হন্দক্তা পাংথোকখিবা মীখলদা মায় পাক্লকপদা ঙসি প্রধান মন্ত্রী শ্রী নরেন্দ্র মোদীবু রিপব্লিক ওফ কোরিয়াগী রাস্ত্রপতি শ্রী মুন জে-ইন, জিম্বাৱেগী রাস্ত্রপতি শ্রী ই.দি. মন্নগাগৱা, অমসুং মোজেম্বিক্কী রাস্ত্রপতি শ্রী ফিলিপ জেসিন্তো ন্যুসিনা তেলিফোন তৌরক্তুনা নুংঙাইবা ফোংদোকখ্রে।
প্রধান মন্ত্রীনা রিপব্লিক ওফ কোরিয়াগী রাস্ত্রপতিবু তেলিফোন তৌরক্তুনা নুংঙাইবা ফোংদোরকপগীদমক থাগৎপা ফোংদোকখি। প্রধান মন্ত্রীনা হন্দক্তা ২০১৯গী ফেব্রুৱারী থাদা রিপব্লিক ওফ কোরিয়াদা চৎখিবা মহাক্কী খোংচৎ অদু নৌহৌনা নীংশিংখি। দীপোৎসব কুমহৈ য়াওনবগীদমক ২০১৮দা ফার্সত লেদী কিম্না ভারত্তা লাকখিবা অদুসু প্রধান মন্ত্রীনা নৌহৌনা নীংশিংখি অমদি খোংচৎ অদুনা ভারত অমসুং রিপব্লিক ওফ কোরিয়াগী মরীদা অনৌবা পন্দুপ অমা হাপচিল্লে হায়না ফোংদোকখি। প্রধান মন্ত্রীনা লৈবাক অনিগী মরক্তা অখন্নবা স্ত্রাতেজিক পার্তনরশিপ মখা তানা চেৎশিলহন্নবা মহাক্কী অচেৎপা ৱাফম অদু অমুক হন্না ফোংদোকখি।
হন্দক্তা পাংথোকখিবা মীখলশিংদা মায় পাক্লকপদা জিম্বাৱেগী রাস্ত্রপতি মন্নগাগৱানা প্রধান মন্ত্রীবু নুংঙাইবা ফোংদোকখি। প্রধান মন্ত্রীনা রাস্ত্রপতি মন্নগাগৱাবু মহাক্কী য়াইফ-পাওজেলগীদমক থাগৎপা ফোংদোকখি অমদি মীখলশিং অদু কোভর তৌনবগীদমক জিম্বাৱেদগী মীদিয়াগী মীওই অনিনা ভারত্তা লাকখিবা অদুদা অপেনবা ফোংদোকখি। হৌখিবা চহীদা ভারতকী উপ-রাস্ত্রপতিগী মায় পাক্লবা জিম্বাৱেগী খোংচৎ অদুসু প্রধান মন্ত্রীনা নৌহৌনা নীংশিংখি অমদি ভারত অমসুং জিম্বাৱেগী মরী অসি অনৌবা থাক অমদা পুখৎপগী অপাম্বা অদু মহাক্না ফোংদোকখি।
প্রধান মন্ত্রীনা রাস্ত্রপতি ন্যুসিবু মোজাম্বিক্তা চহী অসিগী হৌরকপদা নোংলৈ-নুংশিৎনা মরম ওইদুনা মীশি মীনা অমসুং অমাং অতা থোকহনখিবা অদুগীদমক অৱাবা ফোংদোকখি। মতম অদুদা ভারতকী ঈশিং লান্মীনা মতম চানা মতেং পাংলকপগীদমক রাস্ত্রপতি ন্যুসিনা প্রধান মন্ত্রীবু থাগৎপা ফোংদোকখি। সোলিদরিতী অমসুং পার্তনরশিপতা ভারতনা মতম পুম্নমক্তা মোজাম্বিক্কা লেপমিন্নগনি হায়না প্রধান মন্ত্রীনা ফোংদোকখি।
