প্রধান মন্ত্রী শ্রী নরেন্দ্র মোদী দিসেম্বর ১৭-১৮দা গুজরাতকী সুরত অমদি উত্তর প্রদেশকী বরানসীদা চৎকদৌরি। দিসেম্বর ১৭কী অয়ুক পুং ১০:৪৫ রোম তারকপা মতমদা, প্রধান মন্ত্রীনা সুরত এয়রপোর্তকী অনৌবা ইন্তিগ্রেতেদ তর্মিনেল বিল্দিং শঙ্গাগনি। অয়ুক পুং ১১:১৫ রোম তারকপা মতমদা, প্রধান মন্ত্রীনা সুরত দাইমন্দ বর্স শঙ্গাগনি। মদুংগী তুংদা, মহাক্না বরানসীদা চৎকনি, অমদি নুংথিল পুং ৩:৩০ রোম তাবদা, মহাক্না বিক্সিত ভারত সংকল্প য়াত্রাদা শরুক য়াগনি। নুংথিল পুং ৫:১৫ রোম তারকপদা, মহাক্না নমো ঘাত্তা কাসি তামিল সঙ্গমম ২০২৩ হৌদোক্কনি।
দিসেম্বর ১৮গী অয়ুক পুং ১০:৪৫ রোম তারকপা মতমদা, প্রধান মন্ত্রীনা স্বরবেদ মহামন্দিরদা চত্তুনা অয়ুক পুং ১১:৩০ রোম তাবদা মীয়ামগী থৌরম অমদা মদুবু শঙ্গাগনি। নুংথিল পুং ১ রোম তাবদা, প্রধান মন্ত্রীনা বিক্সিত ভারত সংকল্প য়াত্রাতা শরুক য়াগনি। তুংদা, মীয়ামগী থঔরম অমদা নুংথিল পুং ২:১৫ রোম তাবদা, প্রধান মন্ত্রীনা লুপা করোর ১৯,১৫০ রোমগী ওইগদবা য়াম্লবা দিভেলপমেন্ত প্রোজেক্তশিং শঙ্গাগনি অমদি উরেপ উয়ুং তমগনি।
সুরত্তা প্রধান মন্ত্রী
প্রধান মন্ত্রীনা সুরত এয়রপোর্তকী অনৌবা ইন্তিগ্রেতেদ তর্মিনেল বিল্দিং শঙ্গাগনি। তর্মিনেল বিল্দিং অসি পীক মতমদা লমদমসিগী ওইবা পেসেঞ্জর ১২০০ অমদি মালেমগী ওইবা পেসেঞ্জর ৬০০ মায়োক্নবা ঙম্বা তর্মিনেলনি অমদি পীক মতমগী কেপাসিতী অসি মখা তানা পেসেঞ্জর ৩০০০দা অমদি চহিদা পেসেঞ্জর লাখ ৫৫গী চাংদা হেনগৎহন্নবা ফীভম লৈ। তর্মিনেল বিল্দিং অসি, সুরত ময়োল্লমগী হোজঙ ওইবা মরম্না, লমদমসিগী নাৎ অমদি পারি পুরিগী লনশিংগা লোয়ননা দিজাইন তৌদুনা মনুং অমদি মপান অনিমক্তা, মফমসিদা লাকপা মীওইশিংদা মফমসিগী ওইবা ইথিল অমা পীনবা মওংদা শেম্বনি। অপগ্রেদ তৌরবা তর্মিনেল বিল্দিং অসিগী শক্তম অসিনা পেসেঞ্জরশিংগী এক্সপিরিএন্সপু সুরত ময়োল্লমগী ‘রন্দের’ রীজনগী অরিবা য়ুমশিংগী ইনাক খুল্লবা থাইনদগী চৎনরকপা উগী মচাক মথুমশিংগী মহাও অমা পীননবা পান্দম থম্লি। GRIHA IV কমপ্লাইএন্ত ওইবা এয়রপোর্ত অসিগী অনৌবা তর্মিনেল বিল্দিং অসিদা দবল ইনসুলেতেদ রুফিং সিস্তেম, ইনর্জী য়াম্না চঙহন্দনবা কেনোপীশিং, লো হীত গেন দবল গ্লেজিং য়ুনিৎ, রেন ৱাতর হার্ভেস্তিং, ৱাতর ত্রীতমেন্ত প্লান্ত, সিৱেজ ত্রীতমেন্ত প্লান্ত অমদি লেন্সস্কেপিংগীদমক রিসাইকল তৌরবা ঈশিং শীজিন্নবা অমসুং সোলার পৱার প্লান্তনচিংবা তোঙান তোঙানবা সস্তেনেবিলিতী ফীচরশিং হাপ্লি।
প্রধান মন্ত্রীনা সুরত দাইমন্দ বর্সসু শঙ্গাগনি। মসিনা মালেমগী দাইমন্দ অমদি সনা লিক্কোনগী করবারগী খ্বায়দগী চাউবা অমদি মতমগা চুনবা মফম অমা ওইরগনি। মসি নান্থোকত্রিবা অমদি নীংথিনা নান্থোক্লবা দাইমন্দ লোয়ননা সনা লিক্কোন লল্লোন ইতিক তৌবগী মালেমগী ওইবা মফম অমা ওইগনি। বর্স অসিদা ইম্পোর্ত-এক্সপোর্তকী স্তেত ওফ দি আর্ত ‘কস্তম্স ক্লিয়রেন্স হাউস’; সনা লিক্কোনগী রিতেল বিজিনেসশিংগী জিৱেল্লরী মোল অমদি সেফ ভোল্ত য়াওবা ইন্তরনেস্নেল বেঙ্কিংগী খুদোংচাবশিং য়াওরি।
বরানসিদা প্রধান মন্ত্রী
দিসেম্বর ১৭তা, প্রধান মন্ত্রীনা বরানসিগী কত্তিং মেমোরিএল স্কুল গ্রাউন্দদা ভিক্সিত ভারত সংকল্প য়াত্রাদা শরুক য়াগনি। মফমদুদা, প্রধান মন্ত্রীনা পি.এম. অৱাস, পি.এম. স্বানিথী, পি.এম. উজ্জ্বলানচিংবা লৈঙাক্কী তোঙান তোঙানবা স্কীমশিংগী বেনিফিসরীশিংগা ৱারী শানগনি।
মহাক্কী এক ভারত স্রেস্থ ভারতকী মঙলান পরিংদা, প্রধান মন্ত্রীনা নমো ঘাত্তা কাসি তামিল সঙ্গমম ২০২৩ হৌদোক্কনি। থৌরমদুদা, প্রধান মন্ত্রীনা কন্যাকুমারী – বরানসি তামিল সঙ্গমম ত্রেনসু লমথাগনি।
দিসেম্বর ১৮দা, প্রধান মন্ত্রীনা বরানসীগী উমরহাদা নৌনা শাগৎপা স্বরবেদ মহামন্দির শঙ্গাগনি। মহাক্না থৌরমদুদা মহামন্দিরবু নীংজবশিংগী মফমদসু ৱা ঙাংগনি।
মদুগী মতুংদা, প্রধান মন্ত্রীনা মহাক্কী কন্সতিত্যুএন্সীগী খুঙ্গংগী মফম অমা ওইরিবা সেৱাপুরীদা পাঙথোকদা ভিক্সিত ভারত সংকল্প য়াত্রা থৌরমদা শরুক য়াগনি। মহাক্না কাসি সনসদ খেল প্রতিয়োগিতা ২০২৩দা শরুক য়ারিবশিংগী শান্ন-খোৎনবগী থৌরম খরসু মীৎয়েঙ তাগনি। মদুগী তুংদা, মহাক্না থৌরমশিংদুগী অথোইবশিংগা ৱারী শাগনি। মহাক্না থৌরম অদুদা লৈঙাক্কী তোঙান তোঙানবা স্কীমশিংগী বেনিফিসরীশিংগসু ৱারী শানগনি।
হৌখিবা চহি মাপনসিদা, প্রধান মন্ত্রীনা বরানসীগী শক্তমদা অহোংবা পুরক্নবা অমদি বরানসী অমদি অকোয়বগী লমদমশিংগী মীয়ামগী পুন্সি মহিংদা হেন্না ফগৎহন্নবগী লমদা অখন্নবা মীৎয়েঙ থমদুনা লাক্লি। মায়কৈ অসিদা অতোপ্পা খোঙথাং অমা থাংজিন্দুনা, প্রধান মন্ত্রীনা লুপা করোর ১৯,১৫০ রোমগী ওইগদবা তোঙান তোঙানবা চাওখৎ থৌরাংগী প্রোজেক্তশিং মীয়ামগী মফমদা কত্থোক্কনি অমদি উরেপ উয়ুং তমগনি।
প্রধান মন্ত্রীনা লুপা করোর ১০,৯০০ রোম চঙনা শেমগৎপা নিউ পন্দিৎ দীনদয়াল উপধ্যায় নগর-নিউ ভাউপুর দেদিকেতেদ ফ্রৈত কোরিদোর প্রোজেক্ত শঙ্গাগনি। থৌরমদুদা শঙ্গাগদবা অতোপ্পা রেলৱে প্রোজেক্তশিংগী মনুংদা বালিয়া-গাজিপুর সিতী রেল লাইন দব্লিং প্রোজেক্ত; ইন্দরা-দোহরিঘাত রেল লাইন গোজ কনভর্জন প্রোজেক্তনিংবশিং য়াওরি।
প্রধান মন্ত্রীনা বরানসী-নই দিল্লী বন্দে ভারত এক্সপ্রেস ত্রেন, দোহরিঘা-মাউ মেমু ত্রেন অমদি লোং হোল গুদ্স ত্রেন অনিসু নৌনা শঙ্গাগদৌরিবা দেদিকেতেদ ফ্রৈত কোরিদোর অসিদা লমথাগনি। মহাক্না বনারস লোকোমোতিব ৱর্ক্সনা পুথোকপা ১০,০০০ শুবা লোকোমোতিবসু লমথাগনি।
প্রধান মন্ত্রীনা লুপা করোর ৩৭০ হেন্না চঙনা শাবা গ্রীন-ফীল্দ সিবপুর-ফুলৱারিয়া-লহরতারা লম্বীগা অমদি আর.ও.বি. অনিসু শঙ্গাগনি। মসিনা বরানসী ময়োল্লমগী অৱাং অমদি খা থংবা শরুক্কগী মরক্তা চত্থোক চৎশিন তৌবদা চঙবা মতম হন্থহনগনি অমদি মফমদুদা লাক্লিবা মীওইশিংগী নুংঙাইবসু হেনগৎহনগনি। মখা তানা, প্রধান মন্ত্রীনা শঙ্গাগদবা মরুওইবা প্রোজেক্তশিংগী মনুংদা লম্বী ২০ শেমজিনবা অমদি পাকথোকহনবা; কাইথী খুঙ্গংগী সঙ্গম ঘাত অমদি পন্দিত দীনদয়াল উপধ্যায় হোস্পিতালগী রেসিদেন্সিএল বিল্দিংশিং য়াওরি।
মসিগী মথক্তা, পুলিস পর্নসোনেলশিংগী লৈফম চাফমগী মথৌ তাবা পীননবগীদমক, পুলিস লাইন অমসুং পি.এ.সি. ভুলনপুরদা ফবুং ২০০ অমদি ১৫০গী মথোল কয়া লোঙবা বেরেক বিল্দিং অনি, মফম ৯দা শেমগৎলিবা স্মার্ত বস সেল্তরশিং অমদি অলয়পুরদা শাগৎলিবা কিলোৱাত ১৩২গী সব-স্তেসনসু প্রধান মন্ত্রীনা শঙ্গাগনি।
স্মার্ত সিতী মিসনগী মখাদা, মচা খায়বা তুরিস্ত ইনফোর্মেসনগী ৱেবসাইত অমা অমদি য়ুনিফাইদ তুরিস্ত পাস সিস্তেম প্রধান মন্ত্রীনা হাংদোক্কনি। য়ুনিফাইদ পাস অসিনা শ্রী কাসি বিস্বানাথ ধাম, গঙ্গা ক্রুজ, অমদি সর্নাথকী মৈ অমদি খোঞ্জেলগী সোগী ক্যু.আর. কোদ সর্ভিসকা পুনশিল্লবা সিঙ্গল প্লেৎফোর্ম তিকেৎ বুকিং ফংহনগনি।
প্রধান মন্ত্রীনা লুপা করোর ৬৫০০ হেনবগী তোঙান তোঙানবা প্রোজেক্তশিংগী উরেপ উয়ুংসু তমগনি। রিনিউএবল ইনর্জী রিসোর্সশিং পুথোকপগী চাং হেনগৎহন্নবগীদমক, প্রধান মন্ত্রীনা চিত্রকুত দিস্ত্রিক্ততা লুপা করোর ৪০০০ রোম চঙনা শাগৎকদবা মেগাৱাত ৮০০গী সোলার পৱার পার্ক অমা উরেপ উয়ুং তমগনি। পোত্রোলিয়ম সপ্লাই চেনগী ফীভম ফগৎহন্নবগীদমক, মহাক্না মির্জাপুরদা লুপা করোর ১০৫০ হেন্না চঙনা শাগৎকদবা অনৌবা পেত্রোলিয়ম ওইল তর্মিনেল অমগী উরেপ উয়ুংসু তমগনি।
প্রধান মন্ত্রীনা উরেপ উয়ুং তমগদবা অতৈ প্রোজেক্তশিংদি বরানসি-ভদোহী এন.ঐচ. ৭৩১ বি (পেকেজ-২) লুপা করোর ৯০০ চঙনা পাকথোকপা; জল জীবন মিসনগী মখাদা লুপা করোর ২৮০ চঙনা শাগৎকদবা খুঙ্গংগী থক্নবগী ঈশিংগী স্কীম ৬৯; বি.ঐচ.য়ু. ত্রোমা সেন্তরগী ফমুং ১৫০ লৈবা ক্রিতিকেল কেয়র য়ুনিৎ; গঙ্গা ঘাত ৮ নৌনা শেমগৎ শাগৎপা, দিব্যং রেসিদেন্সিএল সেকোন্দরী স্কুল শাবা অমদি অতৈ অতৈনি।
