અમે, ભારત અને ઓસ્ટ્રેલિયાના પ્રધાનમંત્રીઓ, અમારા બંને દેશો વચ્ચે સતત વધુ ગાઢ બનતા દ્વિપક્ષીય સંબંધોથી પ્રેરિત થઈ, અમારા દેશો વચ્ચેની વ્યૂહાત્મક ભાગીદારીને વધુ મજબૂત બનાવવાના દૃઢ સંકલ્પ સાથે તથા મુક્ત, શાંતિપૂર્ણ, સ્થિર અને સમૃદ્ધ ઇન્ડો-પેસિફિક પ્રદેશ માટેની સમાન મહત્વાકાંક્ષાથી પ્રેરિત થઈને, આથી સંરક્ષણ અને સુરક્ષા સહયોગ પરના આ સંયુક્ત ઘોષણાપત્ર (જોઇન્ટ ડિક્લેરેશન) માટે પ્રતિબદ્ધતા જાહેર કરીએ છીએ.
અમે વર્ષ 2020માં સ્થાપિત થયેલી અમારી વ્યાપક વ્યૂહાત્મક ભાગીદારી (Comprehensive Strategic Partnership – CSP) ના મહત્વ અને સશક્તતાની પુનઃપુષ્ટિ કરીએ છીએ. અમારી CSPની શરૂઆતથી જ અમારી વ્યૂહાત્મક સમાનતા વધુ ગાઢ બની છે, અમારા આર્થિક સંબંધો વધુ મજબૂત બન્યા છે અને અમારા બંને દેશોના લોકો વચ્ચેના સંબંધો—જે આપણા રાષ્ટ્રોને જોડતો જીવંત સેતુ છે—વધુ દૃઢ બન્યા છે. અમે નોંધીએ છીએ કે દ્વિપક્ષીય તેમજ બહુપક્ષીય સ્તરે, જેમાં ક્વાડ જેવા પ્રાદેશિક મંચો અને અન્ય બહુપક્ષીય સંસ્થાઓ દ્વારા અન્ય ભાગીદારો સાથેનો અમારો ગાઢ સહયોગ પણ સામેલ છે, તે બંને દેશોના હિતમાં છે અને અમારા સહિયારા પ્રદેશની સુરક્ષા તથા સમૃદ્ધિમાં મહત્વપૂર્ણ યોગદાન આપે છે.
અમે 2009ના ભારત-ઓસ્ટ્રેલિયા સંયુક્ત સુરક્ષા સહકાર ઘોષણા દ્વારા પ્રોત્સાહન આપવામાં આવેલી અમારી ભાગીદારીમાં થયેલી મોટી પ્રગતિ પર પણ પ્રતિબિંબિત કરીએ છીએ. અમે વિદેશ મંત્રીઓના માળખાગત સંવાદ (FMFD), 2+2 વિદેશ અને સંરક્ષણ મંત્રી સ્તરીય સંવાદ અને સંરક્ષણ મંત્રીઓના સંવાદ સહિત વિવિધ દ્વિપક્ષીય પદ્ધતિઓ દ્વારા ભાગીદારીમાં સમૃદ્ધ યોગદાનની પ્રશંસા કરીએ છીએ.
અમે ભૌગોલિક-વ્યૂહાત્મક અનિશ્ચિતતા અને પ્રાદેશિક શાંતિ તથા સ્થિરતા સામેના જોખમો અંગે ચિંતા વ્યક્ત કરીએ છીએ. અમે તમામ પક્ષોને શાંતિપૂર્ણ રીતે સાથે મળીને કામ કરવા પ્રોત્સાહિત કરીએ છીએ અને આંતરરાષ્ટ્રીય કાયદા અનુસાર બળપ્રયોગ અથવા બળજબરી કે ધમકી આપ્યા વિના વિવાદોના ઉકેલ માટે આહ્વાન કરીએ છીએ.
અમે એક મુક્ત, શાંતિપૂર્ણ, સ્થિર અને સમૃદ્ધ ઇન્ડો-પેસિફિક ક્ષેત્ર પ્રત્યેની અમારી અતૂટ પ્રતિબદ્ધતાનો પુનરોચ્ચાર કરીએ છીએ, જે નીચેની બાબતો પર આધારિત છે: આંતરરાષ્ટ્રીય કાયદાના પાલન પર આધારિત નિયમ-આધારિત વ્યવસ્થા; સાર્વભૌમત્વ અને પ્રાદેશિક અખંડિતતા પ્રત્યે આદર; નૌકાનયન અને ઉડ્ડયનની સ્વતંત્રતા સહિત 1982ના યુનાઇટેડ નેશન્સ કન્વેન્શન ઑન ધ લો ઑફ ધ સી (UNCLOS) ના પાલન પર આધારિત એક મુક્ત, સ્થિર અને સુરક્ષિત દરિયાઈ ક્ષેત્ર; અને અસરકારક, સમાવેશી તેમજ પારદર્શક સંસ્થાઓ.
અમે આ પ્રદેશોમાં પડકારોનો સામનો કરવા માટે મુખ્ય મંચ તરીકે ઇન્ડિયન ઓશન રિમ એસોસિએશન (IORA), ASEAN અને ASEAN-કેન્દ્રિત પ્રાદેશિક સ્થાપત્ય અને પેસિફિક આઇલેન્ડ્સ ફોરમ (PIF) ને અમારા સમર્થનની પુનઃપુષ્ટિ કરીએ છીએ.
અમે સ્વીકાર કરીએ છીએ કે બદલાતી વ્યૂહાત્મક પરિસ્થિતિઓને પહોંચી વળવા માટે આપણી ભાગીદારીનો વિકાસ થવો જ જોઈએ, અને અમે અદ્યતન, સંકલિત અને ઉચ્ચ સ્તરીય સંરક્ષણ અને સુરક્ષા ભાગીદારીને ઝડપી બનાવવા માટે પ્રતિબદ્ધ થઈએ છીએ. અમે વ્યૂહાત્મક આદાનપ્રદાનને મજબૂત કરવાનું ચાલુ રાખીશું અને નિયમિત મંત્રી સ્તરીય જોડાણો યોજીશું જે અમારા વ્યૂહાત્મક હિતોની એકરૂપતાને પ્રતિબિંબિત કરે છે. સામૂહિક શક્તિ વધારવા માટે અમે સંરક્ષણ અને સુરક્ષા સહયોગના લાંબા ગાળાના વિઝનને સ્વીકાર કરીએ છીએ. આ સહયોગ બંને દેશોની સુરક્ષામાં ફાળો આપશે અને પ્રાદેશિક શાંતિ તેમજ સુરક્ષામાં મહત્વપૂર્ણ યોગદાન આપશે.
અમે અમારા વ્યાપક સંરક્ષણ સહયોગને મજબૂત કરવા, વ્યૂહાત્મક સંવાદને વધુ ગાઢ બનાવવા અને સહયોગને વધુ તીવ્ર બનાવવા માટે પ્રતિબદ્ધ થઈએ છીએ, જેમાં નીચેની બાબતોનો સમાવેશ થાય છે:
a. ઇન્ડો-પેસિફિકમાં સંરક્ષણ-સંબંધિત એવા વિકાસ પર પરામર્શ (કન્સલ્ટેશન) હાથ ધરવા જે સહિયારા હિતોને અસર કરતા હોય;
b. ભાગીદારો સહિત, અમારી સંરક્ષણ કવાયતોની જટિલતા વધારવી;
c. સંરક્ષણ દળો વચ્ચે આંતર-કાર્યક્ષમતા અને માહિતી શેર કરવાના પ્રયાસોને વેગ આપવો;
d. એકબીજાના પ્રદેશોમાંથી એરક્રાફ્ટ (વિમાનો) ની તૈનાતીનો વિસ્તાર કરવો;
e. સંરક્ષણ દળના કર્મચારીઓ વચ્ચે જોડાણોને વધુ ગાઢ બનાવવા, જેમાં વિનિમય, શિક્ષણ અને તાલીમ અને સંપર્ક ભૂમિકાઓનો સમાવેશ થાય છે; અને
f. કુશળ સંરક્ષણ કાર્યબળ માટે ભરતીમાં સહયોગ કરવાની તકોની શોધ કરવી.
અમે અમારા સંરક્ષણ, સુરક્ષા અને આર્થિક હિતોમાં દરિયાઈ ક્ષેત્રના કેન્દ્રસ્થાને ઓળખીએ છીએ, અને દરિયાઈ સુરક્ષા સહયોગની ઊંડાઈ, સુસંસ્કૃતતા અને નિયમિતતામાં વધારો કરીશું. અમે 'ભારત-ઓસ્ટ્રેલિયા મેરિટાઇમ સિક્યુરિટી કોઓપરેશન રોડમેપ' દ્વારા દરિયાઈ સહયોગને મજબૂત બનાવીશું.
અમે એકીકરણ (ઇન્ટિગ્રેશન), ઉદ્યોગ જોડાણ અને સપ્લાય ચેઇનની સ્થિતિસ્થાપકતાના નિર્માણને પ્રોત્સાહિત કરીને બંને પક્ષોના સંરક્ષણ ઉદ્યોગોની વધતી જતી સંભાવનાઓને અપનાવીશું. અમે અમારા સંરક્ષણ ઇનોવેશન ઇકોસિસ્ટમ્સ વચ્ચેના સહયોગને વધુ ગાઢ બનાવીશું અને અદ્યતન સંરક્ષણ વિજ્ઞાન અને ટેકનોલોજી સહયોગ માટેની વ્યવસ્થાઓ વિકસાવીશું.
શાંતિ રક્ષા કામગીરીમાં લિંગ સમાનતા જાળવવા અને 'મહિલા, શાંતિ અને સુરક્ષા' એજન્ડાને આગળ વધારવા માટેની આપણી પ્રતિબદ્ધતાની પુષ્ટિ કરતા, અમે સંઘર્ષોની રોકથામમાં, રાહત અને પુનઃપ્રાપ્તિના પ્રયાસો પૂરા પાડવામાં અને કાયમી શાંતિના નિર્માણમાં મહિલાઓની સાર્થક ભાગીદારી અને નેતૃત્વને પ્રોત્સાહન આપવા માટે કામ કરીશું.
અમે પ્રાદેશિક આર્થિક સમૃદ્ધિ અને સ્થિતિસ્થાપકતાને ટેકો આપવા માટે દ્વિપક્ષીય રીતે અને ભાગીદારો સાથે મળીને સહયોગ કરવા પ્રતિબદ્ધ થઈએ છીએ. અમે મહત્વપૂર્ણ ખનિજો અને સ્વચ્છ ઊર્જા ટેકનોલોજી સહિત અન્ય ક્ષેત્રો માટે વધુ વૈવિધ્યસભર અને સ્થિતિસ્થાપક સપ્લાય ચેઇન, મહત્વપૂર્ણ ઇન્ફ્રાસ્ટ્રક્ચર અને કનેક્ટિવિટી વિકસાવીશું.
અમે એક એવું ટેકનોલોજી વાતાવરણ તૈયાર કરવામાં સાથે મળીને કામ કરીશું જે સુરક્ષિત અને સ્થિતિસ્થાપક ઇન્ડો-પેસિફિક માટેના અમારા સહિયારા વિઝનને પૂર્ણ કરતું હોય. અમે 'ઓસ્ટ્રેલિયા-ઇન્ડિયા પાર્ટનરશિપ ઓન સાયબર, ક્રિટિકલ ટેકનોલોજીસ એન્ડ સપ્લાય ચેઇન્સ' (Australia-India PACTS) હેઠળ અમારી સાયબર સુરક્ષા અને મહત્વપૂર્ણ તથા ઉભરતી ટેકનોલોજીના સહયોગ અને માહિતીના આદાનપ્રદાનની વ્યવસ્થાઓની સંભાવનાઓનો લાભ લેવા સાથે મળીને કામ કરીશું અને વ્યૂહાત્મક ટેકનોલોજી પર સહયોગને પ્રોત્સાહન આપીશું.
અમે અમારા પ્રદેશમાં આતંકવાદી જોખમો, જેમાં સંસ્થાઓ અને વ્યક્તિઓનો સમાવેશ થાય છે, તે અંગે માહિતીનું આદાનપ્રદાન વધારવા માટે પ્રતિબદ્ધ થઈએ છીએ અને નીચેના ક્ષેત્રો સહિત હિંસક ઉગ્રવાદ અને આતંકવાદનો સામનો કરવા માટે અદ્યતન સહયોગની તકો શોધીશું:
a. નવી અને ઉભરતી ટેકનોલોજી;
b. આતંકવાદનું નાણાકીય પોષણ;
c. મહત્વપૂર્ણ ઇન્ફ્રાસ્ટ્રક્ચર અને ભીડવાળી જગ્યાઓ;
d. દરિયાઈ ક્ષેત્ર; અને
e. ઓનલાઇન કટ્ટરપંથ.
અમે વર્ષ 2023માં હસ્તાક્ષર કરાયેલા 'માઇગ્રેશન એન્ડ મોબિલિટી પાર્ટનરશિપ અરેન્જમેન્ટ' હેઠળ અમારો સહયોગ ચાલુ રાખીશું, જે ગેરકાયદેસર સ્થળાંતર, લોકોની દાણચોરી અને માનવ તસ્કરીને રોકવા માટે સહયોગ કરવાના માર્ગો દર્શાવે છે. અમે આંતરરાષ્ટ્રીય સંગઠિત અપરાધનો સામનો કરવા માટે પણ અમારો સહયોગ ચાલુ રાખીશું.
અમે પરમાણુ શસ્ત્રોથી મુક્ત એક શાંતિપૂર્ણ વિશ્વ ઈચ્છીએ છીએ, અને આ હેતુ માટે અપ્રસાર (નોન-પ્રોલિફરેશન) તેમજ વૈશ્વિક, સંપૂર્ણ, બિન-ભેદભાવપૂર્ણ અને ચકાસણીપાત્ર પરમાણુ નિઃશસ્ત્રીકરણ પ્રત્યેની અમારી પ્રતિબદ્ધતાનો પુર્નોચ્ચાર કરીએ છીએ.
અમે ત્રિપક્ષીય સહયોગ વ્યવસ્થાઓ અને 'ઇન્ડો-પેસિફિક ઓશન્સ ઇનિશિએટિવ' દ્વારા ભાગીદારો સાથે વધુ ગાઢ જોડાણ સહિત અન્ય ઇન્ડો-પેસિફિક ભાગીદારો સાથે સતત સહયોગ માટે પ્રતિબદ્ધ છીએ. એક મુક્ત, સ્થિર, શાંતિપૂર્ણ અને સમૃદ્ધ ઇન્ડો-પેસિફિક ક્ષેત્ર માટેના આપણા હકારાત્મક વિઝન તરફ ક્ષમતા અને સહયોગના નિર્માણ માટે આપણે યુનાઇટેડ સ્ટેટ્સ ઑફ અમેરિકા (યુએસએ) અને જાપાન સાથે આપણા સહયોગનો વિસ્તાર કરીશું.
પ્રાદેશિક શાંતિ, સુરક્ષા, સમૃદ્ધિ અને સ્થિતિસ્થાપકતા પ્રત્યેની અમારી સહિયારી પ્રતિબદ્ધતાને સ્વીકારીને, અમે ઝડપી, સંકલિત અને ટકાઉ આપત્તિ પ્રતિભાવ આપવા માટે માનવતાવાદી સહાય અને આપત્તિ રાહત (હ્યુમેનિટેરિયન આસિસ્ટન્સ એન્ડ ડિઝાસ્ટર રિલીફ - HADR) માં સહયોગને વધુ ગાઢ બનાવવા પ્રતિબદ્ધ છીએ. અમે નીચેની બાબતો સહિત અમારા સહયોગને મજબૂત કરીશું:
a. માહિતીનું આદાનપ્રદાન અને નિષ્ણાતોની આપ-લે; અને
b. સંયુક્ત એચએડીઆર કવાયતો, જેમાં 'ક્વાડ ઇન્ડો-પેસિફિક લોજિસ્ટિક્સ નેટવર્ક' નો સમાવેશ થાય છે, જે મોટા પાયાની કુદરતી આપત્તિઓ સામે નાગરિક પ્રતિભાવને ટેકો આપે છે.
ત્રીજા દેશોમાં પ્રાદેશિક અને વૈશ્વિક સ્થળાંતર કામગીરીને ટેકો આપવા સહિત આપત્તિઓ અને કટોકટી દરમિયાન આકસ્મિક આયોજન, સંયુક્ત પ્રતિભાવ અને સંકલન વહેંચવાની તકોની શોધ કરવા માટે અમે પ્રતિબદ્ધ છીએ.
અમારી વ્યાપક વ્યૂહાત્મક ભાગીદારી (CSP) ની ભાવનાથી, અમે એક શાંતિપૂર્ણ અને સ્થિર ઇન્ડો-પેસિફિક ક્ષેત્રને ટેકો આપવા માટે આ મહત્વાકાંક્ષી એજન્ડાને સંપૂર્ણપણે અમલમાં મૂકવા માટે સંપૂર્ણપણે પ્રતિબદ્ધ છીએ.
