প্ৰধানমন্ত্ৰী শ্ৰী নৰেন্দ্ৰ মোদীয়ে আজি নতুন দিল্লীৰ লোক কল্যাণ মাৰ্গত ভাৰতৰ স্বাধীনতা সংগ্ৰামৰ শ্বহীদসকলক লৈ প্ৰস্তুত কৰা শব্দকোষ মুকলি কৰে৷
অনুষ্ঠানত প্ৰধানমন্ত্ৰীয়ে কয় যে পাঁচটা সংস্কৰণৰ এই শব্দকোষত ১৮৫৭ৰ ভাৰতৰ প্ৰথম স্বাধীনতা যুঁজৰ পৰা আৰম্ভ কৰি ১৯৪৭ত দেশে স্বাধীনতা লাভ কৰাৰ সময়ছোৱালৈ প্ৰাণ আহুতি দিয়া শ্বহীদ সকলৰ বীৰগাঁথা সন্নিবিষ্ট হৈছে৷
তেওঁ কয় যে জালিয়ানৱালা বাগ হত্যাকাণ্ড, অসহযোগ আন্দোলন, ভাৰত ত্যাগ আন্দোলনৰ শ্বহীদৰ লগতে স্বাধীনতাৰ বাবে যুঁজ দিয়া আজাদ হিন্দ ফৌজৰ শ্বহীদ জোৱানসকলকো ইয়াত অন্তৰ্ভুক্ত কৰা হৈছে৷ এই বৃহৎ পৰিমাণৰ শ্বহীদৰ নাম সংগ্ৰহৰ এয়া হৈছে প্ৰথমটো প্ৰয়াস৷ প্ৰধানমন্ত্ৰীয়ে এই প্ৰক্ৰিয়াৰ সৈতে জড়িত সকলোকে ধন্যবাদ জ্ঞাপন কৰে৷
প্ৰধানমন্ত্ৰীয়ে উল্লেখ কৰে যে যিখন দেশে বীৰ শ্বহীদৰ প্ৰতি সন্মান আৰু শ্ৰদ্ধা প্ৰদৰ্শন নকৰে তেনে দেশৰ ভৱিষ্যত সুৰক্ষিত হ’ব নোৱাৰে৷ এই প্ৰসংগৰে তেওঁ বুজাব বিচাৰে যে শ্বহীদৰ শব্দকোষ প্ৰকাশৰ জৰিয়তে চৰকাৰে কেৱল অতীতক সোৱৰণ কৰাই নহয়, ভৱিষ্যতক সুৰক্ষিত কৰাৰ এক পথৰো সন্ধান কৰিছে৷
প্ৰধানমন্ত্ৰীয়ে কয় যে কেন্দ্ৰীয় চৰকাৰৰ প্ৰচেষ্টা হ’ল দেশৰ স্বাধীনতা সংগ্ৰামত প্ৰাণ আহুতি দিয়া শ্বহীদসকলৰ সাহস আৰু বীৰত্বৰ প্ৰতি সন্মান প্ৰদৰ্শন কৰা আৰু তেওঁলোকক স্মৰণ কৰা৷ ইয়ে ভৱিষ্যত প্ৰজন্মৰ মাজত এক ইতিবাচক প্ৰভাৱ পেলাব আৰু ‘দেশ প্ৰথম’ বুলি ভাবিবলৈ তেওঁলোকক অনুপ্ৰাণিত কৰিব৷
প্ৰধানমন্ত্ৰীয়ে কয় যে স্বাধীনতাৰ ইমান বছৰ পাছতো আমাৰ দেশত কোনো যুদ্ধ স্মাৰক নাছিল৷ কিন্তু শেহতীয়াকৈ তেওঁ দেশবাসীৰ বাবে ৰাষ্ট্ৰীয় সমৰ স্মাৰক মুকলি কৰিছ৷ একেদৰে, ৰাষ্ট্ৰীয় আৰক্ষী স্মাৰকো নিৰ্মাণ কৰা হৈছে৷ তেওঁ লগতে চৰ্দাৰ বল্লভভাই পেটেলৰ সোঁৱৰণত নিৰ্মাণ কৰা বিশ্বৰ সৰ্বোচ্চ প্ৰতিমূৰ্তি ষ্টেচু অফ ইউনিটীৰ কথাও উল্লেখ কৰে৷ নেতাজী সুভাষ চন্দ্ৰ বসু আৰু আজাদ হিন্দ ফৌজৰ স্মৃতিত লালকিল্লাত ক্ৰান্তি মন্দিৰ স্থাপন কৰা হৈছে বুলিও প্ৰধানমন্ত্ৰীয়ে কয়৷
সাংস্কৃতিক বিভাগৰ কেন্দ্ৰীয় ৰাজ্যিক স্বতন্ত্ৰ মন্ত্ৰী ড০ মহেশ শৰ্মা অনুষ্ঠানত উপস্থিত আছিল৷
পটভূমিঃ
১৮৫৭ চনৰ বিদ্ৰোহৰ ১৫০সংখ্যক বাৰ্ষিকী উপলক্ষে কেন্দ্ৰীয় সাংস্কৃতিক মন্ত্ৰালয়ে ভাৰতৰ স্বাধীনতা সংগ্ৰামৰ শ্বহীদসকলক লৈ এখন সংকলন প্ৰকাশৰ প্ৰকল্প হাতত লয়৷
এই সংকলনত ভাৰতৰ স্বাধীনতা আন্দোলনত মৃত্যুবৰণ কৰি শ্বহীদ হোৱা অথবা আন্দোলনত অংশ লোৱাৰ সময়ত ব্ৰিটিছ সেনাই মৃত্যুদণ্ডৰ শাস্তি দিয়া শ্বহীদসকলৰ বীৰগাথা সন্নিবিষ্ট কৰা হৈছে৷
ব্ৰিটিছৰ বিৰুদ্ধে যুঁজ দি মৃত্যুবৰণ কৰা ভাৰতীয় সেনাৰ প্ৰাক্তন জোৱান অথবা প্ৰাক্তন সামৰিক জোৱানসকলকো ইয়াত অন্তৰ্ভুক্ত কৰা হৈছে৷
পাঁচটা সংস্কৰণ(মণ্ডল ভিত্তিত)ত সংকলনটো প্ৰকাশ পাইছে৷ সেয়া হ’ল—
• ‘ভাৰতৰ স্বাধীনতা সংগ্ৰামৰ শ্বহীদৰ শব্দকোষ(১৮৫৭-১৯৪৭)’, প্ৰথম সংস্কৰণ, প্ৰথম আৰু দ্বিতীয় অধ্যায়৷
এই সংস্কৰণত দিল্লী, হাৰিয়ানা, পঞ্জাব আৰু হিমাচল প্ৰদেশৰ ৪৪০০ গৰাকী শ্বহীদৰ নাম সন্নিবিষ্ট হৈছে৷
• ‘ভাৰতৰ স্বাধীনতা সংগ্ৰামৰ শ্বহীদৰ শব্দকোষ(১৮৫৭-১৯৪৭)’, দ্বিতীয় সংস্কৰণ, প্ৰথম আৰু দ্বিতীয় অধ্যায়৷ এই সংস্কৰণত উত্তৰ প্ৰদেশ, উত্তৰাখণ্ড, মধ্য প্ৰদেশ, চত্তীশগড়, ৰাজস্থান আৰু জম্মু আৰু কাশ্মীৰৰ ৩৫০০ গৰাকী শ্বহীদৰ নাম সন্নিবিষ্ট হৈছে৷
• ‘ভাৰতৰ স্বাধীনতা সংগ্ৰামৰ শ্বহীদৰ শব্দকোষ(১৮৫৭-১৯৪৭)’,তৃতীয় সংস্কৰণ৷ এই সংস্কৰণে মহাৰাষ্ট্ৰ, গুজৰাট আৰু ছিন্দৰ প্ৰায় ১৪০০ শ্বহীদক সাঙুৰি লৈছে৷
• ‘ভাৰতৰ স্বাধীনতা সংগ্ৰামৰ শ্বহীদৰ শব্দকোষ(১৮৫৭-১৯৪৭)’, চতুৰ্থ সংস্কৰণ৷ এই সংস্কৰণত প্ৰায় ৩৩০০ গৰাকী শ্বহীদে স্থান পাইছে৷ তেওঁলোক হ’ল পশ্চিম বংগ, বিহাৰ, ঝাৰখণ্ড, উৰিষ্যা, অসম, অৰুণাচল প্ৰদেশ, মণিপুৰ, মেঘালয়, নাগালেণ্ড আৰু ত্ৰিপুৰাৰ৷
• ‘ভাৰতৰ স্বাধীনতা সংগ্ৰামৰ শ্বহীদৰ শব্দকোষ(১৮৫৭-১৯৪৭)’, পঞ্চম সংস্কৰণ৷ এই সংস্কৰণত স্থান লাভ কৰিছে অন্ধ্ৰ প্ৰদেশ, তেলেংগানা, কৰ্ণাটক, তামিলনাডু আৰু কেৰালাৰ প্ৰায় ১৪৫০ গৰাকী শ্বহীদে৷
