকৈদা থবক পাইখৎলি। কোচীদা য়ুনিফাইদ মেত্রোপোলিতেন ত্রান্সপোর্ত ওথোরিতী ইমপ্লিমেন্ত তৌখি। ওথোরিতী অসিনা মেত্রো, বস, ৱাতরৱেজ অসিনচিংবা চৎথোক-চৎশিনগী পাম্বৈ পুম্নমক ইন্তিগ্রেৎ তৌনবা থবক পাইখৎলি।
মলতিমোদেল কন্নেক্তিবিতীগী মোদেল অসিগা লোয়ননা কোচীগী সহর অসিদা হকথেংননা কান্নবা অহুম পীরগনি। মসিনা সহর অসিগী মীয়ামগী চৎথোক-চৎশিন তৌবগী মতমদা হন্থহল্লগনি, লম্বীশিংদা ত্রাফিক হন্থহল্লগনি অমসুং সহর অসিদা পোলুসন হন্থহল্লগনি। অকোইবগী ফীভম ঙাকশেন্নবা ভারতনা নেৎ জিরোগী অচৌবা ৱাশক অমা লৌখি, মসিনসু হায়রিবশিং অসিদা মতেং পাংলগনি। মসিনা কার্বোন ফুতপ্রিন্ত হন্থহল্লগনি।
হৌখিবা চহি নিপান্দা কেন্দ্র সরকারনা মেত্রোবু অর্বান ত্রান্সপোর্তকী খ্বাইদগী মাংজিল থারিবা পাম্বৈ অমা ওইহন্নবা লেপ্পা লৈতনা থবক পাইখৎতুনা লাকখি। কেন্দ্র সরকারনা রাজ্য অসিগী অতোপ্পা অচৌবা সহরশিংদা মেত্রো য়ৌহনখি অমসুং মসি কেপিতল খক্তদা লৈবা ওইহনখিদে। ঐখোয়গী লৈবাক অসগী অহানবা মেত্রো অসি চহি ৪০ চেল্লকখি অমসুং অকোনবগী চহি ৩০দা শুপ্নগী মেত্রো রুত কিমি ২৫০ খক্তা হাপচিনখি। হৌখিবা চহি ৮দা পাইখৎখিবা থবক অদুগী মতাংদা প্রধান মন্ত্রীনা হায়খি মদুদি লৈবাক অসিদা মেত্রো রুত কিমি ৫০০ হেন্না হাপচিনখি অমসুং কিমি ১০০০ হেনবগী অনৌবা রুতকী থবক খোঙজেল য়াংনা পাইখৎলি।
ঐখোয়না ইন্দিয়ন রেলৱেজপু মপুং ফানা অহোংবা পুরকখি। ঙসি লৈবাক অসিদা লৈরিবা রেলৱে স্তেসনশিং অসি এয়রপোর্তগুম্না শেমজিল্লি। ঙসি কেরলাদা খুদোল তমখিবা প্রোজেক্তশিং অসিগী মরক্তা কেরলাগী মরু ওইবা রেলৱে স্তেসন ৩ নৌনা শেমগৎনবা অমসুং মখোয়বু মালেমগী থাক্তা শেমগৎনবা অনৌবা থৌরাং অমসু পাইখৎলি। ইরনাকুমল তাউন স্তেসন, ইর্নাকুলম জঙ্কসন অমসুং কোল্লম স্তেসন্দা হৌজিক মোদর্ন ফেসিলিতীশিং শেমগৎলগনি।
কেরলাগী রেল কন্নেক্তিবিতীনা ঙসি অনৌবা মাইপাকপগী পন্দুপ অমা হৌবা ঙম্লে। তিরুবনন্তপুরমগী মেগুলুরু ফাওবগী রেল রুত পুম্নমক দব্লিং তৌখ্রে। মসিনা লমকোইবশিং লোয়ননা কেরলাগী ভক্তাশিংদা চাউনা কান্নবা পীরগনি। এত্তুমনুর-চিঙ্গাবনম-কোত্তায়ম ত্রেক দব্লিং তৌবা অসিনা ভগৱান অয়প্পা দর্শন তৌবা লাকপদা চাউনা মতেং পাংলগনি। মসি ভক্তা কয়ানা মতম শাংনা দিমান্দ তৌদুনা লাক্লবা ৱাফমনি, মসি হৌজিক্তি থুংহনবা ঙম্লে। মসি লৈবাক অমসুং মালেম শিনবা থুংবদগী লাইফমলেন অসি লাকপা পাম্বা সবরীমালাগী ভক্তাশিংগী ওইনা মসি নুংঙাইরবা মীলুপ অমনি। কোল্লম-পুনলুর সেক্সন ইলেক্ত্রিফিকেসন তৌবনা পোলুসন-ফ্রী ওইহল্লগনি, লমদম অসিদা রেলদা চৎথোক-চৎশিন তৌবদা খোঙজেল য়াংশিলহল্লগনি। মসিনা লমদম অসিগী মীয়ামদা খুদোংচাবা ফংহনবগা লোয়ননা মমিং লৈরবা লমকোইবশিংগী লমথুংফম অসিদা মীৎয়েং চংবা হেনগৎলগনি। কেরলাদা হৌজিক লুপা করোর লাখ ১রোমগী তোঙান-তোঙানবা ইনফ্রাস্ত্রকচর প্রোজেক্তশিং পাইখৎলি। লৌউ-শিংউদগী ইন্দস্ত্রীশিং ফাওবা মোদর্ন ইনফ্রাস্ত্রকচরনা কেরলাদা অনৌবা থবক্কী খুদোংচাবশিং পীরগনি অমসুং শাহৌ পীরগনি।
কেন্দ্র সরকারনা কেরলাগী কন্নেক্তিবিতীদা চাউনা মীৎয়েং চংলি। ঐখোয়গী সরকারনা কেরলাগী লাইফলাইন হায়না খঙনরিবা, এন.ঐচ. ৬৬ অসি অওনবা পুরক্তুনা লেন ৬তা ওন্থোকখি। মসিদা লুপা করোর লিশিং ৫৫ হেন্না চংখি। তুরিজম অমসুং ললোন-ইতিক্না মতমগা চুনবা অমসুং হেন্না ফবা ইনফ্রাস্ত্রকচরদগী চাউনা কান্নবা ফংখি। তুরিজম অসি লায়রবা, মিদল ক্লাস, খুঙ্গং, সহর, মীপুম খুদিংমক্না য়াওরিবা, মীপুম খুদিংমক্না শেল তাল্লিবা ইন্দস্ত্রী অমনি। অমৃত কালদা তুরিজম চাউখৎপনা লৈবাক্কী চাউখৎ-থৌরাংদা চাউনা শরুক তমদুনা মতেং পাংগনি।
কেন্দ্র সরকারনা তুরিজম সেক্তরদা লৈরিবা ওন্তপ্রিনোরশিপ থৌগৎনবগীদমক তোঙান-তোঙানবা ইন্সেন্তিবশিং পীরি। মুদ্রা স্কিমনা লুপা লাখ ১০ ফাওবগী অমসুং গরেন্তী অমত্তা য়াওদনা লায়রবশিংগী মতেং পাংলি। স্কিম অসিগী মখাদা কেরলাদা তেংবাং ওইনা অপীকপা ওন্তপ্রিনোর লাখ কয়াদা লুপা করোর লিশিং ৭০ হেন্না পীথখি। মখোয় কয়া অদি তুরিজম সেক্তরদা ওইখি।
কেরলাগী অখন্নবা মগুন অসি, মফম অসিগী মীয়ামগী অখন্নবা মগুন অসি মফম অসিগী খুন্নাইগী পুন্সিরোলদা য়েংশিনবা অমসুং খনবিবা হায়বা অসিনা ওইদুনা লাকখি। নুমিৎ খরনিগী মমাংদা ঐহাক্না হরিয়ানাদা মা অমৃতানন্দময়ীজীগী অমৃতা হোস্পিতাল শঙ্গাবগী খুদোংচাবা ফংজখি। মীনুংশিনা থনবা অমৃতানন্দময়ী অম্মাগী থৌজালশিংসু ঐহাক্না ফংজখি। ঙসি ঐহাক্না কেরলাগী লমদম অসিদগী অমুক হন্না তৌবীমল খঙবা উৎচরি।
মরুপশিং ঐখোয়গী সরকারনা সবকা সাথ, সবকা বিকাস, সবকা বিশ্বাস অমসুং সবকা প্রয়াসকী তঙাই ফবা লাইৱা অসিদা য়ুম্ফম ওইরগা লৈবাক অসিবু চাউখৎহল্লি। অমৃত কালদা চাউখৎপা ভারতকী চাংশিল্লিবা লম্বেল অসি মপাঙ্গল কনখৎহন্নবা ঐখোয়না পুন্না ৱাশক লৌরসি। মসিগা লোয়ননা ঐহাক্না দিবেলপমেন্ত প্রোজেক্তশিং অসিগীদমক ময়ামদা অমুক হন্না নুংঙাইবা ফোঙদোকচরি। অমুক হন্না ময়াম্না ওনমগী য়াইফ পাউজেল পীজরি।
হন্না-হন্না থাগৎচরি!
