શેર
 
Comments

ભારત માતા કી જય..!

મંચ પર બિરાજમાન માધવાભાઈ વાવિયા, ભાઈ શ્રી ગણેશભાઈ ચૌધરી, શ્રીમાન ભાણજીભાઈ રાવલિયા, શ્રી મનજીતભાઈ, શ્રી અંબાણીભાઈ, ભાઈ શ્રી નારાયણભાઈ, શ્રી લક્ષ્મણભાઈ, ભારતીય જનતા પાર્ટીના પ્રમુખ ભાઈ શ્રી જયંતીભાઈ ભાનુશાળી, એ.પી.એમ.સી. ના ચેરમેન શ્રી વાઘજીભાઈ, ભાઈ પંકજ મહેતા, શ્રીમાન ગજેન્દ્રસિંહ, ગંગાબહેન તથા સૌ સ્વજનો અને આ ધોમધખતા તાપમાં આટલી મોટી સંખ્યામાં ઉપસ્થિત વાગડના વહાલા નાગરિક ભાઈઓ અને બહેનો...!

આજે હું આપની વચ્ચે આ કચ્છનું નવું વર્ષ મનાવવા માટે આવ્યો છું અને આ કચ્છના નવ વર્ષ નિમિત્તે હું આપ સૌ કચ્છી ભાઈઓ-બહેનોને, વાગડવાસીઓને નવા વર્ષની અંત:કરણ પૂર્વક શુભકામનાઓ પાઠવું છું. આ નવું વર્ષ આ કચ્છને આખી દુનિયામાં ચમકાવે એવી આપણે સૌ ઈશ્વરને પ્રાર્થના કરીએ. મા નર્મદા, એમ કહેવાતું કે નર્મદા મૈયાનું નામ લો તો પણ પુણ્ય પ્રાપ્ત થાય. ઈશ્વર કૃપાથી મા નર્મદા ઘેર ઘેર પહોંચવાની છે. અહીંયાં તમે આવ્યા છો મુંબઈથી, બાકીના પણ લોકો જરા નજર કરજો, ચારે તરફ વિકાસના કામો ચાલી રહ્યાં છે. ભાઈઓ-બહેનો, આ કચ્છના નવવર્ષના આજના મારા પ્રથમ કાર્યક્રમમાં વહેલી સવારે જગન્નાથજી ભગવાનનાં દર્શન કરીને રથયાત્રાની વિદાયનો સમારંભ કર્યો. અને જગન્નાથજીની રથયાત્રાની જ્યારે વિદાય થાય છે ત્યારે પરંપરાગત રીતે કંઈક વિધિ કરવાની હોય છે. અને એ વિધિ હોય છે કે સોનાના સાવરણાથી એ મંદિર પરિસરનો, એ રથયાત્રાના પરિસરનો, ત્યાં પડેલા કચરાની સફાઈ કરવાની હોય છે, પછી એ રથ આગળ વધતો હોય છે. અને હું ભાગ્યશાળી છું. ગુજરાતમાં હું પહેલો મુખ્યમંત્રી છું કે જેને આ કચરો સાફ કરવાની કામગીરી અગિયારમી વખત મળી છે. એટલે ઈશ્વરને પણ મારામાં ભરોસો છે કે કચરો સાફ કરવામાં આ કાબેલ છે. અને હવે તો આપ બધાના આશીર્વાદથી કચરો સાફ કરવામાં આપણે બધા જ પારંગત થઈ ગયા છીએ. અને આજે મારો કચ્છનો પહેલો કાર્યક્રમ, સરદાર સાહેબની પ્રતિમાનું લોકાર્પણ કરવાનું સૌભાગ્ય પ્રાપ્ત થયું. કદાચ અત્યાર સુધીમાં સો કરતાં વધારે સરદાર સાહેબની પ્રતિમાના લોકાર્પણ કરવાનું સૌભાગ્ય મને મળ્યું હશે.

ભાઈઓ-બહેનો, મારે આ લેઉઆ પટેલ સમાજનું જે કેળવણી મંડળનું જે કામ કરી રહ્યા છે એ ભાઈઓનો આભાર પણ માનવો છે, અભિનંદન પણ આપવા છે. કારણકે સમાજનું પાયાનું કામ આપ કરી રહ્યા છો. આપ મુંબઈમાં બેઠા હો, વેપાર-ધંધામાં ગળાડૂબ હો, તેમ છતાંય આ વાગડની ધરતીમાં શિક્ષણની સરવાણી ચાલુ રહે એના માટે આપ જે મહેનત કરી રહ્યા છો એના માટે આપ સૌને લાખ લાખ અભિનંદન. ભાઈઓ-બહેનો, ભૂતકાળમાં તો શાંતિ હતી, મા-બાપ જાગૃત હોય, ગામમાંય કોઈ માસ્તર સારા હોય અને છોકરાંઓમાં રસ લે અને જો ભણાવે, અને બાળક નિશાળનું પગથિયું ચડ્યું તો ચડ્યું, નહિંતર આખી જીંદગી બિચારાની એમને એમ જતી રહે. આપણા રાજ્યમાં એકવીસમી સદી પહેલાંની વાત કરું છું, દેશ આઝાદ થયા પછીની વાત કરું છું. એ સ્થિતિ એવી હતી કે ગામમાં નિશાળે જાય એવી ઉંમરના દીકરા-દીકરીઓ, સોની જો સંખ્યા હોય, તો માંડ ચાલીસ જતા હતા, માંડ ચાલીસ, સાંઇઠ તો ઘેર જ રહેતા હતા. કારણકે એ વખતની સરકારોને એની કંઈ ચિંતા જ નહોતી. સાંઇઠ રહી ગયા તો રહી ગયા, મજૂરી કરી ખાશે... અને ચાલીસ પહોંચી ગયા તો પહોંચી ગયા એમનું ભાગ્ય જ્યાં લઈ જાય ત્યાં ખરું... અરે ભાઈ, સમાજને આમ એમના નસીબ પર ન છોડી દેવાય. સમાજનું, સરકારનું, રાજનેતાઓનું, શિક્ષણશાસ્ત્રીઓનું, સૌનું સહિયારું કામ છે કે આ સ્થિતિ બદલવી પડે. અને અમે આ અભિયાન ઉપાડ્યું. ૨૦૦૧ માં જ્યારથી હું આવ્યો છું, આ એક કામ મેં માથે લીધું છે, દીકરીઓ ભણે. અને મને ખબર હતી કે દીકરીઓને ભણાવવાનું કામ હું ઉપાડીશને, તો દીકરા તો આપોઆપ ઠેકાણે આવી જશે. અને આજે એનો લાભ એવો મળ્યો છે કે લગભગ સો એ સો ટકાને આપણે નિશાળમાં દાખલ કરાવવામાં સફળ થયા છીએ. પહેલાં ચાલીસ આવતા હતા અને હવે ધડામ દઈને સો આવતા થયા એટલે રાજ્ય ઉપર કેટલું ભારણ આવ્યું..! ઓરડા ખૂટી પડ્યા, માસ્તરો ખૂટી પડ્યા, બી.એડ.ની કૉલેજોય નાની પડવા માંડી. એકધારું કામ આવી પડ્યું. આ દસકામાં જ પોણા બે લાખ જેટલા શિક્ષકોની ભરતી કરી, પોણા બે લાખ..! કારણ, ગુજરાતનું બાળક ભણે, આપણી દીકરીઓ ભણે અને ગુજરાત એમાં પાછું ન રહી જાય એના માટેનું એક સપનું સેવ્યું. ઓરડાઓ ખૂટ્યા, ૬૦-૬૫,૦૦૦ નવા ઓરડાઓ બનાવવા પડ્યા. હવે આ બધું મેં ન કર્યું હોત, મારી સરકારે આ બધી મથામણ ન કરી હોત, તો ભૂતકાળમાં પણ કોઈ સરકારનો કોઈએ હિસાબ નથી માંગ્યો, મારો પણ ન માંગ્યો હોત..! પણ બીજાનો માંગ્યો કે ન માંગ્યો, એમને પડી હતી કે નહોતી પડી, ભાઈ, આ મુખ્યમંત્રી એવો છે, આ સરકાર એવી છે કે એ ચેનથી સૂઈ જાય એવી નથી, એ બેચેન બની જાય..! અને અમે આ ઉપાડ્યું અને જે બાળકોને ૨૦૦૧ માં દાખલ કર્યાં, ‘૦૨ માં કર્યાં, ‘૦૩ માં કર્યાં, ‘૦૫ માં કર્યાં... એમણે હવે ભણી-ગણીને પાંચમું પાસ કર્યું, હવે કહે કે અમને છઠ્ઠાંની નિશાળ આપો, સાતમું પાસ કર્યું, તો કહે કે હવે આઠમાંની નિશાળ આપો, આઠમું પાસ કર્યું, તો કહે કે દસમા સુધીની આપો, દસમું કર્યું તો કહે કે હવે બારમા સુધીની આપો..! ભાઈઓ-બહેનો, એવો આનંદ આવે છે કે ગુજરાતને ખૂણે ખૂણેથી શિક્ષણ માટેની માગણી આવે છે. આ એક સારી નિશાની છે. શાળા ખોલવા માટેની માગણી આવવી, શાળામાં નવા વર્ગો શરૂ કરવાની માગણી આવવી એ ઉજ્જવળ ભવિષ્યની નિશાની છે, એક મજબૂત પાયો રચાઈ રહ્યો છે એના શુભસંકેત છે અને કચ્છમાં આ વાવડ ઘણા સારા જોવા મળે છે, ભાઈઓ. અને રાજ્યએ પણ નક્કી કર્યું છે કે બાળકોને જ્યાં સુધી ભણવું હોય ત્યાં સુધી એમને ક્યાંય અવરોધ ન આવે, એમને મોકળા મને હર પ્રકારની સુવિધાઓ પ્રાપ્ત થાય અને શિક્ષણમાં આ પ્રત્યેક, ગરીબમાં ગરીબ પરિવાર પણ ફૂલે-ફાલે. પણ ભાઈઓ-બહેનો, આપણા માટે આનંદની વાત છે, આપણું રાજ્ય એવું છે કે જ્યાં સરકાર સાથે ખભે ખભો મિલાવીને સમાજિક સંસ્થાઓ, સામાજિક આગેવાનો, કોઈ પણ રાજકીય સ્વાર્થ વગર શિક્ષણની અંદર એટલી જ જહેમત ઉઠાવી રહ્યા છે. આ રાજ્ય પણ આ કામમાં ગૌરવભેર આગળ વધી શક્યું છે એનું કારણ આવા બધા દાતાશ્રીઓ, આવા બધા સમાજને માટે કામ કરનારા આગેવાનો, એના કારણે શક્ય બનતું હોય છે. એમણે આટલું મોટું સંકુલ ઊભું કર્યું, કેવું ભવ્ય સંકુલ છે, સાહેબ..! આપણને એમ થાય કે આપણે પણ વિદ્યાર્થી હોત તો કેવી મઝા આવત..! ફરી ભણવાનું મન થઈ જાય એવું સરસ સંકુલ બનાવ્યું છે, ભાઈ..! વાગડમાં આવી સરસ મઝાની લીલોતરી દેખાય, તો કેવું આંખ ઠરી જાય એવું બનાવ્યું છે, સાહેબ..! અભિનંદન આપું છું, ખૂબ ખૂબ અભિનંદન આપું છું..! સમાજનો આ જે પુરુષાર્થ છે એ પુરુષાર્થમાં સરકાર ડગલે ને પગલે સાથે છે, આપની આ વિકાસયાત્રાને પૂરેપૂરો સાથ અને સહકાર આ સરકારનો હંમેશા હંમેશા રહેશે એ હું આપને ભરોસો આપવા માંગું છું. આવાં સદ્કાર્યો કરનારા લોકો આ ગુજરાતનું ભાગ્ય છે, કે આવા લોકો આપણી પાસે છે, આવા દાતાઓ આપણી પાસે છે, સમાજ માટે ખપનારા લોકો આપણી પાસે છે અને કોઈ પણ પ્રકારના સ્વાર્થ વગર આ બધું કામ કરનારા લોકો છે.

ભાઈઓ-બહેનો, ભૂતકાળમાં બધા મુખ્યમંત્રીઓ જેટલી વખત વાગડ આવ્યા હશેને, એના કરતાં વધારે વખત હું એકલો આવ્યો છું. અને મેં ગયે વખતે પણ કહ્યું હતું કે હવે બધા વાગળના જુના દિવસો ભૂલી જાવ અને હવે તો એક જ મંત્ર ‘વાગળ વધે આગળ’..! અને મેં પુરવાર કરવાનું નક્કી કર્યું છે, મિત્રો. એકવાર મારી મા નર્મદાનું કામ પતે પછી જોઈ લો, પછી તો ચારેકોર જયજયકાર થશે, ચારેકોર જયજયકાર થશે..! વિકાસની નવી ઊંચાઈઓને પાર કરવાની છે હવે. અને આ દેશ-દુનિયાએ સ્વીકાર્યું છે. આજે ચારે તરફ આ દિલ્હી સરકાર ઉપર પસ્તાળ પડી રહી છે. દુનિયાભરની એજન્સીઓ દિલ્હી સરકારે કેવો આખા દેશનો ભઠ્ઠો બેસાડી દીધો છે એના માટે રોજ નવા નવા અભિપ્રાયો, સર્વે રિપોર્ટ, મૂલ્યાંકન આવી રહ્યાં છે. એકમાત્ર બચ્યું હોય તો ગુજરાત બચ્યું છે ભાઈઓ, જ્યાંથી સારા જ સમાચારો આવે છે. રોજ નવા વિકાસના સમાચારો, રોજ નવા પ્રગતિના સમાચારો..! પણ આપણું કમનસીબ છે. મેં દિલ્હીવાળાઓને કહ્યું કે ભાઈ, તમે અમારી ઈર્ષા કરવાનું બંધ કરો, આડે આવવાનું બંધ કરો, પથરા નાખવાનું બંધ કરો. અરે, મદદ ન કરવી હોય તો ન કરો, પણ અમને તો કંઈક કરવા દો..! અને તમારી પાસે આટલી બધી તાકાત છે, તો અમારી મદદ ન કરવી હોય તો કંઈ નહીં, આવો ચાલો, અમારી જોડે સ્પર્ધામાં ઊતરો, લો..! અમેય સારાં કામ કરીએ અને તમેય કરો. જે વધારે સારું કરશે, જનતા જનાર્દન એને વધાવશે. પણ એમને સ્પર્ધામાં ઊતરવું જ નથી, બોલો. દૂર દૂર ભાગે છે..! મેં કહ્યું કે આવો ભાઈ, વિકાસની સ્પર્ધા કરીએ, વિકાસની તંદુરસ્ત સ્પર્ધા કરીએ. તમારા ભાગનાં જે કામો છે એ તમે કરી બતાવો, અમારા ભાગનાં જે કામો છે એ અમે કરી બતાવીએ. અને આ જનતા જનાર્દનને જોવા દો કે કોના કારણે સારાં કામ થાય છે, ક્યાં રૂપિયો પાઈ-પાઈ સરખો વપરાય છે અને ક્યાં તિહાર જેલમાં જવાની તૈયારીઓ ચાલે છે એની લોકોને બરાબર ખબર પડી જશે..! ભાઈઓ-બહેનો, પ્રજાની પાઈ પાઈનો હિસાબ પ્રજાને મળવો જોઈએ. પાઈ પાઈનો સદુપયોગ થવો જોઇએ. તમે આજે ગમે ત્યાં જાવ ગુજરાતમાં સાહેબ, કોઈપણ દિશામાં પચીસ કિલોમીટર જાવ, કોઈપણ દિશામાં... તમને વિકાસનું કામ જોવા મળે, મળે અને મળે જ. ક્યાંક નહેર ખોદાતી હશે, તો ક્યાંક પાઇપલાઇન નંખાતી હશે, તો ક્યાંક ચેકડેમ બનતો હશે, તો ક્યાંક શાળાનો ઓરડો બનતો હશે, તો ક્યાંક દવાખાનું બનતું હશે... કોઈને કોઈ કામ ચાલતું જ હોય. ચારે તરફ ગુજરાતમાં કોઈપણ દિશામાં પચીસ કિલોમીટર જાવ, તો તમને કામ થતું જોવા મળે જ. આ ગામમાં બધા ઘરડાઓ બધા બેસેને, ભાભાઓ બધા ખાટલે બેઠા હોય ને હુક્કાપાણી થતા હોય ને તો વાતો કરે છે, “આ મારો વ્હાલો મોદી રૂપિયા લાવે છે ક્યાંથી..?” ચર્ચા કરે છે. કારણકે પહેલાં તો ભૂખડી બારસો જ હતી બધી..! આ રૂપિયો મોદીનો નથી, ન મોદી રૂપિયો લાવે છે, આ તો તમારા જ છે..! પણ બીજે જતા હતા, મેં એ બધું બંધ કરાવી દીધું એટલે તમારે ત્યાં પાછા આવે છે. આ તમારા જ છે, જનતા જનાર્દનના જ રૂપિયા છે, આ જનતા જનાર્દનની જ સંપત્તિ છે, જનતા જનાર્દનના હકના જ રૂપિયા છે પણ પહેલાં જાતજાતના અને ભાતભાતના પંજા એના ઉપર તરાપ મારતા હતા અને હું તો ચોકીદાર છું, કોઈ પંજો આપની તિજોરી પર હાથ ન મારે એના માટેની મથામણ કરું છું. એના કારણે રૂપિયો આજે વિકાસ માટે વપરાઈ રહ્યો છે, એના કારણે રૂપિયો આજે ગુજરાતનું ભલું કરવા માટે વપરાઈ રહ્યો છે, ગુજરાતના ગરીબની જીંદગી બદલવા માટે વપરાઈ રહ્યો છે.

અને એમાંય આપણી પ્રાથમિકતા છે શિક્ષણ, આપણી પ્રાથમિકતા છે ગામડું, આપણી પ્રાથમિકતા છે ગરીબ, આપણી પ્રાથમિકતા છે ખેડૂત. આપ વિચાર કરો, આ કચ્છમાં ખેતી આવી થશે એવો કોઈએ વિચાર કર્યો હતો? હજુ તો નર્મદા મૈયાનાં ડગ મંડાઈ રહ્યાં છે, એના પહેલાં જે કામ ઊપડ્યું છે એ જુઓ. કોઈએ વિચાર કર્યો હતો..? આજે ખેતીમાં કચ્છનું નામ પંકાવા માંડ્યું છે, મિત્રો. કારણ શું? સરકારનું આયોજન, સરકારની દ્રષ્ટી અને એના કારણે આ ક્રાંતિ આવી છે.

દૂધ ઉત્પાદન, આટલી તેજ ગતિથી દૂધ ઉત્પાદન થઈ રહ્યું છે, ડેરીઓ ધમધમતી થવા માંડી છે, દૂધ ઉત્પાદકના ઘરે સાંજ પડે રોકડો રૂપિયો આવવા માંડ્યો છે... એના કારણે વિકાસની વાતમાં એક વિશ્વાસ બેઠો છે અને વિકાસની વાતમાં એક ભાગીદારીનું વાતાવરણ બન્યું છે.

આજે ગામડે ગામડે ગરીબ બહેનોનાં સખીમંડળો બન્યાં છે. આખા ગુજરાતમાં અઢી લાખ સખીમંડળો બન્યા છે, અઢી લાખ..! અને દસ બહેનો, બાર બહેનો, પંદર બહેનો ભેગી મળીને આ સખીમંડળો ચલાવે છે, આર્થિક પ્રવૃત્તિ કરે છે. આ ગરીબ પરિવારની બહેનો ઘેર બેઠા કંઈક ને કંઈક આર્થિક પ્રવૃત્તિ કરે એના માટે આ સરકારે ૧૬૦૦ કરોડ રૂપિયાની રકમ આ બહેનોના હાથમાં મૂકી છે. અને મારી નેમ છે આવનારા દિવસોમાં ૫૦૦૦ કરોડ રૂપિયાની માતબર રકમ આ બહેનોના હાથમાં મૂકવાની. આપ વિચાર કરો કેવા ધમધમાકાવાળા છે આવનારા દિવસો..!

ભાઈઓ-બહેનો, વિકાસ વિના કોઈ આરો નથી. વિકાસ એક જ અમારો મંત્ર છે. અને લગાતાર અગિયાર વર્ષથી આ સરકાર માત્રને માત્ર વિકાસ, એ કામને વરી છે અને એમાં જ સૌનું ભલું લખાયેલું છે. અને એટલે જ, શાંતિ, એકતા અને સદભાવના એ મંત્ર લઈને, સર્વ સમાજને સાથે લઈને, ‘સૌનો સાથ, સૌનો વિકાસ’ એ મંત્રને ચરિતાર્થ કરતાં કરતાં આપ સૌના આશીર્વાદથી આ ગુજરાત પ્રગતિ કરી રહ્યું છે, આગળ ધપી રહ્યું છે. આજનું આ નવું વર્ષ પણ નવી સિદ્ધિઓ માટેનો, શક્તિનો સંચાર કરનારો એક અવસર બની રહે એવા વિશ્વાસ સાથે આપ સૌને ફરી એકવાર અંત:કરણ પૂર્વકની શુભકામનાઓ પાઠવું છું.

જય જય ગરવી ગુજરાત...!!

ભારતના ઓલિમ્પિયન્સને પ્રેરણા આપો!  #Cheers4India
Modi Govt's #7YearsOfSeva
Explore More
‘ચલતા હૈ’ નું વલણ છોડી દઈને ‘બદલ સકતા હૈ’ વિચારવાનો સમય પાકી ગયો છે: વડાપ્રધાન મોદી

લોકપ્રિય ભાષણો

‘ચલતા હૈ’ નું વલણ છોડી દઈને ‘બદલ સકતા હૈ’ વિચારવાનો સમય પાકી ગયો છે: વડાપ્રધાન મોદી
One Nation, One Ration Card Scheme a boon for migrant people of Bihar, 15 thousand families benefitted

Media Coverage

One Nation, One Ration Card Scheme a boon for migrant people of Bihar, 15 thousand families benefitted
...

Nm on the go

Always be the first to hear from the PM. Get the App Now!
...
સરદાર વલ્લભભાઈ પટેલ નેશનલ પોલીસ એકેડમી ખાતે આઇપીએસ પ્રોબેશનર્સને પ્રધાનમંત્રીએ આપેલા પ્રવચનનો મૂળપાઠ
July 31, 2021
શેર
 
Comments
તમે નસીબદાર છો કે આઝાદીના 75મા વર્ષમાં સેવામાં પ્રવેશી રહ્યા છો, આગામી 25 વર્ષો તમારા અને ભારત, બેઉ માટે મહત્વનાં છે: પ્રધાનમંત્રી
“તેઓ ‘સ્વરાજ્ય’ માટે લડ્યા; તમારે ‘સુ-રાજ્ય’ માટે આગળ વધવાનું છે”: પ્રધાનમંત્રી
ટેકનોજિકલ વિક્ષેપોના આ સમયમાં પડકાર પોલીસને તૈયાર રાખવાનો છે: પ્રધાનમંત્રી
તમે ‘એક ભારત-શ્રેષ્ઠ ભારત’ના ધ્વજ વાહક છો, ‘રાષ્ટ્ર પ્રથમ, હંમેશા પ્રથમ’નો મંત્ર હંમેશા સૌથી આગળ રાખો: પ્રધાનમંત્રી
મૈત્રીપૂર્ણ રહો અને ગણવેશના માનને સર્વોચ્ચ જાળવો: પ્રધાનમંત્રી
હું મહિલા અધિકારીઓની એક તેજસ્વી નવી પેઢીને જોઇ રહ્યો છું, આપણે પોલીસ દળમાં મહિલા ભાગીદારીને વધારવા માટે કાર્ય કર્યું છે: પ્રધાનમંત્રી
મહામારી દરમ્યાન સેવા કરતી વખતે જીવ ગુમાવનારા પોલીસ સેવાના સભ્યોને શ્રદ્ધાંજલિ અર્પી
પડોશી દેશોના અધિકારી તાલીમાર્થીઓ આપણા દેશોની નિકટતા અને ગાઢ સંબંધો પર ભાર મૂકે છે: પ્રધાનમંત્રી

તમારા બધા સાથે વાત કરીને મને ખૂબ સારું લાગ્યું. દર વર્ષે મારો આ પ્રયાસ રહે છે કે તમારા જેવા યુવાન સાથીઓ સાથે વાતચીત કરું, તમારા વિચારોને સતત જાણતો રહું. તમારી વાતો, તમારા પ્રશ્નો, તમારી ઉત્સુકતા મને પણ ભવિષ્યના પડકારોનો સામનો કરવામાં મદદ કરે છે.

સાથીઓ,

આ વખતની આ ચર્ચા એવા સમયે થઈ રહી છે જ્યારે ભારત દેશ પોતાની સ્વતંત્રતાના 75 વર્ષની ઉજવણીનો અમૃત મહોત્સવ મનાવી રહ્યો છે. આ વર્ષની 15મી ઓગસ્ટની તારીખ, તેની સાથે સાથે આઝાદીની 75મી વર્ષગાંઠનો અવસર લઈને આવી રહી છે. છેલ્લા 75 વર્ષમાં ભારતે એક બહેતર પોલીસ સેવાના નિર્માણનો પ્રયાસ કર્યો છે. પોલીસની તાલીમ સાથે સંકળાયેલા ઇન્ફ્રાસ્ટ્રક્ચરમાં પણ તાજેતરના વર્ષોમાં ઘણો સુધારો આવ્યો છે. આજે જ્યારે હું તમારી સાથે વાત કરી રહ્યો છું તો એ યુવાનોને જોઈ રહ્યો છું જે આગામી 25 વર્ષ સુધી ભારતની કાનૂની વ્યવસ્થા સુનિશ્ચિત કરવામા સહભાગી થશે. આ ઘણી મોટી જવાબદારી છે. આથી જ હવે એક નવો પ્રારંભ, એક નવા સંકલ્પના ઇરાદા સાથે આગળ ધપવાનું છે.

સાથીઓ,

મને ખાસ જાણકારી તો નથી કે તમારામાંથી કેટલા લોકો દાંડી ગયા છે અથવા તો તમારામાંથી કેટલાયે સાબરમતી આશ્રમની મુલાકાત લીધી છે પરંતુ હું તમને 1930ની દાંડી યાત્રાની યાદ અપાવવા માગું છું. ગાંધીજીએ મીઠાના સત્યાગ્રહના જોરે અંગ્રેજી શાસનના પાયા હચમચાવી નાખવાની વાત કરી હતી. તેમણે એમ પણ કહ્યું હતું કે જ્યારે સાધન ન્યાયપૂર્ણ અને યોગ્ય હોય છે તો ભગવાન પણ સાથ આપવા માટે ઉપસ્થિત થઈ જતા હોય છે.

 

 

સાથીઓ,

એક નાનકડા જૂથને સાથે લઈને મહાત્મા ગાંધી સાબરમતી આશ્રમથી નીકળી પડ્યા હતા. એક એક દિવસ પસાર થતો ગયો તેમ તેમ જે લોકો જ્યાં હતા ત્યાંથી મીઠાના સત્યાગ્રહ સાથે સંકળાતા ગયા. 24 દિવસ બાદ જ્યારે ગાંધીજીએ દાંડી ખાતે પોતાની યાત્રા પૂર્ણ કરી ત્યારે સમગ્ર દેશ એક રીતે આખો દેશ ઉભો થઈ ગયો હતો. કાશ્મીરથી કન્યાકુમારી સુધી, અટકથી કટક. આખું હિન્દુસ્તાન ચેતનવંતુ  થઈ ચૂક્યું હતો. એ મનોબળને યાદ કરો, એ ઇચ્છાશક્તિને યાદ કરો. એ જ લગને, આ જ એકજૂટતાએ ભારતની આઝાદીની લડતને સામૂહિકતાની શક્તિથી ભરી દીધો હતો. પરિવર્તનનો એ જ ભાવ, સંકલ્પમાં એ જ ઇચ્છાશક્તિ આજે દેશ તમારા જેવા યુવાનો પાસેથી માંગી રહ્યો છે. 1930થી 1947ની વચ્ચે દેશમાં જે જુવાળ પેદા થયો, જે રીતે દેશના યુવાનો આગળ આવ્યા. એક લક્ષ્યાંક માટે એકત્રિત થઈને આખી યુવાન પેઢી તેમાં સામેલ થઈ ગઈ.  આજે એ જ મનોબળ તમારી અંદર પણ અપેક્ષિત છે. આપણે બધાએ એ મનોભાવમાં જીવવું પડશે, એ સંકલ્પ સાથે સંકળાઈ જવું પડશે. એ વખતે આખો દેશ અને ખાસ કરીને દેશનો યુવાન વર્ગ સ્વરાજ્ય માટે લડ્યો હતો.  આજે તમારે સ્વરાજ્ય માટેની લડત માટે જાનની બાજી લગાવીને લડવાનું છે.  એ વખતે દેશના લોકો દેશની આઝાદી માટે જીવનનું બલિદાન આપવા માટે તૈયાર હતા. આજે તમારે દેશ માટે જીવવાની ભાવના સાથે લઈને આગળ વધવાનું છે. 25 વર્ષ બાદ જ્યારે ભારતની સ્વતંત્રતાના 100 વર્ષ પૂરા થશે ત્યારે આપણી પોલીસ સેવા કેવી હશે, કેટલી મજબૂત હશે તે તમારા આજના કાર્યો પર પણ આધાર રાખશે.  તમારે આ પાયો રચવાનો છે જેની પર 2047ના ભવ્ય શિસ્તબદ્ધ ભારતનું નિર્માણ થશે. સમયે આ સંકલ્પની સિદ્ધિ માટે તમારા જેવા યુવાનોની પસંદગી કરી છે. અને હું આ બાબતને તમારા તમામનું મોટું સૌભાગ્ય માનું છું કેમ કે તમે એક એવા સમયે તમારી કારકિર્દીનો પ્રારંભ કરી રહ્યા છો જ્યારે ભારત તમામ ક્ષેત્ર, તમામ કક્ષાએ પરિવર્તનના સમયમાંથી પસાર થઈ રહ્યું છે. તમારી કારકિર્દીના આવનારા 25 વર્ષ ભારતના વિકાસના પણ સૌથી મહત્વના 25 વર્ષ બની રહેવાના છે. આથી જ તમારી સજ્જતા, તમારી મનોદશા આ જ મોટા લક્ષ્યાંકને અનુકૂળ હોવી જોઇએ. આવનારા 25 વર્ષ તમે દેશના અલગ અલગ પ્રાંતોમાં, અલગ અલગ હોદ્દા પર કાર્ય કરવાના છો, અલગ અલગ ભૂમિકા અદા કરશો. તમારા તમામ પર એક આધુનિક અને એક પ્રભાવશાળી તથા સંવેદનશીલ પોલીસ સેવાના નિર્માણની એક અત્યંત મોટી જવાબદારી છે. અને તેથી જ તમારે હંમેશાં એ યાદ રાખવાનું છે કે તમે 25 વર્ષના એક ખાસ મિશન પર છો અને ભારતે તેના માટે ખાસ કરીને તમારી પસંદગી કરી છે.

સાથીઓ,

દુનિયાભરના અનુભવ કહે છે કે જ્યારે કોઈ રાષ્ટ્ર વિકાસના માર્ગે આગળ ધપે છે ત્યારે દેશની બહારથી અને દેશની અંદરથી પડકાર પણ એટલા જ વધે છે. આ સંજોગોમાં તમારી જવાબદારી સતત વધી રહેલા ટેકનોલોજીના અવરોધના આ યુગ વચ્ચે પોલીસ સેવાને સતત સજ્જ કરવાની છે. તમારી જવાબદારી ગુનાની નવી નવી રીતોને તેના કરતાં પણ વધુ ઇનોવેટિવ ઉપાયો અજમાવીને રોકવાની છે. ખાસ કરીને સાઇબર સિક્યોરીટીને લઇને નવા પ્રયોગો, નવા સંશોધન અને નવી સ્ટાઇલને તમારે વિકસાવવી પણ પડશે. અને તેનો અમલ પણ કરવો પડશે.

 

સાથીઓ,

દેશના બંધારણે, દેશની લોકશાહીએ જે પણ અધિકારો દેશવાસીઓને આપ્યા છે. જે કર્તવ્યો અદા કરવાની અપેક્ષા રાખી છે તેને સુનિશ્ચિત કરવામાં તમારી ભૂમિકા મહત્વની છે અને તેથી તમારી પાસેથી અપેક્ષા પણ વધારે રહે છે. તમારા આચરણ પર હંમેશાં સૌની નજર રહે છે અને તમારી ઉપર ઘણા દબાણ પણ આવતા રહેશે. તમારે માત્ર પોલીસ સ્ટેશન કે તમારા પોલીસ સ્ટેશનની હદમાં રહીને જ વિચારવાનું નથી પણ તમારે દરરોજ સમાજની તમામ હિલચાલથી માહિતગાર પણ રહેવાનું છે. મૈત્રીપૂર્ણ પણ રહેવાનું છે અને વરદીની મર્યાદાઓને હંમેશાં અગ્રતા આપવાની છે. આ ઉપરાંત વધુ એક ખાસ વાત જેનું તમારે હંમેશાં ધ્યાન રાખવું પડશે. તમારી ફરજ દેશના અલગ અલગ જિલ્લામાં હશે, શહેરોમાં હશે તેથી તમારે એક મંત્ર સદાસર્વદા યાદ રાખવાનો છે. ફિલ્ડમાં રહીને તમે જે કોઈ નિર્ણય લો તેમાં દેશહિત હોવું જોઇએ.  રાષ્ટ્રીય પરિપ્રેક્ષ્યમાં નિર્ણય લેવાવો જોઇએ. તમારા કામકાજનો વ્યાપ અને સમસ્યાઓ મોટા ભાગે સ્થાનિક હશે. આ સંજોગોમાં તેનો સામનો કરતી વખતે આ મંત્ર ખૂબ જ કામ લાગશે. તમારે હંમેશાં એ યાદ રાખવાનું છે કે તમે ‘એક ભારત, શ્રેષ્ઠ ભારત’ના પણ ધ્વજવાહક છો. આથી જ તમારા તમામ એક્શન, તમારી તમામ ગતિવિધિ નેશન ફર્સ્ટ, ઓલવેઝ ફર્સ્ટ, રાષ્ટ્ર પ્રથમ, સદાય પ્રથમ એવી ભાવનાને પ્રતિબિંબિત કરનારી હોવી જોઇએ.

સાથીઓ,

હું મારી સામે તેજસ્વી મહિલા અધિકારીઓની નવી પેઢીને પણ જોઈ રહ્યો છું. તાજેતરના વર્ષમાં પોલીસ દળમાં દીકરીઓની ભાગીદારી વધારવાનો સતત પ્રયાસ કરવામાં આવ્યો છે. આપણી દીકરીઓ પોલીસ સેવામાં સક્ષમતા અને જવાબદારીની સાથે સાથે વિનમ્રતા, સરળતા અને સંવેદનશીલતાના મૂલ્યોને પણ મજબૂત કરે છે. આવી જ રીતે દસ લાખની વધુ વસતિ ધરાવતા શહેરોમાં કમિશનર પ્રથા લાગુ કરવાની દિશામાં રાજ્યો કામ કરી રહ્યા છે. હજી સુધી 16 રાજ્યના અનેક શહેરોમાં આ વ્યવસ્થા લાગુ થઈ ચૂકી છે. મને ખાતરી છે કે બાકીના જિલ્લાઓમા પણ આ મામલે સકારાત્કમ પગલાં ભરવામાં આવશે.

સાથીઓ,

પોલીસની કામગીરીને મહત્વાકાંક્ષી અને પ્રભાવશાળી બનાવવામાં સહિયારા તથા સંવેદનશીલતા સાથે કાર્ય કરવું અત્યંત જરૂરી છે. આ કોરોના કાળમાં પણ આપણે જોયું છે કે પોલીસકર્મીઓએ કેવી રીતે પરિસ્થિતિને સંભાળવામાં મોટી ભૂમિકા ભજવી છે. કોરોના સામેની લડતમાં આપણા પોલીસ સાથીઓએ દેશવાસીઓની સાથે ખભાથી ખભા મેળવીને કાર્ય કર્યું છે. આ પ્રયાસમાં ઘણા બધા પોલીસ કર્મચારીઓએ પોતાના જીવનનું બલિદાન આપવું પડ્યું છે. હું એ તમામ જવાનોને, પોલીસ કર્મચારીઓને આદરપૂર્વક શ્રદ્ધાંજલિ અર્પણ કરું છું. અને સમગ્ર દેશ વતી તેમના પરિવારો પ્રત્યે સંવેદના વ્યક્ત કરું છું.

 

સાથીઓ,

આજે જયારે હું તમારી સાથે વાત કરી રહ્યો છું તો આ પ્રસંગે હું તમને એક વાત કહેવા માગું છું. આજે જ્યારે આપણે જોઇએ છીએ કે જ્યાં જ્યાં કુદરતી આપત્તિ આવે છે, ક્યાંક પૂર કે ક્યાંક ચક્રવાતી વાવાઝોડું કે ક્યાંક ભૂસ્ખલન આવે છે તો આપણા એનડીઆરએફના સાથી સંપૂર્ણ સજ્જતા સાથે ત્યાં પહોંચી જતા હોય છે. આપત્તિના સમયે એનડીઆરએફનું નામ સાંભળતા જ નાગરિકોમાં એક ભરોસો પેદા થાય છે. આ પ્રતિષ્ઠા એનડીઆરએફએ પોતાની પ્રશંસનીય કામગીરીથી ઉભી કરી છે. આજે લોકોને ભરોસો છે કે આપત્તિના સમયે એનડીઆરએફના જવાનો અમને જીવની બાજી લગાવીને પણ બચાવી લેશે. એનડીઆરએફમાં પણ આમ તો મોટા ભાગે તો પોલીસના જ જવાનો હોય છે, તમારા જ સાથી હોય છે પરંતુ શું આ જ ભાવના, આ જ આદર લોકોમાં પોલીસ માટે છે? એનડીઆરએફમાં પોલીસના જ લોકો છે, એનડીઆરએફને સન્માન મળે છે. એનડીઆરએફમાં કામ કરનારા પોલીસના જવાનોને પણ સન્માન મળે છે પણ સમાજ વ્યવસ્થામાં આવું છે ખરું? આખરે આમ શા માટે? આ સવાલનો જવાબ તમને પણ ખબર છે. જનમાનસમાં પોલીસ માટે આ જે નકારાત્મક અભિગમ પેદા થયેલો છે તે જ પોતાનામાં એક મોટો પડકાર છે.

કોરોના કાળના પ્રારંભે એ અનુભવાયું હતું કે પ્રજામાં આ અભિગમમાં થોડો ફરક આવ્યો છે કેમ કે લોકો જ્યારે વીડિયો જોઈ રહ્યા હતા, સોશિયલ મીડિયામાં જોઈ રહ્યા હતા કે પોલીસના લોકો ગરીબોને ગરીબોની સેવા કરી રહ્યા છે ભૂખ્યાને ખોરાક આપી રહ્યા છે, અને ક્યાંક તો ખોરાક રાંધીને ગરીબોને પહોંચાડી રહ્યા છે તો આ બધું જોઇને સમાજમાં પોલીસ તરફ જોવાનું કે તેમના અંગે વિચારવાનું વલણ વાતાવરણ બદલાઈ રહ્યું હતું. પણ, હવે પાછી એની એ જ સ્થિતિ આવી ગઈ છે. આખરે જનતાના વિશ્વાસનું સંપાદન કેમ થતું નથી. શાખ કેમ વધતી નથી?

સાથીઓ,

દેશની સુરક્ષા માટે, કાયદાની વ્યવસ્થા જાળવી રાખવા માટે, આતંકને નાબૂદ કરવા માટે આપણા પોલીસના સાથીઓ પોતાના જીવનું બલિદાન પણ આપી દે છે. દિવસોના દિવસો સુધી તમે ઘરે જઈ શકતા નથી, તહેવારોમાં પણ તમે અવારનવાર તમારા પરિવારથી તમારે દૂર રહેવું પડે છે પણ જ્યારે પોલીસની ઇમેજની વાત આવે છે તો લોકોની વિચારસરણી બદલાઈ જાય છે.

પોલીસમાં આવી રહેલી નવી પેઢીની એ જવાબદારી બને છે કે આ ઇમેજ બદલે, પોલીસ સામેના નકારાત્મક વલણ બદલાય. આ તમારે જ કરવાનું છે. તમારી તાલીમ, તમારા વિચારોની વચ્ચે વર્ષોથી ચાલતી આવતી પોલીસ વિભાગની જે સ્થાપિત પરંપરા છે તેની સાથે તમારો દરરોજ આમનો સામનો થવાનો જ છે.  સિસ્ટમ તમને બદલી નાખે છે અથવા તો તમે સિસ્ટમને બદલી નાખો છો તે તમારી તાલીમ, તમારી ઇચ્છાશક્તિ અને તમારા મનોબળ પર નિર્ભર કરે છે. તમારા ઇરાદા કેવા છે? તમે કયા આદર્શોથી જોડાયેલા છો. એ આદર્શોની પરિપૂર્તિ માટે કયા સંકલ્પોને સાથે રાખીને તમે આગળ વધી રહ્યા છો એ જ બાબત તમારા વ્યવહાર-વર્તનની બાબતમાં મહત્વ રાખે છે. આમ એક રીતે તમારી વધુ એક પરીક્ષા થશે. અને મને ખાતરી છે કે તમે તેમાં પણ સફળ થશો. ચોક્કસ સફળ થશો.

સાથીઓ,

અહીં જે આપણા પડોશી દેશના યુવાન અધિકારીઓ છે તેમને પણ હું ખૂબ ખૂબ શુભકામના આપવા માગીશ. ભુતાન હોય, નેપાળ હોય, માલદિવ્સ હોય કે મોરેશિયસ હોય આપણે બધા માત્ર પડોશીઓ જ નથી પરંતુ આપણા વિચારો અને સામાજિક બંધનોમાં પણ ઘણી સમાનતા છે. આપણે બધા સુખ-દુઃખના સાથી છીએ. જ્યારે કોઈ આફત આવે છે. આપત્તિ આવે છે તો સૌથી પહેલા આપણે જ એકબીજાની મદદ કરીએ છીએ. કોરોના કાળમાં પણ આપણે આ અનુભવ કર્યો છે. આથી જ આવનારા વર્ષોમાં થનારા વિકાસમાં પણ આપણી ભાગીદારી નિશ્ચિત છે. ખાસ કરીને આજે જ્યારે ક્રાઇમ અને ક્રિમિનલ સરહદોથી અલગ છે આ સંજોગોમાં એકમેક સાથેની તાલમેલ વધુ જરૂરી છે. મને ભરોસો છે કે સરદાર પટેલ એકેડમીમાં પસાર કરેલા તમારા આ દિવસોમાં તમારી કારકિર્દી, તમારા રાષ્ટ્રીય અને સામાજિક વચનબદ્ધતાને અને ભારત સાથેની મિત્રતાને વધુ મજબૂત કરવામાં મદદરૂપ બનશે. ફરી એક વાર તમને તમામને ખૂબ ખૂબ શુભેચ્છાઓ. ધન્યવાદ.