সক্ৰিয় প্ৰশাসন আৰু সময়ভিত্তিক ৰূপায়নৰ বাবে আইটিচি-আধাৰিত, বহুমুখী মঞ্চ প্ৰগতিৰ মাধ্যমেৰে প্ৰধানমন্ত্ৰী শ্ৰী নৰেন্দ্ৰ মোদীয়ে আজি ২৫সংখ্যক বৈঠকত মিলিত হয়৷
২৫ সংখ্যক প্ৰগতি বৈঠকত মুঠ ১০ লাখ কোটিৰ বিনিয়োগৰ ২২৭ টা প্ৰকল্পৰ সামগ্ৰিক পৰ্যালোচনা কৰা হয়৷ বিভিন্ন খণ্ডৰ ৰাজহুৱা অভিযোগ নিষ্পত্তিৰ দিশতো বৈঠকত পৰ্যালোচনা হয়৷
প্ৰধানমন্ত্ৰীয়ে প্ৰগতিৰ ২৫সংখ্যক বৈঠক সম্পূৰ্ণ হোৱাৰ বাবে সকলো ষ্টেকহ’ল্ডাৰক অভিনন্দন জ্ঞাপন কৰে৷ তেওঁ কয় যে প্ৰগতি ব্যৱস্থাৰ ফলস্বৰূপে কেন্দ্ৰ আৰু ৰাজ্যৰ সমন্বয় বৃদ্ধি হৈছে৷ আমাৰ যুক্তৰাষ্ট্ৰীয় ব্যৱস্থাৰ বাবে প্ৰগতি এক মহত্ত্বপূৰ্ণ ইতিবাচক পদক্ষেপ৷ বন্ধ হৈ থকা প্ৰকল্পসমূহৰ লগতে সামাজিক খণ্ডৰ বিভিন্ন আঁচনিৰ পৰ্যালোচনা আৰু অগ্ৰগতিৰ ক্ষেত্ৰতো প্ৰগতি সহায়ক হৈ পৰিছে৷
আজি ২৫ সংখ্যক বৈঠকত প্ৰধানমন্ত্ৰীয়ে প্ৰাক্তন সৈনিকৰ কল্যাণৰ সৈতে জড়িত অভিযোগ নিষ্পত্তিৰো বুজ লয়৷ অভিযোগ নিষ্পত্তিৰ গতি ক্ষিপ্ৰ হোৱাৰ ওপৰত তেওঁ জোৰ দিয়ে, যাতে কম সময়ৰ ভিতৰত প্ৰাক্তন সৈনিকসকলৰ সমস্যা ইতিবাচকভাৱে সমাধান হয়৷
প্ৰধানমন্ত্ৰীয়ে ৰে’লৱে, পথ পৰিবহন, পেট্ৰ’লিয়াম, শক্তি, কয়লা, চহৰ উন্নয়ন, স্বাস্থ্য আৰু পৰিয়াল কল্যাণ খণ্ডৰ ১০ টা আন্তঃগাথনিমূলক প্ৰকল্পৰ অগ্ৰগতিৰ বুজ লয়৷ এই প্ৰকল্পসমূহ হিমাচল প্ৰদেশ, উত্তৰ প্ৰদেশ, উৰিষ্যা, অন্ধ্ৰ প্ৰদেশ, গুজৰাট, মহাৰাষ্ট্ৰ, অসম, ছিকিম, পশ্চিম বংগ, বিহাৰ, তামিলনাডু আৰু ঝাৰখণ্ড আদি ৰাজ্যত চলি আছে৷
প্ৰধানমন্ত্ৰী শ্ৰী মোদীয়ে প্ৰধানমন্ত্ৰী কৃষি সঞ্চয় যোজনাৰ অগ্ৰগতিৰ পৰ্যালোচনা কৰে৷ তেওঁ লগতে অনুসূচিত জনজাতিৰ ছাত্ৰ-ছাত্ৰীৰ উচ্চ শিক্ষাৰ বাবে ৰাষ্ট্ৰীয় ফেল’শ্বিপ আৰু স্ক’লাৰশ্বিপ আঁচনিৰো বুজ লয়৷
