প্ৰধানমন্ত্ৰী শ্ৰী নৰেন্দ্ৰ মোদীয়ে আজি ভিডিঅ’ কনফাৰেন্স যোগে সৌৰাষ্ট্ৰ পেটেল সাংস্কৃতিক সমাজৰ অষ্টম আন্তঃৰাষ্ট্ৰীয় সন্মিলনত ভাষণ প্ৰদান কৰে৷ এই বৰ্ষত সৌৰাষ্ট্ৰ পেটেল সাংস্কৃতিক সমাজৰ আন্তঃৰাষ্ট্ৰীয় সন্মিলন আমেৰিকা যুক্তৰাষ্ট্ৰৰ কেলিফৰ্ণিয়াত অনুষ্ঠিত হৈছে৷
প্ৰৱাসী ভাৰতীয়সকলৰ বিশেষকৈ সৌৰাষ্ট্ৰ পেটেল সমাজৰ প্ৰয়াসক প্ৰধানমন্ত্ৰীয়ে ভূয়সী প্ৰশংসা কৰি কয় যে প্ৰৱাসী ভাৰতীয়সকলে ভাৰতক গৌৰম্বান্বিত কৰিছে৷ তেওঁ কয় যে তেওঁলোকৰ প্ৰয়াসে ভাৰতীয় সকলৰ সন্মান সকলো স্থানতে বৃদ্ধি কৰিছে৷
প্ৰধানমন্ত্ৰীয়ে কয় যে চৰকাৰৰ বিভিন্ন আঁচনি যেনে স্বচ্ছ ভাৰতে দেশৰ পৰ্যটন উদ্যোগ বিকশিত কৰিছে৷ তাৰোপৰি তেওঁ প্ৰৱাসী ভাৰতীয় সমাজক অতি কমেও পাঁচটা বিদেশী পৰিয়ালত প্ৰতি বছৰে ভাৰত দৰ্শনৰ বাবে উৎসাহিত কৰিবলৈ অনুৰোধ জনায়৷ ইয়াৰ জৰিয়তে এক ভাৰত শ্ৰেষ্ঠ ভাৰত অভিযান সাফল্যমণ্ডিত কৰাত সহায় হ’ব আৰু ভাৰতৰ পৰ্যটন উদ্যোগত বৃহৎ বৰঙণি হিচাপে বিবেচিত হ’ব৷ তাৰোপৰি তেওঁ কিদৰে প্ৰৱাসী ভাৰতীয়সকলে মহাত্মা গান্ধীৰ সপোন, স্বচ্ছ ভাৰত সফল কৰি তুলিব পাৰিব সেই বিষয়ে কয়৷
প্ৰধানমন্ত্ৰীয়ে কয় যে ২ অক্টোবৰৰ পৰা ভাৰতে মহাত্মা গান্ধীৰ ১৫০তম জন্ম জয়ন্তী পালন কৰিব৷ লগতে তেওঁ কয় যে ভাৰতৰ লৌহ মানৱ চৰ্দাৰ বল্লভভাই পেটেলৰ সোঁৱৰণত নৰ্মদা নদীৰ তীৰত এটা ঐক্যৰ অতিকায় মূৰ্তি স্থাপন হ’ব আৰু এয়া ২০১৮ চনৰ ৩১ অক্টোবৰত সম্পূৰ্ণ হ’ব৷ এই মূৰ্তি সম্পূৰ্ণ হোৱাৰ পিছত ই বিশ্বৰ সবাতোকৈ ওখ ঐক্যৰ মূৰ্তি হিচাপে প্ৰসিদ্ধ হ’ব৷
জনসমুদ্ৰক সম্বোন্ধি নৰেন্দ্ৰ মোদীয়ে কয় যে ভাৰতে এতিয়া বিশ্বত ভোটা তৰাৰ দৰে উজ্বলি উঠিছে৷ তেওঁ কয় যে আজি ভাৰত ক্ষীপ্ৰ অৰ্থনৈতিক বিকাশ আৰু সততা, স্বচ্ছ চৰকাৰৰ সৈতে জড়িত হৈছে৷ জিএছটিৰ দৰে পদক্ষেপ আৰু দুৰ্নীতিৰ বিৰুদ্ধে কঠোৰ পদক্ষেপে জনসাধাৰণক সততাৰে ব্যৱসায় কৰাত উদগনি জগাইছে৷ এই পদক্ষেপসমূহৰ জৰিয়তে বিগত চাৰিটা বৰ্ষত ভাৰত ইজ অৱ ডুইং বিজনেছত ৪২ তম স্থানলৈ আহিছে বুলি তেওঁ দোহাৰে৷
প্ৰধানমন্ত্ৰী প্ৰৱাসী ভাৰতীয় সমাজক নতুন ভাৰত গঢ়াৰ সপোন বাস্তৱায়িত কৰাৰ বাবে কাম কৰিবলৈ আহ্বান জনায়৷
