In Pictures: PM Modi's visit to UAE

પ્રધાનમંત્રી શ્રી નરેન્દ્ર મોદીએ આજે સંયુક્ત આરબ અમીરાતની સત્તાવાર મુલાકાત લીધી હતી. એરપોર્ટ પર UAEના રાષ્ટ્રપતિ હિઝ હાઈનેસ શેખ મોહમ્મદ બિન ઝાયદ અલ નાહ્યાન દ્વારા તેમનું સ્વાગત કરીને ઔપચારિક સ્વાગત કરવામાં આવ્યું હતું.

બંને નેતાઓએ શ્રેણીબદ્ધ વિગતવાર ચર્ચાઓ હાથ ધરી હતી, જે દરમિયાન પ્રધાનમંત્રીએ યુએઈ પર થયેલા હુમલાઓની ભારતની સખત નિંદા અને યુએઈના નેતૃત્વ તથા ત્યાંના લોકો પ્રત્યે તેની એકજૂથતાનો પુનરોચ્ચાર કર્યો હતો. પ્રધાનમંત્રીએ હોર્મુઝની સામુદ્રધુની દ્વારા સુરક્ષિત પરિવહન માર્ગ અને અવરોધ વિનાના નેવિગેશનને સુનિશ્ચિત કરવાની તરફેણમાં ભારતનું સ્પષ્ટ વલણ પણ વ્યક્ત કર્યું હતું, જે કાયમી પ્રાદેશિક શાંતિ અને સ્થિરતા તેમજ ઊર્જા અને ખાદ્ય સુરક્ષા માટે મહત્વપૂર્ણ છે.

નેતાઓએ દ્વિપક્ષીય સંબંધોના સમગ્ર પાસાઓની પણ સમીક્ષા કરી હતી અને ઊર્જા, વેપાર, રોકાણ, સંરક્ષણ, સુરક્ષા, ફિનટેક, ઇન્ફ્રાસ્ટ્રક્ચર, શિક્ષણ, સંસ્કૃતિ અને લોકો-વચ્ચેના સંબંધો સહિત બહુવિધ ક્ષેત્રોમાં વ્યાપક વ્યૂહાત્મક ભાગીદારીના ગહન થવાને આવકારી હતી. તેઓએ ભારત-યુએઈ વ્યાપક આર્થિક ભાગીદારી કરાર (CEPA) ની સફળતાનો સ્વીકાર કર્યો હતો, જેના કારણે દ્વિપક્ષીય વેપાર નવી ઊંચાઈઓ પર પહોંચ્યો છે.

બંને નેતાઓએ જીવંત અને વધતી જતી દ્વિપક્ષીય ઊર્જા ભાગીદારીની પ્રશંસા કરી હતી, જેમાં યુએઈએ ક્રૂડ ઓઇલ, LNG અને LPG પુરવઠાના સંદર્ભમાં ભારતની ઊર્જા સુરક્ષામાં મહત્વપૂર્ણ ભાગીદાર તરીકેની પોતાની ભૂમિકા જાળવી રાખી છે. નેતાઓ વ્યાપક ઊર્જા ભાગીદારી માટે નવી પહેલોને પ્રોત્સાહન આપવા સંમત થયા હતા. આ સંદર્ભમાં, તેઓએ ભારતના વ્યૂહાત્મક પેટ્રોલિયમ અનામતમાં યુએઈની ભાગીદારીને 30 મિલિયન બેરલ સુધી વધારવા અને ભારતમાં વ્યૂહાત્મક ગેસ અનામત સ્થાપવા માટે સાથે મળીને કામ કરવા માટે ઇન્ડિયન સ્ટ્રેટેજિક પેટ્રોલિયમ રિઝર્વ્સ લિમિટેડ અને અબુ ધાબી નેશનલ ઓઇલ કંપની વચ્ચે વ્યૂહાત્મક સહયોગ કરારના નિષ્કર્ષને આવકાર્યો હતો. તેઓએ લોંગ-ટર્મ એલપીજી પુરવઠા અંગે ઇન્ડિયન ઓઇલ લિમિટેડ (IOCL) કંપની અને અબુ ધાબી નેશનલ ઓઇલ કંપની (ADNOC) વચ્ચે થયેલી વ્યવસ્થાને પણ આવકારી હતી.

બંને નેતાઓએ યુએઈની સંસ્થાઓ દ્વારા ભારતમાં 5 અબજ યુએસ ડોલરના રોકાણની જાહેરાતને આવકારી હતી. આમાં એમિરેટ્સ ન્યૂ ડેવલપમેન્ટ બેંક (ENBD) દ્વારા ભારતીય આરબીએલ બેંક (RBL Bank) માં 3 અબજ યુએસ ડોલરનું રોકાણ, અબુ ધાબી ઇન્વેસ્ટમેન્ટ ઓથોરિટી (ADIA) દ્વારા ભારતના નેશનલ ઇન્ફ્રાસ્ટ્રક્ચર એન્ડ ઇન્વેસ્ટમેન્ટ ફંડ (NIIF) સાથે ભારતમાં અગ્રતા ધરાવતા ઇન્ફ્રાસ્ટ્રક્ચર પ્રોજેક્ટ્સમાં 1 અબજ યુએસ ડોલરનું રોકાણ અને ઇન્ટરનેશનલ હોલ્ડિંગ કંપની દ્વારા ભારતના સન્માન કેપિટલમાં 1 અબજ યુએસ ડોલરના રોકાણનો સમાવેશ થાય છે. આ રોકાણો દ્વિપક્ષીય વ્યૂહાત્મક રોકાણ ભાગીદારીને મજબૂત કરવાની સાથે, ભારતની વિકાસ યાત્રા પ્રત્યે યુએઈની સતત અને લાંબા ગાળાની પ્રતિબદ્ધતાને રેખાંકિત કરે છે.

નેતાઓએ વ્યાપક વ્યૂહાત્મક ભાગીદારીના એક મહત્વપૂર્ણ સ્તંભ તરીકે સતત અને મજબૂત દ્વિપક્ષીય સંરક્ષણ સહયોગનો સ્વીકાર કર્યો હતો. તેમણે મુલાકાત દરમિયાન બંને દેશો વચ્ચે વ્યાપક સંરક્ષણ ભાગીદારી માટેના માળખા (Framework for the Strategic Defence Partnership) પર હસ્તાક્ષર થવાને આવકાર્યા હતા. આ અંતર્ગત, બંને પક્ષો સંરક્ષણ ઔદ્યોગિક સહયોગ અને નવીનતા તથા અદ્યતન ટેકનોલોજી, તાલીમ, કવાયત, દરિયાઈ સુરક્ષા, સાયબર સંરક્ષણ, સુરક્ષિત સંચાર અને માહિતી વિનિમય પર સહયોગને વધુ ગાઢ બનાવવા માટે સંમત થયા છે.

બંને નેતાઓએ મુલાકાત દરમિયાન નીચેના વધારાના દસ્તાવેજોના નિષ્કર્ષના પણ સાક્ષી બન્યા હતા, જે દ્વિપક્ષીય સહયોગને વધુ મજબૂત કરશે:

. ભારત સરકાર દ્વારા શરૂ કરાયેલ મેરિટાઇમ ડેવલપમેન્ટ ફંડ સ્કીમ હેઠળ ઓફશોર ફેબ્રિકેશન સહિત વાડિનાર ખાતે શિપ રિપેર ક્લસ્ટર સ્થાપવા અંગે કોચિન શિપયાર્ડ લિમિટેડ અને ડ્રાયડોક્સ વર્લ્ડ, દુબઈ વચ્ચે MoU થયા.

· શિપ રિપેરમાં કૌશલ્ય વિકાસ અંગે કોચિન શિપયાર્ડ લિમિટેડ, ડ્રાયડોક્સ વર્લ્ડ દુબઈ અને સેન્ટર ઓફ એક્સેલન્સ ઇન મેરિટાઇમ એન્ડ શિપબિલ્ડિંગ (CEMS) વચ્ચે ત્રિપક્ષીય MoU થયા. આ કુશળ દરિયાઈ કાર્યબળને એકત્ર કરવા, તાલીમ આપવા અને રોજગારી આપવા માટે એક માળખું સ્થાપિત કરે છે, ભારતીય દરિયાઈ કાર્યબળની ક્ષમતાઓમાં વધારો કરે છે અને ભારતને કુશળ શિપબિલ્ડિંગ અને શિપ રિપેર વ્યાવસાયિકો માટેના હબ તરીકે સ્થાપિત કરે છે.

· CDAC, ભારત અને G-42, UAE વચ્ચેની ભાગીદારીમાં 8 એક્ઝાફ્લોપ સુપર કોમ્પ્યુટ ક્લસ્ટર સ્થાપવા માટેની ટર્મ શીટ પર સંમતિ થઈ.

બંને નેતાઓએ મૈત્રી - MAITRI (માસ્ટર એપ્લિકેશન ફોર ઇન્ટરનેશનલ ટ્રેડ એન્ડ રેગ્યુલેટરી ઇન્ટરફેસ ઇન્ટરફેસ) નો ઉપયોગ કરીને વર્ચ્યુઅલ ટ્રેડ કોરિડોરના સંચાલનને પણ આવકાર્યું હતું. આ ડિજિટલ માળખું, બંને બાજુના કસ્ટમ્સ અને પોર્ટ સત્તાવાળાઓને જોડે છે, કાર્ગોની અવરજવરને સુવ્યવસ્થિત કરશે અને ખર્ચ તથા પરિવહન સમય બંનેમાં ઘટાડો કરશે, જેનાથી વધુ કાર્યક્ષમ વેપાર પ્રવાહ સક્ષમ બનશે.

પ્રધાનમંત્રીએ રાષ્ટ્રપતિ હિઝ હાઈનેસ શેખ મોહમ્મદ બિન ઝાયદ અલ નાહ્યાનનો તેમના ઉષ્માભર્યા સ્વાગત અને ઉદાર આતિથ્ય સત્કાર બદલ આભાર માન્યો હતો અને તેમને વહેલી તકે ભારત આવવાનું આમંત્રણ આપ્યું હતું.