ଭାରତରେ ନିକଟରେ ସମ୍ପନ୍ନ ହୋଇଥିବା ନିର୍ବାଚନରେ ବିପୁଳ ବିଜୟ ପାଇଁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କୁ ଆଜି ବିଶ୍ୱର ବିଭିନ୍ନ ରାଷ୍ଟ୍ରର ରାଷ୍ଟ୍ରପତିମାନେ ଟେଲିଫୋନ ଯୋଗେ ଅଭିନନ୍ଦନ ଜଣାଇଛନ୍ତି । ଅଭିନନ୍ଦନ ଜ୍ଞାପନ କରିଥିବା ରାଷ୍ଟ୍ରମାନେ ହେଲେ କୋରିଆ ସାଧାରଣତନ୍ତ୍ରର ରାଷ୍ଟ୍ରପତି ମହାମହିମ ମିଃ. ମୁନ ଜେ ଇନ,ଜିମ୍ବାୱେ ରାଷ୍ଟ୍ରପତି ମହାମହିମ ମିଃ. ଇ.ଡି ମନନଗାଗୱା ଏବଂ ମୋଜାମ୍ବିକ ରାଷ୍ଟ୍ରପତି ମହାମହିମ ମିଃ. ଫିଲିପ ଜାସିଂଟୋ ନ୍ୟୁସି ।
ପ୍ରଧାନମନ୍ତ୍ରୀ କୋରିଆ ରାଷ୍ଟ୍ରପତିଙ୍କୁ ତାଙ୍କ ଫୋନ କଲ ଏବଂ ଅଭିନନ୍ଦନ ପାଇଁ ଧନ୍ୟବାଦ ଅର୍ପଣ କରିଥିଲେ ।ଫେବୃଆରୀ 2019ରେ କୋରିଆକୁ ତାଙ୍କର ସଦ୍ୟଗସ୍ତ ବିଷୟରେ ପ୍ରଧାନମନ୍ତ୍ରୀ ଉଦାରତା ପୂର୍ବକ ସ୍ମରଣ କରିଥିଲେ । ଏଥିସହିତ 2018ରେ ଦୀପୋତ୍ସବରେ ଯୋଗ ଦେବା ଲାଗି କୋରିଆର ପ୍ରଥମ ମହିଳା କିମଙ୍କ ଭାରତ ଗସ୍ତ ବିଷୟରେ ସ୍ମରଣ କରି ପ୍ରଧାନମନ୍ତ୍ରୀ କହିଥିଲେ ଯେ ଏହି ଗସ୍ତ ଭାରତ–କୋରିଆ ସମ୍ପର୍କରେ ଏକ ନୂତନ ଅଧ୍ୟାୟ ଯୋଡ଼ିଛି । ଦୁଇ ଦେଶ ମଧ୍ୟରେ ସ୍ୱତନ୍ତ୍ର ରଣନୈତିକ ସମ୍ପର୍କକୁ ଆହୁରି ସୁଦୃଢ଼ କରିବା ଲାଗି ପ୍ରଧାନମନ୍ତ୍ରୀ ନିଜର ଦୃଢ଼ ପ୍ରତିବଦ୍ଧତାକୁ ଦୋହରାଇଥିଲେ ।
ନିକଟରେ ଅନୁଷ୍ଠିତ ସାଧାରଣ ନିର୍ବାଚନରେ ବିପୁଳ ବିଜୟ ପାଇଁ ପ୍ରଧାନମନ୍ତ୍ରୀଙ୍କୁ ଜିମ୍ବାୱେ ରାଷ୍ଟ୍ରପତି ମନନଗାଗୱା ଅଭିନନ୍ଦନ ଜ୍ଞାପନ କରିଥିଲେ। ରାଷ୍ଟ୍ରପତି ମନନଗାଗୱାଙ୍କୁ ତାଙ୍କର ଅଭିନନ୍ଦନ ପାଇଁ ପ୍ରଧାନମନ୍ତ୍ରୀ ଧନ୍ୟବାଦ ଜଣାଇଥିଲେ । ଏଥିସହିତ ଭାରତରେ ହୋଇଥିବା ନିର୍ବାଚନ ଖବର ସଂଗ୍ରହ କରିବା ଲାଗି ଜିମ୍ବାୱେରୁ ଦୁଇ ଜଣ ଗଣମାଧ୍ୟମ ପ୍ରତିନିଧି ଆସିବା ଘଟଣାର ପ୍ରଶଂସା କରିଥିଲେ । ଗତବର୍ଷ ଭାରତର ରାଷ୍ଟ୍ରପତିଙ୍କ ସଫଳ ଜିମ୍ବାୱେ ଗସ୍ତ ବିଷୟରେ ପ୍ରଧାନମନ୍ତ୍ରୀ ସ୍ମରଣ କରିଥିଲେ ଏବଂ ଭାରତ-ଜିମ୍ବାୱେ ସମ୍ପର୍କକୁ ନୂତନ ଉଚ୍ଚତାକୁ ନେଇଯିବା ଲାଗି ନିଜର ଆଗ୍ରହ ବ୍ୟକ୍ତ କରିଥିଲେ ।
ଚଳିତ ବର୍ଷ ପ୍ରାରମ୍ଭରେ ସାମୁଦ୍ରିକ ଝଡ଼ ଯୋଗୁ ହୋଇଥିବା ଧନଜୀବନ ହାନିକୁ ନେଇ ମୋଜାମ୍ବିକ ରାଷ୍ଟ୍ରପତି ନ୍ୟୁସିଙ୍କ ପ୍ରତି ପ୍ରଧାନମନ୍ତ୍ରୀ ନିଜର ସମବେଦନା ଜ୍ଞାପନ କରିଥିଲେ । ଏହି ସମୟରେ ଭାରତୀୟ ନୌସେନା ଦ୍ୱାରା ଯୋଗାଇ ଦିଆଯାଇଥିବା ସହାୟତା ଲାଗି ରାଷ୍ଟ୍ରପତି ନ୍ୟୁସି ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇଥିଲେ ।ପ୍ରଧାନମନ୍ତ୍ରୀ କହିଥିଲେ ଯେ ଏକତା ଏବଂ ସହଭାଗୀତାର ସହିତ ଭାରତ ସବୁବେଳେ ମୋଜାମ୍ବିକ ସହ ଛିଡ଼ା ହୋଇ ରହିବ ।
