પ્રધાનમંત્રી શ્રી નરેન્દ્ર મોદીની અધ્યક્ષતામાં કેન્દ્રીય કેબિનેટે ઇન્ડિયા સેમિકન્ડક્ટર મિશન (ISM) હેઠળ વધુ 2 સેમિકન્ડક્ટર પ્રોજેક્ટ્સને મંજૂરી આપી છે, જેમાં જીએએન (ગેલિયમ નાઇટ્રાઇડ - GaN) ટેકનોલોજી પર આધારિત દેશની પ્રથમ કોમર્શિયલ મિની/માઇક્રો-એલઇડી (Mini/Micro-LED) ડિસ્પ્લે સુવિધા અને એક સેમિકન્ડક્ટર પેકેજિંગ સુવિધાનો સમાવેશ થાય છે.
આ બંને મંજૂર દરખાસ્તો દ્વારા ગુજરાતમાં આશરે ₹3,936 કરોડના સંચિત રોકાણ સાથે સેમિકન્ડક્ટર ઉત્પાદન સુવિધાઓ સ્થાપિત કરવામાં આવશે અને તેનાથી 2,230 કુશળ વ્યાવસાયિકો માટે સંચિત રોજગારીનું સર્જન થવાની અપેક્ષા છે.
મંજૂર કરાયેલી આ બંને દરખાસ્તોની વિગતો નીચે મુજબ છે:
- ક્રિસ્ટલ મેટ્રિક્સ લિમિટેડ (CML): ગુજરાતના ધોલેરા ખાતે મિની/માઇક્રો-એલઇડી ડિસ્પ્લે મોડ્યુલ્સના ઉત્પાદન માટે કમ્પાઉન્ડ સેમિકન્ડક્ટર ફેબ્રિકેશન અને ATMP માટે એક સંકલિત સુવિધા સ્થાપિત કરશે. આ સંકલિત સુવિધા 6 ઇંચના વેફર્સ પર એપિટેક્સી (epitaxy) સહિત જીએએન (GaN) ફાઉન્ડ્રી સેવાઓ પણ પૂરી પાડશે. મિની/માઇક્રો-એલઇડી ડિસ્પ્લે પેનલ્સ માટે વાર્ષિક પ્રસ્તાવિત ઉત્પાદન ક્ષમતા 72,000 ચોરસ મીટર છે, અને મિની-માઇક્રો-એલઇડી જીએએન એપિટેક્સી વેફર્સ માટે 24,000 સેટ RGB વેફર્સની છે. પ્રસ્તાવિત ઉત્પાદનોનો ઉપયોગ ટીવી અને સાઇનેજ/કોમર્શિયલ ડિસ્પ્લે માટેના મોટા ડિસ્પ્લેમાં, ટેબ્લેટ, સ્માર્ટફોન અને ઇન-કાર ડિસ્પ્લે માટેના મધ્યમ કદના ડિસ્પ્લેમાં અને એક્સટેન્ડેડ રિયાલિટી (XR) ગ્લાસીસ તેમજ સ્માર્ટ વોચ માટેના માઇક્રો-ડિસ્પ્લેમાં થશે.
- સુચી સેમિકોન પ્રાઇવેટ લિમિટેડ (SSPL): ગુજરાતના સુરત ખાતે ડિસ્ક્રીટ સેમિકન્ડક્ટર્સના ઉત્પાદન માટે આઉટસોર્સ્ડ સેમિકન્ડક્ટર એસેમ્બલી એન્ડ ટેસ્ટ (OSAT) સુવિધા સ્થાપિત કરશે. સુચી સેમિકોનની પ્રસ્તાવિત ઉત્પાદન ક્ષમતા વાર્ષિક 1033.20 મિલિયન ચિપ્સની છે. તેના લક્ષિત ઉપયોગોમાં પાવર ઇલેક્ટ્રોનિક્સ, એનાલોગ આઇસી (analog ICs) અને ઔદ્યોગિક પ્રણાલીઓનો સમાવેશ થાય છે, જે ઓટોમોટિવ, ઇન્ડસ્ટ્રિયલ ઓટોમેશન અને કન્ઝ્યુમર ઇલેક્ટ્રોનિક્સ જેવા અંતિમ બજારોને સેવા પૂરી પાડશે.
આ બે મંજૂરીઓ સાથે, દેશમાં સેમિકન્ડક્ટર ઇકોસિસ્ટમને નોંધપાત્ર પ્રોત્સાહન મળશે કારણ કે ઇન્ડિયા સેમિકન્ડક્ટર મિશન (ISM) હેઠળ મંજૂર કરાયેલા પ્રોજેક્ટ્સની કુલ સંખ્યા 12 પર પહોંચી ગઈ છે, જેમાં આશરે ₹1.64 લાખ કરોડનું સંચિત રોકાણ સામેલ છે.
આ સુવિધાઓ દેશમાં વિકસી રહેલી વૈશ્વિક સ્તરની ચિપ ડિઝાઇન ક્ષમતાઓને પૂરક બનશે, જેને સરકાર દ્વારા 315 શૈક્ષણિક સંસ્થાઓ અને 104 સ્ટાર્ટ-અપ્સને પૂરી પાડવામાં આવતી ડિઝાઇન ઇન્ફ્રાસ્ટ્રક્ચર સહાય દ્વારા પ્રોત્સાહન આપવામાં આવી રહ્યું છે.
પહેલાથી જ મંજૂર કરાયેલા 10 પ્રોજેક્ટ્સ અમલીકરણના વિવિધ તબક્કામાં હોવાથી ભારતમાં સેમિકન્ડક્ટર ઇકોસિસ્ટમમાં વેગ વધુ મજબૂત બની રહ્યો છે. 2 પ્રોજેક્ટ્સે ભારતમાંથી પહેલેથી જ કોમર્શિયલ શિપમેન્ટ શરૂ કરી દીધું છે અને અન્ય 2 પ્રોજેક્ટ્સ પણ ટૂંક સમયમાં કોમર્શિયલ શિપમેન્ટ શરૂ કરે તેવી અપેક્ષા છે.
Cabinet’s approval of new projects under the India Semiconductor Mission is a part of our efforts towards making India a leader in the global semiconductor value chain, focussing on manufacturing, packaging and advanced materials. India’s advances in the world of semiconductors…
— Narendra Modi (@narendramodi) May 5, 2026
