ভাইসকল, ভগৱান মাতংগেশ্বৰ ভগৱান কী জয় ব’লো, বাগেশ্বৰ ধাম কী জয়, জটাশংকৰ ধাম কী জয়, আপোনাসৱক মোৰ তৰফৰ পৰা দুই হাতযোৰ কৰি ৰাম-ৰাম জনাইছোঁ। অনুষ্ঠানটোত উপস্থিত থকা মধ্যপ্ৰদেশৰ ৰাজ্যপাল শ্ৰী মংগুভাই পেটেল, মুখ্যমন্ত্ৰী ভাই মোহন যাদৱ জী, ‘জগত গুৰু’ পূজ্য ৰামভদ্ৰাচাৰ্য জী, ‘বাগেশ্বৰ ধাম’ৰ ‘পীঠাধীশ্বৰ’ শ্ৰীধীৰেন্দ্ৰ শাস্ত্ৰী জী, ‘সাধ্বী’ ৰীতাম্ভৰা জী, স্বামী চিদানন্দ সৰস্বতী, মহন্ত শ্ৰী বালক যোগেশ্বৰদাস জী, এই অঞ্চলৰ সাংসদ বিষ্ণুদেৱ শৰ্মা জী আৰু অন্যান্য বিশিষ্ট ব্যক্তি তথা প্ৰিয় ভাই-ভনীসকল।
বহু দিনৰ পিছত দ্বিতীয়বাৰৰ বাবে মই বীৰসকলৰ ভূমি বুন্দেলখণ্ডলৈ অহাৰ এই সৌভাগ্য লাভ কৰিছোঁ। আৰু এইবাৰটো বালাজীৰ পৰা আহ্বান লাভ কৰিছিলোঁ। এয়া হনুমান জীৰ কৃপা যে আস্থাৰ এই কেন্দ্ৰটো এতিয়া স্বাস্থ্যৰ কেন্দ্ৰ হ'বলৈ আগবাঢ়িছে। মই এইমাত্ৰ ‘শ্ৰী বাগেশ্বৰ ধাম চিকিৎসা বিজ্ঞান আৰু গৱেষণা প্ৰতিষ্ঠান’ৰ বাবে ‘ভূমি-পূজন’ অনুষ্ঠান সম্পাদন কৰিলোঁ। এই প্ৰতিষ্ঠানটো ১০ একৰ ভূমিত নিৰ্মাণ কৰা হ'ব। প্ৰথম পৰ্যায়ত ইয়াত ১০০ খন বিচনাৰ সুবিধা থাকিব। এই পৱিত্ৰ কামটোৰ বাবে মই শ্ৰী ধীৰেন্দ্ৰ শাস্ত্ৰীজীক অভিনন্দন জনাইছোঁ আৰু বুন্দেলখণ্ডৰ জনসাধাৰণক আন্তৰিক অভিনন্দন জনাইছোঁ।
বন্ধুসকল,
আজিকালি আমি দেখিছোঁ যে নেতাসকলৰ এটা শ্ৰেণী আছে যিসকলে ধৰ্মক উপলুঙা কৰে, উপহাস কৰে, আৰু মানুহক বিভাজন কৰাত নিয়োজিত হৈ থাকে, সততে বিদেশী শক্তিয়েও দেশ আৰু ধৰ্মক দুৰ্বল কৰাৰ প্ৰচেষ্টাত এই ব্যক্তিসকলক সহযোগিতা আগবঢ়োৱা দেখা যায়। হিন্দু আস্থাক ঘৃণা কৰা এই লোকসকলে বহু শতাব্দী ধৰি কিবা নহয় কিবা ছদ্মবেশৰে আমাৰ মাজতে বাস কৰি আহিছে। দাসত্বৰ মানসিকতাত আৱদ্ধ লোকসকলে আমাৰ মত, মান্যতা আৰু মন্দিৰৰ লগতে আমাৰ সন্ত, সংস্কৃতি আৰু সিদ্ধান্তসমূহক আক্ৰমণ কৰি আহিছে। এই লোকসকলে আমাৰ উৎসৱ, পৰম্পৰা আৰু প্ৰথাসমূহক অপমান কৰে। যিটো ধৰ্ম স্বাভাৱিকভাৱেই প্ৰগতিশীল তাৰ ওপৰতে এওঁলোকে বোকা ছটিয়াবলৈ সাহস কৰে। তেওঁলোকৰ কাৰ্যসূচী হৈছে আমাৰ সমাজক বিভক্ত কৰা আৰু ইয়াৰ একতা ভংগ কৰা। এই পৰিৱেশত মোৰ সৰু ভাতৃ ধীৰেন্দ্ৰ শাস্ত্ৰীয়ে দীৰ্ঘদিন ধৰি দেশত ঐক্যৰ মন্ত্ৰ সম্পৰ্কে মানুহৰ মাজত সজাগতা বৃদ্ধি কৰি আহিছে। এতিয়া তেওঁ সমাজ আৰু মানৱতাৰ হিতৰ বাবে আন এক সংকল্প গ্ৰহণ কৰিছে, তেওঁ এই কৰ্কট প্ৰতিষ্ঠানটো স্থাপন কৰাৰ সংকল্প লৈছে, যাৰ অৰ্থ হৈছে যে এতিয়া ভজন, ভোজন আৰু স্বাস্থ্যকৰ জীৱনৰ বাবে আশীৰ্বাদ ইয়াত, অৰ্থাত্ ‘বাগেশ্বৰ ধাম’ত উপলব্ধ হ'ব।
বন্ধুসকল,
আমাৰ মন্দিৰ, আমাৰ মঠ, আমাৰ পবিত্ৰ স্থানসমূহ এফালে উপাসনা আৰু আধ্যাত্মিক অনুশীলনৰ কেন্দ্ৰ হৈ আহিছে, আৰু আনফালে, সেইবোৰ বিজ্ঞান আৰু সামাজিক চিন্তা আৰু সামাজিক চেতনাৰ কেন্দ্ৰ হৈও আহিছে। আমাৰ ঋষিসকলেহে আমাক ‘আয়ুৰ্বেদ’ৰ বিজ্ঞান প্ৰদান কৰিছিল, আমাৰ ঋষিসকলেহে আমাক ‘যোগবিজ্ঞান’ প্ৰদান কৰিছিল, যিটো এতিয়া সমগ্ৰ বিশ্বতে উদযাপন কৰিবলৈ লোৱা হৈছে। আমাৰ বিশ্বাস যে আনৰ কল্যাণতকৈ ডাঙৰ ধৰ্ম আৰু একো নাই। অৰ্থাৎ আনক সেৱা কৰা আৰু তেওঁলোকৰ দুখ-কষ্ট দূৰ কৰাটো হৈছে ধৰ্ম্মৰ মূল কথা। সেয়েহে, নৰত নাৰায়ণক, জীৱত শিৱক দেখা আৰু এই ভাবেৰেই জীৱ মাত্ৰৰ প্ৰতিয়েই সেৱা আগবঢ়োৱাটো হৈছে আমাৰ পৰম্পৰা। আজিকালি, আমি দেখিছোঁ যে ‘মহাকুম্ভ’ৰ বিষয়ে যথেষ্ট আলোচনা হৈছে, ‘মহাকুম্ভ’ এতিয়া ইয়াৰ সমাপ্তিৰ কাষ চাপিছে, কোটি কোটি লোক ইতিমধ্যে তাত উপস্থিত হৈছে, আৰু কোটি কোটি লোকে আস্থাত নিজকে নিমজ্জিত কৰিছে আৰু সাধুসকলৰ দৰ্শন লাভ কৰিছে। যদি এই ‘কুম্ভ’লৈ চোৱা যায় এক সহজভাৱৰ উদ্ভৱ হয়; এয়া হৈছে ‘একতাৰ কুম্ভ’। ১৪৪ বছৰৰ পিছত সংঘটিত হোৱা এই ‘কুম্ভ’ই আগন্তুক শতিকা ধৰি ‘একতাৰ কুম্ভ’ হিচাপে অনুপ্ৰাণিত কৰি থাকিব আৰু দেশৰ ঐক্য শক্তিশালী কৰাৰ অমৃত বৰষি থাকিব। ৰাইজ নিস্বাৰ্থ সেৱা ভাৱেৰে নিয়োজিত হৈছে; ‘কুম্ভ’ত উপস্থিত থকা সকলোৱে নিশ্চিতভাৱে একতাৰ মনোভাৱ প্ৰত্যক্ষ কৰিছে, কিন্তু মই লগ পোৱা সকলোৰে পৰা হিন্দুস্তানৰ প্ৰতিটো কোণত ‘কুম্ভ’ত উপস্থিত থকা প্ৰতিগৰাকী ব্যক্তিৰ মুখৰ পৰা দুটা কথা শুনিবলৈ পাইছোঁ। এক – তেওঁলোকে স্বচ্ছতা কৰ্মীসকলক আন্তৰিকতাৰে প্ৰশংসা কৰিছে। সেৱাৰ মনোভাৱেৰে তেওঁলোকে এই ‘কুম্ভ’ত পৰিষ্কাৰ পৰিচ্ছন্নতাৰ কাম-কাজ চম্ভালি আছে, আৰু আজি মই সেই সকলো স্বচ্ছতাৰ সঙ্গীক সন্মান সহকাৰে অভিবাদন জনাইছোঁ। আন এটা বিশেষত্ব হ'ল যে আমাৰ দেশত এইটো খুব কম শুনা যায়, আৰু এইবাৰ মই দেখিছোঁ যে ঐক্যৰ এই বিশাল ‘কুম্ভ’ৰ পৰা অহা প্ৰতিগৰাকী ভ্ৰমণকাৰীয়ে কৈছে যে এইবাৰ আৰক্ষীকৰ্মীসকলে একোগৰাকী সাধকৰ দৰে, একোগৰাকী সেৱাবৰ্তীৰ দৰে সম্পূৰ্ণ নম্ৰতাৰে দেশৰ কোটি কোটি লোকক চম্ভালিছে। ঐক্যৰ এই ‘মহাকুম্ভ’ত জনসাধাৰণৰ হৃদয় জয় কৰা সেই আৰক্ষী কৰ্মীসকলো অভিনন্দনৰ যোগ্য।
কিন্তু ভাই-ভনীসকল,
প্ৰয়াগৰাজৰ এই ‘মহাকুম্ভ’ত বহুতো বৈচিত্ৰ্যপূৰ্ণ সমাজসেৱা প্ৰকল্পও একে ধৰণৰ সেৱাৰ মনোভাৱৰে চলোৱা হৈছে। এনেবোৰ বিষয়লৈ সংবাদ মাধ্যমৰ মনোযোগ যোৱাটো অতিকে কঠিন, আৰু এই বিষয়ে বেছিকৈ আলোচনাও হোৱা নাই। যদি মই এই সকলোবোৰ সেৱা প্ৰকল্পৰ বিষয়ে আলোচনা কৰিবলৈ যাওঁ তেন্তে মোৰ পৰৱৰ্তী কাৰ্যসূচী হয়তো বিঘ্নিত হ'ব। কিন্তু মই এটা কথা উল্লেখ কৰিব বিচাৰো, একতাৰ এই ‘মহাকুম্ভ’ত এক বিশাল চকু চিকিত্সা কুম্ভও অনুষ্ঠিত হৈছে। এই চকু চিকিত্সা কুম্ভত দেশৰ প্ৰতিটো কোণৰ পৰা অহা ভ্ৰমণকাৰী, দৰিদ্ৰ পৰিয়ালৰ লোকসকলে বিনামূলীয়াকৈ চকু পৰীক্ষা কৰাই আছে। চকুৰ চিকিৎসক, সমগ্ৰ দেশৰ সন্মানীয় চিকিৎসকসকলে তাত দুমাহ ধৰি সেৱা আগবঢ়াইছে, আৰু এতিয়ালৈকে দুই লাখতকৈয়ো অধিক মোৰ ভাই-ভনীয়ে এই চকু চিকিত্সা শিবিৰত চকু পৰীক্ষা কৰিছে। প্ৰায় ডেৰ লাখ লোকক বিনামূলীয়া ঔষধ আৰু চশমা দিয়া হৈছে, আৰু কিছু সংখ্যক লোকক ছানি পৰা ৰোগৰ অস্ত্ৰোপচাৰৰ প্ৰয়োজন হোৱা দেখা গৈছে, সেয়েহে এই চকু চিকিত্সা শিবিৰৰ পৰা চিত্ৰকূট আৰু ওচৰ-পাজৰৰ ঠাইবোৰত থকা চিকিত্সালয়সমূহত, য'ত চকুৰ যত্নৰ ভাল সুবিধা উপলব্ধ, প্ৰায় ১৬,০০০ গৰাকী ছানি পৰা ৰোগীক সম্পূৰ্ণ বিনামূলীয়াকৈ অস্ত্ৰোপচাৰ কৰা হৈছে।
ভাই-ভনীসকল,
এই সকলোবোৰ কোনে কৰি আছে? আমাৰ সাধুসকলৰ নিৰ্দেশনাত হাজাৰ হাজাৰ চিকিৎসক আৰু হাজাৰ হাজাৰ স্বেচ্ছাসেৱক স্বতঃস্ফূৰ্তভাৱে আৰু সমৰ্পিতভাৱে এই সেৱাত নিয়োজিত হৈ আছে। যিসকলে ঐক্যৰ এই মহান সঙ্গমলৈ গৈ আছে তেওঁলোকে এই প্ৰচেষ্টাবোৰক প্ৰশংসা কৰিছে।
ভাই-ভনীসকল,
একেদৰেই ভাৰতৰ বহুতো ডাঙৰ চিকিৎসালয় আমাৰ ধৰ্মীয় প্ৰতিষ্ঠানৰ দ্বাৰা পৰিচালিত হৈ আহিছে। স্বাস্থ্য আৰু বিজ্ঞান সম্পৰ্কীয় বহুতো গৱেষণা প্ৰতিষ্ঠান ধৰ্মীয় ন্যাসৰ দ্বাৰা পৰিচালিত হৈ আছে। লাখ লাখ দৰিদ্ৰ লোকে এই প্ৰতিষ্ঠানসমূহত চিকিৎসা আৰু সেৱা লাভ কৰে। মোৰ ভগ্নী মা ইয়াত বহি আছে। যিদৰে তেওঁ নিস্বাৰ্থভাৱে অনাথ ছোৱালীবোৰলৈ সেৱা আগবঢ়ায়, তেওঁ কন্যাসকলৰ বাবে নিজৰ জীৱন উৎসৰ্গা কৰিছে।
বন্ধুসকল,
এই ওচৰতে আমাৰ বুন্দেলখণ্ডৰ চিত্ৰকূট ‘ভগৱান’ ৰামৰ সৈতে সম্পৰ্কিত এক পৱিত্ৰ তীৰ্থ হৈছে বিশেষভাৱে সক্ষম আৰু ৰোগীসকলক সেৱা আগবঢ়োৱাৰ বাবে এক গুৰুত্বপূৰ্ণ কেন্দ্ৰ। মই আনন্দিত যে ‘বাগেশ্বৰ ধাম’ৰ ৰূপত এই গৌৰৱময় পৰম্পৰাত এটা নতুন অধ্যায় সংযুক্ত হ'বলৈ ওলাইছে। এতিয়া, ‘বাগেশ্বৰ ধাম’ত স্বাস্থ্যৰ বাবে আশীৰ্বাদো উপলব্ধ হ'ব। মোক জনোৱা হৈছে যে আজিৰ পৰা দুদিনৰ পিছত ‘মহাশিৱৰাত্ৰি’ৰ দিনা ইয়াত ২৫১ গৰাকী কন্যাৰ বাবে এক গণ বিবাহ উৎসৱৰো আয়োজন কৰা হ'ব। এই মহৎ কামৰ বাবে মই ‘বাগেশ্বৰ ধাম’ক প্ৰশংসা কৰিছোঁ। মই সকলো নৱ বিবাহিত দম্পতী আৰু মোৰ ছোৱালীহঁতক এক সুন্দৰ আৰু সুখী জীৱনৰ বাবে আন্তৰিক অভিনন্দন আৰু আশীৰ্বাদ জনাইছোঁ।
বন্ধুসকল,
আমাৰ শাস্ত্ৰসমূহে কয়- ‘শৰীৰ-মাধ্য খলু ধৰ্ম-সাধনম্’। অৰ্থাৎ আমাৰ শৰীৰ, আমাৰ স্বাস্থ্য হৈছে আমাৰ ধৰ্ম, আমাৰ সুখ আৰু আমাৰ সফলতাৰ সৰ্বশ্ৰেষ্ঠ মাধ্যম। সেয়েহে, যেতিয়া দেশখনে মোক সেৱা কৰাৰ সুযোগ দিছিল, মই 'সবকা সাথ, সবকা বিকাশ'ৰ মন্ত্ৰটো চৰকাৰৰ সংকল্প হিচাপে গ্ৰহণ কৰিলোঁ। আৰু, 'সবকা সাথ, সবকা বিকাশ'ৰ এই সংকল্পৰ এক গুৰুত্বপূৰ্ণ ভেটি আছে - সকলোৰে বাবে চিকিৎসা, সকলোৰে বাবে স্বাস্থ্য! এই দৃষ্টিভংগী পূৰণ কৰিবলৈ, আমি বিভিন্ন স্তৰত গুৰুত্ব দি আছো। ৰোগ প্ৰতিৰোধত আমি গুৰুত্ব দিছোঁ। মোক কওঁকচোন, ‘স্বচ্ছ ভাৰত অভিযান’ৰ অধীনত প্ৰতিখন গাঁৱত শৌচালয় নিৰ্মাণ কৰা হৈছে নে নাই? এইটোৱে আপোনালোকক সহায় কৰিছে নে নাই? আপোনালোকে জানে যে শৌচালয় নিৰ্মাণে আন এক লাভো সম্ভৱ কৰিছে। শৌচালয় নিৰ্মাণ কৰাৰ ফলত অপৰিচ্ছন্নতাৰ বাবে হোৱা ৰোগৰ পয়োভৰো হ্ৰাস পাইছে। এক অধ্যয়নত কোৱা হৈছে যে শৌচালয় থকা পৰিয়ালবোৰত ৰোগৰ বাবে হ’বলগীয়া বহু হাজাৰ টকা ৰাহি হ’বলৈ ধৰিছে। বন্ধুসকল, ২০১৪ চনত আমাৰ চৰকাৰ শাসনলৈ অহাৰ আগতে, পৰিস্থিতি এনেকুৱা আছিল যে দেশৰ দৰিদ্ৰ লোকসকলে ৰোগতকৈ চিকিৎসাৰ ব্যয়ক বেছি ভয় কৰিছিল। যদি পৰিয়ালৰ এগৰাকী ব্যক্তি গুৰুতৰভাৱে অসুস্থ হৈ পৰে, গোটেই পৰিয়ালটোৱেই সংকটত পৰিবলগীয়া হয়। ময়ো আপোনালোকৰ দৰে এটা দৰিদ্ৰ পৰিয়ালৰ পৰাই আহিছোঁ। মই এই কষ্টবোৰ দেখিছোঁ। আৰু সেয়েহে মই সংকল্প গ্ৰহণ কৰিছো - মই চিকিৎসাৰ ব্যয় হ্ৰাস কৰিম আৰু আপোনালোকৰ জেপৰ ধন যতদূৰ সম্ভৱ ৰাহি কৰিম। মই আপোনালোকক আমাৰ চৰকাৰৰ কিছুমান কল্যাণমূলক আঁচনিৰ বিষয়ে বাৰে বাৰে অৱগত কৰি আহিছোঁ যাতে এজনো দৰিদ্র ব্যক্তি আঁচনিৰ পৰা বাদ পৰিবলগীয়া নহয়। সেয়েহে, মই আজি ইয়াত কেবাটাও গুৰুত্বপূৰ্ণ কথাৰ পুনৰাবৃত্তি কৰিছো আৰু মই আশা কৰো যে আপোনালোকে সেইবোৰ মনত ৰাখিব আৰু আপোনালোকৰ পৰিচিত সকলকো অৱগত কৰিব। আপোনালোকে তেওঁলোকক জনাব, ঠিক আছেনে? জনাব নহয়, নিশ্চয়কৈ জনাবনে, এয়াও হৈছে এক সেৱা। চিকিৎসাৰ ব্যয় কমিব লাগে নে নাই? সেইকাৰণে মই প্ৰতিগৰাকী দৰিদ্ৰ ব্যক্তিৰ বাবে বিনামূলীয়া চিকিৎসাৰ ব্যৱস্থা কৰিছোঁ। কোনো ব্যয় নোহোৱাকৈ ৫ লাখ টকালৈকে চিকিৎসা! কোনো পুত্ৰই তেওঁৰ পিতৃ-মাতৃৰ চিকিৎসাৰ বাবে ৫,০০,০০০টকা খৰচ কৰিব নালাগে। দিল্লীত থকা এইজন পুত্ৰই সেই কামটো কৰিব। কিন্তু ইয়াৰ বাবে আপোনালোকে ‘আয়ুষ্মান কাৰ্ড’ এখন তৈয়াৰ কৰিব লাগিব। মই আশা কৰোঁ ইয়াত এনে বহুলোক থাকিব যিয়ে নিশ্চয় তেওঁলোকৰ ‘আয়ুষ্মান কাৰ্ড’ তৈয়াৰ কৰিছে, আৰু যিসকলে নাই কৰা তেওঁলোকেও যিমান সম্ভৱ সোনকালে এই কামটো সম্পন্ন কৰিব, আৰু মই মুখ্যমন্ত্ৰী ডাঙৰীয়াক এই কামটো ত্বৰান্বিত কৰিবলৈও ক’ম, এই অঞ্চলত যদি কোনোবা বাদ পৰি গৈছে তেন্তে অনতি বিলম্বে এই কাম আগবঢ়োৱাৰ দিহা কৰিব।
বন্ধুসকল,
আপোনালোকে আৰু এটা কথা মনত ৰাখিব লাগিব। এতিয়া, দুখীয়া, ধনী বা মধ্যবিত্ত শ্ৰেণীৰ যিকোনো পৰিয়ালৰ ৭০ বছৰৰ অধিক বয়সৰ সকলো বৃদ্ধ লোকৰ বিনামূলীয়া চিকিৎসাৰ বাবে আয়ুষ্মান কাৰ্ড প্ৰস্তুত কৰা হৈছে। এই ‘কাৰ্ড’বোৰ অনলাইনতেই প্ৰস্তুত কৰা হ'ব। ইয়াৰ বাবে কাকো কোনো ধন পৰিশোধ কৰাৰ কোনো প্ৰয়োজন নাই। আৰু যদি কোনোবাই টকা বিচাৰে, মোলৈ পোনপটীয়াকৈ এখন চিঠি লিখিব, বাকী কাম মই কৰি ল’ম। যদি কোনোবাই টকা বিচাৰে তেন্তে আপোনালোকে কি কৰিব? আপনালোকে লিখিব। মই সকলো সাধু-সন্তকো কওঁ যে আপোনালোকেও ‘আয়ুষ্মান কাৰ্ড’ এখনৰ ব্যৱস্থা কৰা উচিত, যাতে আপোনালোকৰ অসুস্থতাৰ সময়ত মই সেৱা কৰাৰ সুযোগ পাব পাৰোঁ। আপোনালোকতো অসুস্থ হোৱাৰ সম্ভাৱনা নাই, তথাপি যদি এনে কেতিয়াবা হয়ো, তেন্তে।
ভাই-ভনীসকল,
বহুসময়ত চিকিৎসাৰ বাবে চিকিৎসালয়ত ভৰ্তি হোৱাৰ প্ৰয়োজন নহয়। চিকিৎসকে দিয়া ঔষধ ঘৰতে গ্ৰহণ কৰিবলগীয়া হয়। এনে ক্ষেত্ৰত মই ঔষধৰ দোকানত সুলভ মূল্যত ঔষধৰ ব্যৱস্থাও কৰিছোঁ। এই খৰছ কম কৰিবলৈ দেশত ১৪,০০০ ৰো অধিক ‘জন ঔষধী কেন্দ্ৰ’ খোলা হৈছে, আৰু এই কেন্দ্ৰবোৰে মাত্ৰ ১৫-২০ বা ২৫ টকাতে বজাৰত ১০০টকা ব্যয় হোৱা ঔষধ প্ৰদান কৰে। গতিকে, আপোনালোকৰ ধন ৰাহি হ'ব নে নাই? আপোনালোকে ‘জন ঔষধী কেন্দ্ৰ’সমূহৰ পৰা ঔষধ কিনা উচিত হয় নে নহয়? মই আন এটা কথা উল্লেখ কৰিব বিচাৰিছোঁ যে আজিকালি গাঁওবোৰত বৃক্কৰ ৰোগ বিয়পি পৰাৰ খবৰ সঘনাই পোৱা যায়। যেতিয়া বৃক্কৰ ৰোগ বৃদ্ধি হয়, ‘ডায়েলাইচিছ’ নিৰন্তৰ আৰু নিয়মীয়াকৈ কৰিবলগীয়া হয়, যাৰ বাবে দীঘলীয়া দূৰত্ব ভ্ৰমণ কৰিবলগীয়া হয় আৰু খৰছো যথেষ্ট হয়। আপোনালোকৰ সমস্যাবোৰ দূৰ কৰিবলৈ আমি সমগ্ৰ দেশৰ ৭০০ খনতকৈয়ো অধিক জিলাত পোন্ধৰশৰো অধিক ‘ডায়েলাইচিছ কেন্দ্ৰ’ খুলিছোঁ। ইয়াত বিনামূলীয়াকৈ ‘ডায়েলাইচিছ’ সেৱা উপলব্ধ হয়। আপোনালোক এই সকলোবোৰ চৰকাৰী আঁচনিৰ বিষয়ে অৱগত হোৱা উচিত আৰু আপোনালোকে আপোনালোকৰ পৰিচিত সকলোকে এই কথা অৱগত কৰা উচিত। গতিকে, আপোনালোকে মোৰ বাবে এইকণ কাম কৰিব নে বাৰু? অনুগ্ৰহ কৰি আপোনালোকৰ হাতবোৰ দাঙি কৰিবনে নাই কওকচোন? আপোনালোকৰ পূণ্য হ’ব; এয়া হৈছে মানৱতাৰ বাবে এক সেৱা।
বন্ধুসকল,
কৰ্কট ৰোগীসকলৰ বাবে এখন ডাঙৰ চিকিৎসালয় ‘বাগেশ্বৰ ধাম’ত খুলিবলৈ ওলাইছে। যিহেতু কৰ্কট ৰোগ সকলো ঠাইতে এক ডাঙৰ সমস্যা হৈ উঠিছে, আজি চৰকাৰ, সমাজ আৰু সাধু সকলোৱে কৰ্কট ৰোগৰ বিৰুদ্ধে যুঁজত একেলগে কাম কৰি আছে।
ভাই-ভনীসকল,
গাঁৱত যদি কাৰোবাৰ কৰ্কট ৰোগ হয় তেন্তে তাৰ বিৰুদ্ধে যুঁজ দিয়াটো কিমান কঠিন হৈ পৰে সেই কথা মই জানো। প্ৰথমতেতো ই প্ৰায়ে দীঘলীয়া সময়ৰ বাবে অজ্ঞাত হৈ থাকে। মানুহে সাধাৰণতে জ্বৰ আৰু বিষৰ বাবে ঘৰুৱা প্ৰতিকাৰ লয়, আৰু কিছুমানে আনকি পূজা-পাতল আৰু ৰীতি-নীতিৰো আশ্ৰয় লয়, বা তান্ত্ৰিকৰ কবলত পৰে, যেতিয়া বিষটো অসহনীয় হৈ উঠে বা পিণ্ড ওলাবলৈ ধৰে তেতিয়াহে গম পোৱা যায় যে কৰ্কট ৰোগ হৈছে। আৰু কৰ্কট ৰোগৰ নাম শুনাৰ লগে লগে গোটেই পৰিয়ালটোকে এক বিষাদৰ পৰিৱেশে আচ্চন্ন কৰি পেলায়, সকলো আতংকিত হয়, সকলো সপোন ভাঙি যায়, আৰু চিকিৎসাৰ বাবে ক'লৈ যাব লাগে তাৰো উৱা-দিহ নোপোৱা হয়। বেছিভাগ মানুহে কেৱল দিল্লী আৰু মুম্বাইৰ বিষয়েহে জানে। সেয়েহে, আমাৰ চৰকাৰে এই সকলো সমস্যাৰ সমাধানৰ বাবে কাম কৰি আছে। এই বছৰৰ বাজেটতো কৰ্কট ৰোগৰ বিৰুদ্ধে যুঁজিবলৈ কেবাটাও ঘোষণা কৰা হৈছে, আৰু মোদীয়ে সিদ্ধান্ত লৈছে যে কৰ্কট ৰোগৰ ঔষধ সস্তা কৰা হ'ব। পৰৱৰ্তী ৩ বছৰত দেশৰ প্ৰতিখন জিলাত ‘কৰ্কট ডে’ কেয়াৰ চেণ্টাৰ’ খোলা হ'ব। ‘ডে’ কেয়াৰ চেণ্টাৰ’সমূহত ৰোগ-পৰীক্ষণৰ ব্যৱস্থাৰ লগতে আৰাম কৰাৰ সুবিধাও থাকিব। আপোনালোকৰ ওচৰে-পাজৰে থকা জিলা চিকিৎসালয় আৰু চিকিৎসা কেন্দ্ৰসমূহতো কৰ্কট ৰোগৰ ক্লিনিক খোলা হৈছে।
কিন্তু ভাই-ভনীসকল, আপোনালোকে ভালেই পাওঁক বা নাপাওঁক, এইক্ষেত্ৰত কিবা নহয় কিবা কৰিবই লাগিব, মনত ৰাখিব আৰু ইয়াক জীৱনত প্ৰয়োগ কৰিব, কৰ্কট ৰোগৰ পৰা ৰক্ষা পাবলৈ আপোনালোকো সতৰ্ক আৰু সচেতন হ'ব লাগিব। প্ৰথম সাৱধানতা হ'ল সময়মতে কৰ্কট ৰোগৰ পৰীক্ষা কৰা, কিয়নো এবাৰ কৰ্কট ৰোগ বিয়পি পৰিলে পৰাজিত কৰাটো সিমানেই কঠিন হৈ পৰে। সেয়েহে, আমি ৩০ বছৰতকৈ অধিক বয়সৰ সকলো ব্যক্তিক পৰীক্ষা কৰাৰ বাবে এটা অভিযান চলাই আছোঁ। সকলোৱে এই অভিযানৰ সুবিধা লোৱা উচিত আৰু ইয়াত অংশগ্ৰহণ কৰা উচিত। কোনো অৱহেলা নকৰিব। যদি কৰ্কট ৰোগৰ সামান্য সন্দেহো থাকে তাৎক্ষণিক পৰীক্ষা কৰা প্ৰয়োজন। আন এটা গুৰুত্বপূৰ্ণ কথা হ'ল কৰ্কট ৰোগৰ বিষয়ে সঠিক তথ্য গুৰুত্বপূৰ্ণ। কৰ্কট ৰোগ স্পৰ্শৰ দ্বাৰা সংক্ৰমিত নহয়; ই এক সংক্ৰামক ৰোগ নহয়, ই স্পৰ্শৰ জৰিয়তে নিবিয়পে। বিড়ি, চিগাৰেট, গুটখা, ধঁপাত আৰু মচলাৰ পৰা কৰ্কট ৰোগৰ আশংকা বৃদ্ধি হয়, আৰু আইসকল আৰু ভগ্নীসকলে মোৰ কথা শুনি ভাল পাইছে চাগৈ নহয় নে। সেয়েহে, আপোনালোক কৰ্কট ৰোগ বিয়পোৱা এই সকলোবোৰ নিচাৰ পৰা আঁতৰি থাকিব লাগিব, আৰু আনকো সেইবোৰৰ পৰা আঁতৰাই ৰাখিব লাগিব। আপোনালোকে আপোনালোকৰ শৰীৰ আৰু স্বাস্থ্যৰ যত্ন ল'ব লাগিব। আৰু মই আশা কৰিম যে যদি আমি সতৰ্ক হৈ থাকিম, আমি ‘বাগেশ্বৰ ধাম’ৰ কৰ্কট ৰোগ চিকিৎসালয়ৰ ওপৰত বোজা নহ'ম। ইয়ালৈ অহাৰ প্ৰয়োজন নাথাকিব, তেন্তে সাৱধানতা অৱলম্বন কৰিবনে? আপোনালোক অসাৱধান নহ'ব নহয় নে বাৰু?
বন্ধুসকল,
মোদীয়ে আপোনালোকৰ সেৱা কৰিবলৈ আপোনালোকৰ সেৱক হিচাপে কাম কৰি আছে। শেষবাৰৰ বাবে যেতিয়া মই ছত্ৰপুৰলৈ আহিছিলো, মই হাজাৰ হাজাৰ কোটি টকাৰ প্ৰকল্প উদ্বোধন কৰিছিলো আৰু আধাৰশিলা স্থাপন কৰিছিলো, আৰু মুখ্যমন্ত্ৰীয়েও এই কথা বৰ্ণনা কৰিছে। আপোনালোকৰ মনত থাকিব পাৰে, সেইবোৰৰ ভিতৰত আছিল ৪৫,০০০ কোটি টকাক ‘কেন-বেটৱা সংযোগ প্ৰকল্প’। এই প্ৰকল্পটো কেবা দশক ধৰি ওলমি আছিল, বহু চৰকাৰ আহিছিল আৰু গৈছিল, আৰু প্ৰতিটো দলৰ নেতাই বুন্দেলখণ্ড ভ্ৰমণো কৰিছিল। পিচে, ইয়াত পানীৰ সংকট বাঢ়িহে গৈছিল। আপোনালোকে মোক কওঁকচোন, পূৰ্বৰ কোনোবা চৰকাৰে বাৰু তেওঁলোকৰ প্ৰতিশ্ৰুতি পূৰণ কৰিছিল নে? এই কামটো তেতিয়াহে আৰম্ভ হৈছিল যেতিয়া আপোনালোকে মোদীক আশীৰ্বাদ দিছিল। খোৱা পানীৰ সংকট সমাধানৰ বাবেও দ্ৰুতগতিত কাম কৰি থকা হৈছে। ‘জল জীৱন মিছন’ৰ অধীনত, অৰ্থাৎ ‘হৰ ঘৰ জল প্ৰকল্প’ৰ অধীনত বুন্দেলখণ্ডৰ প্ৰতিখন গাঁৱলৈ নলৰ জৰিয়তে পানী যোগান ধৰা হৈছে। আমি গাঁওবোৰত আমাৰ কৃষক ভাই-ভনীসকলৰ সমস্যা দূৰ কৰিবলৈ আৰু তেওঁলোকৰ উপাৰ্জন বৃদ্ধি কৰিবলৈ দিনে-ৰাতিয়ে কাম কৰি আছোঁ।
ভাই-ভনীসকল,
বুন্দেলখণ্ডৰ উন্নতিৰ বাবে, আমাৰ মাতৃ আৰু ভগ্নীসকল সমানে শক্তিশালী হোৱাটো অত্যাৱশ্যকীয়, যাৰ বাবে আমি ‘লাখপতি দিদি’ আৰু ‘ড্ৰোন দিদি’ৰ দৰে আঁচনি আৰম্ভ কৰিছোঁ। আমি ৩ কোটি ভগ্নীক ‘লাখপতি দিদি’ কৰি তোলাৰ লক্ষ্য গ্ৰহণ কৰিছোঁ। ভগ্নীসকলক ‘ড্ৰোন’ উৰোৱাৰ প্ৰশিক্ষণো দিয়া হৈছে। জলসিঞ্চনৰ পানী বুন্দেলখণ্ডত উপস্থিত হ'ব, ভগ্নীসকলে ড্ৰোনেৰে শস্য সিঁচিব আৰু কৃষিত সহায় কৰিব, তাৰ পিছত আমাৰ বুন্দেলখণ্ড সমৃদ্ধিৰ পথত দ্ৰুতগতিত আগবাঢ়িব।
ভাই-ভনীসকল,
‘ড্ৰোন প্ৰযুক্তি’ ব্যৱহাৰ কৰি গাঁৱত আন এক গুৰুত্বপূৰ্ণ কাম কৰি থকা হৈছে। ‘স্বামিত্ব আঁচনি’ৰ অধীনত ড্ৰোনেৰে ভূমি জৰীপ কৰি থকা হৈছে আৰু পকা নথিপত্ৰ প্ৰদান কৰা হৈছে। ইয়াত মধ্যপ্ৰদেশত এই ক্ষেত্ৰত যথেষ্ট ভাল কাম কৰা হৈছে। এতিয়া, মানুহে এই নথিপত্ৰবোৰেৰে বেংকৰ পৰা সহজে ঋণ লৈ আছে, আৰু এই ঋণ নিযুক্তি উদ্যোগত ব্যৱহাৰ কৰা হৈছে, যাৰ ফলত মানুহৰ উপাৰ্জন বৃদ্ধি হৈছে।
বন্ধুসকল,
বুন্দেলখণ্ডৰ এই মহান ভূমিক উন্নয়নৰ নতুন উচ্চতালৈ লৈ যোৱাৰ বাবে ‘দ্বৈত ইঞ্জিন’ চৰকাৰে দিনে-ৰাতিয়ে কাম কৰি আছে। মই ‘বাগেশ্বৰ ধাম’ত ইয়াৰ বাবে কামনা কৰিছোঁ। বুন্দেলখণ্ডই সমৃদ্ধি আৰু বিকাশৰ পথত এইদৰেই আগবাঢ়ি গৈ থাকক, আৰু আজি মই যিহেতু ‘হনুমান দাদা’ৰ চৰণলৈ আহিছোঁ সেয়ে মই ভাবিছো যে ধীৰেন্দ্ৰ শাস্ত্ৰীয়ে ইয়াত অকলেই ‘স্লিপ’টো উলিয়াব নে ময়ো উলিয়াব পাৰিম? মই চাব বিচাৰিছো ‘হনুমান দাদা’ৰ অনুগ্ৰহ আজি মোৰ ওপৰত আছে নে নাই। ‘হনুমান দাদাজী’য়ে মোক আশীৰ্বাদ দিছে আৰু মই আজি প্ৰথমখন ‘স্লিপ’ উলিয়ালো, তেওঁৰ মাকৰ ‘স্লিপ’খন উলিয়ালো, যাৰ বিষয়ে শাস্ত্ৰীজীয়ে ইতিমধ্যে আপোনালোকক অৱগত কৰিছে।
বাৰু বন্ধুসকল,
এয়া এক বহুত ডাঙৰ সুযোগ, এটা অতিকে ডাঙৰ কাম। যদি সংকল্প মহান হয়, যদি সাধুসকলৰ আশীৰ্বাদ থাকে, আৰু যদি প্ৰভুৰ অনুগ্ৰহ থাকে, তেন্তে সকলোবোৰ সময়সীমাৰ ভিতৰতে সম্পূৰ্ণ হয়। আপোনালোকে বিচাৰিছিল যে মই ইয়াৰ উদ্বোধনৰ বাবে আহিব লাগে, আৰু আনসকলে বিচাৰিছিল যে মই তেওঁলোকৰ বিবাহযাত্ৰী হৈহে আহিব লাগে। মই আজি ৰাজহুৱাভাৱে প্ৰতিশ্ৰুতি দিছো যে মই দুয়োটা কামকে কৰিম। আপোনালোক সকলোকে আকৌ এবাৰ মোৰ শুভেচ্ছা জনাইছোঁ। আপোনালোকক বহুত বহুত ধন্যবাদ, হৰ-হৰ মহাদেৱ।
