এগী নুংশিজরবা ইমুংগী মীওইশিং, খুরুমজরি। মন কী বাতকী ওগস্তকী তাঙক্কসিদা ময়াম্বু হন্না-হন্না তরাম্নাওকচরি। শাৱনগী শেংলবা থানুংসিদা, ‘মন কী বাত’সি অনিরক হন্না পাংথোকপা অমুক্তা য়াওখিদ্রি, অদুবু, হন্দক্তি মদু ওইথোক্লে। শাৱন হায়বসি, ভগবান শিবগী থানি, হরাও-কুম্মৈগী থানি। চন্দ্রয়ানগী মাইপাকপনা কুম্মৈ অসিবু অমুক্কা হেন্না হেনগৎহল্লে। চন্দ্রয়ান্না থাদা খোংদাখিবা নুমিৎ হুম্নি খরা হেল্লে। মাইপাকপসি অদুক্কী মতিক মগুন লৈখ্রে, শিংথাবগী লোইবা-খম্বা নাইদ্রে। ঙসি ময়ামগী মফমদা ৱা ঙাংজরিঙৈগী মরকসিদা, ঐহাক্কী অরিবা শৈরেং অমা নিংশিংলকই।
অহাংবা মালঙদা লেপখত্তুনা কোক
অমুবা লৈচিলগী পৌমাই হাংদোক্তুনা
মঙাল ফংগনি হায়বগী ৱাখলদা
থোরক্লে কোরৌহনবা।
অরেপ্পা ৱাখলগা লোইননা
খুদোংথিবা কয়াবু লান্থোক্লে হায়রগা;
শুক্ল-মম্লবা অমম্ববু কোকহন্নবা
থোরক্লে কোরৌহনবা।
অহাংবা মালঙদা লেপখত্তুনা কোক
অমুবা লৈচিলগী পৌমাই হাংদুনা
থোরক্লে কোরৌহনবা।
এগী ইমুংগী মীওইশিং, ওগস্ত ২৩দা ভারতকী চন্দ্রয়ান্না খোংদাবা ঙমখিবা অসিনা, মঙাল ফংবগী ৱাখলসি, থাদশু য়ৌরে হায়বা খঙহনবা ঙম্লে। মিসন চন্দ্রয়ান অসি ভারতকী ফিভম অমদা হেক্তা মাইপাকপা ঙম্বগী স্পিরিৎ অসি মিসন চন্দ্রয়ান্না ওইখ্রে।
মরুপশিং, ঙসি ঐহাক্না ময়ামগী মফমদা, মিসন অসিগী তাঙ্কক অমগী মতাংদা থোইদোক্না পঞ্জনিংঙি। ঐহাক্না লাল কিলাদগী হায়জখিবা, ৱুমেন লেদ দেবেলপমেন্তবু নেস্নেল কেরেক্তর ওইনা, এমপাৱর তৌগনি হায়বদু, নুপীশিংগী তৌবা ঙম্বগী শক্তি লৈবা মফমদুদা ওইথোক্তবা হায়বা অমত্তা লৈতে। ভারতকী মিসন চন্দ্রয়ান অসি নারি শক্তিগী ময়েক লারবা খুদম্নি। মিসন অসিদা ৱুমেন সাইন্তিস্ত অমদি ইঞ্জিনীয়র কয়ানা হকথেংননা শরুক য়ারি। মখোয়না তোঙান-তোঙান সীস্তেমগী প্রোজেক্ত দাইরেক্তর, প্রোজেক্ত মেনেজরনচিংবা অচৌবা থৌদাং কয়া লৌরি। ভারতকী ইচানুপীশিংনা হৌজিক মপাল নাইদ্রে হায়নরিবা সুন্য তরংবু শিংনরি। লৈবাক অদুগী মচানুপীশিংনা অদুক্কী মতিক ৱাখল ৱাংলবদা, অদুগুম্বা লৈবাক অদুনা চাউখৎপদা কনানা থিংবা ঙমগদৌরি।
মরুপশিং, ঐখোয়না অসুক ৱাংনা পাইবা ঙম্লিবসি, ঐখোয়গী মঙলান অচৌবা মঙবগীনি অমদি লেপ্পা লৈতনা হোৎনবগীনি। চন্দ্রয়ান-৩না মাইপাকপদা অতোপ্পা সেক্তর কয়াগীশু অচৌবা থৌদাং য়াওরি। মসিগী পার্তশিং অমদি তেক্নিকেল ওইবা তঙাইফদবা কয়া মপুং ফাহনবদা লৈবাক মীয়াম্না অচৌবা থৌদাং লৌরি। ময়াম পুম্নমক্না হোৎনবীবদগী মাইপাকপসি ওইরকখিবনি। মসিনি চন্দ্রয়ান-৩গী খ্বাইদগী চাউবা মাইপাকপা। মতুংদশু ঐখোয়গী স্পেস সেক্তরদা ময়াম পুন্না হোৎনমিন্নদুনা মাইপাকপা পুরকসি হায়না ঐনা থাজবা থমজরি।
ঐগী ইমুং মনুংগী মীওইশিং, সেপ্তেম্বর থাসিদা, ভারতকী তৌবা ঙম্বগী শক্তি অদু ময়াম্না উবীগদৌরি। মথং থাদা পাংথোক্কদৌরিবা জি.-২০ লীদর্স সম্মিতকীদমক ভারতনা নিংথিনা শেমশারে। থৌরম অসিদা শরুক য়ানবগীদমক্তা লৈবাক ৪০গী লুচিংবা অমদি অতৈ গ্লোবেল ওর্গনাইজেশন কয়া দিল্লীদা লাক্কদৌরি। জি.-২০গী সম্মিতকী পুৱারিদা মসিনা হৌজিক ফাওবগী ওইবা অচৌবা শরুক য়াবা ওইগদৌরিবনি। ঐখোয়না প্রেসিদেন্সী ওইরিঙৈসিদা ভারতনা জি.-২০গী ওইবা ইনক্লুজিব ফোরম অমা শেম্লে। ভারতনা হায়জরুবদগী অফ্রিকান য়ুনিয়নশু জি.২০দা য়াওরে লোইননা অফ্রিকাগী মীয়ামগী খো্লাওশু মালেমগী অথোইবা প্লেতফোর্মদা য়ৌবা ঙমহল্লে। মরুপশিং, হৌখিবা চহিদা, বালিদা ভারতনা জি.-২০গী পরেসিদেন্সী ফংলবা মতুংদগী হৌজিক ফাওবদা পাংথোক্লিবা থবক ময়াম অসিনা ঐখোয়বু চাউথোকচবা ফাওহল্লি। অচৌ-অচৌবা থৌরম কয়া দিল্লীদতা পাংথোকপগী চৎনবী লৈরম্বা অদু তোকথোক্তুনা, লৈবাক অসিগী সহর কয়াদা পাংথোক্লি। লৈবাক অসিগী সহর ৬০রোমদা, মসিগা মরি লৈনবা মীতিং ২০০রোম পাংথোকখ্রে। জি.-২০গী দেলিগেতশিংনা চৎলু-চৎলুবা মফমশিংদা, মীয়াম্না হরাও-তয়াম্না ওকখি।দেলিগেতশিংনা ঐখোয়গী লৈবাক্কী দাইভর্সিতরী অমদি ভাইব্রেন্ত দেমোক্রেসী উবদা য়াম্না পেন্নখি। মখোয়না ভারতকী মফদমদা থাজবা থমখি।
মরুপশিং, জি.-২০গী প্রেসিদেন্সী অসি পীপলস প্রেসিদেন্সিনি। মসিদা মীয়াম্না শরুক য়াবগী ৱাখল্লোন্না মাংজিল থারি। জি.-২০দা এনগেজমেন্ত গ্রুপ ১১ লৈ, মসিদা একাদেমিয়া, সিভিল সোসাইতী, নহারোল, নুপীশিং, ঐখোয়গী সংসতশিং, এন্ত্রপ্রেনরশিং অমদি অর্বান এদমিনিস্ত্রেশনগী মরি লৈনবা মীওইশিং অচৌবা থৌদাং লৌরি। মসিগা মরি লৈননা লৈবাক অসিদা পাংথোক্লিবা থৌরমশিংদা মীওই করোর ১.৫ রোমদি হিরম অমা নত্রগা হিরম অমদা শরুক য়ারি । মীয়াম্না শরুক য়ানবা হোৎনবা অসিদা অমুক্তা নত্তনা ৱার্ল্দ রেকোর্দ অনিরক থম্বা ঙমখ্রে। বারানসিদা পাংথোকখিবা জি.-২০ ক্বিজদা স্কুল ৮০০গী মহৈরোই লাখ ১.২৫ রোম্না শরুক য়াদুনা ৱার্ল্দ রেকোর্ফদ থমখ্রে। মফম অদুদা লম্বানি খুৎ-শা হৈবশিংনা মখোয়গী হৈথোই-শিংথোইবা অদু উৎখি। খুৎ-শা হৈবা ৪৫০না চাউরাক্না য়ুনিক পেচেস ১৮০০গী অঙকপা কলেক্সন শেমদুনা মখোয়গী হৈ-শিংবা অমদি ক্রাফসমেনশীপতু ময়ামদা শক তাকখি। জি.-২০দা লাকখিবা মীওই খুদিংমক্না ঐখোয়গী লৈবাক্কী আর্তিস্তিক দাইভর্সিতীসি উবদা পুমঙক ঙকখি। অসিগুম্বা অচৌবা থৌরম অমশু সুত্তা পাংথোকখি। মফম অদুদা পাংথোকপা ‘সারী ৱাকাথোন্দা’, রাজ্য ১৫দগী নুপী ১৫,০০০রোম্না শরুক য়াখি। থৌরম অসিদগী সুরতকী তেক্সতাইল ইন্দস্ত্রীবু পুক্নিং থৌগৎখি, লোইননা ‘ভোকেল ফোর লোকেল’বুশু মপাঙ্গল কনখৎহনখি, লোকেলবু গ্লোবেল ওইনবগী লম্বি য়াৎখ্রে।স্রিনাগরদা জি.-২০গী মীতিং পাংথোকপদগী, কাশ্মিরদা লম কোইবা লাকপা মশিং হেনগৎলক্লি। ঐহাক্না ইরৈবাকচাশিংদা, জি.-২০ সম্মিত অসিবু মাইপাকহন্দুনা লৈবাক্কী মিংচৎ হেনগৎ্ল্লসি হায়জরি।
এগী ইমুংগী মীওইশিং, ‘মন কী বাত’কী থৌরমদা ঐখোয়গী নহাশিংগী তৌবা ঙম্বা কয়াগী মতাংদা য়াম্না তোইনা খন্ন-নৈনৈ। ঙসি শান্ন-খোৎনবগী লম অসিদা, ঐখোয়গী নহাশিংনা লেপ্পা লৈতনা মাইপাকপা পুরক্লি। ঙসিগী ‘মন কী বাত’কী থৌরম অসিদা ঐখোয়গী শান্নরোইশিংনা, লৈবাক অসিগী ফিরাল ৱাংনা পাইহনখিবা তোর্নামেন্ত অমগী মতাংদা ৱাফম খরা হায়জগে। নুমিৎ খরগী মমাংদা চাইনাদা ৱার্ল্দ য়ুনিভর্সিতী গেম্স পাংথোকখি। মসিদা ভারতকী বেস্ত ইভর পার্ফোর্মেন্স হায়বদু ওইখি। ঐখোয়গী শান্নরোইশিং পুন্না মেদল ২৬ ফংবা ঙমখি। মসিদা গোল্দ মেদল ১১নি। ১৯৫৯দগী ৱার্ল্দ য়ুনিভর্সিতী গেম্স কয়া শরুক য়ারকপা অসিদা হৌজিক ফাওবদা পুন্না মেদল ১৮ খক্তমক ঙাইরি। দিকেদ কয়াসিদা, শুপ্নতংগী মেদল ১৮ অদুবু হন্দক্তি ঐখোয়গী শান্নরোইশিংনা মেদল ২৬ ফংবা ঙমখ্রে। ৱার্ল্দ য়ুনিভর্সিতী গেম্সতা মেদল ফংলক্লবা শাত্র নহা শান্নরোইশিং ফোন লাইনদা লৈরে। মখোয়গী মতাংদা ঐনা হান্না তাকচগে। য়ু.পি. লৈবি প্রগতিনা আর্চরীদা মেদল ফংখি। অসামদা লৈবা অম্লাননা এথলেতিক্সতা মেদল ফংখি। য়ু.পি.দা লৈবী প্রিয়াঙ্কানা রেস ৱাকতা মেদল ফংখি। মহারাস্ত্রদা লৈবী অভিদন্যানা শুতিংদা মেদল ফংখি।
মোদী জী :- ঐগী নহা শান্নরোইশিং, খুরুমজরি।
নহা শান্নরোইশিং :- খুরুমজরি সর।
মোদী জী :- নখোয়গা ৱারি শাবা ফংবসি য়াম্না নুংঙাইরে। অহানবদা, ভারতকী য়ুনিভর্সিতীশিংদগী খনগৎলক্লবা তীম নখোয়না লৈবাক্কী মিংচৎ পুরকপগীদমক্তা য়াইফ-পাউজেল পীজরি। ৱার্ল্দ য়ুনিভর্সিতী গেম্সতা নখোয়না ফজরবা পার্ফোর্মেন্স পীদুনা লৈবাক অসিগী মীপুম খুদিংমক্না চাউথোকচনবা তাঞ্জা পীনবীরে। মর অদুনা নখোয়বু য়াইফ-পাউজেল পীজরি।
প্রগতি, ৱারি শাবসে নঙোন্দগী হৌরগে। নহাক্না মেদল অনি ফংবা ঙম্লক্লে, মসি ফংগনি হায়বসি হান্নদগী খনখিবরা? য়াম্না চাউনা মাইপাকপসিদা নশাদা করি ফাওই?
প্রগতি :- সার, ঐখোয়গী লৈবাকাক্কী ফিরাল য়াম্না ৱাংনা পাইহনবা ঙম্বসিদা, ঐ য়াম্না চাউথোকচবা পোকই। অহানবদা গোল্দ ফাইত য়ৌরম্বদগী লুজ তৌবা মতমদা য়াম্না নিংহন্নবা পোকখি। অদুবু অনিরক শুবদা মখা শুংতা তাহনবা য়াদে হায়বা ৱাখলদা লেপখি। অকোনবদা ফাইত অদু মাইপাকখি, পোদিয়মদা ঐখোয়না ফজনা সেলেব্রেত তৌখি। ঐখোয়না অদুক্কী মতিক নুংঙাইখি। লৈবাক্কীদমক্তা চাউথোকচবা পোকখি।
মোদী জী :- প্রগতি, নহাক ফিজিকেল্লী য়াম্না প্রোব্লেম ওইখিবনি। মদুদগী নহাক ফগৎলক্তুনা হোৎনরকখিবনি। মসি লৈবাক অসিগী নহাশিংগীদমক্তা তমজনিংঙাইনি। করি তৌখিবনো অমুক্তা হায়য়ু?
প্রগতি :- সার, মে ৫, ২০২০দা, ঐহাক ব্রেন হেমরেজ তৌখি। ভেন্তিলেতরদা লৈখি। ঐ হিংগনি, শিগনি হায়বা তম্বা ঙমখিদে, হিংলবশু ঐ করম্বা ফিভমদা লৈগনি হায়বা তম্বা ঙমখিদে? অদুবু ঐঙোন্দা থৌনাদি নিংহন্নখিদে, গ্রাউন্দা লেপ্তুনা তেন কাপখিগনি হায়না অদুমক লেপখি। ঐগী পুন্সি অসি তাইবং মপুনা কনবীরকপনি, মথংদা দোক্তর অমদি আর্চরীনা।
মোদী জী :- ঐখোয়গী ইরক্তা, অম্লানশু লৈরি। অম্লান, এথলেতিক্সতা পুক্নিং চংলকখিবসি মতৌ করম্ননো!
অম্লান :- নমস্তে সার।
মোদী জী :- নমস্কার, নমস্কার
অম্লান :- সার, অহানবদদি এথলেতিক্সতা ঐ য়াম্না খোইদারমদে। হান্নদি ঐহাক ফুতবোলদনা হেন্না কোইদারম্মি। অদুবু ঐগী ইয়াম্বগী মমান্নবনা অমনা ঐসে এথলেতিক্সকী কমপিতিশন্দা শরুক য়াও হায়না হায়রকখি। ঐশু ফরে হায়দুনা স্তেত মীত্তা শরুক য়াখি অদুবু ঐ মাইথিখি। মাইথিবসি ঐনা শুকপাম-পামখিদে। অদুদগী মথং-মথং লাক্তুনা এথলেতিক্সতা চংশিল্লে। হৌজিক্তি য়াম্না নুংঙাইরে। পাম্বশু য়াম্না হেনগৎলে।
মোদী জী :- অম্লান প্রক্তিস তৌবদি, অয়াম্বা মতমদা কদাইদা তৌই!
অম্লান :- অয়াম্বা মতমদা হাইদ্রবাত্তা, সাই রেদ্দী সারগী লমজিং মখাদা প্রক্তিস তৌই। অদুদগী ভুবনেশ্বরদা হোংলক্তুনা প্রোফেস্নেল্লী প্রক্তিস তৌবা হৌরে।
প্রিয়াঙ্কাশু লৈরি। প্রিয়াঙ্কা, নহাক ২০ কিলোমিতর রেস ৱাক্তা য়াওখিবনি। লৈবাক শিনবগী মীওইনা তারিবনি। মখোয়না স্পোর্তস অসিগী মতাংদা খঙবা পাম্মি। মশান্না অসিগী করি- করম্বা স্কিল মথৌ তাই হায়বা খরা হায়য়ু। লোইননা নহাক্কী কেরিয়র অসি কদাই-কদাইদগী লাক্তুনা হৌজিক করম্বা ফিভমদা লৈরে।
প্রিয়াঙ্কা :- ঐগী মশান্না অসি য়াম্না লুবা অমনি। মসিদা জজ ৫ লৈগনি। করিগুম্বা, চেল্লুরবা, চোংলুরবা, জজনা মপান থোকহল্লক্কনি, লোইননা কম্লাক কোল্লুরবশু জজনা মপান থোকহল্লক্কনি। ঐ হন্দক্কী মতাং অদুদা ৱার্নিং অনি ফংখি। অদুদগী ঐনা তীমগীদমক্তা মেদল লৌগদবনি খন্দুনা স্পীত ফজনা কন্ত্রোল তৌখি। মরমদি, মফম অসিদা লৈবাক্কীদমক্তা লাকখিবনা, খুৎ হাংনা হনবা পামখিদে।
মোদী জী :- হোই, অদুগা পাবুং, ইবুং-ইপ্বাদি লোইনা নুংঙাইরিকো?
প্রিয়াঙ্কা :- হোই সার, ময়াম পুম্নমক নুংঙাইরি। সারনা ঐখোয়বু অশুক্কী মতিক পুক্নিং থৌগৎপী হায়দনা ঐগী পুম্নমক্তা পাউদম্লিবনি। তশেংনমক্কীশু, সার, য়াম্না নুংঙাইবা ফাওজৈ। ৱার্ল্দ য়ুনিভর্সিতী গেম্স অসি ভারত্তদি কনামত্তনা খঙবীদে। অদুবু হৌজিক্তি শান্নবগী লমদা সপোর্ত য়াম্না ফংবা হৌরে। ত্বীত কয়াদশু উবা ফংলে। ঐখোয়না মেদল কয়া অমা ফংবা ঙম্লে। ত্বীত্তা মতরাং কাইনা ইরি। য়াম্নশু নুংঙাই। ওলেমপিক্তা মেদল ফংলকপগুম ফাওই। মসিনশু ময়াম্নশুং পুক্নিং থৌগৎপীরি।
মোদী জী :- প্রিয়াঙ্কাবু ঐগী মাইকৈদগীশু থাগৎপা ৱাহৈ থম্লি। অদোম্না লৈবাক্কী মিংচৎ পুরক্লি। য়াইফবতা ওইবীয়ু। হৌজিক অভিদান্যাগ অমুক ৱারি শারসি।
অভিদন্যা :- খুরমজরি সার।
মোদী জী :- খুরুমজরি, ইশাগী মতাংদা খরা তাসি।
অভিদন্যা :- সার ঐ মহারাস্ত্রগী প্রোপর কোলাপুরদগীনি। ২৫ মিতর্স স্পোর্তস পিস্তল অমদি ১০ মিতর্স এয়র পিস্তল ইভেন্ত অনি অসি ঐহাক শান্নজৈখ। ঐহাক্কী ইমা-পাবুং হাইস্কুলগী ওজানি। ২০১৫দগী শুতিং তম্বা হৌরককি। শুতিং তম্বা হৌরকপদা, মতমদুদা কোলাপুরদা খুদোংচাবা কয়া ফংখিদে। বস তোংদুনা ৱাদগাওনদগী কোলাপুর ফাওবা চৎপদা, পুং ১.৩০ চংখি, হল্লকপগী পুং ১.৩০ অমুক্কা, ত্রেনিংদা পুং ৪, অসুম্না চত্থোক-চৎশিন অমদি ত্রেনিংগা পুন্না পুং ৬ – ৭ চংখ্রবনিনা স্কুলশু চৎপা ঙমদনা তোকপা কয়া য়াওখি। মদুদা, ইমা-পাবুংনা হায়রকখি, থাংজ- নোংমাইজিংসিদি শুতিং রেঞ্জতা মখোয়না থিনবীগে, অতৈ নুমিৎ খৈদনা অতোপ্পা মশান্নদা মাই ওন্সিল্লু হায়দনা, মরম অসিনা মশান্না কয়া অমা ঐনা শান্নরকপা ফংখি। ঐগী ইমা-পাবুং অনিমক শান্নবদা থৱাই য়াওজরবশু, শেল-থুমগী ফিভমদি ফত্তবনা, মখোয়না করিশু অহেনবা তৌবদি ঙম্লমদে। য়াম্না হেন্না খঙ-হৈবশু নৎচদে মখোয়, অদুনা ইমাগী মঙলান ওইরম্মি। লৈবাক্কী মীহুৎ ওইনা চত্তুনা মেদলশু লৌগদবনি হায়বসি ইমানা তত্তনা হায়বা ৱাহৈশিংনি। ইমা মঙলানবু অশেংবদা ওন্থোক্নবা, অঙাং ওইরিঙৈদগী শান্ন-খোৎনবদা থৱাই-হকচাং য়াওনা চংশিনখি। তাইক্বোন্দো ব্লেক বেল্তনি। বোক্সিং, জুদো, ফেন্সিং অমদি দিস্কস থ্রো মশান্নশিংসিদা শান্নরবা মতুংদা, ইং ২০১৫দগী শুতিং মশান্নদা চংশিনখি। চহি ২-৩ ঐ য়াম্না স্তধ্রগল তৌখি, য়ুনিভর্সিতী চেমপিয়নশিপ্তা মলেসিয়া চৎনবগীদমক্তা ঐহাক খল্লকখি, মদুদা ব্রোঞ্জ মেদলশু ফংজরকখি। মসিদগী ঈথিল অমশু ফংলকখি। মসিদগী ঐখোয়গী স্কুলনা শুতিং রেঞ্জ অমশু শেম্বীখি, মফম অদুদা ঐহাক ত্রেনিং চতথখি, অদুগী মতুং, ঐবু ত্রেনিং মখাতানা চত্থনবগীদমক্তা পুনেদা থাবীখি। মফম অদুদা গগন নরায়ন স্পোর্তস ফাউন্দেশনগী গন ফোর গ্লোরীগী মখাদা ত্রেনিং লৌরকখি। গগন সরনা ঐবু য়াম্না সপোর্ত তৌবীরকখি। ঐগী গেম্সতা পুক্নিং থৌগৎপীখি।
মোদী জী :- য়াম্না ফরে, নখোয় মরি ঐঙোন্দা করি করম্বা ৱাফম হায়নিংবা লৈ, ঐ তানবা ঙাইরিবনি। প্রগতি, অম্লান, প্রিয়াঙ্কা অমসুং অভিদান্যা। হায়য়ুনে, নখোয় মরিগী ৱাহৈ খরশু পাউদম্লকউ। হৌজিক ঐগা ৱারি শান্নরিঙৈসিদা।
অম্লান :- সার ৱাহং অমখক্তং হংজগে।
মোদী জী :- হংবীয়ু।
অম্লান :- সার, সারনা খ্বাইদগী পামজবা মশান্নসি করিনো?
মোদী জী :- শান্নবগী তাইবংদা, ভারতনা য়াম্না চাউথোকচফম থোকই। ঐদি লম অসিবু পুক্নিং য়াম্না থৌগৎলি, হোকী, ফুতবোল, কবাদ্দি, খো-খো মশান্নশিং অসি ঐখোয়গী লৈবাক্কা শাগোন্ননা চৎমিন্নরকপা মশান্ননি। মশান্নশিং অসিদা ফাওবদি, ঐখোয় মনিংদা লৈহৌফম থৌক্তে, আর্চরীদা ঐখোয়গী শান্নরোইশিংনা ফজবা পার্ফোরমেন্স উৎলি, শুতিংদশু য়াম্না ফজনা পার্ফোর্ম তৌরি। অদুগা ৱাফম অমনা ঐখোয়গী নহাশিং, ইমুংগী মীওইশিংদা, শান্ন-খোৎনবগী লমদা ৱাখল্লোন অমা হোংলকপগুম উবা ফংলে। হান্না লৈরম্বা মিৎয়েং অদু হৌজিক লৈত্রে। হান্নদি অঙাংশিং শান্নবা চৎপদা খাম্বীখিবা ঙাক্তনি। হৌজিক্তি মদুগী ফিভমদু নত্রে। অদোম্না মেদলশিং পুবীরক্লিবা ময়াম অদুনা ইমুং কয়া-কয়াবু পুক্নিং থৌগৎলি। মশান্না অমদা হেক্তা চংখিবদা, মাইপাক্তুনা লৈবাক্কী মিংচৎ পুরকই। মসিগী পাউশিংশু , খবরগী চেফোংশিংদা হেদলাইন ওইরি। স্কুল কোলেজশিংদা খন্ন-নৈনৈ। য়াম্না নুংঙাইরে! নখোয় ময়ামগা ৱারিশু শারে। ঐগী মাইকৈদগী হন্না-হন্না থাগৎচরি। য়াইফবতা ওইবীয়ু।
নহা শান্নরোইশিং :- য়াম্না নুংঙাইজৈ! থেঙ্ক্যু সার!
মোদী জী :- থাগৎচরি! খুরুমজরি।
এগী ইমুংগী মীওইশিং, হন্দক্কী ওগস্ত ১৫দা লৈবাক্না ময়াম পুন্না হোৎনবগী শক্তি অদু উবা ফংখ্রে। লৈবাক মচা পুম্নমক্কী হোৎনজমন্না হর ঘর তিরঙ্গা অভিয়ানবু, হর মন তিরঙ্গা অভিয়ান ওইহল্লে। অভিয়ান অসিগী মনুংদা রেকোর্দ কয়া অমশু থমখি। ইরৈবাকচাশিংনা ভারতকী মচু অহুমগী ফিরালশিং করোর ৩গী মথক্তা লৈনখি। পোস্ত ওফিস লাখ ১.৫গী কুত্থাংদা, ফ্লেগ করোর ১.৫০ রোম য়োনখি। মসিনা ঐখোয়গী থবকশুবশিং, ফি শাবশিং, মরু ওইনা নুপী ওইবীশিংগী আই তানবগী হিরমদা কান্নবা পীখি। মচু অহুমগী ফিরালগা লোইননা, সেল্ফী নম্দুনা থাগৎপদা, ইরৈবাকচাশিংনা অনোবা রেকোর্দ থমখ্রে। মমাং চহিগী ওগস্ত ১৫ ফাওবদা, ইরৈবাকচাশিং করোর ৫ রোম্না মচু অহুমগী ফিরালগা লোইননা সেল্ফী থাগৎখি। হন্দক্কী চহিদা মসি করোর ১০ হেনখি।
মরুপশিং, হৌজিক মতম অসি ‘মেরি মাতি, মেরা দেশ’ ইরৈবাক নিংবগী ৱাখল্লোন অসিদা ইহৌ শাগৎলি। লাক্লিবা সেপ্তেম্বর থাসিদা, খুঙ্গং খুদিংমক্তা, য়ুমথোং খুদিংমক্তগী লৈবাক খরা-খরা পুনশিনবগী থবক হৌরগনি। ওক্তোবরগী অরোইবা ফাওবা অমৃত কলশকী খোংচৎ লিসিং কয়া কয়া দেশকী রাজধানিদা থুংলগনি। হায়রিবা লৈবাকশিংসিনা দিল্লীগী অমৃত ভাতিকা শেমগৎপা হৌগনি। লৈবাকসিগী মীওই কয়ানা, অসিগুম্বা থবকশিং অসিবু মাই শোইদনা পাকহনগনি হায়বসি ঐহাক্না থাজজৈ।
ঐগী ইমুংগী মীওইশিং, হন্দক্তি ঐনা সংস্কৃত লোলদা চিথি কয়ামরুম ফংঙি। মসিগী মরমদি, থৱান থাগী পুর্নিমা অসিদা মালেমগী সংস্কৃত নুমিৎ হায়না পাংথোক্লি।
সর্বভ্যা বিস্বা সংস্কৃত দিৱস্যা হারদয়াহা সুভকাম্মনাহ
ময়াম পুম্নমকপু মালেমগী সংস্কৃতকী নুমিৎ অসিদা হন্না-হন্না নুংঙাইবা ফোংদোকচরি। সংস্কৃত হায়বা লোল অসি খ্বাইদগী লিরবা লোল অমনি। লোল অসি অনৌবা লোল ময়াম অসিগী অপোকপীনি। সংস্কৃত লোল অসি অরিবা লোল অমা ওইবগা লোইন-লোইননা বিগ্যানগী অমসুং ব্যাকরনগী হৌরকফম্নি। চহি লিশিং কয়াগী মমাংদগী লৈরক্লবা অরিবা সভ্যতাগী গ্যান লৌশিং কয়া সংস্কৃত লোলদা ফংঙি। য়োগ, অয়ুরভেদ অমসুং ফিলোসোফী হায়রিবা বিসয়শিং অসিদা রিসর্চ কয়ামরুম অমশু হায়রিবা মাইকৈ অসোমদা থবক তৌরি, থিজিল্লি। মদুদি সংস্কৃত প্রোমোশন ফাউন্দেশন, সংস্কৃত ফোর য়োগ, সংস্কৃত ফোর অয়ুরভেদ অমসুং সংস্কৃত ফোর বুধিজম অসিনচিং কোর্স কয়ানি। ‘সংস্কৃত ভার্তী’না মীওই কয়াবু সংস্কৃত তম্বীবগী থবক চত্থরি। মসিদা অদোম্না নুমিৎ ১০নিগী ‘সংস্কৃত ভাশন শিৱির’দা শরুক য়াবা য়াগনি। ময়াম্না সংস্কৃত লোলবু য়াম্না মরু ওইনা লৌবসি উবদা, ঐহাক য়াম্না হরাওবা পোকই। হৌখিবা চহি কয়াগী মমাংদগী মরু ওইবা থৌদাং কয়া লৈ। মসিদা সংস্কৃত দীম য়ুনিভর্সিতী ৩ লৈ। মসি ২০২০দা সেন্ত্রেল য়ুনিভর্সিতী ওন্থোকখ্রে। তোঙান-তোঙানবা সহরশিংদা সংস্কৃত বিস্ববিধ্যালয়, কোলেজ কয়া অমশুং ওর্গানাইজেশন কয়া লিংখৎলে। আই.আই.তি অমশুং আই.আই.এম. হায়রিবা ওর্গনাইজেশনশিংদা সংস্কৃত কেন্দ্রশু থম্লি।
মরুপশিং, অদোম্না শোইদনমক পুক্নিং ফাওবীরমগনি। ঐখোয়গী সংস্কৃতিগা খুৎশম্নবা ঐখোয়গী চৎনবী, ঐখোয়গী ইমা লোল। ঐখোয়না ঐখোয়গী ইমা লোলগা শম্নজবগুম সংস্কৃতকী চৎনবীগশু শম্নৈ। মসি ঐখোয়গী থাইনদগী লৈরক্লবা ইরলনি। অসুম্না ভারত্তশু তেলিগু লোলশু ইমা লোল অমনি। ওগস্ত তাং ২৯ অসি তেলিগু দিবস পাংথোক্লি।
অন্দারিকি তেলিগু ভাশা দিনোতসব শুভকাঙ্কশলু
পুম্নমকপু তেলিগু দিবসনা লাকপসিদা হন্ন-হন্না থাগৎচরি। তেলিগু লোন্দা সহিত্যগী ওইবা অথোইবা ভারত্য সংস্কৃতীগী মমল য়াম্লবা মগুন কয়া লোত্তুনা লৈরি। তেলিগু লোনগী পুক্কৈদগী কান্নবা কয়া লৈবাকসিনা ফংলি।
ঐগী ইমুংগী মীওইশিং, ‘মন কী বাত’কী তাঙ্ককসিদা তুরিজমগী মতাংদা খন্নখি। পোৎশকশিং মফমশিংবু বু ইশানা য়েংজবা, খঙজবা, খঙনবা হোৎনবসিনা মিৎকুপ খরদং অনৌবা তোঙাননুংঙাইবা পীরি।
মীয়াম্না সমুদ্রগী ফজবা ময়ামশিং শিংথানরবশু, সমুদ্রবু উরদ্রগদি মদুগী ফজবা নিংথিবা কয়াদুগী মরদা খঙবা ঙমদে। কনা অমনা হিমালয়গী নিংথিবা ফজবা কয়া শিংথারবশু, মদুবু উরুদ্রগদি, ফজবদু খঙবা ঙম্লোই। মরম অদুনা অদোম্না তাঞ্জা ফংলগদি, লৈবাক অসিগী ফজবা, ঐখোয়গী দাইভর্সিতী শোইদনা য়েংবা চৎপীয়ু। ঐখোয়না মফম কয়া কোইনা চৎলবশু, ঐখোয়গী সহরশিং অমসুং রাজ্যশিংদা য়েংবা য়াবা অফবা মফম কয়াশু লৈরি।
মীওই খরা অমদি মশাগী স্র অমশুং ইতিহাসকা শাগোন্নরবা মফমশিংগী মরমদা নিংথিনা খঙদে। নোংমা ধনপাল জীদশু থোক্লম্মি, ধনপাল জী বেঙ্গলুরুগী ত্রান্সপোর্ত ওফিসকী দ্রাইভরনি। চহি ১৭কী মমাংদা, মহাক সাইত সীয়িং ৱিংগী থৌদাং লৌরম্মি। মহাকপু হৌজিক্তি বেঙ্গলুরু দর্সিনি হাইনা খঙনরে। ধনপাল জীনা লম কোইবশিংবু সহরগী তোঙান-তোঙানবা মফমশিংদা য়েংবদা লমজিংঙি। অসুম্না তুরিস্ত ত্রিপ অমদা, তুরিস্ত অমনা বেঙ্গলুরুদা তেঙ্কপু সেনকি তেঙ্ক করিগী কৌরিবনো হায়না হংলকই। মহাক্না মদুগী পাউখুম খঙলমদে। মদুদগী মহাক্না খঙননবা য়াম্না কন্না হোৎনরম্মি। মহাক্কী লৈরম্লিবা পোৎলমশিং অদুবু খঙননবা হোৎনবা অসিদা নুংদা হক্তুনা থম্লম্বা পোৎলম কয়া থেংনখি। মহাক্না অদুক্কী মতিক পুক্নিং চংখ্রে। হায়রিবা থবক অসিদা ধনপাল জী, ইপিগ্রাফী, হায়বদি নুংদা হক্তুনা ইবশিংগী নৈনবা হিরমদা দিপ্লোমাশু তৌথোক্লে। হৌজিক্তি মহাক থবক্তগী পোত্থারে অদুবু বেঙ্গলুরুগী পুৱারিদা নৈনবদদি তোক্ত্রি।
মরুপশিং, ব্রিয়ান দি. খরপ্রানগী মতাংদা ৱাফম খরদং পঞ্জবদা নুংঙাইবা পোকচৈ। মহাক মঘালয়াদগীনি। মহাক্না স্পেয়িলোলোজীগী মতাংদা থৱায় য়াম্না য়াওই অরাইবা লোলদা হায়রগা, মসিগী আর্থ অসি কেবশিংগী মরমদা নৈনবা, মহাক্না ৱারি মচা কয়া পাবদগী ইন্তরেস্ত অশি লৈরকখিবনি। ১৯৬৪দা মহাক্না স্কুলগী মহৈরোই অমা ওইনা অহানবা এক্সপ্লোরেশন তৌখি। ১৯৯০দা মহাক্না মহাক্কী মরুপশিংগা পুল্লগা এসোসিয়েশন অঞা লিংখৎখি। লোইননা মঘালয়াগী ময়াম্না খঙনদবা কেবশিংগী মরমদা খঙনবা হোৎনখি। অসুম তৌনা মহাক্না মহাক্কী তীমগা লোইননা, মেঘালয়াগী কেব ১৭০০ হেনবা থিদুনা পুথোকখি অমসুং রাজ্য অসিবু ৱার্ল্দ কেব মেবতা য়াওহনখি। ভারতকী খ্বাইদগী শাংবা অমশুং লুবা কেবশিং খরদি মেঘালয়াদা লৈ। ব্রিয়ান জী অমশুং মহাক্কী তীম্না কেব ফাউনা, হায়বদি কেবশিংদা লৈবা মালেমশিংগী মফম অতৈদা ফংদ্রবা, থৱায় পানবা জিবশিংগী মরমদা থিজিনখি। ঐহাক্না তীম অসিনা তৌরিবা থবকশিং অদুবু থাগৎচরি, লোইননা ময়ামশু মঘালয়াদা চৎপীদুনা কেবশিং অদু য়েংবীরুনবা প্লান শিনবীয়ু।
ঐগী ইমুংশিংগী মীওইশিংদা হায়জনিংবা অমনা, দেরী সেক্তর অসি ঐখোয়গী লৈবাক্কী ওইবা য়াম্না মরু ওইবা সেক্তর অমনি। মসিনা ঐখোয়গী ইচে-ইচলশিংগী পুন্সিদা য়াম্না অচৌবা অওনবা অমা লাকহনবদা য়াম্না মরু ওইরবা থৌদাং অমা লৌরি। এসিয়াগী ওইনা খ্বাইদগী চাউবা দেরী অমা ওইনা খঙনরিবা গুজরাতকী বানস দেরীগী য়াম্না ইন্তরেস্তিং ওইবা ইনিসিয়েতিব অমগী মতাংদা পাউ অমা ফংজখি। মফম অসিদা, নুমিৎ খুদিংগী ওইনা, চাউরাক্না শঙ্গোম লিতর লাখ ৭৫মুক প্রোসেস তৌদুনা পুথোকপা ঙম্লি। মসিদগী অতোপ-অতোপ্পা স্তেতশিং থাবগী থবক তৌরি। মসিবু মতম চানা দেলিভরী তৌননবা তেঙ্করশিং নত্রগা শঙ্গোমগী ত্রেনশিংদা শিজিন্নৈ। অদুবু মসিমকশু অরাইবা খক ওইখিদে। লোদিং-অনলোদিং তৌবনচিংবদা মতম য়াম্না চংঙি। অদুগা অমনা শঙ্গোম য়াম্না বিন্ধা ওন্দুনা মাংঙি, অসিগুম্বা অৱাবা ফিভম অসি মায়োক্নবা ঙম্নবা, ভারতকী রেলগী ওইবা, অনৌবা থৌওং অমা পাইখৎলি। রেলৱেনা ত্রক ওন ত্রেক কৌবা অনৌবা থৌওং অসিগা মরি লৈননা, পাল্লমপুরদগী ন্যু রেৱারি ফাওবা থবক পাইখৎখি। ত্রক ওন ত্রেননা পীবা খুদোংচাবসি অদুক্কী মতিক পেনবা হায়বদু থোকই। মরমদি, মসিগী মতেংনা শঙ্গোমগী ত্রকশিংবু ত্রেনগী মথক্তা থৌগৎহন্দুনা ত্রান্সপোর্তেশনগী অৱাবশিং অদুবু কোকহল্লি। মসিনা অৱাবা ময়াম অমা কোকহন্দুনা য়াম্না লাইনা মতম ইচং-চংহন্দনা শঙ্গোম য়ৌহনবা ঙম্মি। হায়রিবা থবকসি হান্নদি ৱানা পুং ৩০ চংনা হোৎনরম্বনি। মসিদা নত্তনা গারিগী ইঞ্জিনগী চংলম্বা খর্জ কয়াদা নত্তনা, অমোৎপা মৈখু থোকহনবদগীশু কনবা ঙম্লে। লোইননা, গারি দ্রাইভরশিংগী হিংবগী পুন্সি লম্বিদশু কান্নবা কয়া পীরি।
মরুপশিং, ঐখোয়গী শঙ্গোম দেরীশিং কয়া অমশুং অনৌবা ৱাখল্লোন লাকপদগী, কেলক্তিব ইফর্তকা লোইননা মাংলোমদা অসুম চংশিনবা ঙম্মি। অকোইবগী ঈশিং-নুংশিৎপু য়োকখৎপগী মতাংদশু, বানস দেরীনা করি করি থবক-থৌরম পাইখত্তুনা মাংলোমদা চংশিল্লি হায়বসি ঐখোয়না সীদবোলগী উ-পাম্বী থাবগী খোংজংগী মতাংদগী খঙা ঙম্মি। মেন্যুর মেনেজমেন্ত তৌদুনা, বারানসিসি মিল্ক য়ুনিয়ন্না ঐখোয়গী লৌমীশিংগী ইনকম হেনগৎহনবদা মতেং পাংঙি। কেরলাগী মালাবার মিল্ক য়ুনিয়ন দেরীনা হোৎনজবা অদু অঙকপগী মশক অমা ওইখি। দেরী অসিনা শং-শনগী ওইবা লাইনা কয়া লাইয়েংদুনা আয়ুরবেদিক মেদিসিনশিং চাউখৎহন্নবগী মাইকৈলোমদা কন্না চংশিল্লি।
মরুপশিং, হৌজিক্কী মতম অসিদা মীওই কয়ানা ঙসিদি দেরীবু শিজিন্নদুনা, হেন্না দাইভর্সিইফাইদ ওইবা মওংদা ওইহল্লে। মতাং অসিগা মরি লৈননা, রাজস্থানগী কোতাদা, দেরী ফার্ম চলাইরিবা, অমনপ্রীত সিংগী মরমদা খঙহঞ্জনিংঙি। মহাক্না দেরীগী থবক অসিগা লোইননা বায়ো গ্যাস শিজিন্নবগী মাইকৈদা খোং থাংজিন্দুনা, বায়োগ্যাস প্লান্ত অনিশু লিংখৎখি। মসিনা মরম ওইরগা মৈ শিজিন্নবগী চাং চাদা ৭০ হন্থহল্লি। মহাক্কী অসিগুম্বা থবক অসিনা লৈবাক্কী অতৈ দেরী ফার্মরশিংবুশু লম অসোমদা থৱায় চংশিলহল্লি। অদুনা ঙসিদি দেরী কয়া বায়োগ্যাসকী থবক অসিদা পুক্নিং চঙশিন্নরে। মতৌ অসিগুম্বা কম্যুনিতী দ্রিভন ভেল্যু এদিশন অসিনা পুক্নিং থৌগৎপদা মতেং পাংঙি। লৈবাক পুম্বদা, ত্রেন্ত অসি লেপ্পা লৈতনা চত্থগনি হায়বগী থাজবা থমজগে।
ঐগী ইমুংগী মীওইশিং, মন কী বাত্তা ঙসিগী ওইনা হায়রিবশিং অসিখক থমজগে। হৌজিক্তি কুম্মৈ হরাওগী মতমশু নকশিল্লক্লবনি, ময়াম পুম্নকপু রক্সা বন্ধনগী য়াইফ-পাউজেল পীজরি। কুম্মৈ হরাওবা শরুক য়াবা মতমদা, ভোকেল ফোর লোকেলগী মন্ত্রবু শোইদনা নিংশিংবীয়ু। ‘আত্মানির্ভর ভারত’ হায়রিবা খোংজং অসি লৈবাক প্রজা পুম্বগী ওইবা মশা-মশাগী খোংজং অমনি। কুম্মৈ হরাওগী ওইবা মফমশিং অমদি অকোইবদা লৈবা মফমশিংবু ঐখোয়না লু-নান্না থমগদবনি; মদুবু কাওবীগনু মতম চুপ্পদা। মথংগী তাঞ্জা অমদা ‘মন কী বাত’তা অতোপ্পা হিরম কয়া অমগা লোইননা অমুক থেংনখিসি। লৈবাক্কী প্রজা কয়ামরুমগী হোৎনবগী মাইপাকপগী ৱারি কয়া অমগী মতাংদা অমুক খন্নখিসি। মতম অদুফাওবতংদি কাইনয়াথং পীনবীসি।
থাগৎচরি, খুরুমজরি।
Mission Chandrayaan has become a symbol of the spirit of New India, which wants to ensure victory, and also knows how to win in any situation. #MannKiBaat pic.twitter.com/hw9uj8JHvW
— PMO India (@PMOIndia) August 27, 2023
India is all set for the G-20 Leaders' Summit to be held next month. #MannKiBaat pic.twitter.com/Ki6sw3VTrm
— PMO India (@PMOIndia) August 27, 2023
Our Presidency of the G-20 is a People's Presidency, in which the spirit of public participation is at the forefront. #MannKiBaat pic.twitter.com/GGwyfko0JV
— PMO India (@PMOIndia) August 27, 2023
A few days ago the World University Games were held. Indian players displayed their best ever performance in these games. #MannKiBaat pic.twitter.com/1qo48k3p1a
— PMO India (@PMOIndia) August 27, 2023
With 'Sabka Prayas', the 'Har Ghar Tiranga' campaign became a resounding success. #MannKiBaat pic.twitter.com/NKD1lNBPh7
— PMO India (@PMOIndia) August 27, 2023
Sanskrit is one of the oldest languages in the world. Gladdening to see that people doing research on subjects like Yoga, Ayurveda and philosophy are now learning Sanskrit more and more. #MannKiBaat pic.twitter.com/fKBNe7efP1
— PMO India (@PMOIndia) August 27, 2023
When we connect with our mother tongue, we naturally connect with our culture. #MannKiBaat pic.twitter.com/L9JDyi73zv
— PMO India (@PMOIndia) August 27, 2023
Meet Bengaluru's Dhanapal Ji, whose passion for learning about heritage is commendable. #MannKiBaat pic.twitter.com/JdQruF1B6W
— PMO India (@PMOIndia) August 27, 2023
Meghalaya's Brian D. Kharpran has a great interest in speleology. He along with his team discovered more than 1700 caves and put the state on the World Cave Map. #MannKiBaat pic.twitter.com/HrolSQksOc
— PMO India (@PMOIndia) August 27, 2023
An interesting initiative of Banas Dairy of Gujarat... #MannKiBaat pic.twitter.com/kHMw9u4jrb
— PMO India (@PMOIndia) August 27, 2023
Know about Amanpreet Singh Ji, who is running a dairy farm in Rajasthan's Kota... #MannKiBaat pic.twitter.com/BIPlHvelKR
— PMO India (@PMOIndia) August 27, 2023
