নমস্কাৰ!
মোৰ কেবিনেটৰ সকলো সহকৰ্মী, বিত্ত আৰু অৰ্থনীতি বিশেষজ্ঞ, অংশীদাৰ, মহিলা আৰু ভদ্র লোকসকল!
উৎপাদন আৰু ৰপ্তানিৰ ওপৰত এই বাজেট ৱেবিনাৰে প্ৰতিটো দৃষ্টিকোণৰ পৰা অতি গুৰুত্বপূৰ্ণ। আপোনালোকে জানে, এই বাজেট আছিল আমাৰ চৰকাৰৰ তৃতীয় কাৰ্যকালৰ প্ৰথমখন পূৰ্ণ বাজেট। এই বাজেটৰ আটাইতকৈ গুৰুত্বপূৰ্ণ বিষয়টো হ’ল আশা কৰাতকৈ অধিক বিতৰণ কৰা। এনে বহুতো খণ্ড আছে য’ত চৰকাৰে বিশেষজ্ঞসকলে আশা কৰাতকৈও ডাঙৰ পদক্ষেপ লৈছে আৰু ইয়াক বাজেটত প্ৰত্যক্ষ কৰিছে। বাজেটত উৎপাদন আৰু ৰপ্তানিৰ ক্ষেত্ৰতো গুৰুত্বপূৰ্ণ সিদ্ধান্ত লোৱা হৈছে।
বন্ধুসকল,
আজি দেশখনে এক দশকৰো অধিক সময় ধৰি চৰকাৰৰ নীতিত এনে ধাৰাবাহিকতা প্ৰত্যক্ষ কৰিছে। যোৱা ১০বছৰত ভাৰতে ধাৰাবাহিকভাৱে সংস্কাৰ, বিত্তীয় অনুশাসন, স্বচ্ছতা আৰু সামগ্ৰিক বিকাশৰ প্ৰতি ইয়াৰ প্ৰতিশ্ৰুতি প্ৰদৰ্শন কৰি আহিছে। ধাৰাবাহিকতা আৰু সংস্কাৰৰ নিশ্চয়তা হৈছে এক পৰিৱৰ্তন, যিয়ে আমাৰ উদ্যোগৰ ভিতৰত নতুন আত্মবিশ্বাস কঢ়িয়াই আনিছে। মই উৎপাদন আৰু ৰপ্তানিৰ সৈতে জড়িত প্ৰতিগৰাকী অংশীদাৰক আশ্বাস দিছো যে আগন্তুক বছৰবোৰত এই ধাৰাবাহিকতা অব্যাহত থাকিব। মই আপোনালোকক মোৰ সম্পূৰ্ণ আত্মবিশ্বাসৰে অনুৰোধ জনাইছো যে, আপোনালোকে সম্পূৰ্ণ আত্মবিশ্বাসৰে বাহিৰলৈ যাওক আৰু ডাঙৰ পদক্ষেপ লওক। আমি দেশৰ বাবে উৎপাদন আৰু ৰপ্তানিৰ এই নতুন পথসমূহ মুকলি কৰিব লাগিব। আজি বিশ্বৰ প্ৰতিখন দেশে ভাৰতৰ সৈতে নিজৰ অৰ্থনৈতিক অংশীদাৰিত্ব শক্তিশালী কৰিব বিচাৰিছে। এই অংশীদাৰিত্বৰ সৰ্বাধিক সুবিধা ল’বলৈ আমাৰ উৎপাদন খণ্ডসমূহ আগবাঢ়ি অহা উচিত।
বন্ধুসকল,
যিকোনো দেশৰ উন্নয়নৰ বাবে এক সুস্থিৰ নীতি আৰু উন্নত ব্যৱসায়িক পৰিৱেশ অতি গুৰুত্বপূৰ্ণ। সেয়েহে কেইবছৰমান পূ্ৰ্বে আমি জন বিশ্বাস আইন আনিছো, আমি অনুপালন হ্ৰাস কৰিবলৈ চেষ্টা কৰিছো, কেন্দ্ৰীয় আৰু ৰাজ্যিক পৰ্যায়ত ৪০ হাজাৰৰো অধিক অনুপালন বিলুপ্ত কৰা হৈছে ফলত ই ব্যৱসায় কৰাৰ সহজতা বৃদ্ধি কৰিছে। আমাৰ চৰকাৰে বিশ্বাস কৰে যে এই অনুশীলন অব্যাহত থাকিব লাগে। সেয়েহে, আমি সৰলীকৃত আয়কৰ ব্যৱস্থা লৈ আহিছো, আমি জন বিশ্বাস ২.০ ৰ ওপৰত কাম কৰি আছো। অ-বিত্তীয় খণ্ডৰ নিয়মাৱলী পৰ্যালোচনা কৰিবলৈ এখন সমিতি গঠন কৰাৰো সিদ্ধান্ত লোৱা হৈছে। তেওঁলোকক আধুনিক, নমনীয়, জনসাধাৰণৰ অনুকূল আৰু বিশ্বাসযোগ্য কৰি তোলাটোৱে হৈছে আমাৰ প্ৰয়াস। এই প্ৰক্ৰিয়াত উদ্যোগৰ এক বৃহৎ ভূমিকা আছে। নিজৰ অভিজ্ঞতাৰ পৰা, আপুনি সমাধান কৰিবলৈ বেছি সময় লোৱা সমস্যাবোৰ চিনাক্ত কৰিব পাৰি। আপোনালোকে প্ৰক্ৰিয়াবোৰ অধিক সৰল কৰিবলৈ পৰামৰ্শ দিব পাৰে। প্ৰযুক্তি ব্যৱহাৰ কৰি আমি কেনেদৰে দ্ৰুত আৰু উন্নত ফলাফল লাভ কৰিব পাৰোঁ সেই বিষয়ে আপোনালোকে নিৰ্দেশনা দিব পাৰে।
বন্ধুসকল,
আজি বিশ্বই ৰাজনৈতিক অনিশ্চয়তাৰ মাজেৰে পাৰ হৈ আছে। সমগ্ৰ বিশ্বই ভাৰতক বিকাশৰ কেন্দ্ৰ হিচাপে দৃষ্টি নিক্ষেপ কৰি আছে। কোভিড সংকটৰ সময়ত, যেতিয়া বিশ্ব অৰ্থনীতিত মন্দাৱস্থা হৈছিল, ভাৰতে বিশ্বৰ বিকাশ ত্বৰান্বিত কৰিছিল। এইটো নিজে নিজে হৈ যোৱা নাছিল। আমি আত্মনিৰ্ভৰ ভাৰতৰ দৃষ্টিভংগীক আগুৱাই লৈ গৈছিলো আৰু আমাৰ সংস্কাৰৰ গতি অধিক ত্বৰান্বিত কৰিছিলো। আমাৰ প্ৰচেষ্টাই অৰ্থনীতিত কোভিডৰ প্ৰভাৱ হ্ৰাস কৰি ভাৰতক দ্ৰুতগতিত বিকাশশীল অৰ্থনীতিত পৰিণত কৰাত সহায় কৰিছে। আজিও ভাৰত বিশ্ব অৰ্থনীতিৰ বাবে বিকাশৰ ইঞ্জিন হৈ আছে। অৰ্থাৎ, ভাৰতে কঠিনতম পৰিস্থিতিটো নিজৰ স্থিতিস্থাপকতা প্ৰমাণ কৰিছে।
যোৱা কেইটামান বছৰত আমি দেখিছোঁ যে যেতিয়া যোগান শৃংখলাত ব্যাঘাত ঘটিছে আৰু ই সমগ্ৰ বিশ্বৰ অৰ্থনীতিত প্ৰভাৱ পেলাইছে। আজি বিশ্বক উচ্চ মানৰ সামগ্ৰী আৰু নিৰ্ভৰযোগ্য যোগানৰ সৈতে বিশ্বাসযোগ্য অংশীদাৰৰ প্ৰয়োজন। আমাৰ দেশে এয়া কৰিবলৈ সক্ষম কাৰণ আপোনালোক শক্তিশালী। এয়া আমাৰ বাবে এক বৃহৎ সুযোগ। মই বিচাৰো যে আমাৰ উদ্যোগটোৱে বিশ্বৰ এই প্ৰত্যাশাবোৰক দৰ্শক হিচাপে যাতে নেদেখুৱাই, কিয়নো, আমি দৰ্শক হৈ থাকিব নোৱাৰো। আপোনালোকে ইয়াত নিজৰ ভূমিকা বিচাৰিব লাগিব, নিজৰ বাবে সুযোগ তৈয়াৰ কৰিব লাগিব। পুৰণি দিনৰ তুলনাত আজি এইটো বেছি সহজ। আজি দেশখনে এই অনুষ্ঠানসমূহৰ বাবে বন্ধুত্বপূৰ্ণ নীতি গ্ৰহণ কৰিছে আৰু চৰকাৰে উদ্যোগৰ সৈতে কান্ধত কান্ধ মিলাই থিয় দিছে। এক দৃঢ় সংকল্প, বস্তুনিষ্ঠতাৰে গোলকীয় যোগান শৃংখলাত সুযোগ বিচাৰি, প্ৰত্যাহ্বান গ্ৰহণ কৰি, এনেদৰে, যদি প্ৰতিটো উদ্যোগই এখোজ আগুৱাই যায়, আমি বহু দূৰ আগবাঢ়ি যাব পাৰোঁ।
বন্ধুসকল,
আজি ১৪ টা খণ্ডই আমাৰ পি এল আই আঁচনিৰ সুবিধা লাভ কৰিছে। এই আঁচনিৰ অধীনত ৭০০-ৰো অধিক ইউনিট অনুমোদন কৰা হৈছে। ইয়াৰ ফলত ১৫ লাখ কোটি টকাতকৈও অধিক বিনিয়োগ হৈছে, ১৩ লাখ কোটি টকাতকৈও অধিক উৎপাদন হৈছে আৰু ৫ লাখ কোটি টকাতকৈও অধিক ৰপ্তানি হৈছে। ইয়াৰ দ্বাৰা এইটো প্ৰমাণিত হৈছে যে আমাৰ উদ্যোগীসকলে যদি সুযোগ পায় তেন্তে প্ৰতিটো নতুন ক্ষেত্ৰত আগবাঢ়ি যাব পাৰে। উৎপাদন আৰু ৰপ্তানি বৃদ্ধিৰ বাবে আমি ২টা অভিযান আৰম্ভ কৰাৰ সিদ্ধান্ত লৈছো। আমি উন্নত প্ৰযুক্তি আৰু গুণগত মানৰ সামগ্ৰীৰ ওপৰত গুৰুত্ব দিছো আৰু ব্যয় হ্ৰাস কৰিবলৈ দক্ষতাৰ ওপৰত গুৰুত্ব দিছো। মই বিচাৰো যে ইয়াত উপস্থিত সকলো অংশীদাৰে যাতে আমি উৎপাদন কৰিব পৰা তথা বিশ্বত চাহিদা থকা নতুন সামগ্ৰীসমূহ চিনাক্ত কৰে। তাৰ পাছত আমি সেই দেশবোৰলৈ এক ৰণনীতি লৈ যাম য'ত ৰপ্তানিৰ সম্ভাৱনা আছে।
বন্ধুসকল,
ভাৰতৰ উৎপাদন যাত্ৰাত গৱেষণা আৰু উন্নয়নৰ এক গুৰুত্বপূৰ্ণ অৱদান আছে, ইয়াক আগুৱাই নিয়া আৰু ত্বৰান্বিত কৰাৰ প্ৰয়োজন আছে। গৱেষণা আৰু উন্নয়নৰ জৰিয়তে আমি উদ্ভাৱনীমূলক সামগ্ৰীৰ ওপৰত গুৰুত্ব দিব পাৰো, লগতে সামগ্ৰীসমূহৰ মূল্য সংযোজন কৰিব পাৰো। বিশ্বই আমাৰ পুতলা, জোতা আৰু চামৰা উদ্যোগৰ সম্ভাৱনাৰ বিষয়ে জানে। আমি আমাৰ পৰম্পৰাগত শিল্পকলাৰ সৈতে আধুনিক প্ৰযুক্তিৰ সংমিশ্ৰণ কৰি বৃহৎ সফলতা অৰ্জন কৰিব পাৰোঁ। এই খণ্ডসমূহত আমি বিশ্ব চেম্পিয়ন হ’ব পাৰো আৰু আমাৰ ৰপ্তানি বহুগুণে বৃদ্ধি হ’ব পাৰে। ই লাখ লাখ চাকৰিৰ সুযোগো সৃষ্টি কৰিব আৰু উদ্যোগশীলতাক উৎসাহিত কৰিব। পৰম্পৰাগত শিল্পীসকলে প্ৰধানমন্ত্ৰী বিশ্বকৰ্মা যোজনাৰ জৰিয়তে অন্তিম পৰ্যায়ৰ সমৰ্থন লাভ কৰিছে। আমি এনে শিল্পীসকলক নতুন সুযোগৰ সৈতে সংযোগ কৰাৰ প্ৰয়াস কৰিব লাগিব। এই খণ্ডসমূহত বহুতো সম্ভাৱনা লুকাই আছে, আপোনালোক সকলোৱে ইয়াক সম্প্ৰসাৰণ কৰিবলৈ আগবাঢ়ি আহিব লাগিব।
বন্ধুসকল,
আমাৰ এমএছএমই খণ্ড হৈছে ভাৰতৰ উৎপাদন আৰু ঔদ্যোগিক বিকাশৰ মেৰুদণ্ড। ২০২০ চনত আমি এমএছএমইৰ সংজ্ঞা সংশোধন কৰাৰ এক গুৰুত্বপূৰ্ণ সিদ্ধান্ত লৈছো। এইটো ১৪ বছৰৰ পাছত কৰা হৈছিল। আমাৰ সিদ্ধান্তই এমএছএমইবোৰৰ শংকা অন্ত পেলাইছে। যদি তেওঁলোকে আগবাঢ়ি যায়, চৰকাৰৰ পৰা লাভালাভ বন্ধ হ'ব। আজি দেশত এমএছএমইৰ সংখ্যা ৬ কোটিতকৈ অধিকলৈ বৃদ্ধি পাইছে। ই কোটি কোটি লোকক নিযুক্তিৰ সুযোগ প্ৰদান কৰিছে। এই বাজেটত, আমি পুনৰ এমএছএমইৰ সংজ্ঞা সম্প্ৰসাৰণ কৰিছো, যাতে আমাৰ এমএছএমইবোৰে আগবাঢ়ি যোৱাৰ আত্মবিশ্বাস থাকে। ইয়াৰ ফলত যুৱক-যুৱতীসকলৰ বাবে অধিক নিযুক্তিৰ সুযোগ সৃষ্টি হ’ব। আমাৰ এমএছএমইসমূহে সন্মুখীন হোৱা আটাইতকৈ ডাঙৰ সমস্যাটো আছিল যে তেওঁলোকে সহজে ঋণ লাভ কৰা নাছিল। এমএছএমইসমূহে ১০ বছৰ পূৰ্বে প্ৰায় ১২ লাখ কোটি টকাৰ ঋণ লাভ কৰিছিল, যিটো আঢ়ৈ গুণ বৃদ্ধি হৈ প্ৰায় ৩০ লাখ কোটি টকা হৈছে। এই বাজেটত এমএছএমইসমূহক দিয়া ঋণৰ গেৰাণ্টি দুগুণ কৰি ২০ কোটি টকা কৰা হৈছে। কাৰ্য্যকৰী মূলধনৰ প্ৰয়োজনীয়তাৰ বাবে, ৫ লাখ টকাৰ সীমাৰ সৈতে অনুকূলিত ক্ৰেডিট কাৰ্ড প্ৰদান কৰা হ'ব।
বন্ধুসকল,
আমি ঋণ সহজ কৰি তুলিছো আৰু এক নতুন ধৰণৰ ঋণ ব্যৱস্থাৰ সৃষ্টি কৰিছো। মানুহে গেৰাণ্টি অবিহনে ঋণ পাবলৈ আৰম্ভ কৰিছে, যিটো তেওঁলোকে কেতিয়াও ভাবিব পৰা নাছিল। যোৱা ১০ বছৰত, মুদ্ৰাৰ দৰে অ-গেৰাণ্টি যুক্ত ঋণ আঁচনিসমূহেও ক্ষুদ্ৰ উদ্যোগসমূহক সহায় কৰিছে। ট্ৰেডছ প’ৰ্টেলৰ জৰিয়তে ঋণ সম্পৰ্কীয় বহুতো সমস্যা সমাধান কৰা হৈছে।
বন্ধুসকল,
এতিয়া আমি ক্ৰেডিট ডেলিভাৰীৰ বাবে নতুন পদ্ধতি বিকশিত কৰিব লাগিব। এইটো আমাৰ প্ৰয়াস হ'ব লাগে যে প্ৰতিটো এমএছএমই যাতে কম খৰচী হয় আৰু সময়োপযোগী ঋণ লাভ কৰে। মহিলা, অনুসূচীত জাতি আৰু অনুসূচীত জনজাতি সম্প্ৰদায়ৰ ৫ লাখ উদ্যোগীক প্ৰথমবাৰৰ বাবে ২ কোটি টকাৰ ঋণ প্ৰদান কৰা হ’ব। নতুন উদ্যোগীসকলক কেৱল ঋণৰ সহায়ৰ প্ৰয়োজনেই নহয়, তেওঁলোকক নিৰ্দেশনাৰো প্ৰয়োজন। মই ভাবো যে উদ্যোগটোৱে এনে লোকসকলক সহায় কৰিবলৈ এটা পৰামৰ্শমূলক কাৰ্যসূচী সৃষ্টি কৰা উচিত।
বন্ধুসকল,
বিনিয়োগ বৃদ্ধিৰ ক্ষেত্ৰত ৰাজ্যসমূহৰ ভূমিকা অতি গুৰুত্বপূৰ্ণ। এই ৱেবিনাৰত ৰাজ্য চৰকাৰৰ বিষয়াসকল উপস্থিত আছে। ৰাজ্যসমূহে যিমান সহজে ব্যৱসায় কৰাৰ প্ৰচাৰ কৰিব, সিমানেই অধিক বিনিয়োগকাৰী তেওঁলোকৰ ওচৰলৈ আহিব। ইয়াৰ পৰা আপোনালোকৰ ৰাজ্য সৰ্বাধিক লাভৱান হ’ব। এই বাজেটৰ পৰা কোনে সৰ্বাধিক লাভ কৰে সেই সন্দৰ্ভত ৰাজ্যসমূহৰ মাজত প্ৰতিযোগিতা হোৱা উচিত। যিবোৰ ৰাজ্যই প্ৰগতিশীল নীতি লৈ আগবাঢ়ি আহে, কোম্পানীবোৰ সেইবোৰত বিনিয়োগ কৰিবলৈ আহিব।
বন্ধুসকল,
মই নিশ্চিত যে আপোনালোক সকলোৱে এই বিষয়বোৰৰ ওপৰত গুৰুত্বসহকাৰে চিন্তা কৰিব। এই ৱেবিনাৰৰ পৰা আমি কাৰ্যকৰী সমাধানৰ সিদ্ধান্ত ল’ব লাগিব। নীতি, আঁচনি আৰু নিৰ্দেশনা প্ৰস্তুত কৰাত আপোনাৰ সমৰ্থন অতি গুৰুত্বপূৰ্ণ। ই বাজেটৰ পাছত ৰূপায়ণৰ কৌশল প্ৰস্তুত কৰাত সহায় কৰিব। মই নিশ্চিত যে আপোনাৰ অৱদান অতি উপযোগী বুলি প্ৰমাণিত হ’ব। আজিৰ দিনজোৰা আলোচনাৰ পৰা সৃষ্টি হোৱা সমলে আমাক আমি যি সপোন লৈ আগবাঢ়িছো সেয়া পূৰণ কৰাৰ শক্তি প্ৰদান কৰিব। এই আশাৰে আপোনালোক সকলোকে বহুত বহুত ধন্যবাদ।
